САСА: Работата на рудникот беше загрозена поради незаконска блокада


Македонска Каменица, 14 март, 2018 - 13:58 (META) 

Група поддржувачи на огранокот на Мултиетничкиот синдикат на образованието (МЕСО) од Македонска Каменица, спротивно на Законот, утринава поставиле блокада на патот што води кон рудникот САСА, при што автобусот што ги превезува работниците од првата смена во рудникот бил спречен да дојде до рудникот и на работниците им било оневозможено да стигнат на своите работни места, тврдат од компанијата.

Во моментов, рудникот САСА функционира нормално, но доколку ваквата незаконска блокада продолжи, ќе се доведе во прашање натамошната работа, што ќе предивика големи штети и за компанијата и за сите нејзини 700 вработени, велат од таму.

За целата ситуација биле информирани надлежните државни органи, од кои, согласно нивните законски надлежности, е побарано да преземат мерки за целосна деблокада на патот кон рудникот.

„Согласно одредбите од Законот за работни односи, протестот организиран од локалниот огранок на МЕСО е незаконски. Рудникот САСА досега имаше одлична соработка со вработените и нивниот легитимен синдикат које е дел од СИЕР – Синдикатот на индустријата, енергетиката и рударството, за што доказ се досегашните постигнати резултати во безбедноста при работа, платите кои се двојно поголеми од просечните плати во земјата и вложувањата во нова технолија и подобри услови за работа“, се вели во соопштението на компанијата.

Во него се додава дека, според Законот, менаџментот на рудникот е обврзан да разговара и соработува со оној синдикат кој во законска процедура докажал дека ги претставува вработените.

„Тоа досега беше синдикатот на рударите при СИЕР. Секој друг синдикат, за да може да преговара, согласно Законот за работни односи, е обврзан да го докаже истото. Досега, и покрај барањата од страна на компанијата, новиот огранок на МЕСО нема доставено до рудникот ниту еден формален доказ дека е репрезентативен синдикат во САСА. Исто така, согласно Законот, пред да се започне со штрaјк или протест, двата синдикати треба да состават заеднички тим за преговори со менаџментот и да отпочнат процес на медијација. Ниту еден од овие законски одредби досега не е исполнет, што го спречува менаџментот на компанијата да постапува“, објаснуваат од САСА.


СДСМ: ВМРО-ДПМНЕ и Мицкоски се обидуваат да ги блокираат реформите и Собранието


Скопје, 14 март, 2018 - 11:55 (META) 

Сè она што го прават Христијан Мицкоски и ВМРО-ДПМНЕ во Собранието нема никаква врска со законот за употребата на јазиците туку единствено станува збор за обид за блокадата на Собранието, блокада на реформскиот процес и обид за блокада на европската перспектива на државата, велат од СДСМ како реакција на соопштението на ВМРО-ДПМНЕ.

„Продолжувајќи ги штетните политики на Никола Груевски, токму Христијан Мицкоски промовира поделби и блокади со што продолжува да работи спротивно на интересите на граѓаните и против концептот едно општество за сите. Фактот што ВМРО-ДПМНЕ претходно го прифати Законот за употреба на јазиците, како и фактот што речиси 33 илјади амандмани од поднесените околу 35 илјади се однесуваат само на казнените одредби, потврдува дека амандманите немаат врска со законот туку служат само за блокада на Собранието“, велат од СДСМ.

Од владејачката партија ги обвинија Мицкоски и ВМРО-ДПМНЕ и за лажен патриотизам.


Опозицијата да биде разумна и да не го блокира Собранието, законот и реформите, порача Заев


Скопје, 29 јануари, 2018 - 11:23 (META) 

Премиерот Зоран Заев очекува дебатата за законот за јазиците да се води на координација меѓу партиите кај претседателот на Собранието Талат Џафери, а опозицијата да покаже разум за да не дојде да блокада на реформските процеси.

– Јас сум Зоран Заев кој водеше борба за слобода и демократрија. Демократријата е императив. Секако поднесувањето на амандмани е право на опозицијата кое треба да се почитува, но тука е обврската дека со таквото право се блокира Собранието. Јас сум загрижен за реформските процеси и како ќе одат законите што се важни од планот 3-6-9 – рече Заев.

Тој истакна дека Македонија е пред позитивна клима со можност за почнување на преговорите за членство во ЕУ, кое како што рече, се надева треба да биде во јуни.

– Ако ги заглавиме реформите, нема да можеме да се движиме во овој правец. Верувам дека опозицијата ќе биде разумна и дека ќе се изнајде решение. Решение во рамките на законот за Собрание и деловникот – рече Заев.


