!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Борисов: Мора да формираме влада


Софија, 25 април, 2017 - 22:34 (META) 

Мора да формираме влада, затоа другите формули, па дури и математички, нема да фунцкионираат, изјави лидерот на ГЕРБ, Бојко Борисов, по консултациите со бугарскиот претседател Румен Радев.

Борисов рече дека за време на преговорите со партијата Обединети патриоти не разговарале за министерски позиции во идната влада. Тој истакна дека тоа за кое треба да раговараат со Обединети патриоти се програмата и механизмите по кои ќе функционира идната влада.

– Министрите најлесно се одредуваат затоа што може и лесно да се отстранат. Одлуката ќе биде донесена на 3 мај – рече Борисов.

Тој го запознал претседателот со тоа дека поучен од претходните години, при сегашните преговори за формирање коалиција, детално ги разгледуваат и разјаснуваат можните конфликтни ситуации на коалициската влада. Тоа, како што рече, го прават за да обезбедат стабилна влада во следните четири години.


Во новиот парламент на Бугарија влегуваат пет партии


Софија, 27 март, 2017 - 15:02 (META) 

Во 44. состав на Народното собрание на Бугарија ќе влезат пратениците на 5 политички партии, покажуваат првичните неофицијални резултати на Централната изборна комисија на Бuгарија (ЦИК) по предвремените парламентарни избори што во земјата се одржаа вчера.

Според досега обработените гласачки ливчиња, предноста на партијата Граѓани за европски развој на Бугарија (ГЕРБ) во однос на Бугарската социјалистичка партија (БСП) изнесува 5,5 отсто. Првичните анализи велат дека ГЕРБ во парламентот ќе има 96 пратеници, а БСП – 79.

Партијата Обединети патриоти ќе имаат 27 пратеници, ДПС – 26, Волја – 12. Промени во распоредот на пратенички места се можни само кај Обединети патриоти и ДПС. Разликата меѓу овие две партии, на обработени 98,5 отсто од материјалите, изнесува 770 гласа разлика.

Според првичните резултати, ГЕРБ на вчерашните избори има освоено 32,64 отсто од гласовите, за БСП гласале 27,12 отсто од граѓаните на Бугарија, односно 1.112.754 граѓани гласале за партијата на Борисов, а 924.143 за социјалистите.

Процентот на гласови што ги доби ГЕРБ на вчерашните избори е многу блиску, односно речиси идентичен, со оној од парламентарните избори одржани во октомври 2014 година, кога оваа партија освои 32,67 отсто од гласовите. Од друга страна, БСП на изборите во 2014 година освои двојно помалку гласови, односно 15,4 отсто.


ГЕРБ на Борисов победи на изборите во Бугарија


Софија, 27 март, 2017 - 9:42 (META) 

Претседателката на Бугарската социјалистичка партија, Корнелија Нинова го призна поразот на предвремените парламентарни избори, што се одржаа вчера во Бугарија, откако анкетите за излезност покажаа дека нејзината партија е на второто место, зад партијата на поранешниот премиер Бојко Борисов.

Нинова им ја честиташе победата на партијата Граѓани за европски развој на Бугарија (ГЕРБ), која според анкетите на гласачките места освоила повеќе од 32 отсто од гласовите.

Борисов синоќа изјави дека неговата партија е подготвена да формира влада, но не сакаше да каже со која партија ќе се обиде да направи коалиција.

– ГЕРБ има должност да формира влада затоа што тоа е волјата на народот и затоа ги свикавме предвремените парламентарни избори – рече Борисов, кој во ноември поднесе оставка откако на претседателските избори нивната кандидатка беше поразена.


Тесна трка на парламентарните избори во Бугарија


Софија, 26 март, 2017 - 17:50 (META) 

Граѓаните на Бугарија денеска гласаат на предвремени парламентарни избори во тесна трка помеѓу поранешниот премиер Бојко Борисов, кој со оставка издејствува избори, и опозиционите социјалисти кои се за приближување кон Русија.

На избирачките места кои се отворени во 7 часот наутро, ќе се гласа до 20 часот кога се очекуваат првите процени од исходот на изборите. Право на глас имаат околу 6,8 милиони Бугари.

