Борисов ја стави под мраз „Џи-Пи Груп“, која градеше во Прилеп и се спомнуваше со убиената новинарка од Русе


Софија, 12 октомври, 2018 - 17:56 (META) 

Бугарскиот премиер Бојко Борисов попладнево соопшти дека наложил големата бугарска компанија „Џи-Пи Груп“, која работела или уште работи на многу инфраструктурни проекти во Бугарија, да биде отстранета од државните проекти и проектите финансирани со европски пари, јави бугарскиот „Медиапул“.

„Џи-Пи Груп“, како што наведе бугарски „Банкер“, исто така ја заврши и пречистителната станица за отпадни води во Прилеп, која беше пуштена во употреба на почетокот на јули годинава.

„Џи-Пи Груп“ беше темата на последната телевизиска емисија на убиената ТВ водителка Викторија Маринова, во која таа разговараше со новинари што истражувале злоупотреби поврзани со оваа групација која во последните години зеде многу големи проекти. Иако првично се сметаше дека станува збор за ликвидација на новинар, потоа се покажа дека убиството го извршил млад маж во пијана состојба, кој по убиството избегал во Германија.

„Џи-Пи Груп“ во последните неколку месеци е во центарот на „Џи-Пи-гејт“, поради лоша изведба на капитални проекти.

– Му наложив на претседателот на агенцијата „Патна инфраструктура“, Светослав Глосов, почитувајќи го законот, да најде начин уште денеска за „Џи-Пи Груп“ да се отстрани од проектите финансирани од државата и од ЕУ – рече Борисов денеска во Асеновград.

Големата градежна група во моментот ја следат два големи скандали. Едната е за ремонтот на улицата Граф Игнатиев во строгиот центар на Софија, а вториот поради истражувањето на сајтот „Бивол“ за махинации за победување на тендери за проекти со европски пари.

Поради истражување за уништување документација за овој случај беа уапсени новинарите Димитар Стојанов и неговиот колега од Романија, Атила Биро, кои по реакција на европската јавност беа ослободени. Стојанов и Биро беа последните гости во емисија на убиената водителка Маринова.

По случајот со Стојанов и Биро, бугарското Јавно обвинителство отвори истрага и нареди запирање на исплатата на 14 милиони евра на „Џи-Пи Груп“, компанија која се поврзува со Валентин Златев, директорот на „Лукоил Бугарија“. Тој го негира тоа, а Џи-Пи Груп, инаку, изградила повеќе од 100 објекти на „Лукоил“ во Бугарија и врши нивно одржување, меѓу кои и новото седиште во центарот на Софија.

„Џи-Пи Груп“ го доби и тендерот за изградба на најдолгиот тунел во Бугарија, „Железница“ на новиот автопат „Струма“ во близина на Симитли, за сума од 185 милиони лева, односно 92,5 милиони евра.

Според бугарски „Банкер“ сегашниот гигант „Џи-Пи Груп“ полека стана најчестиот победник на државните и општинските тендери за изградба на патишта, инфраструктура, пречистителни станици“, а работи и на третата линија на софиското метро.

Во 2017 година имала  приходи од 185 милиони лева,3,6 отсто повеќе од годината претходно, а профитот изнесувал 27 милиони лева, што е 45 отсто повеќе од профитот во 2016 година.

„Џи-Пи Груп“ на почетокот на август годинава победи на тендерот за најдолгиот тунел во Бугарија, по што две странски компании – грчката „Актор“ и италијанската „Тодини“ поднесоа жалби. „Актор“ го градеше новиот автопат Демир Капија – Смоквица.

За реконструкцијата на централната софиска улица Граф Игнатиев, Џи-Пи Груп победи со понуда од 24 милиони лева (околу 12 милиони евра).

Компанијата со други компании ќе дели и  92 милиони лева (околу 46 милиони евра) за изградба на шест метро станици и 4,3 километри тунел на новата, трета линија на софиското метро. За изградба на две станици и тунел од 2,3 километри Џи-Пи Груп е во конзорциум со уште три компании, а за два километри тунел и четири метро станици направила конзорциум со друга компанија.

„Џи-Пи Груп“ стои и зад голем број други објекти изградени во последната деценија, меѓу кои и луксузни хотели и спортски сали, како и новото седиште на „Лукоил“ во Софија. Формирана е во 2004 година.


Борисов: Давањето совети не е дипломатски, ги поддржуваме соседите на патот кон ЕУ


Софија, 2 октомври, 2018 - 14:47 (META) 

Секоја нација ја одредува сопствената судбина и можеме само да кажеме дека ги поддржуваме нашите соседи на патот кон ЕУ и НАТО, бидејќи сме во ова семејство, изјавил бугарскиот премиер Бојко Борисов за референдумот во Македонија, јавува дописничката на „Мета“ од Софија.