СДСМ: ВМРО-ДПМНЕ сака со нова политичка блокада да ги закочи реформите


Скопје, 27 јануари, 2018 - 17:50 (META) 

Најавата дека ВМРО-ДПМНЕ ќе се врати во Собранието само за да го блокира Законот за употреба на јазиците е уште еден доказ дека опозициската партија продолжува да работи спротивно на интересите на граѓаните и на државата и дека нејзина единствена цел е да создаде нова политичка блокада со која ќе го закочи реформскиот процес, реагираат од СДСМ.

Од владејачката партија велат оти е очигледно дека ВМРО-ДПМНЕ нема капацитет да ги напушти политиките на деструкција и блокади, коишто предизвикуваат политички тензии, поделби и раздор во општеството.

„Со таквото дејствување, ВМРО-ДПМНЕ е против европските вредности и против концептот на едно општество и уште еднаш докажува дека не се грижи за интересите и потребите на граѓаните, туку дека води ситни, провидни политикантски игри“, стои во соопштението на СДСМ.

Оттаму го повторуваат ставот дека Законот за употреба на јазиците е во согласност со Уставот и Амандманот 5 и дека законот не фаворизира и не дискриминира ниту еден јазик, туку ја унапредува употребата на јазиците на сите немнозински заедници што живеат во Македонија.

„Законот не го доведува во прашање унитарниот карактер на Македонија, а употребата на македонскиот јазик и неговото кирилско писмо и понатаму остануваат единствени официјални службен јазик и писмо на територија на Република Македонија, во меѓународните односи, одбраната, монетарната политика и централната полиција“, велат од владејачката партија.


Заврши финансиската блокада на американската влада


Вашингтон, 23 јануари, 2018 - 9:54 (META) 

Тридневната блокада на Владата на САД е завршена, откако Сенатот на американскиот Конгрес го усвои предлог законот за привремено финансирање на владата на САД.

За повторно отворање на федералните агенции гласале 81 сенатор, додека 18 биле против. За гласањето за буџетските прашања потребно беше мнозинство од 60 сенатори.

Американската влада беше блокирана од саботата откако не беше постигнат договор за буџетот што демократите го условуваа со договорот за заштита од депортација на околу 700 илјади имигранти кои во земјата се доведени како деца и останале илегално.

Десетици илјади сојузни административци престанаа да работат на првиот ден од блокадата, но клучните сервиси за безбедност и одбрана продолжија да функционираат.

Во Сенатот е постигната согласност до 8 февруари да почне дебата за предлог законот за имиграцијата.

Потпретседателот Мајк Пенс од Ерусалим порача дека со постигнувањето на договорот пропаднала „Шумеровата блокада“.

-Ја поздравуваме веста дека блокадата во Вашингтон завршила, за што се заслужни цврстиот став на претседателот Трамп и на републиканците од Претставничкиот дом и Сенатот – порача Пенс.


Трамп: Демократите ми дадоа „убав подарок“ за првиот јубилеј како претседател


Вашингтон, 20 јануари, 2018 - 17:03 (META) 

Американскиот претседател Доналд Трамп ги обвини демократите заради тоа што американската влада е во финансиска блокада.

-Демократите се многу позагрижени за илегалните мигранти отколку што ги загрижува нашата војска или безбедноста на нашата јужна граница – напиша Трамп на „Твитер“.

Тој потенцираше дека „лесно можеле да се договорот, но дека одлучиле да одат на блокада“.

Освен тоа тој на „Твитер“ потенцираше дека денеска е една година откако тој стапи на функцијата претседател на САД, и дека демократите му дале „убав поклон“.

-За оние кои се прашуваат, републиканците имаат само 51 глас во Сенатот, а потребно им е 60. Затоа треба да освоиме повеќе места за републиканците на изборите во 2018 година – напиша Трамп и додаде дека Америка е на прво место.


Амбасадата на САД ќе издава визи и покрај финансиската блокада на американската влада


Скопје, 20 јануари, 2018 - 14:03 (META) 

Амбасадата на САД во Скопје соопшти дека нејзиниот сервис за пасоши и визи, како и за итни случаи за американските граѓани, ќе продолжи да работи и покрај затворањето на американската влада.

„Закажаните сервиси за пасоши и визи и сервисите за итни случаи за граѓаните на САД ќе продолжат во амбасадата за време на затворањето на владата на САД. Нема да го обновуваме овој профил редовно, освен во итни случаи“, соопшти Амбасадата на САД на својот официјален „Твитер“ профил.

Делумно затварање на американските федерални служби стапи на сила на полноќ, по неуспешниот обид републиканците и демократите во Сенатот да постигнат компромис за буџетот. Ноќеска, сенаторите не го изгласаа законот да го продолжат финансирањето на владата до 16 февруари. За да помине законот беа потребни 60 гласа од вкупно 100, но само 50 го поддржаа.

Појавата на финансиска блокада е невообичаена но се случувала и порано. Од 1981 година имало 12 вакви случаи, а блокадите варирале по должина на траењето.


