ЕЛЕМ: Планирано исклучување на блок 3 во РЕК Битола


Битола, 11 јули, 2018 - 13:16 (META) 

АД ЕЛЕМ информира дека РЕК Битола во текот на вечерта ќе изврши планирано исклучување на блок 3.

„Причината за планираното исклучување е намалениот конзум на електрична енергија во овој период и добрата хидролошка состојба која овозможува производство од хидроелектраните, што дава можност овој период да се искористи за превентивна нега на блокот, отстранување на помали дефекти и за зајакнување на оперативноста и на расположливоста на блокот. Блок 3 ќе биде вратен во мрежа на почетокот на следната недела. РЕК Битола ќе го продолжи континуираното производството на електрична енергија преку блок 2, додека на блок 1 се изведува капиталниот ремонт“, се вели во соопштението на ЕЛЕМ.


Пожар во РЕК Битола, првиот блок исклучен, еден работник е повреден


Битола, 7 јули, 2017 - 20:14 (META) 

Поради ненамерна човечка грешка, како што соопштија од РЕК Битола, денеска нешто по 13 часот, при рутинска манипулација на 6-киловолтната постројка на блок 1 на РЕК Битола, дошло до пожар на дел од кабловските системи, кој со навремена интервенција на надлежните служби на комбинатот бил неутрализиран и изгаснат.

Притоа повреден бил работник кој со возило за итна медицинска помош е транспортиран до битолската болница, каде што по извршената медицинска интервенција, се наоѓа надвор од животна опасност.

Блокот 1 сега е надвор од фунција.

„Како резултат на ова, проработи заштитата што доведе до исклучување на блокот 1 на РЕК Битола. Во моментот стручни екипи на комбинатот работат на негова санација и се очекува во текот на утрешниот ден блокот да влезе во функција. Снабдувањето со електрична енергија на тарифните потрошувачи се одвива нормално од другите производствени капацитети на ЕЛЕМ“, се вели во соопштението од РЕК Битола.


При крај е реновирањето на блокот Б во студентскиот дом „Гоце Делчев“


Скопје, 24 октомври, 2015 - 16:46 (META) 

Во студентскиот дом „Гоце Делчев“, во блокот Б, завршени се градежните активности, а следната недела се очекува набавката на мебелот, информираше заменик-министерот за образование, Спиро Ристовски.

По целосната реконструкција на овој блок, се очекува и реновирање на блокот А.

Ристовски информираше дека во фаза на подготовка е и проект за другите два блока, како и за мензата во домот.

Целосното завршување на реконструкцијата на домот се очекува на крајот на 2016 или на почетокот на 2017 година.

Во наредните неколку дена, ќе биде распишан тендер за обезбедување нови лифтови за сите студентски домови. Владата разгледува десетина локации за нов студентски дом.