Манчевски: Отворените податоци може да создадат иновативни бизниси и подобар живот на граѓани


Скопје, 26 јули, 2018 - 15:42 (META) 

Отворените податоци можат да бидат силен поттик за социјален и економски развој. Тие може да се искористат и за подобрување на управувањето преку зголемување на транспарентноста, отвореноста, интегритетот и јавното учество во централната и локалната власт, порача денеска министерот за информатичко општество и администрација, Дамјан Манчевски.

Тој ги презентираше Стратегијата и Акцискиот план за отворени податоци.

-Ова ќе доведе до подобрување на испораката на услуги и ефикасноста на јавниот сектор. Ќе го зголеми на учеството на граѓаните. Особено треба да се нагласи дека директно ќе влијае позитивно во напорите за борба против корупцијата. Исто така, со малку иновативност, дава можност за отворање и на нови бизниси. Наша главна заложба е да ги донесеме услугите до граѓаните. Тоа е многу полесно отколку да ги носиме граѓаните до услугите. Отворањето на податоците е еден од механизмите да го постигнеме тоа – рече министерот за информатичко општество и администрација.

Тој посочи пример како со отворените податоци може да се развие бизнис. Односно, како што рече од објавувањето на податоците од сензорите поставени на раскрсниците, ќе може да се направи апликација која корисникот ќе го известува каде има сообраќајна гужва и ќе му нуди други правци за да не заглави во метеж. Друг пример е случајот на Британија, односно со апликацијата за квалитетот на услугата што ги нудат болниците или училиштата.

– Одлуката во кое училиште да го запишат своето дете британците ја носат според, отворените податоци за училиштата кои даваат јасна слика за услугите што го нудат училиштата. Тоа што како позитивен пример од кај нас ќе биде исто така дел од порталот е и софтверот за трошоците на функционерите – рече Манчевски, посочувајќи дека МИОА во моментов МИОА го доработува порталот за отворени податоци.


ССК и УЈП заеднички ќе се борат против нерегистрираните бизниси


Скопје, 11 јули, 2018 - 16:43 (META) 

Сојузот на стопански комори на Македонија (ССК) и Управата за јавни приходи (УЈП) денеска потпишаа Меморандум за соработка за заеднички да се координираат за регистрирање на субјектите кои немаат регистрирано фирма, a со цел намалување на сивата економија и нелојалната конкуренција

Меморандумот за соработка помеѓу институциите го потпишаа претседателката на ССК, Данела Арсовска и директорката на УЈП, Сања Лукаревска.

„Неформалната т.е сивата економија е еден од најголемите проблеми бидејќи оние кои учествуваат во неа неправично и незаконски ги става во повластена положба во однос на оние што си имаат регистрирано фирми и ги исполнуваат законските обврски. Според последните податоци на меѓународните организации, во земјава секоја година фирмите губат до 15 проценти од профитот поради сивата економија во сите сектори. Инспекциските служби треба да практикуваат тие што ќе ги затекнат на терен по службена должност да ги регистрираат за да се воведат во системот, да плаќаат даноци и бидат лојална конкуренција“, изјави Арсовска.

Таа појасни дека тие субјекти никаде не фигурираат, прават милионски профити на црно, а не се регистрирани и работат со готовина.

Анализите на ССК покажаа дека оние кои работат без фирма во старт се повеќе од 50 проценти поконкурентни од регистрираните фирми, поради тоа што не плаќаат ДДВ, не плаќаат продонеси по основ на социјално и пензиско осигурување, тековните трошоци ги плаќаат како лица, наместо да плаќаат индустриска струја и вода како регистрираните фирми, со што, не само што го оштетуваат буџетот, туку и нудат цени пониски и до 50 проценти, кои, регистриран бизнис што ги плаќа сите давачки, не може да ги постигне.

Според извештајот на ОЕЦД во Македонија има 25 отсто учество на сивата економија во вкупната економија, а што се потврди и во извештајот на ЕУ во кој се вели дека сивата економија останува главна пречка за бизнисот и влијае на конкурентноста на формалниот приватен сектор. Просечното ниво во европските земји се движи од 12 до 15 проценти.


Потпишани првите договори за програмата ИПАРД 2014-2020


Скопје, 6 март, 2018 - 14:00 (META) 

Денеска во Агенцијата за финансиска поддршка во земјоделството и руралниот развој се потпишаа првите договори за користење на финансиски средства од програмата ИПАРД 2014-2020.

