!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Борисов: Да се обединиме и да помогнеме во решавање на проблемот за името


Белград, 9 декември, 2017 - 15:39 (META) 

Прашањето за името меѓу Македонија и Грција мораме да го решиме. Мора да се обединиме и да ѝ помогнеме на Европската комисија да му помогне на Брисел да донесе правилни одлуки, а не да поставува некакви ултиматуми, истакна бугарскиот премиер Бојко Борисов денеска во Белград, по средбата со српскиот претседател Александар Вучиќ и со премиерите на Грција, Алексис Ципрас, и на Романија, Михај Тудосе.

Борисов посочил дека четирите застапени земји на денешната среддба се неразделно парче на Европа и дека треба се покаже на дело дека се научени лекциите.

– Балканот многу векови наназад генерирал само војни. Сега е клучен момент, многу од големите играчи во светот се заинтересирани за Балканот, а ние сакаме обединет Балкан, модерна инфраструктура, дигитална инфраструктура. Лидерите на Западен Балкан сознаваат дека доцнат со остварувањето на обврските и треба да се ангажираат. Продолжуваме, испраќаме кон нашите пријатели во Европа порака дека имаат еден мудар, сигурен Балкан, кој не генерира проблеми, туку ги почитува сите правила – рече Борисов.


Заев – Борисов: Го активиравме моторот што ќе го повлече целиот регион напред


Струмица, 23 ноември, 2017 - 15:01 (META) 

Заедничката седница на владите на Бугарија и на Македонија беше плодна, оцени денеска во Струмица премиерот Зоран Заев, на заедничката прес-конференција со својот бугарски колега, Бојко Борисов. Тој рече дека со денешната седница е „активиран уште еден од моторите што треба да го повлечат напред целиот регион“.

Заев истакна дека на седницата било разговарано за продлабочување на економската, како и на соработката во областа на енергетиката и на инфраструктурата, прекуграничната соработка. Тој рече дека се разговарало и за изградба на Коридорот 8 и за можноста за гасоводно поврзување на двете земји, како и на регионот.

– Денеска е усвоена заедничка декларација во која се нотирани сите наши заложби за подобрување на соработката во сите сфери. Со декларацијата ја потврдуваме желбата за зајакнување на односите во сите сфери, градејќи доверба и меѓусебно почитување и разбирање – рече Заев, додавајќи добрососедските односи се темел за стабилноста во Југоисточна Европа.

Бугарскиот премиер Борисов ја нагласи поддршката за Македонија во однос на членството во Европската Унија и во НАТО.

– Сакам само да кажам дека завчера, при средбата со претседателот на Европскиот парламент, Антонио Тајани, заедно со парламентарните групи од Европскиот парламент во Софија, јасно кажав дека сега е моментот да се искористи бугарското претседателство, а потоа австриското, романското и хрватското и за две години Западниот Балкан да не биде само во фокусот на вниманието на Брисел, туку реално да се придвижи. Убеден сум дека за два-три месеци ќе успееме да го намалиме роамингот. Убеден сум дека и Коридорот 8 ќе се развие. Нашата политика е политика за присоединување во економијата, енергетиката зошто тоа носи инвестиции и повисоки доходи. Луѓето сакаат работа, да имаат доходи, да може да патуваат и да прават бизнис, а ние сме должни да им го овозможиме тоа – рече Борисов, додавајќи дека перспективата на Македонија во НАТО е од важно значење и дека како влади ќе продолжат со низа практични дејства.


Заев и Борисов не сакаат да се мешаат – ги охрабруваат црквите да најдат решение


Струмица, 23 ноември, 2017 - 14:26 (META) 

Македонскиот и бугарскиот премиер, Зоран Заев и Бојко Борисов, денеска изјавија дека го почитуваат секуларниот карактер на двете држави и не сакаат да се мешаат во работата и во соработката на двете цркви, но оти можат да ги охрабрат да најдат решение во духот на добрососедството и на пријателството.

– Јас се надевам дека ќе дојде до меѓусебно признавање, бидејќи за нас како Македонска православна црква – Охридска архиепископија, автокефалноста е многу важна. Прашањето е меѓу двете цркви. Наше е да охрабриме да се најде решение во духот на Договорот за добрососедство и пријателство меѓу двете земји – рече Заев, одговарајќи на новинарско прашање во врска со писмото што Македонската православна црква го упати до Бугарската православна црква.

И бугарскиот премиер, Борисов, истакна дека не сакаат да се мешаат во работите на црквите, но додаде дека ќе бидат среќни доколку двете цркви соработуваат и меѓусебно си помагаат, како што Македонија и Бугарија соработуваат на политички план.

Борисов упати благодарност до владиката Наум и до другите владици што денеска ги пречекаа двете државни делегации во манастирот „Водоча“ во Струмица.


Заев и Борисов се поклонија пред споменикот на Борис Трајковски во Струмица


Струмица, 23 ноември, 2017 - 12:49 (META) 

Премиерите на Македонија и на Бугарија, Зоран Заев и Бојко Борисов, пред почетокот на заедничката седница на владите на двете земји, положија венци свежо цвеќе пред споменикот на поранешниот претседател на Македонија, Борис Трајковски, во Струмица.