Одѕивот на избирачите до 13 часот беше 25,31 отсто, односно два отсто поголем отколку на претходните избори одржани во октомври 2014 година, кога одѕивот на гласачите беше најмал од 1990 година.

Според последните анкети, партијата на десниот центар Граѓани за европски развој на Бугарија на Бојко Борисов, повторно би можела да освои најголем број гласови.


Борисов: Бугарската привремена влада ќе остане подолго на функција


Софија, 21 февруари, 2017 - 17:52 (META) 

Привремената влада на Бугарија ќе остане подолго време на функција затоа што не гледам како ќе можат партиите да направат коалиции во оваа ситуација, изјави лидерот на ГЕРБ, Бојко Борисов.

Тој повторно истакна дека парламентарните избори ќе се одржат за пет до шест месеци, поради што кабинетот на Огнен Герџиков подолго ќе управува со државата поради антагонизмот и раздорот кој го гледал во партиите.

– Од тоа што го гледам и слушам, се чини неверојатно тешко да се седнат лидерите на политичките партии на една маса. Дури и да постигнат договор за некаква коалиција, таа ќе биде многу кревка – смета Борисов.


Борисов и официјално одби да формира нова влада


Софија, 2 декември, 2016 - 15:36 (META) 

Бугарскиот премиер во оставка, Бојко Борисов, објави дека и официјално ја одбил понудата на претседателот Росен Плевнелиев да формира нова влада, со што отвори пат за предвремени парламентарни избори напролет.

– Постои морал и политичко достоинство. Ако еден ден народот одлучи за нов мандат, тогаш ќе бидеме спремни – рече Борисов.

Лидерот на десниот центар поднесе оставка откако претседателска кандидатка на ГРЕБ, Цецка Цачева, изгуби на изборите на 3 ноември од кандидатот на социјалистите, Румен Радев, кој освои 59,35 отсто од гласовите.

Новиот претседател ќе ја преземе должноста на 22 јануари.

Ниту една партија не може да добие парламентарно мнозинство без поддршка на ГРЕБ, поради што мора да се одржат предвремени парламентарни избори.

Борисов, кој беше на власт од 2009 година, беше реизбран кон крајот на 2014 година и имаше мандат до крајот на 2018 година.

 


Борисов: Лидерите како Орбан и се многу потребни на Европа


Будимпешта, 30 ноември, 2016 - 18:00 (META) 

Судбината на Европа денеска е дефинирана на јужната граница со Бугарија. Бугарите ја зајакнаа безбедноста на Унгарија, но исто така ја заштитија цела Европа, рече премиерот на Унгарија, Виктор Орбан за време на церемонијата каде на бугарскиот премиер во заминување, Бојко Борисов му додели орден „Голем крст за граѓански заслуги“.

– За нас Унгарците важно е да знаеме и да чувствуваме дека Балканот има луѓе чија верба и историјата е поврзана со нашата, кои го разбираат нашето размислување и делување. Ова е особено важно сега кога Европа се однесува како ништо да не е научено и како се да е заробено во последниците децении – рече унгарскиот премиер.

Според Орбан, денеска е неопходно да се заштитат надворешните граници на Европа и дека оваа задача мора да се изврши од оние кои имаат долга историја и меморија. Тој рече дека оваа награда е знак на пријателство помеѓу Бугарија и Унгарија.

– Ве уверувам дека заштитата не само на бугарските туку и на европските граници ќе продолжи. Чест ми е што ја добив оваа награда, но безбедноста на Бугарија но и на Европа се должи на заложбите на цела влада, цела бугарска гранична полиција и целиот воен персонал. Лидерите како Орбан и се многу потребни на Европа поради трезвената проценка која ја имаат на опасностите кои доаѓаат – рече Борисов.


Борисов предупреди дека е можен терористички напад по немирите во бегалскиот камп


Софија, 25 ноември, 2016 - 15:48 (META) 

Состојбата во бегалскиот камп во Харманли на југот на Бугарија се нормализира по безредијата и немирите, кои избувнаа вчера и продолжија во текот на ноќта. Повеќе од 400 мигранти се задржани во притвор поради вандалско однесување, а во нередите се повредени 24 полицајци, од кои најтешко настраданиот има скршеница на раката.