Министерот за земјоделство, шумарство и водостопанство, Љупчо Николовски посочи дека ефикасното искористување на програмите ИПАРД е еден од главните приорити на МЗШВ, со цел приближување до европскиот аграр.

„Станува збор за 60 милиони неповратни средства, европски пари и нашата цел е ефикасно искористување на европските фондови. Ако изминатите години искористеноста била слаба, сега сакаме ова да биде една успешна политика на Владата“, изјави Николовски.

На првиот јавен повик од ИПАРД- програмата 2014-2020 кој беше објавен лани, има рекордно голем број на добиени барања за ко-финансирање. Пристиганти се 1.648 барања, со вкупна побарана финансиска поддршка од околу 73,6 милиони евра.

Вкупните финансиски средства од целата програма ИПАРД 2014-2020, која може да се користи до 2023 година, изнесува 79,6 милиони евра, од кои 60 милиони евра се од европските фондови, а останатите се национално буџетирање.

До денеска се одобрени пет решенија за одобрување на барање за финансиска поддршка од мерката 3 „Инвестиции во основни средства за преработка на земјоделски и рибни производи“ со вкупна вредност на финансиска поддршка до 310.000 евра, од кои  232.500 евра се европски средства.

Во тек се проверките на останатите предмети од трите мерки и се очекува овој и следниот месец, да бидат склучени договорите за сите мерки.

Еден од проблемите со кој се соочуваат потенцијалните корисници на програмите ИПАРД е недостаток на средства за реализација на инвестицијата, затоа, од МЗШВ велат дека во соработка со другите институции работат на воспоставување на механизам, односно гарантен фонд, кој би овозможил предфинансирање за програмите ИПАРД.


ЦИКП: Корупцијата и даноците – дел од факторите за постоење на сива економија


Скопје, 28 јули, 2017 - 11:38 (META) 

Корупцијата, високиот даночен товар, стремежот на бизнисмените за брзо богатење се фактори што влијаат на постоењето на сива економија.

Ова го покажува бизнис-анкетата на Центарот за истражување и креирање политики (ЦИКП), спроведена за да се утврдат различните форми на скриени економски активности во бизнис-секторот лани и да се споредат резултатите од истата анкета направена во 2014 година.

– Покрај општото задоволство со даночниот систем во земјата, се смета дека даноците играат значајна улога во појавувањето на скриени економски активности. Поточно, „високиот даночен товар“ се смета за втор најважен фактор за појава на сивата економија (42,9 проценти) и „импулс на бизнисмените за брзо богатење“ избран од 40 проценти од бизнисите – се вели во анкетата.

Најголемите детектирани проблеми лани биле нелојалната конкуренција, која е проценета како среден и голем проблем од страна на 64,3 проценти од бизнисите, политичката ситуација (50 проценти) и криминалот, кражбите и немирите (50 проценти).

– Пријавувањето понизок обрт од реалниот е уште една практика во сивата економија која се користи за избегнување на даночниот опфат. Манипулирањето со плаќање и со пријавување данок на додадена вредност (ДДВ) и користење на сметководствени трикови за плаќање пониски даноци е исто така честа практика во Македонија – се вели во анкетата.


Тевдовски: Во првата година од мандатот ќе обезбедиме најниска плата од 12.000 денари


Скопје, 12 март, 2017 - 14:25 (META) 

Најниската плата во првата година од мандатот ќе ја зголемиме на 12.000 денари, ќе обезбедиме по 20 милиони евра годишно за поттикнување на малите и на средните бизниси, а сите институции и јавни претпријатија ќе мора да даваат отчет еднаш месечно за тоа како ги трошат парите од државниот буџет, порача денеска на прес-конференција Драган Тевдовски, претседател на комисијата за економија на СДСМ.

Тој вели дека програмата за влада предводена од СДСМ содржи нов пристап за развој на македонската економија, врз основа на поддршка за домашните претпријатија, пораст на платите и социјална праведност.

– Државната поддршка за поттикнување на домашните претпријатија, пред сè малите и средни претпријатија, ќе биде поставена на 20 милиони евра уште во првата година на мандатот. Преку активните мерки за вработување ќе се влијае на вработување на 16.000 лица годишно во приватниот сектор – рече тој.
Претседателот на комисијата за економија на СДСМ вели и дека во мандатот на СДСМ, малите и средни претпријатија за отворање на ново работно место ќе добиваат еднократна финансиска поддршка помеѓу 72.000 и 162.000 илјади денари, под услов на лицето да му исплаќаат бруто-плата повисока од просечната во минатата година во период од 12 месеци.  Што се однесува до минималните плати, Тевдовски објави зголемување уште во првата година.
– Во првата година на мандатот, минималната плата ќе се зголеми на 12.000 денари и таа ќе важи и за индустријата за текстил, облека и за кожа – појасни претседателот на комисијата за економија на СДСМ.

