!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Само што почна, „паузирана“ седницата за разрешувањето на Зврлевски


Скопје, 10 јули, 2017 - 12:17 (META) 

Седницата на Собранието на Република Македонија на која треба да се расправа за разрешување на републичкиот јавен обвинител, Марко Зврлевски, продолжи денеска во 11 часот, но веднаш беше прекината откако координаторот на седмата од десетте пратенички групи на опозициската ВМРО-ДПМНЕ, Димитар Стевананџија, побара еден час пауза.

Претседателот на Собранието, Талат Џафери, побара од Стевананџија да објасни „од која пратеничка група, од која политичка партија, од кој субјект бара пауза“ и, сепак, и покрај бурните реакции од мнозинството, ја прекина седницата.

Џафери, во четвртокот откако двајца од координаторите побараа пауза, ја прекина седницата и го најави нејзиното продолжение за денеска.

На днешното продолжение би требало да се расправа за oдлуката за давање согласност на општите акти на Народниот правобранител, по што следува расправата за разрешувањето на Зврлевски.

На дневниот ред се и годишни извештаи на некои агенции, како и предлог-законот за зголемување на породилното отсуство на 18 месеци.


Џафери: 10-те пратенички групи прават дилема дали ВМРО-ДПМНЕ е единствена партија


Скопје, 7 јули, 2017 - 16:54 (META) 

Формално, деловникот дозволува да се формираат повеќе пратенички група од пет пратеници, но од правен аспект тоа е дискутабилно и поради тоа се создава дилема кај нивниот електорат дали тоа е единствена политичка партија или имаат внатрешни проблеми, па затоа не сакам да им го коментирам овој потег, изјави денеска претседателот на Собранието, Талат Џафери, во врска со формирањето 10 пратенички групи во Собранието од страна на опозициската ВМРО-ДПНЕ.

– Не сакам да прејудицирам која е нивната намера, тоа ќе се покаже со нивното дејствување во Собранието. Ако се однесуваат како што се однесуваа вчера, тоа значи дека ќе ја искористат можноста низ принципот барање по еден час пауза, која координаторот има право да ја побара, и во 24 часа ќе бараат 10 часа пауза. Тие ќе поднесат политичка одговорност за нивното дејствување – рече Џафери.

Собранискиот спикер додаде дека денешната собраниска седница ја одложил за понеделник на барање на пратеничките групи, но не прецизираше за кои пратенички групи станува збор.

– Нивното постапување ќе резултира со соодветна постапка од моја страна, доколку оценам дека има некоја таква намера. Не сакам однапред да прејудицирам за нечија намера – рече Џафери.

Координаторот на една од пратеничките групи на ВМРО-ДПМНЕ, Илија Димовски, рече дека формирањето на 10 пратенички групи е последица на однесувањето на власта во минатите 40 дена кон опозицијата и дека на тој начин имаат можност да дискутираат подолго.

Димовски нагласи дека формирањето пратенички групи сепак не значи признавање на Талат Џафери како претседател на Собранието.

– Не го признаваме Џафери за легитимен претседател, нашето обраќање досега е идентично. Се обраќаме „до претседател на СРМ“, до институцијата, ниту пишуваме „Талат Џафери“, ниту го членуваме „претседателот“. Собранието не е на никој пратеник, тоа е на граѓаните – изјави координаторот на првата пратеничка група на ВМРО-ДПМНЕ.


Тунтев: Формирањето 10 пратенички групи е класична блокада на Собранието и на реформите


Скопје, 6 јули, 2017 - 16:29 (META) 

Координаторот на пратеничката група на СДСМ, Томислав Тунтев, на прес-конференција во Собранието изјави дека формирањето десет пратенички групи е класична блокада на законодавниот дом, како и блокада на реформите и оневозможување на граѓаните да ги добијат потребите услуги од државата.

– Со ваквата блокада, ВМРО-ДПМНЕ продолжува да се однесува лицемерно, себично, неодговорно и на директна штета на граѓаните. Парламентарното мнозинство, предводено од СДСМ, ќе направи сè за да не застанат реформите за кои гласаше мнозинството граѓани и кои носат добро за сите. Од авион се гледа дека опструираат за да не биде разрешен Марко Зврлевски. Ги повикуваме пратениците на ВМРО-ДПМНЕ да се откажат од ваквиот несовесен потег, кој, всушност, претставува понижување и девастација на институцијата Собрание, понижување на граѓаните и на демократските вредности и е спротивен од државните и интересите на граѓаните – изјави Тунтев.

Координаторот на пратеничката група на СДСМ додаде дека ниту граѓаните, ниту државата не смеат да бидат заложници на неколку лица од раководството на ВМРО-ДПМНЕ.


