На Богородица и Табановце се чека од 15 до 30 минути за излез од државата


Скопје, 8 август, 2018 - 13:02 (META) 

Сообраќајот на државните патишта се одвива по суви коловози со зголемен интензитет на патните правци надвор од градските средини. На граничните премини Богородица и Табановце има зголемена фреквенција на возила и за излез од државата се чека од 15 до 30 минути, информира АМСМ.

На останатите гранични премини, од македонска страна, нема подолги задржувања за влез и излез од државата.

Од АМСМ препорачуваат внимателно возење, прилагодена брзина на движење и почитување на поставената сообраќајна сигнализација. Во клисурите и засеците можна е појава на одрони, особено на патните правци: Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.


МВР пронајде 26 мигранти во две возила на патот Гевгелија – Скопје


Скопје, 3 декември, 2017 - 13:11 (META) 

Вчера, во 12 часот, мешовит патролен тим од полициска станица за граничен премин и граничен надзор Богородица, на автопатот Гевгелија – Скопје, забележал автомобил „рено еспејс“ со велешки регистарски ознаки, при што на даден знак возачот да го запрел возилото, тој ја зголемил брзината и се упатил кон село Миравци, каде се обидел да побегне.

Полицијата го привела лицето С.М. (35) од село Бузалково, Велешко, а при контрола, во неговиот автомобил пронашла 12 мигранти. Возачот е предаден во полициска станица Гевгелија за понатамошна постапка.

Утрово на граничен премин Богородица за влез во Македонија во товарно моторно возило „волво“ со скопски регистарски ознаки управувано од Р.Т. (63) од Србија, со место на живеење во Скопје, откриени се 14 илегални мигранти. Се преземаат мерки за расчистување на случајот.


Полицијата пронашла 15 мигранти кои нелегално биле превезувани


Гевгелија, 26 февруари, 2017 - 13:20 (META) 

Полициски службеници, на автопатот Гевгелија – Скопје, во близина на местото Авлак, забележале возило „крајслер“ со повеќе лица, кое со голема брзина се упатило кон Скопје.

Од страна на полициските службеници во близина на Удово возилото било сопрено, а возачот избегал.

При преглед на возилото, утврдено е дека регистарските ознаки се од друго возило, кои на 31 јануари биле пријавени за украдени.

Во возилото биле затекнати 15 лица – мигранти, од кои седум лица (и едно дете) од Ирак, пет лица (и едно дете) од Сирија и едно лице од Пакистан.

Лицата биле приведени во полициската станица на граничниот премин Богородица, каде што полициски службеник извршил разговор.


Народна банка пушти во оптек нови ковани пари за колекционерски цели


Скопје, 20 февруари, 2017 - 15:19 (META) 

Народна банка го издаде и го пушти во оптек комплетот ковани пари за колекционерски цели наречен „Триптих“.

Исус Христос, Богородица и Св. Никола Чудотворец се на монетите за колекционерски цели „Триптих“. Цената на комплетот изнесува 4.500 денари.

Кованите пари за колекционерски цели издадени од Народната банка се законско средство за плаќање во Македонија.


Гевгелиските таксисти и денеска два часа ќе ја блокираат границата


Гевгелија, 16 февруари, 2016 - 11:44 (META) 

И денеска продолжува блокадата од гевгелиските таксисти и од приватните автобуски превозници на граничниот премин Богородица. Блокадата за влез и за излез од земјата почна во 10 часот, а ќе трае до 12 часот.

Превозниците сè уште немаат одговор на нивното барање да се вклучат во превозот на бегалците од јужната кон северната граница. ­

„Ни беше ветено од надлежните дека до синоќа ќе стигне одговорот на нашето барање, но тоа не се случи и покрај тоа што чекавме до последен момент. Нашата добра волја не се почитува, па затоа одлучивме да продолжиме со блокирањето на граничниот премин секој ден по два часа. До кога ќе трае тоа веќе не зависи од нас – рече денеска претседателот на такси-здружението, Миле Ангелов.

Барањето на автобуските и на такси-превозници е тие во дневните часови да ги превезуваат мигрантите кон Табановце, а ноќе тоа да го прават возовите на МЖ.


Таксистите од Гевгелија ги блокираа границата и градот


Гевгелија, 10 февруари, 2016 - 13:05 (META) 

Околу 250 автобуски и такси-превозници од Гевгелија напладне почнаа двочасовна блокада на граничниот премин Богородица. Тие бараат да бидат вклучени во превозот на мигрантите според неодамна постигнатиот договор.

Освен блокадата на сообраќајот во двете насоки на граничниот премин, тие еден час ќе го попречуваат и пристапот до градот.

Причина за протестот е што изминативе два дена не се почитува договорот за рамноправен превоз на мигрантите со „Македонски железници“.