Од Министерството за внатрешни работи на Бугарија соопштија дека се формирани две предсудски постапки за лицата кои учествувале во нередите.

Бугарскиот премиер во оставка, Бојко Борисов, кој ноќеска за време на немирите пристигна во бегалскиот камп, соопшти дека против сите што учествувале во безредијата ќе бидат поднесени обвиненија.

Тој повика и предупреди да се внимава на повиците за напади и на она што се објавува на социјалните мрежи бидејќи вакви настани вообичаено се проследени со терористички напади.

„Обично, онаму каде што има зголемување на насилствата, секогаш има и терористички акт, секогаш се активираат ќелиите со спијачи… Мрежите на Исламска држава многу внимателно го следат „Фејсбук“ и она што излегува во медиумите. Таквите, кои се прават големи херои, треба да знаат дека со вакво поведение можат да изложат на ризик огромен дел од населението“, изјави премиерот во оставка.

Претседателката на Агенцијата за бегалци, Петја Прванова, истакна дека најверојатно постои поврзаност меѓу мигрантските протести во Бугарија со оние во камповите во другите европски земји.

„Кога се запали кампот во Кале (Франција), инциденти имаше и во Харманли, кога имаше инцидент во Германија, имаше и тука. Вчера се запали камп на островот Лезбос, сега и тука. Очигледно има врска меѓу овие настани“, изјави Прванова за БТВ.

Немирите во кампот во Харманли биле предизвикани главно од мигранти од Авганистан.

„Групи Авганистанци тепаа Сиријци, за да излезат да се бунтуваат“, изјави Борисов.

Според него, постои можност бунтот да е организиран од надвор. Како аргумент за ова, тој го посочи фактот дека самите мигранти преку мобилни телефони пуштале снимки на социјалните мрежи.

Во декември треба да почне екстрадицијата, односно враќањето назад во нивната земја, на мигрантите од Авганистан. Како што соопшти Борисов, веќе бил нарачан авион од Кабул, а летот е организиран од бугарските власти во координација со Европската агенција за гранична и крајбрежна заштита.

По нередите, кампот во Хармални е целосно оштетен. Нанесена е сериозна материјална штета, а според зборовите на Борисов, не е останат ниту еден здрав прозорец.

Во моментов во центарот во Хармални има околу 2.700 лица, кои се разделени и групирани според нивната националост за да не дојде до нови судири. Во кампот има околу 600 деца и од 400 до 500 жени, кои, како што соопшти Прванова, се сместени на безбедно.


Бугарската полиција притвори 200 мигранти по немири во бегалски камп


Софија, 25 ноември, 2016 - 10:55 (META) 

Бугарската полиција притвори 200 мигранти по судирите во бегалски камп на југот на Бугарија, во кој биле повредени и 14 полицајци, соопштија бугарски официјални претставници.

Според портпаролката на бугарската полиција, Нина Николова, во нередите учествувале околу 2.000 мигранти, кои скандирале, палеле гуми и фрлале камења кон полицијата.

Тензиите, како што пренесуваат локалните медиумите, ескалирале вчера, поради што полицијата употребила водени топови за да ги прекине насилствата.

Се очекува во текот на денот бугарскиот премиер Бојко Борисов да го посети бегалскиот камп каде се случија нередите.


Бугарскиот парламент ја прифати оставката на премиерот Бојко Борисов


Софија, 16 ноември, 2016 - 19:51 (META) 

Бугарскиот парламент, со 218 гласа „за“ и двајца воздржани пратеници, денеска ја прифати оставката на премиерот Бојко Борисов.

На 14 ноември, Борисов до народното собрание на Бугарија поднесе оставка на наговата влада, поради победата на независниот кандидат за претседател на Бугарија, Румен Радев, поддржан од Бугарската социјалистичка партија (БСП).

Од утре ќе почнат консултациите за состав на новата влада која треба да ја сочинуваат стручњаци, кои ќе ги организираат предвремените парламентарни избори.

Борисов е на власт од 2009 година, а неговиот мандат требаше да истече во 2018 година.

Румен Радев ќе ја преземе должноста претседател на Бугарија на 22 јануари.