Европската комисија во март ќе одлучува за земјите-членки со загаден воздух


Брисел, 13 февруари, 2018 - 10:43 (META) 

Европската комисија соопшти дека, од средината на март ќе се разгледува случајот со девет земји во кои состојбата со загадениот воздух се смета за најлоша во Европска Унија, и на кои, им се заканува судска постапка, пренесуваат светските медиуми.

Комисијата која е задолжена да обезбеди докази дека земјите-членки ги почитуваат заедничките правила за емисија на штетните гасови, им даде последна шанса на Германија, Шанија, Франција, Унгарија, Италија, Чешка, Романија, Велика Британија и Словачка на кои во петокот им истече рокот за доставување на дополнителни информации.

Тие земји, според извештаите на Европска комисија, редовно ја надминуваат границата на емисија на гасови, кои биле поставени со цел да се заштити здравјето на Европјаните од ПМ-10 честичките и азот диоксид.

И покрај постојаните предупредувања од Комисијата, наведените земји не ги ограничиле емисиите во согласност со прописите.

Комисијата одлучила против нив да покрене последна фаза постапка пред Европскиот суд на правдата, освен ако земјите не достават дополнителни ефикасни мерки.

Загадениот воздух се смета за причинител на повеќе од 400.000 предвремено починати во ЕУ. Во оваа статистика не влегуваат Европјаните кои добиле респираторни и кардиоваскуларни болести.


Таравари: Анализите за починатите на Инфективна се прават во Тирана и во Приштина


Скопје, 27 јули, 2017 - 10:17 (META) 

Министерот за здравство, Арбен Таравари, вели дека анализите за причините за смртта на двајцата гостиварци, кои починаа на Клиниката за инфективни болести, засега се прават во Тирана, Приштина и во Скопје.

– Ако резултатите од овие анализи се исти, нема да бараме дополнителни. Но, ако не се совпаѓаат, ќе побараме дополнителни анализи во лаборатории во други земји – вели министерот.

Таравари, кој е на службено патување во САД, се обрати преку видеопорака на „Фејсбук“, во која изрази сочувство за смртта на двајцата гостиварци.

– Вчера се состана Комисијата за заразни болести и се преземени сите мерки што треба да се преземаат во вакви ситуации. Другите седум луѓе што се хоспитализирани на Клиниката за инфективни болести се во стабилна состојба и надвор од секаква опасност – вели Таравари.

Тој информираше дека ситуацијата е под контрола, дека нема простор за паника и нагласи дека не е етички, ниту човечки смртните случаи да се користат политички.

Вчера од Клиниката за инфективни болести соопштија дека во изминатите неколку дена починале двајца мажи на возраст од 23 и 50 години, чии симптоми одговарале на повеќе болести, а официјалната причина за смртта ќе се знае по спроведените анализи.


Мехмедовиќ: Сите здравствени осигуреници ќе бидат ослободени од партиципација


Скопје, 23 мај, 2017 - 12:17 (META) 

„Сите здравствени осигуреници ќе бидат ослободени од болничката партиципација. Сметаме дека оваа мерка ќе го олесни финансиското оптоварување на сите, посебно на примателите на социјална помош,“ изјави членот на Комисијата за здравство на СДСМ, Злате Мехмедовиќ на средбата со претставници на организацијата „ЛИЛ“, за заштита на правата на жени и деца и со други претставници од граѓанскиот сектор, но и од институциите.

Тој посочи дека за респираторно заболување, хронична опструктивна белодробна болест партиципацијата е некаде околу 1.800 денари. За вградување бајпас е околу 6.000 денари, и дека во услови на стресно живеење и со големо загадување на воздухот, за граѓаните кои по неколку пати завршуваат во болница, оваа мерка ќе биде големо олеснување.

Според Мехмедовиќ, и сумата од 2.000 до 6.000 денари за социјална парична помош е многу мала.


Повеќе од 100 странци починале во мигрантските центри во Малезија


Куала Лумпур, 30 март, 2017 - 14:25 (META) 

Повеќе од 100 странци починале од разни болести и од непознати причини, во изминатите две години во мигрантските центри за притвор, покажуваат податоците на малезиската Национална комисија за заштита на човековите права.

Во текот на 2015 година се забележани 83 смртни случаи, додека во текот на 2016 година, завршно до 20 декември, починале 35 лица.

Повеќе од половина од починатите се од Мјанмар, муслимани кои од земјата бегаат од властите и од мнозинското будистичко население.


Не запираат бегалските бранови од Турција кон Грција


Атина, 29 август, 2016 - 12:52 (META) 

Продолжува да се зголемува загриженоста во Грција за континуираните нови бранови бегалци што пристигнуваат на грчките острови. Во државата има речиси 60.000 бегалци распоредени низ бегалски центри, приватни станови и во изнајмени хотелски соби.

