!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

СДСМ: Ребалансот на буџетот ги пренасочува парите кај граѓаните


Скопје, 17 јули, 2017 - 16:08 (META) 

Не постои поголемо и поштетно задолжување од тоа што ВМРО-ДПМНЕ им го направи на граѓаните на Македонија за време на 11-годишното криминално владеење, се вели во реакцијата на СДСМ на соопштението на ВМРО-ДПМНЕ за ребалансот на буџетот.

Од владејачката партијата велат дека ВМРО-ДПМНЕ се задолжувала расипнички, тајно и нетранспарентно, а парите од скапите задолжувања ги трошела непродуктивно, за луксузирање и за криминално богатење на поединци.

„Таквиот расипнички однос на ВМРО-ДПМНЕ кон парите на граѓаните, резултираше со јавен долг од повеќе од 50 проценти од домашниот бруто-производ, со околу 500.000 осиромашени граѓани и повеќе од 180.000 граѓани кои живееа со само 40 денари дневно. Ребалансот на буџетот е првиот чекор кон поправање на економските штети предизвикани од криминалното владеење на ВМРО-ДПМНЕ и враќање на парите кај граѓаните. Преку ребалансот се решаваат долгогодишни проблеми на граѓаните, се намалуваат животните трошоци и се создаваат услови за придвижување на економијата и за севкупен економски пораст“, се вели во соопштението.


Нова кривична пријава за ексдиректорот на Неврохирургија


Скопје, 15 јули, 2017 - 13:41 (META) 

СВР Скопје соопшти дека до Основното јавно обвинителство-Скопје поднел кривична пријава против А.Ч. (57), поранешен директор на Клиниката за неврохирургија во Kлиничкиoт центар „Мајка Тереза“. Го товари за противправно стекнување и прикривање имот.

Според новата пријава, Александар Чапаровски, кој претходно во мај доби кривична пријава за примање поткуп, од 2007 до 2017 година, спротивно на обврската, не ја пријавил својата имотна состојба во Државната комисија за спречување на корупција, за да прикрие, како што вели полицијата, значителен износ пари, недвижен имот и скапи монети.

СВР Скопје, по наредба од Основен суд Скопје 1 и од Основно јавно обвинителство Скопје, во присуство на јавен обвинител, отворило сеф во банка кој бил изнајмен од Чапаровски и во него се пронајдени 199.000 евра, 18.300 американски долари, 21.900 швајцарски франци, 1.500 фунти, 50 бугарски лева, како и паричник со 19 монети од благороден метал и накит, за кои пријавениот немал доказ од каде потекнуваат.

Истражувајќи ја документацијата во Агенцијата на катастар за недвижности е утврдено дека Чапаровски има шест имотни листа за недвижен имот на подрачјето на Скопје и еден имотен лист за недвижен имот во Гостивар.

Чапаровски во мај доби кривична пријава за примање поткуп, а во неговата работна канцеларија беа пронајдени вкупно 24.890 евра, 4.477 американски долари, 2.250 швајцарски франци, 65 австралиски долари, 170 хрватски куни, 60 бугарски лева и 4.700 денари, додека при извршен претрес во неговиот дом пронајдени се и одземени вкупно 9.750 евра и 10.000 денари.


СДСМ: Владeењето на Груевски е најголемото антиреформско владеење во историјата на Македонија


Скопје, 4 јуни, 2017 - 16:40 (META) 

Социјалдемократскиот сојуз на Македонија, како што се обврза пред граѓаните, ќе предводи реформска влада што ќе обезбеди достоинствен живот, правда и евроатлантски перспективи за граѓаните и за Република Македонија, велат од партијата.

„Ќе има реформи што ќе обезбедат повисоки плати и нови работни места, преку државна поддршка на домашните претпријатија. Ќе има редовни субвенции, повисоки и од 160 милиони евра. Ќе има реформи во правосудството преку реизбор според најдобрите европски практики. Ќе има независни и професионални институции и медиуми. Ќе бидат земени предвид сите забелешки во извештаите на Прибе и на Европската комисија и ќе бидат отворени евроатлантските интеграции на Македонија“, стои во соопштението на СДСМ.

