!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Блокирана одлуката на Трамп за укинување на програмата за помош на младите имигранти


Вашингтон, 10 јануари, 2018 - 10:34 (META) 

Американскиот судија Вилијам Алсап синоќа привремено ја блокирал одлуката на администрацијата на претседателот на САД, Доналд Трамп за укинување на програмата која ги штити младите имигранти од депортација.

Како што пренесуваат светските агенции, Алсап го одборил барањето на сојузната држава Калифорнија и на другите тужители да се спречи укинувањето на програмата која ги штити децата кои со родителите илегално дошле во САД, се додека не бидат завршени судските постапки по тужбите на засегнатите.

Алсап рекол дека адвокатите кои ја поддржуваат програмата јасно покажале дека младите имигранти можат да сносат озбилна и неповратна штета доколку судот би донел поинаква одлука. Судијата, исто така, рекол дека адвокатите имаат големи шанси да успеат во тие судски постапки.

Инаку, програмата заштитува околу 800.000 лица кои се доведени во САД илегално како деца или дошле со своите семејства кои останале во САД и по истекот на визите. Програмата вклучува стотици илјади млади на факултетска возраст, кои медиумите во САД ги нарекуваат „Сонувачи“ (Dreamers).

Програмата ја иницираше поранешниот американски претседател, Барак Обама во 2012 година.

Американскиот министер за правда, Џеф Сешонс во септември, минатата година објави дека програмата ќе биде постепено укината, наведувајќи дека поранешниот претседател Обама ги пречекорил своите овластувања кога го применил во 2012 година, заобиколувајќи го Конгресот.


Шилегов: Судии под контрола на власта се префрлаат по директиви од Неготино во Скопје


Скопје, 7 февруари, 2017 - 14:58 (META) 

Основниот суд Неготино е блокиран и не може нормално да работи бидејќи судии под контрола на власта во заминување се префрлаат по директиви во судовите во Скопје, обвини денеска на прес-конференција портпаролот на СДСМ, Петре Шилегов.

Тој се повика на документ, со кој, како што наведе, Основниот суд Неготино го информира Апелацискиот суд во Скопје дека состојбата во кривичниот оддел е алармантна.

– Причина за ваквото барање на Основниот суд во Неготино е тоа што во судот има само двајца судии и претседател, наместо законски утврдениот број од четири судии и претседател. Значи, во судот во Неготино нема доволен број судии за да одлучуваат по предмети за кривични дела. Судот во Неготино поради тоа бил принуден да побара Апелацискиот суд да определи друг надлежен суд за да не застарат кривичните предмети – рече Шилегов.

Една од судијките, нагласи Шилегов, која се посочува дека е префрлена од Основниот суд во Неготино во Скопје е судијката Александра Поп-Стефанија.

– Таа во Скопје прво е донесена во судот за прекршоци, а потоа беше префрлена во одделот за организиран криминал во Кривичниот суд во Скопје. За потсетување, Поп-Стефанија беше назначена за судијка во одделот за организиран криминал од страна на претседателот на судот, Владимир Панчевски, спротивно на Законот за судовите, одлуката на Судскиот совет и на правилникот за работа на судот. Токму оваа судијка е една од најекспонираните во кочењето на работата на Специјалното јавно обвинителство – истакна Шилегов, додавајќи дека „ова е само една од причините зошто на Македонија ѝ е итно потребна нова и одговорна влада на граѓаните, која ќе обезбеди итни реформи во судството“.


Блокиран патот Тетово – Јажинце, отсечени неколку села од Мавровско-реканскиот крај


Тетово, 6 јануари, 2017 - 11:06 (META) 

Голем снежен нанос синоќа по полноќ го затрупа патот Тетово – Јажинце, на само 200 метри од граничниот премин Јажинце. Повеќе возила на ова место се заглавени, а патниците се згрижени на граничниот премин и во селото Јажинце, информира портпаролот на СВР Тетово, Марјан Јосифоски.