На грчките острови од Турција секојдневно пристигнуваат нови бегалци, во просек од 50 до 100 бегалци дневно, иако не се ретки и деновите кога има едвај десетина бегалци. Од минатиот понеделник до денеска во државата пристигнале 585 нови бегалци, од кои најголем дел, 358 лица, на островот Лезбос. До утрово, според последните бројки на грчките власти, пристигнале 149 нови бегалци и тоа на Лезбос и на Калимнос. Во текот на август во земјата стигнале повеќе од 2.000 нови бегалци.

Белгаскиот центар на Лезбос е речиси преплавен од бегалци. Иако центарот има капацитет само за 3.500 луѓе, на Лезбос во моментов има повеќе од 5.000 бегалци.

Шефот на грчката дипломатија, Никос Коѕиас, по неговиот состанок со турскиот министер за надворешни работи, Мевлут Чавушоглу, на Крит, увери дека Турција планира да продолжи да го почитува договорот со ЕУ за контрола на бегалскиот бран кон Грција, тема која значително ги загрижува грчките власти, особено по обидот за пуч и заканите на турскиот претседател за прекинување на договорот со Брисел доколку турските граѓани не добијат безвизно олеснување за патување во шенген-зоната.

„Турција, како што разбирам јас, сака да го одржи договорот. Тоа што тие го истакнуваат е дека и Европа треба да го одржи својот дел од договорот. Ние се трудиме колку што е можно сите страни да ги исполнат договорените обврски“, истакна Коѕиас.

Според грчките медиуми, владата периодов се подготвува да го испразни импровизираниот камп од стариот аеродром Елинико, каде има околу 900 луѓе.

Условите во импровизираниот камп се катастрофални, без соодветни места за лична хигиена, поради што се стравува дека може да дојде до ширење на зараза и болести и меѓу бегалците  и жителите во јужните предградија на Атина, каде што се наоѓа бегалскиот камп.

На потенцијалните болести кои може да почнат да се шират во кампот, предупредуваат и претставниците на УНХЦР во Грција. Грчкото министерство за миграција, според информациите, се подготвува да ги пресели бегалците од Елинико во други организирани бегалски центри, во постојните каде има места или во нови кои треба да ги заменат досегашните, а за кои се најавува дека наместо во септември, може да се готови околу декември.

Следниот предизвик за грчките власти е интеграцијата на децата бегалци во грчкиот државен образовен систем.


СДСМ Тетово: Катастрофални услови во тетовската болница


Тетово, 16 февруари, 2016 - 15:27 (META) 

Од СДСМ Тетово обвинуваат дека во Клиничката болница во Тетово недостигаат санитарни јазли, а постојните се во катастрофална состојба и претставуваат опасност од ширење на заразни болести.

– Условите во оваа болница се катастрофални, хигиената е под секое човечко достоинство, санитарните јазли се запуштени и претставуваат извор на зарази, на седум амбуланти има само по еден тоалет за пациентите. Во зградата на одделот за интерна медицина топла вода нема уште од 2007 година. Постои голем недостиг од лекови и од ампуларна терапија, поради што пациентите се принудени сами да ги купуваат лековите – изјави доктор Анастасија Блажевска, претседателка на комисијата за здравство при општинската организација на СДСМ Тетово.

Од партијата обвинија дека во болницата нема апарат за мамографија, па пациентите биле принудени да се снимаат приватно или во Клиничкиот центар во Скопје.

– Апаратот за магнетна резонанца, по поплавите во Тетово во август минатата година, е надвор од функција. Детската стоматологија која работи во рамките на Здравствениот дом, речиси и да не фунционира поради немање основни услови за работа – додаде Блажевска.

Од СДСМ Тетово велат дека власта се грижи само за своите, како што ги нарекоа, тендер-политики, а здравството во Македонија доживува целосен колапс. Според партијата, биле потрошени 630 милиони евра за споменици, а граѓаните немаат основни здравствени услуги.

Од раководството на Клиничката болница Тетово ни изјавија дека во текот на денот преку писмено соопштение ќе одговарат на обвинувањата од СДСМ.


Чешка: Бегалците ќе мора да докажат дека немаат заразни болести


Прага, 11 ноември, 2015 - 16:27 (META) 

Бегалците што ќе ги прими Чешка ќе мора во иднина, при влезот во државата, да докажат дека не боледуваат од заразни болести, а кога ќе добијат азил, ќе им биде одземен ако извршат кривично дело со умисла, се наведува во новиот закон за азил што денеска го усвои сенатот на парламентот на Чешка.

– Владата настојува да ги заштити чешките интереси. Ставот на чешката влада е во согласност со здравиот разум – рече министерот за внатрешни работи, Милан Хованец, за предлог-измените на законот за азил, за кој денеска гласаа 48 од 81 сенатор, колку што има во чешкиот парламент.