Според договорено на состанокот на Координативното тело за справување со кризи, такси-возилата и автобусите би требало да ги транспортираат мигрантите дење, а возовите ноќе.


Бугарите ја блокираа бугарско-грчката граница


Софија, 9 февруари, 2016 - 12:46 (META) 

Возачите на камиони во Бугарија денеска на најголемиот граничен премин Кулата-Промахон, го блокирале граничниот преминот со Грција за сите возила, како реакција на блокадата на овој премин од грчките земјоделци, кои веќе осум дена не дозволуваат возачите да ја поминат границата.

На граничниот премин Кулата-Промахом е формирана колона на камиони долга околу 30 километри.

Бугарското министерство за внатрешни работи соопшти дека е сопрен сообраќајот и на граничниот премин Илинден-Ексохи.

Од вкупно 135 блокади, колку што има низ цела Грција, од 68 места земјоделците в петок ќе заминат во Атина на протест.

 


Грчките земјоделци и денеска ќе ги блокираат граничните премини Богородица и Дојран


Атина, 6 февруари, 2016 - 11:27 (META) 

Според најавите од Грција, граничниот премин Богородица и денеска ќе биде блокиран од 11 до 14 часот, а потоа и од 18 до 21 часот по македонско време.

Весникот „Нафтемпорики“ јавува дека преминот Дојран ќе биде блокиран 24 часа, од денеска од 11 часот до утре до 11 часот.

На двата гранични премина има околу 800 трактори, кои речиси три недели го блокираат протекот на возила.

Слична е ситуацијата и на граничните премини кон Бугарија и кон Турција.

Земјоделците бараат владата да седне на преговори со нив и да ги прифати барањата да се почне целосно нова дискусија за законот за здравствено и за пензиско осигурување.

Доколку не се дојде до договор, земјоделците се закануваат со интензивирање на блокадите.


Илјадници бегалци чекаат од грчката страна на Богородица да преминат во Македонија


Атина, 2 февруари, 2016 - 11:24 (META) 

Во Грција продолжува да се зголемува паниката дека државата ќе остане заглавена со илјадници бегалци и мигранти.

Грчките медиуми јавуваат дека граничниот премин кај Богородица, односно Идомени е преполнет со бегалци од грчка страна бидејќи македонските граничари пропуштаат многу мал број бегалци и мигранти.

Според информациите од грчката полиција, минатата ноќ се пропуштени 750 бегалци, додека во бегалскиот камп кај Идомени својот ред и шанса да заминат во земјите од Европската унија чекаат 700 бегалци. Но, бројката е драстично поголема на само неколку километри подалеку, односно на бензинската пумпа кај Поликастро, која стана неформален бегалски камп. Таму во моменов има околу 4.000 лица, кои чекаат да бидат префрлени во кампот кај Идомени и оттаму да видат дали ќе бидат пропуштени во Македонија.

Грчката влада од вчера најави дека во соработка со армијата ќе го интензивира градењето на пет прифатни бегалски центри и контролни точки за регистрирање на бегалците, чекор направен по негативниот извештај на Европската комисија за начинот на кој државата се соочува со бегалската криза, а кој доведе до изјави од европските функционери дека Грција би можела привремено да биде исклучена од шенген-зоната.

Иако грчката влада демантира дека тоа може да се случи, опозициските партии предупредуваат дека исклучувањето од шенгенската зона е реална опасност и владата мора да реагира за да не дозволи да се дојде до тој чекор.


Грчките земјоделци денеска од 11 до 13 часот ќе ги блокираат премините Богородица и Дојран


Атина, 26 јануари, 2016 - 9:36 (META) 

Грчките земјоделци денеска повторно ќе ги блокираат граничните премини Богородица и Дојран. Блокадата ќе биде поставена од 12 до 14 часот по локално време, односно од 11 до 13 часот по македонско време.

Покрај македонската, земјоделците ги блокираат и граничните премини од Грција кон Албанија и кон Бугарија. Најлоша засега е ситуацијата кај преминот Промахонас кон Бугарија, каде грчките земјоделци од вчера најавија дека постојано ќе биде блокиран, без паузи. На границата веќе има огромна редица возила и камиони. Блокот на Промахонас беше тргнат накратко вчера вечерта, по тензични расправии меѓу земјоделците и голем дел од возачите кои сакаа да заминат кон Бугарија.

Денеска напладне земјоделците од цела Грција ќе се состанат во Солун, во Синдос и ќе се договорат за иднината на протестите и дали воопшто ќе се сретнат со премиерот Алексис Ципрас. Земјоделците планираат масовен протест во Солун в четврток, за време на отворањето на Саемот за земјоделство.

Процените се дека по денешниот состанок можно е протестите и блокадите на земјоделците да се интензивираат во знак на незадоволство поради одлуката на владата да се продолжи со спроведување на законот за реформи во пензиското и во здравственото осигурување.