Ахмети: Овој Божиќ го одбележуваме во многу важна година за нашата земја


Скопје, 7 јануари, 2018 - 16:51 (META) 

Овој Божиќ го одбележуваме во многу важна година за нашата земја, еден момент кој ги отвара сите можности за евроатланската интеграција на земјата, вели во честитката до православните верници, лидерот на ДУИ, Али Ахмети.

„Заедно да ги надминеме сите вештачки препреки и во духот на довербата, разбирањето и соработката заедно да чекориме кон патот на напредокот и благосостојбата.Сите да ги соединиме напорите и посветеноста за исполнување на очекувањата, што ќе не направи едно пристојно општество, за да станеме дел од големото европско семејство“, се додава во честитката.


Џафери: Божиќ нека биде поттик за остварување на слободата и праведноста


Скопје, 7 јануари, 2018 - 11:09 (META) 

Претседателот на Собранието, Талат Џафери на сите верници од православна вероисповед, на членовите на Светиот архијерејски синод и до целото свештенство и монаштво, упати честитки по повод големиот христијански празник Божиќ.

„Најсветиот христијански празник, Христовото раѓање – Божиќ е празник кога се негуваат убави мисли и дела, посебно спрема најближните и кон оние на кои таквата љубов и поддршка им е најпотребна. Верувам дека Македонската православна црква како најголема христијанска заедница во Македонија и во иднина ќе ја исполнува својата улога во нашето општество, ширејќи ја пораката за љубов, простување, помирување и за сплотување. Затоа, нека овие денови бидат поттик за остварување на вредностите кон кои сите заеднички се стремиме, а тоа се слободата, еднаквоста и праведноста“, се вели во честитката на Џафери.


Православните христијани денеска го слават Божиќ


Скопје, 7 јануари, 2018 - 10:30 (META) 

Православните христијани во Македонија денеска го слават Рождеството Христово-Божиќ. Во сите храмови на Македонската православна црква изутринава се одржуваат божиќни литургии, a централното одбележување е во Соборниот храм „Св. Климент Охридски“ во Скопје, каде што архиепископот охридски и македонски г.г. Стефан ќе богослужи литургија на Св.Василиј Велики.

Во неговата порака која што ја упати по пово Божик, тој рече дека „новородениот Богомладенец постојано не повикува преку верата и добрите дела да се спасуваме од суетите и минливоста, не повикува да не ги заборавиме оние коишто страдаат и имаат потреба од помош, од подадена рака и утеха.“

„Претстојното лето Господово нека биде исполнето со надеж дека и во Македонија, и помеѓу иселените нашинци и насекаде по светот ќе завладеат мирот и добрата волја. Ние како народ – тоа најдобро ќе го постигнеме ако живееме според верата и преданието на светата Црква. Треба да опстоиме во борбата за нашето право, достоинство и наследство, мудро чувајќи ја и вреднувајќи ја жртвата на нашите доблесни предци“, се вели во пораката на г.г Стефан.


Заев: Христос да се роди внатре во нас и да не направи подобри луѓе


Скопје, 6 јануари, 2018 - 14:19 (META) 

Премиерот Зоран Заев упати писмо со честитки до архиепископот охридски и македонски г.г Стефан и до сите православни верници во Македонија, по повод прославата на Христовото раѓање – Божиќ.

Заев во честитката нагласува дека „славењето на овој ден не е само спомен на историскиот настан, туку е повик, Христос да се роди внатре во нас и од нас да направи подобри луѓе.“

„Празнувањето на Божиќ нека ни биде причина за неминлива радост, за да ја споделуваме со сите, во сите наши претстојни предизвици“, се вели меѓудругото во честитката.

Претседателот на ВМРО-ДПМНЕ, Христијан Мицкоски исто така упати честитка по повод Божиќ во која се апелира „да се стави крај на омразата, да излезе државата од стагнацијата и застојот“.

„Потребен е разум и меѓусебно почитување, да постои наптревар во правење на добри дела за граѓаните“, вели Мицкоски во честитката.


Иванов: Овој Божиќ е уште една можност за да си простиме и да се помириме


Скопје, 6 јануари, 2018 - 10:35 (META) 

Претседателот Ѓорге Иванов, упати честитка до архиепископот охридски и македонски, г.г. Стефан и до сите христијани, по повод големиот празник Христово раѓање – Божиќ.