Тој рече и дека СДСМ ќе работи на обезбедување на целосна фискална транспарентност.

–  Сите буџетски корисници, фондови и јавни претпријатија не само што ќе мораат да ги имаат објавено завршните сметки на своите веб-страници, туку, уште повеќе, ќе мораат да доставуваат до Министерството за финансии детални месечни извештаи за трошењето на доделените пари од буџетот, заедно со обврските што ги презеле, а не ги платиле. Овие податоци, со помош на платформа за пребарување, ќе бидат објавени на веб-страницата на Министерството за финансии, за граѓаните да бидат контролори ако се прават злоупотреби – вели Тевдовски.


Креирајте вредности, не само профит, порача Дресен на првиот Форум на добри компании


Скопје, 2 декември, 2016 - 14:44 (META) 

Денеска се одржа првиот Форум на добри компании, на тема „Трансформација на општеството преку бизнисите“, на кој учествуваа претставници на компании, граѓански организации, носители и спроведувачи на политики.

Гостин на форумот беше холандскиот претприемач и основачот на „Гуд хоспиталити груп“ (Good Hospitality Group), Мартин Дресен, кој го сподели искуството на создавањето „Добар хотел“, пловечка конструкција која привлекува илјадници туристи, особено оние кои ја разбираат својата улога во создавањето можности за луѓето од маргините.

– Во социјалниот бизнис како „Добар хотел“, акцентот е ставен на луѓето и на креирањето вредности, а не само на профитот. Фокусирајте се на луѓето, обидете се да ги мотивирате, да ги задржите и тоа ќе даде резултати на крајот. Најдобар случај е кога се постигнува баланс, остварување добивка и вреднување на човечкиот фактор – порача Дресен.

Холандскиот амбасадор Ваутер Пломп истакна дека форумот е настан каде треба да се изродат нови идеи за решавање на социјалните нееднаквости и предизвици.

– Холандија е долгогодишен пријател на Македонија и во изминатите 20 години сме поддржале и работиме со многу граѓански организации и компании. Длабоко веруваме во концептот „1 плус 1 може да биде 3“ и оттаму мотивацијата да ги доведеме овие два сектора на едно место денес, затоа што предизвиците на национално и на глобално ниво не можат да бидат адресирани од само еден сектор и затоа што веруваме дека синергијата може да биде двигател на позитивни промени и на напредок на општеството – рече Пломп.

Форумот беше во организација на Асоцијацијата за истражување, комуникации и развој, „Паблик“ и Амбасадата на Кралството Холандија во Македонија.

 


Повеќе инвестиции во помалку развиените региони, бараат од СКСЗМ


Скопје, 28 ноември, 2016 - 14:36 (META) 

Зголемување на прагот за инвестирање во помалку развиените региони од еден процент од домашниот бруто-производ (БДП) на најмалку 2 до 2,5 проценти од БДП е едно од барањата на Стопанската комора на Северозападна Македонија (СКСЗМ) на денешната средба со Алијансата за Албанците.

Тие оваа мерка ја предлагаат како итна за наредните пет години, земајќи го предвид сегашното ниво на инвестирање, кое изнесува околу 0,03 проценти од БДП.

Комората бара неселективна примена на законите, особено оние во полза на развојот на бизнисот и поттикнување на малите и средните бизниси преку стимулирање на претприемништвото во руралните средини, како и преку промоција на жените во бизнисот.

– Барањата на бизнисмените од СКСЗМ до политичките партии, воедно и до Алијансата за Албанците, се транспарентност и отчетност, намалување на нееднаквоста во регионалниот развој, напуштање на митот за евтина работна сила, нови мерки за зголемување на вработеноста, подготвување на економска платформа за одржлив економски развој и сериозен ангажман за зголемување на порастот на БДП за повеќе од 4 проценти – велат од комората.

Тие предлагаат странските директни инвестиции да се насочуваат рамномерно во сите зони во Македонија за рамномерен економкси пораст на сите плански региони на земјата.

Платформата за економски развој на Македонија вклучува и реформи на јавните и на државните институции, јавни финансии, правна регулатива и др.