ВМРО-ДПМНЕ ја обвини Владата дека ја блокира изградбата на автопатот Кичево – Охрид


Охрид, 1 јули, 2017 - 15:43 (META) 

Опозициската ВМРО-ДПМНЕ денеска ги обвини СДСМ и Владата дека ја блокираат изградбата на автопатот Кичево – Охрид. Пратеникот на ВМРО-ДПМНЕ, Љубен Арнаудов, денеска од местото Мауцкер кај Охрид, каде треба да поминува автопатот, изјави дека претходната влада ја оставила изградбата на делницата во напредна фаза, а дека сега има целосен застој без никаков сигнал за нејзино продолжување.

– Неспособноста на СДС на дело се покажува токму тука. Граѓаните гледаат дека СДС немаат ниту капацитет, ниту визија и план за да ја водат Република Македонија. Единствено нешто кое добро им оди е блокирање, укинување и правење застои како што сега го прават со автопатската делница Кичево – Охрид – изјави Арнаудов.

Тој во името на ВМРО-ДПМНЕ порача дека изградбата на автопатот не смее да биде проблематизирана и опструирана и дека таа мора веднаш да продолжи, бидејќи автопатот е важен за Македонија и за целиот регион.

Инаку, како што претходно соопшти Владата, застојот во изградбата на автопатот е поради грешки во проектирањето, односно несовпаѓањето на проектираната и на изведената траса.


Возила го блокираа булеварот пред судот, продолжува протестот против обвиненијата на СЈО


Скопје, 30 јуни, 2017 - 13:19 (META) 

Неколку десетици граѓани денеска со своите автомобили го блокираа булеварот Гоце Делчев пред Кривичниот суд во Скопје, во знак на протест против обвиненијата што вчера ги поднесе Специјалното јавно обвинителство. До судот се поднесени и барања за одредување притвор на високи функционери на ВМРО-ДПМНЕ и поранешни министри, меѓу кои и за лидерот на партијата и поранешен премиер, Никола Груевски.

Инаку, денеска истекува рокот од 24 часа во кој судот треба да донесе одлука по барањата за притвор и за мерки за претпазливост против дел од обвинетите во случаите на СЈО.

Пред судот нема никакви скандирања, а демонстрантите само седат во своите автомобили и го блокираат булеварот, пренесува порталот „А1 он“. Околу судот е зголемено полициското обезбедување.

Синоќа околу 300 граѓани се собраа пред Кривичниот суд на протест против обвиненијата на СЈО, каде извикуваа „Македонија“ и „Нема да ви помине“.

Вчера, Никола Груевски на прес-конференција во партиското седиште рече дека ВМРО-ДПМНЕ била нападната и дека завршила нивната конструктивност.

– Ако мислат дека ВМРО-ДПМНЕ ќе го преспие ова, длабоко се излажале. Сакам да објавам дека конструктивноста кои некои ја нарекуваа попустливост во нашето дејствување завршува денеска. Сега е време историја да оценува и да суди – рече Груевски.

Специјалното јавно обвинителство поднесе 17 обвиненија против 94 физички и седум правни лица. СЈО побара и да им биде одредена мерка притвор на Груевски, на поранешниот директор на УБК, Сашо Мијалков, на поранешните министри Миле Јанакиески, Гордана Јанкулоска и Елизабета Канческа-Милевски и на уште 13 други лица.

Кривичниот суд вчера доцна попладне соопшти дека ги примиле сите обвиненија на СЈО и дека ги распределиле кај судии. Оттаму најавија дека по барањата за определување мерки за претпазливост и притвор одлучуваат судии од кривичните совети.

Според Законот за кривична постапка, судот има рок од 24 часа да одлучи по барањата за одредување притвор и мерки за претпазливост.


Овоштарите го блокираа патот Градско – Прилеп и се заканија со радикални штрајкови


Прилеп, 20 јуни, 2017 - 13:25 (META) 

Овоштарите денеска го блокираа патот Градско – Прилеп еден час поради проблеми со откупот на праските. Во знак на револт, тие гo расфрлаа родот на патот и се заканија со радикализација на штрајкот.

Поранешниот заменик-министер за земјоделство, Ванчо Костадиновски, пред една недела информираше дека родот пропаѓа, а земјоделците претрпуваат штета.

Mинистерството за земјоделство, шумарство и водостопанство вчера соопшти дека ќе бидат преземени сите неопходни мерки за непречен откуп и дистрибуција на земјоделските производи и за заштита на домашното производство.


„Спас за Валандово“ почнa со блокади поради нераспишувањето референдум


Валандово, 13 јуни, 2017 - 13:38 (META) 

Активистите од иницијативата „Спас за Валандово“ денеска со блокада на клучката Валандово – Пирава – Марвинци побараа општинските власти да закажат седница на која ќе се донесе одлука за референдумско изјаснување против рудникот Казандол.