„Оттаму, според мене, давањето совети или разбирање не е правилно, дипломатски, ниту чесно. Ние треба да ги оставиме македонските политичари да одлучат кој е патот што ќе го изберат по референдумот и ги поддржуваме на секој начин на тој пат кон ЕУ и НАТО“ додаде Борисов кој што изнесува лично мислење, а не официјален став на владејачката парламентарна група ГЕРБ.


Заев – Борисов: Градиме европска иднина, само тоа води кон квалитетен живот


Благоевград, 3 август, 2018 - 11:33 (META) 

Премиерот Зоран Заев и бугарскиот премиер Бојко Борисов заеднички ја чествуваа 115 – годишнината од Илинденското востание, во Благоевград, Бугарија.

Премиерите Заев и Борисов оддржаа билатерална средба пред почетокот на свеченоста, а средбата се поклопи со првата годишнина од потпишувањето на Договорот за пријателство, добрососедство и соработка помеѓу двете земји во Скопје на Илинден, 2 Август минатата година.

На средбата двајцата премиери ги потврдиле заложбите за градење на заедничка иднина за граѓаните на двете земји, надминување на разликите, зајакнување на економската соработка како процеси кои ќе донесат стабилност и просперитет за целиот регион.

„Историјата и минатото ги ставивме да бидат цврсти темели на кои што почнавме да ја градиме европската и евроатлантската иднина на нашите држави, народи и на целиот регион. Само тоа води до квалитетен живот. Република Македонија и Република Бугарија се здружија, си ги подадоа раце за да ги развиваме нашите односи“, изјави Заев.

По официјалните обраќања двајцата премиерите Заев и Борисов положија свежо цвеќе на споменикот на „Гоце Делчев“ – на централниот плоштад Македонија во Благоевград.


Заев и Борисов ќе ја одбележат годишнината од Илинденското востание во Благоевград


Скопје, 1 август, 2018 - 11:23 (META) 

Македонскиот премиер Зоран Заев и бугарскиот премиер Бојко Борисов утре во Благоевград заедно ќе ја одбележат 115 – годишнината од Илинденското востание, соопшти владината прес-служба.

Двајцата премиери ќе учествуваат на церемонијата на положување венци и цвеќе на споменикот на Гоце Делчев, на плоштадот „Македонија“ во Благоевград.

Ова ќе биде втора заедничка прослава, по потпишувањето на Договорот за пријателство, соработка и соседство помеѓу Република Бугарија и Република Македонија пред една година.

На одбележувањето на годишнината, ќе присуствуваат и министерот за внатрешни работи на Република Македонија, Оливер Спасовски, како и вицепремиерот и министер за одбрана на Република Бугарија, Красимир Каракачанов.


Борисов: Ќе беше предавство со фанфари и почести да го пречекам Иванов


Софија, 14 јуни, 2018 - 16:23 (META) 

Ќе беше предавство доколку по она за што прочитав вчера, по средбата од 120 секунди меѓу премиерот Заев, министерот за надворешни работи и претседателот Иванов, него денеска да го пречекам со фанфари и почести. Затоа проценив дека денеска не е моментот, рече во Софија бугарскиот премиер Бојко Борисов одговарајќи на новинарски прашања за одбивањето да се сретне со македонскиот претседател Ѓорге Иванов, кој од денеска е во дводневна посета на Бугарија. Борисов порача и дека претседателот Румен Радев не можел да постапи како него, оти Иванов дошол како гостин на претседателот.

И вицепремиерката и министерка за надворешни работи, Екатерина Захариева ја откажа средбата со Иванов закажана за утре во Софија.

Бугарскиот премиер рече и дека и на Иванов, за кого рече дека му изразува почит, му е јасно дека Бугарија и посакува само добро на Македонија.

– Кон претседателот Ѓорге Иванов секогаш сум се однесувал со огромна почит. Претседателот Иванов одлично знае дека единственото што го посакуваме за Македонија е европска интеграција, влегување во ЕУ и НАТО, просперитет и поврзаност – дополни Борисов и откри дека при нападот на Собранието на 27 април 2017 година, првите на кого му се јавиле и претседателот Иванов и Зоран Заев и Никола Груевски, бил тој.

– Направив сè што е можно за проблемот да се реши мирно – објасни бугарскиот премиер.

Борисов порача и дека ако не се придвижи напред проблемот со името на Македонија, тој е песимист за развојот на Балканот.