Според изменетиот закон, бегалците мораат прво да докажат дека не се болни, за што ќе им биде доволен преглед во Чешка.

Чешкиот парламент така, на мала врата, го протурка законот за азил, во кој внесе ставови за кои во октомври беше критикуван лидерот на конзервативната десница на соседна Полска, Јарослав Качињски, кого тогаш го обвинија за ксенофобија.


Невремето во Тетовско може да донесе заразни болести


Институтот за јавно здравје по направениот увид во тетовскиот регион, констатирал дека невремето што го зафати Тетовско може да предизвика појава на заразни болести, пред сè, цревни заболувања. Според Институтот, постојат голем број фактори што можат да предизвикаат ширење зараза кај населението.

– Како прво, во тетовскиот регион има села кои се погодени од поплавите. Жителите од тие села се снабудваат со вода за пиење од разни непроверени извори, кои поради невремето се сигурно загадени. Голем дел од јавните површини се контаминирани се фекали од канализациските системи, кои настрадаа во поплавите – изјави Жарко Караџоски, епидемилог од Институтот за јавно здравје.

Доктор Караџоски апелира населението во овие денови да внимава каде се движи и како ја подготува храната.

– Мора да се избегнуваат површините каде има излеано фекалии, храната добро да се мие, но и да се внимава со каква вода се подготвува – вели Караџоски.

Од Центарот за јавно здравје Тетово, велат дека за разлика од селата и од приградските населби, водата од тетовскиот градски водовод е здрава за пиење и може да се употребува. Направените анализи од земените мостри на водата од седум мерни места, покажале дека водата е технички, хемиски и микробиолошки исправна за пиење.


Британски научници тврдат: Се зголемува продажбата на мајчино млеко преку интернет


Лондон, 18 јуни, 2015 - 11:31 (META) 

Истражување, спроведено од британски научници, покажало дека се зголемува продажбата на мајчино млеко од доилки, кое преку интернет го купуваат фетишисти, бодибилдери и болни од рак, јавува „Би-Би-Си“.

Тим научници од Универзитетот „Квин Мери“ во Лондон тврдат дека млекото што се продава е непастеризирано и може да содржи опасни бактерии.

Тие велат дека тврдењата дека мајчиното млеко го зајакнува имуниот систем се погрешни, а употребата на млекото може да биде дури и опасна.

Засега нема точни податоци колкава е продажбата на овој продукт, кој се нарекува и „течно злато“, бидејќи договорот за купопродажба секогаш го прават две страни.

Доктор Сара Стел од „Бартс и Лондонската школа за медицина и стоматологија“, авторка на извештајот во списанието на Кралското друштво за медицина, за „Би-Би-Си“ изјавила дека продажбата на мајчино млеко е во постојан пораст насекаде во светот.

Во извештајот било наведено дека 93 отсто од мајчиното млеко продадено преку интерент содржи бактерии бидејќи за пакување и за чување на млекото не се користи никаква опрема за стерилизирање.

Поради ова, научниците предупредиле на можни закани од хепатит Б и Ц, ХИВ и сифилис.

Трговијата со мајчино млеко почнала пред неколку години, како помош за мајките кои немаат доволно млеко за доење.

Сега се купува и поради наводната корист по здравјето, зголемувањто на мускулната маса и фетишизам.

Доктор Стел изјавила дека мајчиното млеко што се продава ги нема истите ригорозни безбедносни стандарди кои важат за другата храна што се продава.

Таа била особено загрижена поради тоа што млекото се продава на болни од рак бидејќи, како што изјавила, „кај овие пациенти имуниот систем не функционира како кај здрава возрасна личност“.


Новороденчињата во Италија ќе се проверуваат за наследни болести


Рим, 5 мај, 2015 - 13:10 (META) 

Лекарите во Италија, во рок од 48 часа по раѓањето ќе ги прегледуваат новороденчињата за да утврдат можна појава на наследни болести, јавуваат италијанските медиуми, повикувајќи се на допис кој Министерството за здравство во Рим им го испратил на регионалните здравствени институции.

Раните прегледи ќе им овозможат на здравствените работници да осмислат примена на соодветни третмани и пред детето да ги покаже симптомите или последиците од болеста.

За програмата за рани прегледи, годинава ќе бидат издвоени 10 милиони евра. Прегледите во раната фаза од оваа програма ќе бидат насочени кон барање можни наследни метаболични болести.
– Благодарение на оваа мерка, постојните програми за преглед на новороденчињата ќе бидат дополнително зајакнати и проширени, за да се ограничи развојот на наследните метаболични болести. На тој начин можеме да ја спречиме штетата што би настанала поради доцното дијагностицирање на тие болести – рече италијанската министерка за здравство Беатриче Лоренцин.