!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Скопјанец го убил татко си со нож


Скопје, 7 септември, 2017 - 12:45 (META) 

Четириесет и едногодишниот скопјанец И.Т. синоќа со нож го убил својот татко во нивниот дом во населбата Црниче.

Полицијата била повикана од нивна сосетка, на улицата Чедомир Кантарџиев во Скопје, која пријавила дека соседите се тепаат. Кога пристигнале полицајците, на прагот на дневната соба го пронашле избоден Љ.Т. (68), а лекарот од итна медицинска помош констатирал смрт.

Како што соопшти СВР Скопје, сопругата на Љ.Т. изјавила дека додека со сопругот седеле во дневната соба, дошол нивниот син, ја откорнал влезната врата и влегол, по што ја избркал од собата. Потоа почнал да го влече татко си и во еден момент го избодел со нож. Осомничениот потоа заминал и по извесно време се пријавил во Ургентниот центар „Мајка Тереза“ каде побарал помош, бидејќи имал расеченица на десната рака.

Осомничениот И.Т. е приведен и задржан во полициската станица во Кисела Вода, а по наредба на јавен обвинител, телото на убиениот е однесено на обдукција.


Иван Џепароски е добитник на наградата „Браќа Миладиновци“


Струга, 26 август, 2016 - 20:21 (META) 

За книгата „Светлината на Света Гора“, Иван Џепароски е добитник на наградата „Браќа Миладиновци“ за најдобра поетска книга на македонски јазик напишана меѓу две фестивалски изданија на „Струшките вечери на поезијата“ (СВП).

– Задоволството е поголемо зашто во жири-комисијата се тројца поранешни добитници на наградата „Браќа Миладиновци“, а двајца се и добитници на наградата „Димитар Митрев“ за книжевна критика и за есеистика, што уште повеќе говори дека човек не би посакал подобра и покомпетента комисија за да донесе едно такво решение. Книгата е инспирирана од мојот престој на Света Гора и од посетата на сите 20 манастири таму – изјави Џепароски.

Целиот паричен износ од наградата, Џепароски ќе го донира за настраданите од поплавите во Скопје и во Фондот за изградба на конаците во манастирот „Св. Јован Бигорски“.

Наградата на Џепароски му ја додели жири-комисијата составена од Вера Чејковска, Весна Мојсова-Чепишевска, Санде Стојчевски и Братислав Ташковски.


Една жена почина од напад во воз во Швајцарија


Цирих, 14 август, 2016 - 18:23 (META) 

Почина една жена повредена за време на синоќешниот напад со нож во воз во Швајцарија, соопшти полицијата. Жената која имала 34 години им подлегна на повредите здобиени за време на нападот, а уште три жртви остануваат во критична состојба. Во нападот беа повредени седум луѓе. Напаѓачот првин нападнал со нож, а потоа подметнал пожар во возот. Напаѓачот, кој бил швајцарски државјанин, исто така починал од изгорениците од пожарот.

Полицијата соопшти дека не постојат индикации дека 27-годишниот осомничен за нападот имал какви било врски со терористички организации. Осомничениот за нападот исто така е хоспитализиран со тешки изгореници.

Нападот се случил во близина на границата со Лихтенштајн.


Струшки книжевни средби: „Книжевна далга“ за Олга Лалиќ-Кровицка 


Струга, 10 јули, 2016 - 12:41 (META) 

Со доделувањето на наградите, синоќа во Струга заврши шестата по ред манифестација „Струшки книжевни средби – 2016“.

Лауреат на големата награда „Книжевна далга“ за 2016 година е Олга Лалиќ-Кровицка од Полска, додека меѓународната награда „Струшко слово“ им припадна на Виолета Димова (Македонија) и на Ѓорѓе Добре (Романија).

Наградите ги доделува редакцијата на ревијата за книжевност „Бранувања“.

Покрај во Струга, одделни настани имаше и во Вевчани и во Охрид. На Вевчанските извори се одржа Меѓународно поетско матине, а свои песни читаа поети од Македонија, Албанија, Бугарија, БИХ, Полска, Романија, Словенија, Србија и од Хрватска.

Поставена беше и изложбата на Христо Петрески – „Луѓе и птици“.

Беседа на тема 155 години од излегувањето на Зборникот на македонски народни песни (1861-2016) во чест на браќата Миладиновци, одржа Хрвојка Михановиќ-Салопек од Хрватска.

Во Спомен-домот на браќата Миладиновци во Струга се одржа и настанот „Книжевна пловидба“.