„Божјото поистоветување со луѓето преку Исус Христос е, воедно, и најсилната недвосмислена потврда на вроденото човеково достоинство и неотуѓивата вредност на секој човек, независно од етничката, јазичната, верската, социјалната припадност, независно од полот и возраста. Поради тоа, ние сме обврзани љубовта кон Бог да ја искажеме преку почитувањето на нашите ближни, семејства, соседи, сонародници и сограѓани. Денес, повеќе од кога било порано во Македонија ни е потребно одново да ја откриеме таа почит. Овој Божиќ е уште една можност за да си простиме, да се помириме и да се сплотиме околу трајните вредности. Ова е можност да градиме човечно, солидарно и праведно мултиетничко општество во кое ќе владеат праведни закони“, се вели меѓудругото во честитката на Иванов.


Г.г Стефан: Овде и меѓу иселениците нека завладеат мирот и добрата волја


Скопје, 5 јануари, 2018 - 10:12 (META) 

Архиепископот охридски и македонски г. г. Стефан испрати божикна порака по повод претстојниот празник Рождество Христово – Божик.

„Претстојното лето Господово нека биде исполнето со надеж дека и во Македонија, и помеѓу иселените нашинци и насекаде по светот ќе завладеат мирот и добрата волја. Ние како народ – тоа најдобро ќе го постигнеме ако живееме според верата и преданието на светата Црква. Треба да опстоиме во борбата за нашето право, достоинство и наследство, мудро чувајќи ја и вреднувајќи ја жртвата на нашите доблесни предци“, се вели во пораката на г.г Стефан.

Во неа исто така се додава дека „новородениот Богомладенец постојано не повикува преку верата и добрите дела да се спасуваме од суетите и минливоста, не повикува да не ги заборавиме оние коишто страдаат и имаат потреба од помош, од подадена рака и утеха.“


Понеделник неработен за сите граѓани


Скопје, 2 јануари, 2018 - 14:19 (META) 

Министерството за труд и социјална политика соопшти дека понеделник, 8 јануари, ќе биде неработен за сите граѓани.

Според Законот за празниците, Божик, 7 јануари, е неработен ден за сите граѓани, но бидејќи годинава тој паѓа в недела, неработниот ден се поместува на понеделник.

Министерството за труд и социјална политика им го честита Божик на граѓаните од православна вероисповед.


Ципрас за божикните празници ќе му биде гостин на Вучиќ


Атина, 24 декември, 2017 - 16:55 (META) 

Грчкиот премиер Алексис Ципрас ќе престојува во Белград како гостин на Вучиќ за време на божикните празници, пренесуваат грчките медиуми.

Ципрас со семејството денеска отпатувал во Белград каде што ќе го помине Божиќ, на покана на српскиот претседател Александар Вучиќ, јави грчката агенција АНА-МПА.

Грција го слави Божиќ по Грегоријанскиот календар.

Ципрас престојуваше во Белград и на почетокот на овој месец, кога со Вучиќ и со колегите од Бугарија и Романија, Бојко Борисов и Михаи Тудосе разговараа за унапредување на економската соработка, стабилноста во регионот и евроинтеграциите на Србија.


Честитка за католичкиот Божик од претседателот на Собранието Талат Џафери


Скопје, 24 декември, 2017 - 11:12 (META) 

Претседателот на собранието, Талат Џафери им го честита големиот христијански празник, Христовото раѓање – Божиќ на припадниците на Католичката вероисповед.

„Овој голем христијански празник и претстојните празнични денови, нека донесат добра мисла, спокој и единство за сите! Радоста што овие денови ја носат, споделете ја со најблиските и нека овие денови бидат исполнети со многу среќа, здравје и благосостојба во вашите домови. Сите заедно, сплотени, да се стремиме кон подобра иднина за сите граѓани на Република Македонија“ напиша Џафери во честитката до припадниците на Католичката црква.


За Божик во Франција ќе има 100.000 полицајци


Париз, 23 декември, 2017 - 11:01 (META) 

Во Франција во недела и во понеделник ќе бидат распоредени речиси 100.000 припадници на полициските и другите безбедносни сили за да се осигури безбедноста за време на славењето на Божик.

Ова го соопшти францускиот министер за внатрешни работи Жерар Коломб.

-На целата територија на Франција на 24 и 25 декември ќе бидат распоредени 97.000 припадниците на силите за безбедност – рече Коломб. Ова претставува 6.000 луѓе повеќе во споредба со минатата година.

Министерот оцени дека христијанскиот празник може да биде мета на повеќе терористички закани и додаде дека апсолутен приоритет е безбедноста на Французите и сите туристи.

Во терористички напади во Франција од 2015 година загина 241 лице.