!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Во Турција спречен напад на бомбаш самоубиец


Анкара, 6 септември, 2017 - 10:34 (META) 

Турската полиција уби бомбаш самоубиец кој, според наводите на безбедносните извори, се подготвувал да изврши напад на полициска станица во градот Мерсин.

Полициската станица се наоѓа веднаш до регионалното седиште на турската национална разузнавачка агенција МИТ.

Државниот обвинител на Мерсин, Мустафа Ерчан, изјави дека властите работат на случајот и дека постои сомнеж оти напаѓачот е припадник на Исламска држава.

Инцидентот се случил во 9.30 часот по локално време, кога полицијата го воочила мажот, на возраст од околу 30 години, кој чудно се однесувал и не запрел иако му било наложено да го направи тоа.

Полицијата пукала и го убила на 30 метри од полициската станица.

Мажот кај себе имал експлозивна направа на чија деактивација во моментов се работи.


Бомбаш самоубиец совладан во Брисел


Брисел, 21 јуни, 2017 - 11:12 (META) 

Белгиската војска неутрализирала личност која носела појас со експлозив на главната железничка станица во Брисел. Медиумите пренесуваат дека полицијата стрелала кон мажот со експлозив и дека одекнала и помала експлозија на станицата, која е веднаш евакуирана.

– Се случи инцидент на централната станица. Личноста носела експлозив околу појасот. Војниците успеаја да ја неутрализираат личноста – изјави портпаролот на полицијата.

Полицијата го евакуирала и главниот плоштад во Брисел и ја блокирала областа кај централната станица.

Портпаролот на пожарната служба, Пјер Меј, потврди дека се случила некаква експлозија на централната станица.

Белгиското обвинителство соопшти дека експлозијата што на железничката станица во Брисел ја предизвикал маж се третира како терористички напад.

Полициската единица за борба против тероризмот ги истражува мотивите на бомбашот самоубиец, кој бил убиен од војниците што ја чуваат железничката станица во Брисел.

Очевидците наведуваат дека прво во зградата на станицата експлодирал куфер, по што војниците го совладале мажот кој носел експлозив. Тие тврдат дека осомничениот извикувал „Алах е голем“.

Во инцидентот не се повредени граѓани или припадници на војската.


Најмалку 15 загинати во самоубиствен бомбашки напад во Могадишу


Могадишу, 20 јуни, 2017 - 19:31 (META) 

Најмалку 15 лица загинале во самоубиствен бомбашки напад што денеска се случил во главниот град на Сомалија, Могадишу. Одговорноста за нападот ја презела исламистичката група Ал шабаб, јавуваат светските агенции.

Во експлозијата повредени биле уште 18 лица, меѓу кои и седум жени. Повеќето настрадани во нападот се цивили.

Сомалиското министерство за безбедност соопштило дека нападот се случил кога маж со комби, наполнето со експлозив, ја пробил вратата од регионална канцеларија во јужниот дел на Могадишу.

Групата Ал шабаб последните неколку месеци води засилена кампања на бомбашки напади врз цели во Могадишу и на други места во Сомалија.


Најмалку тројца загинати во напад на џамија во Кабул


Кабул, 15 јуни, 2017 - 21:08 (META) 

Најмалку три лица загинале, а десет се ранети во самоубиствен бомбашки напад што денеска се случил во шиитска џамија во главниот град на Авганистан, Кабул, јавуваат светските агенции кои се повикуваат на изјава на портпаролот на авганистанското министерство за внатрешни работи, Наџиб Даниш.

Напаѓачот се обидел да влезе во просторијата за молитва во џамијата, но бил спречен од полицијата. Притоа дошло до пукање, по што напаѓачот се сокрил во кујната каде ја детонирал бомбата.

Нападот се случил во моментот кога голем број верници се собирале за ноќната молитва по повод светиот муслимански месец Рамазан.

Џамијата Ал Захра, каде се случил нападот, му припаѓа на шиитското малцинство во Кабул и досега повеќепати беше цел на напади.


Објавена слика од Салман Абеди, бомбашот од Манчестер


Манчестер, 24 мај, 2017 - 12:39 (META) 

Салман Абеди е идентификуван како осомничен за самоубиствениот бомбашки напад на концерт во Манчестер во кој загинаа 22 лица, а 59 беа повредени.

Британските медиуми денеска објавија фотографија од 23-годишниот Абеди за кој британската премиерка Тереза Меј потврди дека е роден и пораснал во Британија.

Абеди е од Манчестер, а родителите му се со либиско потекло. Неговите родителите емигрирале од Либија во Лондон а потоа се преселиле во јужното предградие на Манчестер, каде што живееле најмалку 10 години.