– Ако прашањето за името на Македонија не се придвижи, не само што не сум оптимист, туку и ќе станам целосен песимист за равојот на Балканот. На сите им е јасно дека додека не се постигне договор за името, нема никаква шанса да мрднат напред, ниту шанса за НАТО и ЕУ – рече бугарскиот премиер.

Тој ги пофали и грчкиот и македонскиот колега.

– Независно што се социјалисти, Алексис Ципрас и Зоран Заев се исклучително храбри. Македонците го сакаат тој збор. Тие се смели премиери од за мене противничкото политичко семејство. Но тие ја имаат целата моја поткрепа за напорите и ризиците што ги преземаат. Тоа се непопуларни, тешки решенија и за двата народа – порача Борисов.


Иванов: Борисов одбивајќи да се сретне со мене зазема страна


Софија, 14 јуни, 2018 - 13:49 (META) 

Со овој гест Борисов зазема страна, изјави македонскиот претседател Ѓорге Иванов кој е во дводневна официјална посета на Бугарија, како реакција на одлуката на бугарскиот премиер Бојко Борисов да не се сретне со Иванов кој е во дводневна посета на Бугарија.

Борисов и вицепремиерката и министерка за надворешни работи на Бугарија, Екатерина Захариева, во последен момент ја откажаа средбата.

– Тоа е негова одлука и негова одговорност. Со овој негов гест тој зазема страна. Борисов не е само премиер на Бугарија, туку е и претседавач со ЕУ. Но, со овој гест тој учествува и не ја разбира главната цел на претседателствувањето. Европската Унија апелира за дијалог, а некој бега од него – изјави претседателот Иванов, одговарајќи на новинарско прашање во врска со одлуката на Борисов да не се сретне со него.

Иванов по средбата со бугарскиот претседател Румен Радев рече дека ние сме Македонци и тоа ќе останеме.

– Ние сме Македонци и тоа ќе останеме и не можеме да бидеме ништо поинаку. Ние сме тука да го чуваме континуитетот, тој што има проблем со името, тоа е негов проблем и треба да си бара решение – истакна Иванов.


Борисов и Захариева ги откажаа средбите со Иванов


Софија, 14 јуни, 2018 - 11:05 (META) 

Бугарскиот премиер Бојко Борисов одбил да се сретне со македонскиот претседател Ѓорге Иванов во закажаниот термин утре претпладне, а средбата ја откажала и бугарската вицепремиерка и министерка за надворешни работи Екатерина Захариева, со образложение дека бугарската влада не сака да биде вмешана во внатрешнополитичките дебати во Скопје, јави бугарската агенција „Фокус Њус“.

Потегот следи откако вчера претпладне Иванов по само две минути ја напушти средбата со македонскиот премиер Зоран Заев и министерот за надворешни работи Никола Димитров, на која му беше доставен текстот на Договорот со Грција, а потоа попладнето договорот го нарече штетен и рече дека нема да го потпише.

„Не сакаме да се вмешуваме во внатрешните работи на соседната држава. Нашата позиција е принципиелна и е јасна, како и позицијата на целата меѓународна заедница. Јасна е и позицијата на претседателот на Република Македонија. Бугарската влада не гледа смисла во то да биде искористена во внатрешнополитичките дебати во Скопје. Клучна за идниот развој на нашата соседна држава е интеграцијата во ЕУ и НАТО и таа не смее да се става под прашање“, гласи изјавата на Борисов што „Фокус Њус“ ја добил од бугарската влада.

Иванов и бугарскиот претседател Румен Радев во моментов имаат тет-а-тет средба, по што ќе одржат прес-конференција.

Инаку, вицепремиерката Захариева кратко пред пристигањето на македонскиот претседател во Софија го информирала Радев по телефон дека се откажани средбите што таа и премиерот требаше да ги имаат со Иванов.


Заев и Борисов на 24 мај во Рим заеднички ќе се поклонат на гробот на Свети Кирил


Рим, 14 мај, 2018 - 16:35 (META) 

Премиерите на Македонија и Бугарија, Зоран Заев и Бојко Борисов, со владини делегации на 24 мај, четврток, во базиликата „Свети Климент“ во Рим заедно ќе положат венци свежо цвеќе на гробот на Свети Кирил, соопштија од Владата.

Потоа, македонската делегација ќе се упати кон базиликата „Санта Марија Маџоре“ каде ќе положат свежо цвеќе на спомен плочата од папата Адриан Втори, а истиот ден, македонската делегација ќе положи венци свежо цвеќе и на споменикот на Свети Кирил и Методиј во амбасадата на Република Бугарија, каде ќе има и заеднички ручек двајцата премиери.

