Тетовските средношколци протестираа против загадувањето на воздухот


Тетово, 29 ноември, 2018 - 12:43 (META) 

Група тетовски средношколци денеска го изразија незадоволството од состојбата со аерозагаувањето во градот со мирен протест на градскиот плоштад, од каде се упатија до Општина Тетово. Велат дека локалната власт не презема никакви мерки за подобрување на состојбата и ако продолжи така, ќе почнат со бојкот на наставата.

-Надлежните за седум дена да преземат конкретни мерки или ќе почнеме со бојкот на наставата. Градоначалничката не се појави, бидејќи не ја интересира нашето мислење. Протестот беше пријавен и најавен – истакна еден од средношколците.

Средношколците извикуваа „Чист возух“ и „Стоп на аерозагадувањето“, а беа присутни ученици од македонска настава од економското училиште и гимназијата „Кирил Пејчиновиќ“.

-Дел од директорите и професорите не им дозволија на учениците од другите средни училишта да учествуваат на протестот. Истото се случи и со соучениците од албанска настава. Имаме и информации дека и на дел од родителите им биле вршени притисоци, за нивните деца да не излезат на протест – изјавија среднишколците.

Во понеделникот протестираа и дел од основците во Тетово.


Хан: Не нови избори, туку градење двотретинско мнозинство во парламентот


Виена, 5 октомври, 2018 - 12:55 (META) 

Нови избори во Македонија ќе бидат одолговлекување на патот кон почетокот на преговорите со ЕУ, порачува комесарот за проширување на ЕУ, Јоханес Хан за австрискиот весник „Куриер“, велејќи дека го советувал македонскиот премери Зоран Заев да не свикува вонредни парламентарни избори, туку да изгради двотретинско мнозинство во Собранието кое би го поддржало Договорот со Грција.

-Новите избори ќе бидат одолговлекување на патот кон почетокот на преговорите со ЕУ. Опозицијата придонесе за нискиот одзив преку бојкот. Далеку од тоа дека може да се каже оти референдумот бил неуспешен. Невообичаено е еден референдум да добие поддршка од 94 проценти од гласачите, но да земат учество само 37 проценти – затоа што опозицијата очигледно беше успешна во бојкотот. Во парламентот ќе може да се обезбеди двотретинско мнозинство. На власта ѝ се потребни 8 или 9 гласа од опозицијата и тоа мора да биде остварливо. Сите велат дека сакаат во ЕУ и НАТО, и опозицијата исто така, и затоа мора да се плати цената со овој договор – вели Хан.

На новинарското прашање како да се дојде до потребното мнозинство во парламентот, Хан одговора „со комбинација на Балкан и рационалност“.


Мицкоски си поигрува со полускриен шовинизам и лажни бројки


Скопје, 2 октомври, 2018 - 16:49 (META) 

Христијан Мицкоски, лидерот на главната опозициска партија кој пасивно повикуваше на бојкот, а на денот на гласањето и активно го промовираше, во својот триумфализам по објавувањето на резултатите од референдумот настапи со извртени вистини и со доза на прикриен шовинизам кој покажува дека Македонците не се тие кои што гласале на овој референдум „за“, пишува „Вистиномер“.

Во обраќањето до јавноста во вечерните часови на 30.10.2018 година Мицкоски искажа најмалку три извртени вистини, од кои првата е дури и целосна невистина, од повеќе причини.

Целата статија прочитајте ја на „Вистиномер.мк“.


Заев: Предвремени избори доколку ВМРО-ДПМНЕ не ја почитува одлуката на граѓаните


Скопје, 30 септември, 2018 - 20:11 (META) 

Референдумот е највисоката демократска алатка. Гласот даден на референдум е конечен, а волјата на граѓаните мора да биде почитувана од сите. Во демократија одлуките се носат со гласање. Им честитам на сите граѓани, имавме успех за европска Македонија.

Ова го изјави премиерот Зоран Заев по затварањето на гласачките места на денешниот референдум на кои граѓаните требаше да се изјаснат, „Дали се за членство во ЕУ и НАТО со прифаќање на Договорот со Грција“.

– Успехот е заеднички на нашата земја и на сите граѓани без разлика на организираниот бојкот на ВМРО-ДПМНЕ со чест на исклучоците. Очекувам дека огромно мнозинство кои гласаа, го избрала вистинскиот пат. Сега гласот на граѓаните, волјата на оние кои гласаа на овој консултативен референдум треба да се претвори во политичка одлука во законодавниот дом. Ако навистина како што очекуваме сите, имаме големо, огромно, мнозинство „за“ од тие што гласале, со гласот на пратениците во Собранието треба конечно да ги забрзаме процесите за ЕУ, НАТО и за подобар живот на нашите деца. Очекувам пратениците на ВМРО-ДПМНЕ да ја почитуваат одлуката на граѓаните, во спротивно ќе нема друго, ќе мора да ја примениме другата демократска алатка, а тоа се предвремени парламентарни избори веднаш – рече Заев.