Американската влада во финансиска блокада


Вашингтон, 20 јануари, 2018 - 11:29 (META) 

Делумно затварање на американските федерални служби стапи на сила по неуспешниот обид републиканците и демократите во Сенатот да постигнат компромис за буџетот.

Претставничкиот дом изгласа закон со кој се продолжува финансирањето на буџетот до 16 февруари, но Сенатот не го потврди и покрај интензивните преговори на републиканците и демократите и интервенцијата на американскиот претседател Доналд Трамп.

Откако двата дома на американскиот Конрес до полноќ не успеаја да постигнат договор за усвојување на предлогот за продолжување на финансирање на федералната влада во Вашингтон, дојде до финансиска блокада.

За да помине законот беа потребни 60 гласа од вкупно 100, но само 50 го поддржаа.

Затварање на некои сојузни агенции стапи на сила на полноќ, но не е можно да се предвиди колку ќе трае.
Блокадата на владата нема да го опфати финансирањето на секоја агенција, програма и услуга која ја финансира федералната влада, додека вработените во агенциите и министерствата кои не се сметаат за клучни ќе престанат да работат се додека Конгресот не биде во состојба да го усвои законот за федералниот буџет.

Појавата на финансиска блокада е невообичаена но се случувала и порано. Од 1981 година имало 12 вакви случаи, а блокадите варирале по должина на траењето.


Трамп бара од демократите да спречат блокада на сојузната администрација


Вашингтон, 19 јануари, 2018 - 17:10 (META) 

Претседателот на САД, Доналд Трамп ги повика сенаторите од редот на демократите да гласаат за законот за привремено финансирање на владата за да не дојде до парализирање на сојузната администрација, јавуваат агенциите.

Трамп притоа ги критикуваше демократите во Сенатот, велејќи дека „тие сакаат нелегална имиграција и слаби граници“.

„Законот за привремено финансирање на владата е одобрен ноќеска во Претставничкиот дом. Сега се потребни гласовите на демократите за да биде одобрен во Сенатот, но тие сакаат нелегална имиграција и слаби граници“, напиша Трамп на „Твитер“.

Долниот дом на Конгресот синоќа го изгласа законот со кој продолжува финансирањето на буџетот до 16 февруари. Сенатот би требало да гласа за законот денеска до полноќ, кога престанува досегашниот начин на финансирање.

Трамп предупреди дека доколку текстот на законот не добие зелено светло во Сенатот, ќе дојде до блокада на сојузната влада, поради што голем број на сојузни агенции може да бидат затворени.


Мицкоски: ВМРО-ДПМНЕ нема да учествува во Собрание зошто нема демократски амбиент


Скопје, 9 јануари, 2018 - 13:46 (META) 

Христијан Мицкоски, претседателот на најголемата опозициска партија денеска пред Собранието изјави дека пратеничката група на ВМРО-ДПМНЕ нема да учествува во работата на законодавниот дом се додека не престане, како што, „рече политичкиот прогон на власта кон неистомислениците“ и не бидат ослободени притворените за насилствата од 27 април.

– Во Македонија во моментов нема демократски амбиент за нормално функционирање на Собранието. Дванаесет проценти од пратеничката група на ВМРО-ДПМНЕ или 5 проценти од собранискиот состав е во притвор под конструирано обвинение за тероризам – рече Мицкоски.

Тој ги повтори наодите на Народниот правобранител дека при приведувањето на пратениците на 28 ноември минатата година било прекршено начелото на пратенички имунитет со што како што наведе, надлежните органи извршиле противправно лишување од слобода на пратениците.

Мицкоски рече дека одговорноста е на власта и дека таа мора да избере помеѓу реформите и просперитетот и прогонот на политичките неистомисленици.

Лидерот на ВМРО-ДПМНЕ изјавата ја даде пред еден од влезовите на Собранието придружуван од поголемиот дел од пратениците на опозициската партија, меѓу кои сепак не беа присутни Илија Димовски, долгогодишниот координатор на пратеничката група и пратеникот Антонио Милошоски, кои беа меѓу членовите на партијата кои бараа одложување на партискиот конгрес за избор на нов партиски лидер.

Одговарајќи на новинарско прашање, Мицкоски рече дека пратеничката група е единствена и дека сите пратеници стојат на одлуките донесени на денешниот координативен состанок на партијата.

Прашан дали има комуникација помеѓу пратеничката група на ВМРО-ДПМНЕ со претседателот на Собранието и со пратеничката група на СДСМ, Мицкоски рече дека постои, но се одвива преку ретки средби и состаноци кои се однесуваат на работата на одредени комисии. Тој потврди дека опозициската партија има формирано работна група за дел од реформските закони и дека комуницира и се координира со работната група на владејачкото мнозинство околу овие прашања.