Манифестација посветена на браќата Миладиновци ќе се одржи во Осиек


Охрид, 15 јуни, 2016 - 11:41 (META) 

По повод 155 години од објавувањето на „Зборникот“ на браќата Миладиновци, во Осиек, Хрватска, денеска почнува  манифестацијата „19. Денови на браќата Миладиновци“, во организација на Заедницата на Македонците во Република Хрватска.

Денеска во Осиек ќе биде промовирана книгата „Македонски бои во славонска рамница, траги на сеќавањата“ од Јагода Тренеска-Цветичанин.

Активностите продолжуваат и в сабота, 18 јуни, кога меѓу другото, ќе се организира посета и разгледување на музејот на Јосип Јурај Штросмаер, кој го помогнал издавањето на Зборникот на браќата Миладиновци.

На манифестацијата  „Фолклорни игри“ ќе настапи  КУД „Браќа Миладиновци“ од Осиек.


Заедницата на Македонците во Хрватска ги организира „19. Денови на Браќата Миладиновци“


Загреб, 8 април, 2016 - 10:16 (META) 

Заедницата на Македонците во Република Хрватска и Македонското културно друштво „Браќа Миладиновци“ од Осиек, денеска ја организираат културната манифестација „19. Денови на Браќата Миладиновци“.

Манифестацијата ќе се одржи во два дела.

Во првиот – денеска, во ѓаковачката катедрала на Штросмаеров трг, во Ѓаково, организирано е разгледување на катедралата, прием кај генералниот викар м-р Иван Ќуриќ и полагање венци на гробот на бискупот Јосип Јурај Штросмаер, кој помогнал за печатењето на Зборникот на Браќата Миладиновци.

Во вториот дел ќе се одржи литургија за бискупот Јосип Јурај Штросмаер.


Најавен бојкот на наставата во училиштето „Браќа Миладиновци“ во Струга


Струга, 15 септември, 2015 - 15:24 (META) 

Учениците од најголемото основно училиште во Струга, „Браќа Миладиновци“, од четврток ќе ја бојкотираат наставата затоа што немаат струја од почетокот на новата учебна година.

На денешната седница на Советот на родители е договорено в четврток и в петок да се бојкотира само првиот час, додека од понеделник да има целосен бојкот на наставата во ова училиште. Исто така, од денеска часовите се одвиваат и со скратено време.

Долгот за струја на струшките основни училишта е поголем од еден милион евра. Во моментот седум од 11 основни училишта немаат електрична енергија.

Во меѓувреме, струшкиот градоначалник, Зијадин Села, изјави дека Општина Струга е подготвена да го плати долгот за електрична енергија во струшките основни училишта ако ЕВН овозможи плаќање на рати.

Општината минатата година го презеде плаќањето на долгот за електрична енергија од околу 6.300.000 денари во струшките основни училишта заклучно со ноември. Тој долг, според Села, редовно се плаќа на рати.

– Во меѓувреме, поради блокираните сметки на училиштата, се наталожи нов долг за електрична енергија. Подготвени сме да го преземеме и овој долг за електрична енергија од два милиони денари, но и сите долгови што ќе се направат во меѓувреме во образованието за да не играме политика со децата. Ако ЕВН и кој било друг не сака да слушне за ова и ако сака да има бојкот во образованието во Струга, ќе има, и јас ќе го поддржам – вели Села.

На денешната прес-конференција, струшкиот градоначалник обвини дека исклучувањето на струјата во училишта во општината и неможноста да се плати долгот на рати е хајка на владејачката коалиција на ВМРО- ДПМНЕ и на ДУИ заедно со ЕВН против Општина Струга.


Отворена реновираната библиотека „Јане Сандански“


Скопје, 12 ноември, 2014 - 13:57 (META) 

Во општина Аеродром се отвори реновираната библиотека „Јане Сандански“ која е дел од Градската библиотека „Браќа Миладиновци“. Во реновираниот објект целосно е заменета електричната инсталација, набавени се нови маси и полици за книгите, направен е бесшумен под, поставени се и нови прозорци, со што објектот влегува во категоријата на енергетски ефикасни објекти.

На свеченото отварање на библиотеката беа присутни Градоначaлникот на Град Скопје, Коце Трајановски и Директорот на библиотеката „Браќа Миладиновци“, Бранко Цветковски. Градоначалникот Трајановски рече дека целта на овој објект е да се доближи пишаниот збор до поголем број граѓани, вљубеници во читањето.

– На посетителите на овој клон ќе им бидат достапни 20 000 наслови, а во новоотвореното електронско катче периодично ќе имаат можност и бесплатно да читаат поголем број е-часописи. За реализација на овој проект Градот од буџетот издвои 1.200.000 денари, а во иднина планираме да инвестираме и во отворање на нови клонови во другите скопски општини за да ја донесеме книгата што поблиску до сите наши граѓани – додаде градоначалникот Трајановски.