Од партијата додаваат дека 11-годишното владеење на Никола Груевски донело само изолација, сиромаштија, масовно иселување на граѓаните, заробени институции, криминал и корупција и урнисан образовен и здравствен систем.

„Владeењето на Груевски и на неговите соработници е најголемото антиреформско владеење во историјата на Македонија. Секој проект, секоја мерка што тие ги спроведуваа беа на штета на граѓаните и на државата. Најголемата реформа на Никола Груевски и на неговите соработници беше тоа што во време на најголема сиромаштија, ВМРО-ДПМНЕ стана најбогата партија во Европа. Секоја таканаречена реформа на Груевски го зголемуваше неговото лично богатство, на неговите соработници и на фамилијата, а го правеше полош животот на сите други граѓани“, стои во соопштението.


ВМРО-ДПМНЕ: Изјавите на Шилегов како да не се дадани при целосна свест


Скопје, 16 февруари, 2017 - 16:49 (META) 

Како што наближува денот кога ќе се дознае вистината за криминалот, така зачестуваат изјавите на Петре Шилегов кои наликуваат дека не се дадени при целосна свест, се вели во реакцијата на ВМРО-ДПМНЕ, на денешната прес-конференција на портпаролот на СДСМ.

„Аболицираниот криминалец Зоран Заев никогаш немал проблем да најде некој што јавно ќе се посрамоти со разни небулози, бидејќи Петре Шилегов со задоволство си го одработува богатството што го стекнува извршувајќи ги наредбите. Граѓаните на 11-ти декември гласаа против криминогеното раководство на СДСМ и бараа тие да одговараат пред судот и законите. Ниедна апсурдна изјава и ниедна манипулација на криминалниот двоец на СДСМ нема да им помогне да избегаат од соочување со правдата“, стои во соопштението на ВМРО-ДПМНЕ.

Од партијата велат дека целиот имот на СДСМ е под хипотека за кредит земен од Комерцијална банка, кој според пишувањата на медиумите, изнесувал 2 милиони евра и го повикуваат Шилегов да објасни „дали неговото енормно лично збогатување и богатењето на аболицираниот криминалец Зоран Заев е поврзано со тој кредит“.

„Од каде му е на Петре Шилегов нов капитал од 200.000 евра заработен за само 2 години? Јасно е дека криминогеното раководство на СДСМ е во паника. Секој што сторил криминал, треба да се плаши“, велат од ВМРО-ДПМНЕ.


„Гардијан“: Во Македонија се прават скапи брендирани чевли за минимални плати


Скопје, 23 август, 2016 - 11:06 (META) 

„Работници во Албанија и во Македонија земаат толку ниски плати што не можат да ги прехранат своите семејства, а јазот меѓу законски загарантираната минимална плата и висината на исплатените дневници е поголем отколку во Кина. На овој начин некои светски брендови за производство на чевли остваруваат огромен профит на грбот на сиромашниот работник“, се вели во текстот на „Гардијан“ во врска со тоа дека скапите чевли што носат предзнак „произведено во Италија“, всушност, се прават во земји со евтина работна сила каде што се експлоатираат работници.

Истрагата за производството на чевли ја повела Европската чевларска индустрија, која открила шокантни услови за работа во фабриките што произведуваат чевли за пазарот во Велика Британија, а во кои работат работници платени под законскиот миниум.

Во текстот на „Гардијан“, исто така, се наведува дека „една македонска фабрика што го произведува брендот за чевли „Геокс“, работниците ги плаќа 131 евро месечно, сума во која а вклучена и прекувремената работа“. Текстот потсетува дека минималната плата кај нас изнесува 145 евра и дека во таа сума не влегуваат прекувремените часови на работа.

Како земји во кои се експлоатира работната сила за производство на скапи италијански и германски чевли, покрај Македонија и Албанија, се споменуваат и Полска, Романија и Словачка.