На крајот од краткиот говор, Заев потенцираше дека ќе продолжи да ја води државата напред и дека Македонија ќе биде членка на НАТО и ЕУ.


АВМУ: Прекршочни пријави за „1ТВ“ и ТВ „Сонце“ за недозволено референдумско рекламирање


Скопје, 24 септември, 2018 - 16:59 (META) 

Агенцијата за аудио и аудиовизуелни медиумски услуги (АВМУ) ќе покрене прекршочни постапки против „1ТВ“ и ТВ „Сонце“ за констатирани прекршувања на референдумското рекламирање во периодот од 15 до 20 септември годинава.

„АВМУ констатираше дека по јавното укажување од 14 септември, два радиодифузери од оние кои се предмет на надзор за начинот на покривање на референдумот не го усогласија емитувањето на платената јавна пропаганда со Упатството за медиумско претставување за време на референдум. „1ТВ“ не го почитуваше дозволеното време за емитување на рекламните пораки „ЗА“ референдумот, а ТВ „Сонце“ рекламните пораки за „бојкот“ на референдумот, спротивно на правилата, ги емитуваше во повеќе изданија на посебни информативни програми. Против двата радиодифузера, Агенцијата ќе покрене прекршочни постапки за прекршувањата констатирани во периодот од 15 до 20 септември 2018 година“, соопшти АВМУ.

Од АВМУ додаваат дека „проверката на почитувањето на правилата за емитување платена јавна пропаганда во овој период, покажала дека кај неколку радиодифузери, на 20 септември 2018 година, има отстапувања во поглед на лимитите за емитување на рекламните пораки „ЗА“ референдумот.“

„Доколку податоците од следните денови покажат дека не станува збор за ненамерни грешки, и за овие радиодифузери ќе следат мерки согласно регулативата“, додаваат од АВМУ.


Иванов: Нема да излезам да гласам на референдумот на 30 септември


Детроит, 24 септември, 2018 - 10:15 (META) 

Претседателот Ѓорге Иванов нема да гласа на референдумот за промена на името. Тој пред Обединетата Македонска Дијаспора во Детроит рече дека пред 27 години гласал за независна држава со достоинство и дека нема да отстапи од ветувањето кое го дал пред граѓаните.

– Што се однесува до мене, јас веќе гласав. Гласав пред 27 години, на 8 септември 1991 година. Јас бев еден од оние кои го дадоа својот глас за Република Македонија да се конституира како суверена и независна држава, со свое име и свое достоинство. Не отстапувам од таа моја одлука. Затоа, на 30 септември нема да излезам да гласам. Два пати ја добив довербата на граѓаните за да не дозволам промена на уставот со цел промена на уставното име, да не прифаќам идеи и предлози што би ги загрозиле македонскиот национален идентитет, посебноста на македонската нација, македонскиот јазик и македонскиот модел на соживот. Не отстапувам од тоа мое ветување. Затоа, на 30 септември нема да излезам да гласам – рече Иванов.

Претседателот во моментот е во посета на САД. На 27 септември ќе има обраќање на генералната дебата на 73. сесија на Генералното собрание на Обединетите Нации. Предвидено е да оствари средба со генералниот секретар на ОН, Антонио Гутереш, како и повеќе билатерални средби со шефови на држави и влади, учесници на Генералното собрание.


Жителите на Иловица и Штука демантираат дека поставиле ултиматум за референдумот


Скопје, 17 септември, 2018 - 10:11 (META) 

Жителите на селата Иловица и Штука го демантираат соопштението на „Здрава Котлина“ дека поставиле ултиматум до премиерот Зоран Заев, да се изјасни за рудникот Иловица или нема да излезат на референдум.

„Имено, единствено точна е информацијата дека се одржа средба на жителите на селата Иловица и Штука, но таа беше поврзана со претстојниот референдум на 30 септември 2018 година. Според нас, станува збор за многу важен датум за иднината на европска Македонија и е прашање кое заслужува сериозно внимание и од нас како жители на Македонија. Исто така е факт дека неколкумина наши сограѓани се обидоа да го свртат вниманието кон прашањето за странската инвестицијата – рудникот „Иловица – Штука“, кој според жители на селата Иловица и Штука, е одлична економска можност за развој на овој крај“, се вели во соопштението.