На седницата, која е резултат на Договорот за добрососедство меѓу двете земји, се разговара за продлабочување на соработката во економијата, енергетиката, инфраструктурата, прекуграичната соработка и за реформските процеси, потребни за европските и евроатлантските интеграции на земјава.

На седницата, како што информираат од Владата, ќе бидат потпишани повеќе билатерални договори.


Заедничка седница на македонската и на бугарската влада, ќе се потпишат 9 документи


Струмица, 23 ноември, 2017 - 10:09 (META) 

Владите на Македонија и на Бугарија денеска во Домот на АРМ во Струмица ќе одржат заедничка седница.

Средбата помеѓу двете делегации почнува во 10 часот, кога премиерите Зоран Заев и Бојко Борисов ќе положат цвеќе на споменикот на загинатиот македонски претседател Борис Трајковски.

Владината седница ќе почне во 11 часот и на неа министрите ќе потпишат девет документи за билатерална соработка во областа на надворешната политика, инвестициите, енергетиката, одбраната, туризмот, телекомуникациите, инфраструктурата и реакцијата при катастрофи. Договорите се дел од Договорот за пријателство, соработка и соседство, потпишан на 1 август оваа година.

Во 12.20 часот делегациите ќе имаат заедничка прес-конференција, по што бугарската владина делегација ќе ѝ предаде донација на Општина Струмица.


Борисов: Сега е моментот за европската перспектива на земјите од Западен Балкан


Брисел, 8 ноември, 2017 - 19:19 (META) 

Бугарскиот премиер Бојко Борисов денеска во Брисел изјави дека сега е вистински момент да се направат конкретни чекори и да се донесат конкретни одлуки кога е во прашање европската перспектива на Западен Балкан.

– Можноста е тука, бидејќи по Бугарија (на чело на ЕУ) доаѓаат Австрија и Романија кои се запознаени со регионот, знаат што може да понуди и како да се направи прогрес во регионот – оцени Борисов на заедничката прес-конференција со претседателот на Европската комисија, Жан Клод Јункер, со кого разговараше за приоритетите на бугарското шестмесечно претседателство со ЕУ кое почнува на први јануари 2018 година.

Борисов потврди дека неговата влада во мај, следната година во Софија ќе организира самит ЕУ – Западен Балкан.

Бугарија веќе најави дека Западен Балкан ќе биде меѓу главните приоритети за време на нејзиното претседавање со ЕУ.

Претседателот на Европската комисија, Жан Клод Јункер истакна дека е од суштинска важност да се задржи европската перспектива на Западен Балкан.

Одговарајќи на новинарско прашање, тој изјави оти очекува Србија и Црна Гора да станат полноправни членки на Европската Унија пред најавениот рок.

– Мислам дека овие две земји ќе бидат членки на ЕУ и пред 2025 година – рече Јункер.

Претседателот на Европската комисија во својот говор од септември годинава за прв пат во текот на својот мандат на чело на ЕУ потврди дека Унијата ќе се прошири кон Западен Балкан.


Владите на Македонија и на Бугарија ќе имаат заедничка седница во Струмица


Софија, 2 ноември, 2017 - 15:55 (META) 

Македонија и Бугарија се пример за добрососедство и за соработка што ја зацврстува безбедноста на целиот регион и Бугарија недвосмислено ја поддржува Македонија на патот кон Европската Унија и кон НАТО и ќе помогне во остварувањето на стратешките цели на земјава. Ова било истакнато на средбите на министерката за одбрана, Радмила Шекеринска, со премиерот на Бугарија, Бојко Борисов, и со бугарскиот министер за одбрана, Красимир Каракачанов, во Софија.

Бугарскиот премиер Борисов на средбата со Шекеринска, како што соопштија од Министерството за одбрана, рекол дека со преземањето на претседателството со Европската Унија, Бугарија ќе ѝ ја пружи сета поддршка на Македонија во нејзиниот евроинтегративен процес.

Шекеринска истакнала дека последните месеци покажале дека постои силна политичка волја за конкретна соработка, реални позитивни и пријателски односи меѓу двете земји и една нова клима на соработка.

– Потпишувањето на Договорот за пријателство, добрососедство и за соработка помеѓу Македонија и Бугарија ги интензивираше контактите во сите области. Ние сме особено задоволни бидејќи како две пријателски земји, презедовме чекори за издигнување на одбранбената соработка на едно повисоко ниво – рекла Шекеринска, додавајќи оти очекува во следниот период да се дефинираат конкретни активности на соработка на двете армии, со фокус на заедничката обука на специјалните сили.

Министерката за одбрана рекла и дека претстојната седница меѓу двете влади во Струмица ќе покаже дека соработката се продлабочува.

Министерот за обрана на Бугарија, Каракачанов, изразил задоволство што со владата на премиерот Зоран Заев од 1 август до денес контактите меѓу Бугарија и Македонија се поинтензивни отколку во последните 20 години. Тој истакнал дека политиката на Бугарија за членство на Македонија во НАТО и во ЕУ е јасна, а таа е – категорична поддршка.