Кучи: Се зголемува бројот на жени претприемачи, сопственички на компании


Скопје, 18 ноември, 2016 - 14:32 (META) 

„Жените претприемачи, освен што креираат нови работни места, воведуваат и посебни пристапи во менаџирањето и во организацијата на бизнисите“, истакна министерот за економија, Дритон Кучи, на одбележувањето на Денот на жените претприемачи.

Тој истакна дека радува фактот што бројoт на жените како претприемачи и раководен кадар во малите претпријатија е во постојан пораст и кај нас, така што активни се околу 20.000 деловни субјекти во сопственост на најмалку една жена, кои вработуваат повеќе од 50.000 лица.

Кучи потсети на мерките креирани за финансиска поддршка на женското претприемништво, кои веќе петта година по ред се реализираат преку годишните програми за развој на претприемништвото, конкурентноста и иновативноста на МСП на Министерството за економија.


СДСМ: Со преголемите казни, ВМРО-ДПМНЕ ги уништува малите бизниси во Штип


Штип, 5 септември, 2016 - 18:38 (META) 

Владимир Милошев, претседател на разгранокот на СДСМ во Штип, денеска на прес-конференција обвини дека казните од  Управата за јавни приходи се преголеми, а малите и средните бизниси одвај преживуваат.

– Ваквата политика на ВМРО-ДПМНЕ негативно се одразува на нормалното работење на фирмите. За многу фирми, големите казни претставуваат и сериозна закана за нивната егзистенција и за вработените во овие фирми – изјави Милошев на денешната прес-конференција.

Одговор на партиските обвинувања, новинарите побараа од регионалната УЈП. Оттаму најавија одговор, но до доцна попладнето не одговорија. Портпаролката дури не одговараше на телефонските повици.

Наместо од УЈП, на новинарските прашања одговорија од општинскиот комитет на ВМРО-ДПМНЕ.

„Инспекторите од УЈП имаат законска обврска да ги посетуваат фирмите и да ги проверуваат истите дали функционираат согласно законите, вклучително и дали ги намируваат даночните обврски. Тоа е нивна работа и тие се постојано на терен, за разлика од времето на СДСМ кога службите биле почесто во фотелјите и во канцелариите наместо во контроли“, одговорија од ВМРО ДПМНЕ во соопштение.


СКСЗМ бара институционална помош и за компаниите во поплавените подрачја


Скопје, 1 септември, 2016 - 14:06 (META) 

Седум милиони евра изнесува материјалната штета на компаниите во поплавените подрачја, покажува анкетата на Стопанската комора на Северозападна Македонија (СКСЗМ).

Оттаму информираат дека во оваа сума не се пресметани 1,5 милиони евра авансно платен данок на додадена вредност (ДДВ), како и 1,3 милиони евра за царини и за акцизи на уништената стока.

– Штетите од поплавите во Стајковци, Сингелиќ и во Арачиново за најголем дел од бизнисите ќе значат банкрот. Институционалната поддршка изостана, а тие не се моќни сами да застанат на нозе. Сега е вистинско време државата да покаже дека се грижи за стопанството, да се направи план и да се предложат конкретни мерки за заживување на компаниите – истакна претседателот на СКСЗМ, Неби Хоџа.

Тој додаде дека особено на удар се малите фирми, на кои ќе им бидат потребни две години за финансиски да се стабилизираат.

Бизнисмените истакнаа дека голем дел од нив ја стопирале работата. Нури Сулејмани од АД „Сингелиќ“, кој стопанисува со 700 хектари државно земјоделско земјиште, бара надлежните да ги регистриаат сите оштетени, независно дали се домаќинства или бизниси.

– Ние сме обесправени. Државата манифестираше различен аршин. На едни им ги исплаќа штетите, а другите не сака ни да ги евидентира – изјави Сулејмани во чија компанија се стопроцентно уништени површините, опремата, земјоделската механизација, објектите и стоката.

Бизнисмените од поплавените подрачја бараат да се донесе владина одлука за вклучување на економските оператори во институционалниот третман, да почне процесот на утврдување на штетите од релевантните институции и да се донесе одлука за степенот на покриеност на потенцијалните загуби на компаниите од овие подрачја.

– Да се евидентира ДДВ и царината на оштетената стока и да се најде начин за враќање или ослободување од нив на компаниите, без разлика дали тие ќе увезуваат следниот период. Во случај да не се увезува во траење од шест месеци, Комората бара компаниите да бидат ослободени од данок на добивка или други давачки во износ на штетите. Истото важи и за царинските и за акцизните давачки. Се предлага и четири до шест месеци субвенционирање на придонеси за вработените во сите компании – истакна Хоџа.