В петок во 11 часот премиерот Заев и македонската владина делегација ќе бидат на аудиенција кај  папата Франциск во Апостолската Палата во Ватикан, а потоа Заев ќе се сретне со Државниот секретар на Светата Столица, кардинал Пјетро Паролин.

Во попладневните часови, македонската и бугарската владина делегација ќе присуствуваат на отворање на заедничка културно уметничка програма, организирана од министерствата за култура на двете земји.


Иванов побара паралелни преговори од ЕУ за Македонија


Скопје, 28 април, 2018 - 17:15 (META) 

Иднината на Западен Балкан е во европското семејство, но работа се уште има, а билатералните прашања мора да се решаваат пред влезот во Унијата, се дел од заклучоците од двочасовниот состанок на шефовите на држави и влади од Процесот Брдо- Бриони што се одржа во Скопје вчера.

Домаќинот на самитот, македонскиот претседател Ѓорге Иванов, побара паралелни преговори за спорот со името и за членство во Европската Унија.

– Повикувам Унијата да овозможи паралелно движење на преговорите зачленство и надминување на билатералнаата разлика меѓу  Македонија и Грција. По самата своја природа проширувањето е политичко, а не само техничко прашање. Ако ЕУ не ни ја обезбеди иднината  тогаш ние ќе се занимаваме  со минатото – рече македонскиот претседател.

Претседателот на Европскиот совет, Доналд Туск пак порача дека доаѓа со силна порака и цврста заложба за европската иднина на земјите од регионот. Македонија според него, покажала дека за една година успеала невозможното да го направи возможно во процесот на преговорите со името.

– Ќе го повторам тоа што го кажав за Кореја – невозможното станува возможно. Минатата година слушнав дека е невозможно да се реши ова прашање, меѓутоа блиску сте до успех. Можно е историјата на Балканот, која што личи на хорор филм кој никогаш не завршува,  сепак да има среќен крај – рече Туск.

Бугарскиот премиер Бојко Борисов порача дека спорот за името со Грција би требало да се реши набргу.

-Се надевам дека Македонија и Грција ќе најдат начин да го решат проблемот со името и тоа мора да са случи многу набрзо, затоа што имаме историска можност и како што кажа мојот пријател  Доналд кој е историчар рече, во иднината за шеесет години од сега историчарите ќе го оценуваат овој момент – порача Борисов.


Балканската политичка елита и Доналд Туск на самитот Брдо-Бриони во Скопје


Скопје, 27 април, 2018 - 10:02 (META) 

Претседателот на Европскиот Совет, Доналд Туск, седум претседатели и еден премиер ќе бидат гости на претседателот Ѓорге Иванов, кој е домаќин на самитот на шефовите на држави во Процесот Брдо-Бриони, што ќе се одржи попладнево и вечерва во хотелот „Александар Палас“ во Скопје.

Официјално присуство на самитот го потврдија претседателите на Хрватска, Колинда Грабар Ќитаровиќ, која е во Скопје од вчера, претседателот на Словенија, Борут Пахор, како и неговите колеги од Србија, Црна Гора, Албанија и Косово – Александар Вучиќ, Филип Вујановиќ, Илир Мета, Хашим Тачи, и претседавачот со претседателството на Босна и Херцеговина, Бакир Изетбеговиќ.

Специјален гостин на состанокот, покрај Туск, е и бугарскиот премиер Бојко Борисов.
Претпладнево претседателот на Европскиот Совет, Туск, во Владата ќе има средба со премиерот Зоран Заев.

Поради странските државници, безбедносната состојба во Скопје е од прв степен на готовност, со хеликоптерски надлетувања, посебен сообраќаен режим на неколку булевари и силни полициски контроли.

Главната цел на Процесот Брдо-Бриони е европска интеграција на земјите од регионот и стабилизирање на состојбите во Западен Балкан преку јакнење на регионалната соработка и решавање на отворените прашања.

Во фокусот на годинешниот состанок на лидерите на земјите учеснички е потребата за подобрување на меѓусебната поврзаност во политичка, економска, инфраструктурна и безбедносна смисла, а во контекст на новата стратегија на Европската Унија за Западен Балкан.

Процесот Брдо-Бриони прв пат се одржа во 2013 година на заедничка иницијатива на претседателите на Република Словенија и Република Хрватска, во Брдо кај Крањ, Словенија.

На состанокот на лидерите на земјите учеснички од Процесот Брдо-Бриони, кој ќе се одржи во хотелот „Александар Палас“ во Скопје, се акредитирани 156 претставници на медиумите, 116 од Македонија и 40 од странство.