Каракачанов рекол оти се надева дека Договорот за добрососедство набргу ќе го ратификуваат и двата парламенти.

Во рамките на посетата, Шекеринска ќе го посети и Националниот воен команден центар на бугарската армија.


Борисов телефонски му честиташе на Заев за успешното спроведување на изборите


Скопје/Софија, 16 октомври, 2017 - 15:46 (META) 

Премиерот Зоран Заев денеска имал телефонски разговор со својот бугарски колега, Бојко Борисов, кој, како што соопштија од Владата, му го честитал на Заев успешното спроведување на локалните избори.

„Премиерот Борисов му го честиташе на премиерот Заев успешното спроведување на локалните избори во Република Македонија и истакна дека организацијата на изборите создаде услови во кои граѓаните можеа слободно, врз основа на сопствената политичка волја, да го реализираат правото на учество на изборите и да го дадат својот глас за политичката опција според нивниот избор“, стои во соопштението.

Бугарија, рекол Борисов, останува и понатаму доследна на поддршката за политиките на новата Влада на Македонија, посакал успех за земјава во иницијативите во регионот и изразил надеж и очекување дека наскоро Македонија ќе стане членка на НАТО и ќе ги почне преговорите за членство во Европската Унија.


Бугарија и Романија добија пристап до информацискиот систем на Шенген


Варна, 4 октомври, 2017 - 14:49 (META) 

Европскиот парламент го поддржа предлогот на Советот на ЕУ, на Бугарија и на Романија да им се овозможи делумен пристап до базата на податоци за визите од информацискиот систем за шенгенскиот режим, јавија бугарските медиуми. Кога ќе биде изгласана од Советот на ЕУ, одлуката ќе им дозволи на двете држави да проверуваат информации во визниот систем, без да можат да внесуваат, менуваат или да бришат податоци.

Решението на Европскиот парламент е формално и е условено од потребата за постојани проверки на надворешните граници на ЕУ на сите лица и возила и не е тесно сврзано со влегувањето на Бугарија и на Романија во шенгенскиот безвизен режим.

Но, бугарскиот и романскиот премиер, Бојко Борисов и Михај Тудосе, вчера по конференцијата на премиерите на балканските земји во поранешната летна царска резиденција, дворецот Евксиноград во бугарскиот град Варна, рекоа дека нема формални пречки за влегување на двете земји во шенгенскиот систем и сметаат дека тоа треба да се случи најдоцна за една година.

Тудосе смета дека Бугарија и Романија се судбински одредени да чекорат заедно и на патот кон шенгенскиот безвизен режим. Според него, прашањето е политичко и според општото мислење на европските партнери, нема формални преки за вклучувањето во шенген-зоната.

Борисов напоменува дека Бугарија се наоѓа на едно од најкритичните места на патот на мигрантите кон Централна Европа, но дека благодарение на заедничките напори со  Романија, е постигната „нулта миграција“.

– Повеќето од нашите европски партнери се категорични дека во однос на заштитата на надворешните граници на ЕУ, Бугарија и Романија се справувааат многу подобро отколку ред други земји од шенген-зоната – смета бугарскиот премиер.


Борисов: Грција и Македонија да најдат решениe, како што тоа го направивме ние


Варна, 4 октомври, 2017 - 13:09 (META) 

„Треба да се најде решение меѓу двата народа, така како што ние го најдовме. Инаку Грција ќе ги блокира за НАТО и за ЕУ“, изјави бугарскиот премиер Бојко Борисов за бугарскиот весник „Труд“. Тој сепак не одговори на прашањето зошто на конференцијата на премиерите на балканските земји вчера во Варна не присуствувал и македонскиот премиер Зоран Заев.

Во Варна вчеравечер се сретнаа Борисов, неговиот грчки колега Алексис Ципрас, романскиот премиер Михај Тудосе и српскиот претседател Александар Вучиќ, а на средбата се разговарало за балканските и за европските прашања.

– Немојте да напишете дека во Евксиноград се родила нова Вишеградска четворка, оти на Европејците ќе им се крене косата на главата – рече бугарскиот премиер вчера по завршувањето на четиристраната средба во поранешната летна царска резиденција, дворецот Евксиноград во Варна.

Борисов објасни дека на средбата се разговарало за најтешките проблеми во Европа.

– Од Балканот зрачиме со мир, стабилност, просперитет. Зборувавме за развој на бизнисот, на туризмот, на заедничките проекти. Во 2002 или 2003 година беше создадена патната карта по која ние уверено се упативме кон ЕУ. Сега меѓу нас е претседателот на Србија и ние знаеме дека нејзиното место е во ЕУ. Сите вложуваме  напори за да може процесот да се забрза. Мислам дека тоа ќе биде во полза на мирот на Балканот – изјави Борисов по средбата во Евксиноград.

Тој кажа дека на четиристраната средба учесниците се обединиле околу тезата дека природно е продолжението на проектот за поврзување на Егејско со Црно Море и со Дунав, кој беше тема на средбата во Кавала, да биде со вклучување на Белград.