„Спас за Валандово“ инсистираше седница на Советот на Општина Валандово да се одржи вчеравчера, за да може на 9 јули да се одржи референдумот, но претседателката на Советот не закажа седница.

Граѓанската иницијатива во петокот извести дека ги собрала потребните потписи за распишување референдум на локално ниво и во име на сите 2.213 потпишани граѓани на општина Валандово, до Советот на Општина Валандово поднесе предлог за распишување референдум.

Предложеното референдумско прашање е дали граѓаните се за или против продолжување со работа на рудникот и рударскиот комплекс „Казандол“ и дали се за или против изградба на рудници на метални суровини на територија на Општина Валандово.


ВМРО-ДПМНЕ: СДСМ и мнозинството еден месец ја блокираат локалната самоуправа


Скопје, 29 мај, 2017 - 9:44 (META) 

СДСМ и собраниското мнозинство имаат одговорност за одложувањето на локалните избори, со што се става под знак прашалник ефективното функционирање на локалната самоуправа, порача ВМРО-ДПМНЕ претпладнево преку соопштение.

Партијата вели дека и еден месец откако „СДС насилно изведе сценарио за избор на претседател на Собранието, флагрантно кршејќи го Уставот, низа закони и деловникот за работа на Собранието“, во законодавниот дом нема никаква активност „која би била барем обид за излез од кризата во државата“.

„Фактот дека и по еден месец од изборот на Талат Џафери за претседател на Собранието, во истото нема никаква активност и фактот дека СДС сè уште ги кочи клучните и неминовни процеси во државата, како одржувањето на редовните локални избори, покажува дека СДС, очигледно, со намера го изведе сценариото од 27 април, за дополнително продлабочување на кризата. Република Македонија и нејзините граѓани не треба да ја плаќаат сметката за антидржавното дејствување на СДС. Државата не смее да трпи, економијата не смее да стагнира, граѓаните сакаат да одат напред. СДС мора да овозможи одржување на локалните избори, а со нив и предвремени парламентарни избори, кои се вистинско долгорочно решение за државата“, стои во соопштението од ВМРО-ДПМНЕ.


ЛДП: Прво влада, па законско решение за одржување на локалните избори


Скопје, 15 мај, 2017 - 10:39 (META) 

Либерално-демократската партија го повика Ѓорге Иванов да го додели мандатот за составување на нова реформска влада, а парламентарните претставници на ВМРО-ДПМНЕ да не ги опструираат демократските процеси за формирање влада. Партијата вели дека само по изборот на новата влада, може да се разговара за датумот на одржување на наредните локални избори. За застојот во досегашното работење, ја обвинува ВМРО-ДПМНЕ.

„Во овој момент потребно е да се надминат разликите, да се постигне договор за формирање влада, за потоа да се определи и датум за одржување на локалните избори.Граѓаните на Република Македонија во оваа ситуација реално стравуваат од блокада на локалните самоуправи и од последиците врз нивниот секојдневен живот, но новото парламентарно мнозинство веќе размислува за законско решение за излезе од ситуацијата.  Блокадата на Собранието на Република Македонија, од страна на пратениците на ВМРО-ДМПНЕ, со бесконечно долгите дискусии и со нелогичното меѓусебно реплицирање, при изборот на Комисијата за прашања на изборите и на именувањата, е намерен обид за блокирање на институциите на државно и на локално ниво. Да беше избрана новата влада, досега ќе беа распишани и локалните избори и немаше да се доведе во прашање функицонирањето на општините“, се вели во соопштението од ЛДП.

Партијата освен барањето до претседателот на Република Македонија за доделување на мандатот за составување влада, бара и да се изберат најмалку две собраниски комисии, Законодавно правна комисија и Комисија за политички систем и односи меѓу заедниците, за да биде продолжен мандатот на локалните органи.


Европска комисија ни предвидува пораст на БДП од 2,9 отсто за годинава


Брисел, 11 мај, 2017 - 16:16 (META) 

Европската комисија во својата пролетна економска прогноза за Македонија вели дека лани порастот на домашниот бруто-производ (БДП) забавил поради долгото траење на политичката криза, но и поради падот на инвестициите. За годинава, пак, прогнозира пораст на БДП од 2,9 отсто.

Во прогнозата, исто така, се вели дека институциите се блокирани за спроведување на структурните реформи и дека јавниот долг не може да се стабилизира.

Сепак, побарувачката, увозот и извозот остануваат стабилни.

Европската комисија објави пролетна прогноза за државите членки на ЕУ, за Западен Балкан, за САД, Индија и за Кина.