Тие во него велат дека „стојат позади интересот на компанијата „Еуромакс рисорсис“ да го отвори рудникот „Иловица – Штука“ и да овозможи вработувања на нашите граѓани, да обезбеди нови работни места и за други жители од Македонија кои ќе дојдат тука да живеат и да работат и да создаваат иднина за своите семејства и да вложат пари во отворање на рудникот во нашиот регион.“

„Го повикуваме градоначалникот Зоран Зимбаков да не потклекнува на провокациите на овие 4-5 индивидуалци. Исто така, поради ова сакаме и да му кажеме на нашиот премиер Зоран Заев дека и референдумот и рудникот обезбедуваат светла иднина за овој регион, но и за целата држава и дека, целосно, ја има нашата поддршка како граѓани на Македонија.Свесни сме дека секогаш ќе има мала група граѓани кои ќе се обидат да ја злоупотребат ситуацијата и да си дадат до значење пред македонската јавност и пред државните лидери. За нас, одлуката на премиерот Заев да дозволи отворање на рудникот само ќе значи дека тој се грижи за оваа околина и дека е свесен за манипулациите на одредени граѓани, кои за свои лични интереси, си играат со судбината на другите“, се вели во соопштението.


ВМРО-ДПМНЕ го пречекори рокот за да каже став за референдумот


Скопје, 11 септември, 2018 - 11:06 (META) 

Вчера помина рокот што на почетокот на минатиот месец Христијан Мицкоски го соопшти како датум кога ВМРО-ДПМНЕ ќе каже ставот за референдумот.

Се очекува денеска да заседава Извршниот комитет на најголемата опозициска партија, по што можеби ВМРО-ДПМНЕ ќе соопшти дали во целост го поддржува или го отфрла референдумот, или пак ќе остави нејзините членови и симпатизери да донесат самостојна одлука дали и како ќе гласаат на референдумот.

За разлика од централата, истакнати партиски припадници веќе се произнесоа со став за референдумското прашања. Пратеникот Антонио Милошоски излезе со став дека ќе го бојкотира референдумот, а „реформаторот“ Петар Богојески дека ќе гласа, зошто и гласот „против“ е глас за Македонија.


Еко-активисти предупредуваат: И власта и опозицијата одработуваат за концесионерите


Струмица, 4 септември, 2018 - 17:01 (META) 

Цијанидната коалиција СДСМ-ДПМНЕ, асистирана од ДУИ, уште еднаш потврди дека нивните кавги само ја замајуваат јавноста во вид на димни бомби, а всушност се работи за коњуктурно-лукративна групација со ротирачка методологија, огорчено реагираат еко-активистите од југоисточна Македонија по информациите дека Собранието не гласаше за измените и дополнувањата на Законот за минерални суровини поради немање кворум за работа иако беа предложени од пратеници од владеачката коалиција.

– Рударското лоби мора да биде елиминирано и оневозможено да влијае врз политиката, како што досега со децении влијаело Македонија да нема закон за максимум дозволена контаминација на почвата, имено за да можат рудниците да загадуваат без контрола, без казни и без забрани – вели струмичкиот екологист и новинар Крум Велков по повод неизгласувањето на измените на Законот за минерални суровини.

Со измените на законот се предлага во идните рудници да постои забрана за употреба на цијаниди и сулфурна киселина во технолошкиот процес, се бара депонирана финансиска гаранција од идните концесионери во случај на еколошки катастрофи, како и јасно наведување на постапката во техничко-технолошки елаборат.

Според образложението на едната од предлагачите, пратеничката на ДОМ Лилјана Поповска, „со тоа се обезбедува заштита на животната средина од ризични постапки во случаи на рудници на металични минерални суровини кои се со сиромашни руди и кои применуваат ризични технологии и постапки“.

Слична беше и реакцијата на ДОМ во чиешто соопштение се вели дека „наместо поддршка на благороден закон кој ја штити животната средина и здравјето на граѓаните, се случи тивок бојкот од страна на поединечни пратеници. Само тие си ја знаат причината за тоа“.


Заев: Ако референдумот не успее, веројатно со тоа завршуваме со политиките


Скопје, 31 август, 2018 - 12:57 (META) 

Како премиер имам мандат до 2020 година. Ако референдумот падне и не успее ние веројатно завршуваме со политиките овде. Но, зошто би ни била потребата од владеење кога ни нема иднина државата. Оттука ги црпам ставовите за одговорноста на сите главни политички чинители политички во државата вклучително и ВМРО-ДПМНЕ дека мора да се застане во обезбедување просперитетна иднина на РМ, рече премиерот Зоран Заев на конференцијата „Македонија гледа напред: мигот е да се фати возот за ЕУ“ во Скопје денеска.

Тој повторно ја повика опозициската ВМРО-ДПМНЕ да се приклучи и да овозможи успешен референдум за, како што рече, успешна иднина на заедничката држава.

– Потребно е единство. Може опозицијата и власта да се различни и да не се согласуваат по многу прашања, но во историски моменти сите треба да застанат заедно, бидејќи не постои друг алтернативен пат за оваа наша заедничка земја и затоа нема да престанам да упатувам повици опозицијата да се вклучи во референдумот – рече Заев.