Од Јавното претпријатите „Македонија пат“ – секција Тетово, велат дека нивни екипи со специјална механизација се тргнати кон граничниот премин, заради расчистување на патот и слободен протек на возила. Оттаму се надеваат дека во текот на денот, целиот снежен нанос кој се спуштил од Шар Планина на патот, ќе биде остранет.

Поголеми проблеми од големите снежни врнежи во Западна Македонија се јавија во Мавровско-реканскиот крај. Дел од селата од овој регион ноќеска снемаа струја, но сега состојбата со напојување на електрична енргија е стабилизирана.

Од Секторот за внатрешни работи Тетово информираат дека селата Сенце, Нистрофо и Дуф се отсечени поради блокираните патишта што водат до нив.

Автопатиштата и регионалните патни правци во Западна Макеодонија се проодни. Забраната за тешки товарни возила кон скијачкиот центар Попова Шапка и кон планинскиот превој Стража сè уште е на сила.


Нова жртва на невремето и на поплавите во Грција


Атина, 10 септември, 2016 - 12:37 (META) 

Бројот на жртвите од невремето и од поплавите во Грција се искачи на пет лица, откако доцна ноќеска беше пронајдено безживотното тело на 30-годишен маж во областа Ксилокастро кај Коринт.

Претпоставките се дека човекот бил заглавен во автомобилот кога почнало невремето и во обид да излезе од него и да отиде на безбедно место, бил повлечен од најдојдените води.

Голем дел од Пелопонез е одново поплавен по синоќешното невреме и по силните врнежи од дожд. Проблеми има во Коринт и во Трикала, каде се поплавени голем број куќи. Дел од патиштата се повторно отсечени, а противпожарните служби цела ноќ интервенираа на терен за да се помогне да се извлече водата од поплавените куќи.

Тие интервенирале во извлекувањето на едно возило и на еден камион заглавени на локален пат во Трикала, а слична интервенција имаше и на автопатот кај градот Ламиа, каде беа заглавени повеќе автомобили и камиони.

Денеска за сообраќај е затворен и дел од автопатот Егнатиа, кој се поплави поради силните врнежи изминатите два дена, за противпожарните служби да може да ја испумпаат водата. Сообраќајот е пренасочен преку стариот пат Кожани – Јанина.


Бегалците од Идомени повторно го блокираа автопатот Солун – Евзони


Атина, 2 април, 2016 - 14:12 (META) 

Бегалците од Идомени започнаа нов протест и блокада на автопатот Солун – Евзони кон македонско-грчката граница, јавува грчката телевизија „Мега“. Според телевизијата неколку стотици бегалци се распоредени на двете страни на автопатот и покрај сите мали патчиња кои водат кон автопатот со цел да не дозволат пристап на возилата.

Утринава на автопатот немало проблеми и македонските граѓани кои патуваат кон Солун слободно поминале, но во моментов тој е блокиран.

Седнати на автопатот бегалците скандираат со барање да се отвори границата за да си заминат од кампот кај Идомени, каде повеќе од еден месец живеат во очајни, нехигиенски услови. Во кампот се позачестено е и физичкото насилство. Пред неколку дена беше забележан инцидент каде бегалец беше нападнат со нож.

Поради протестот се создаваат колони возила и камиони од двете страни на автопатот и чекаат протестот да се расчисти за да го продолжат патот. Меѓу возачите се создава и тензија поради неочекуваниот протест.

Утринава, пред протестот на бегалците, свој симболичен протест во знак на незадоволство што државата сè уште не успева да го испразни кампот кај Идомени одржаа и неколку десетици граѓани од локалната заедница. Тие го блокираа мостот кај реката Вардар во насока кон Идомени, каде според официјалните бројки се заглавени 11.318 луѓе.

Градоначалникот на областа Пеонија, Христос Гуденудис истакна дека нервозата расте и кај бегалците, но и кај жителите кои се во и околу Идомени. Тој изрази и стравување да не дојде до судири меѓу бегалците и локалните жители.

Бегалците продолжуваат да доаѓаат од Солун и околните градови кон Идомени секојдневно, наводно поради информации дека границата ќе се отвори.