Полицијата истражува дали Абеди патувал во Либија и дали имал контакти со Исламска држава.

Францускиот министер за внатрешни работи, Жерар Коломб изјави дека верува дека бомбашот самоубиец кој го извел нападот во Манчестер престојувал во Сирија и дека имал врска со Исламска држава.


Најмалку 38 лица загинаа, а 166 се ранети во двете експлозии во Истанбул


Истанбул, 11 декември, 2016 - 8:52 (META) 

Триесет и осум лица загинаа, а 166 се ранети во двете експлозии кои синоќа се случија во близина на стадионот на клубот „Бешикташ“ во центарот на Истанбул, соопшти турскиот министер за внатрешни работи Сулејман Сојлу.

Целта на нападот бил полициски автобус и најголем дел од загинатите биле полицајци.

– Прво експлодирал автомобилот-бомба, а една минута подоцна се разнел бомбашот-самоубиец – информираше министерот Сојлу.

Турскиот претседател Реџеп Таип Ердоган овој напад го оцени како терористички, чија што цел била да има што поголем број на жртви.

Експлозиите одекнале два часа по завршување на натпреварот помеѓу фудбалските клубови „Бешикташ“ и „Бурсаспор“.

Засега никој не ја презеде одговорноста за нападот.


Авганистан: Најмалку четворица загинати во бомбашки напад на германскиот конзулат


Кабул, 11 ноември, 2016 - 12:09 (META) 

Најмалку четворица цивили загинале, а 120 се ранети во самоубиствен бомбашки напад што ноќеска се случил пред германскиот конзулат во Авганистан, јавуваат светските агенции.

Нападот го извршил бомбаш самоубиец, кој со камион наполнет со експлозив удрил во зградата каде е сместен германскиот конзулат во градот Мазар е Шариф, во северниот дел на Авганистан. По експлозијата, друго лице отворило оган кон германските и авганистанските сили, распоредени околу конзулатот, кои веднаш возвратиле.

Одговорноста за нападот ја презеле талибанците, во знак на одмазда за минатонеделните воздушни напади во провинцијата Кундуз.

Од локалната полиција соопштиле дека најмалку едно лице е уапсено, поради сомневања за поврзаност со нападот.


Најмалку 17 загинати и 50 ранети при експлозија во Багдад


Багдад, 15 октомври, 2016 - 13:29 (META) 

Најмалку 17 лица загинаа, а повеќе од 50 се ранети кога бомбаш самоубиец активираше експлозив во толпа шиитски муслимани во Багдад.

Експлозијата се случила во шатор полн со луѓе, кои учествувале во шиитски ритуали ашура, кои го претставуваат оплакувањето на Хусеин, внук на пророкот Мухамед.

Светските медиуми наведуваат дека шаторот бил поставен на пазар преполн со луѓе во северен кварт на ирачката престолнина.


Во напад на бомбаш самоубиец во Турција, 18 лица загинаа, а 26 се ранети


Истанбул, 9 октомври, 2016 - 18:30 (META) 

Турскиот премиер Бинали Јилдирим изјави во Истанбул дека во експлозија на автомобил бомба на југоистокот на Турција загинале 18 лица, а 26 се ранети.

Тој го осуди нападот и нагласи дека Турција ја продолжува борбата против тероризмот.

– Нападот го изврши бомбаш самоубиец кој крена во воздух комби со пет тони експлозив во близина на воен пункт – изјавил Јилдирим.

Во нападот кој се случил во покраината Хакари биле ранети 10 војници и 16 цивили.


Најмалку 24 загинати во двоен бомбашки напад во Кабул


Кабул, 5 септември, 2016 - 17:01 (META) 

Најмалку 24 лица загинале, а 91 се повредени во двоен бомбашки напад, кој денеска се случил во Кабул, во близина на министерството за одбрана на Авагнистан, јавува Би-би-си“.

Првата бомба била активирана од далечина, а по кратко време бомбаш-самоубиец ја детонирал другата експлозивна направа, соопштиле од авганистанското министерство за одбрана за „Би-би-си“.

Одговорноста за нападот ја презеле талибанците, кои стојат и зад серијата бомбашки напади во Кабул, кои се случија неодамна.

Според информациите, бомбашот-самоубиец ја активирал бомбата во моментот кога безбедносните сили пристигнале на местото по првиот напад.

Покрај цивили, полицајци и војници, во нападот загинале и вработени во министерството, кои во тоа време заминувале од работа.

Претседателот на Авганистан, Ашраф Гани, го осудил нападот, нагласувајќи дека тој е изведен од „непријатели на Авганистан кои ја изгубиле способноста да се борат со безбедосните сили“ и додал дека „целта на терористите е да предизвикаат страв“.