ЕБОР, ЕИБ и ГСБ со ново истражување на компаниите во 40 земји, меѓу кои и ние


Скопје, 26 ноември, 2018 - 12:28 (META) 

Европската банка за обнова и развој (ЕБОР), Европската инвестициона банка (ЕИБ) и Групацијата Светска банка (ГСБ) воведуваат нова рунда на истражувања на претпријатијата во повеќе од 40 земји, вклучувајќи ја и Македонија.

Целта на истражувањето е да се добијат повратни информации од претпријатијата од приватниот сектор за состојбата на бизнис опкружувањето во секоја земја учесничка и да се искористат овие повратни информации за да се оценат можностите и ограничувањата за растот на приватниот сектор. Во секоја земја истражувањето ќе биде спроведено преку интервјуа со приватни фирми во производствениот и услужниот сектор.

„Во Македонија е склучен договор со „Ипсос“ (Ipsos) кој ќе го спроведе прибирањето на податоци и ќе ги започне интервјуата со фирми по случаен избор во ноември 2018 година. Оваа активност ќе трае до мај 2019 година, а прелиминарните резултати од истражувањето се очекуваат во втората половина од 2019 година. Темите кои се вклучени во прашалникот – како што се продуктивност, усвојување на технологија и иновации, конкуренција, квалификуваност на работната сила, неформалност, пристап до финансиски услуги, инфраструктура и влијание на владините регулативи – ќе бидат споредливи на глобално ниво. Истражувањето исто така ќе содржи модул за зелена економија“, се вели во соопштението на ЕБОР.

Оваа рунда на истражувања на претпријатијата ќе се спроведе во повеќе од 40 земји низ Европа, Централна Азија, Среден Исток и Северна Африка.


Започна седмиот самит „Македонија 2025“ на кој учествуваат 350 гости од регионот


Скопје, 8 ноември, 2018 - 10:47 (META) 

Со панел-дискусии посветени на образование, лидерство и успешни македонски бизнис-приказни во светот, започна седмото издание на самитот „Македонија 2025“.

Денеска и утре, повеќе од 350 реномирани гости од целиот регион, ќе имаат можност да слушнат за најдобрите светски практики во бројни актуелни области, меѓу кои: дигитална трансформација во бизнисот, производство на канабис за медицински цели, примена на најсовремените технологии во здравството, изградба на технолошко-иновативни центри, вештачка интелегенција и многу други.

„Целта на Самитот е да се стимулира соработка, размена на знаења и лидерски развој. Годинава го потврдивме учеството на повеќе од 60 врвни говорници од преку 20 земји, кои во рамки на над 15 интерактивни сесии, ќе дискутираат на теми релевантни за глобалната економија, но и за регионот. Ќе укажеме на најголемите економски предизвици на светско ниво, како што се трговските војни, масовните миграции, недостатокот на квалификувана работна сила и нивното влијание врз „малите“ економии“, велат организаторите.

Самитот „Македонија 2025“ е исклучително важен бизнис собир во регионот, кој ги претставува клучните трендови во економијата, инвестициите, технологијата, иновациите, кои го движат светот.

На официјалното отворање поздравно обраќања имаше клучниот говорник Ентони Б. Ким од фондацијата „Херитиџ“ – САД, како и на високи претставници од „Економист“ (The Economist), „МекКинси“ (McKinsey), Европската инвестициска банка и многу други.


СКСЗМ: Власта да не му прави пречки на бизнисот, економијата е во тешка состојба


Скопје, 18 октомври, 2018 - 14:04 (META) 

Локалната и централната власт да не го опструираат бизнисот, да ги почитуваат законските и административните постапки, наместо да ги менуваат одлуките и Деталните урбанистички планови (ДУП) преку ноќ, апелира денеска Стопанската комора на Северозападна Македонија (СКСЗМ).

Претседателот на СКСЗМ, Неби Хоџа на прес-конференција рече дека ваквите пречки што им ги прават локалните и централната власт на компаниите, не значи само стагнација на бизнисот, туку и обесхрабрување за натамошни вложувања.

– Силно ги осудуваме дневните политики кои ги попречуваат капиталните инвестиции, а имаат единствена цел да добијат поени на сметка на бизнисот – рече Хоџа.

Тој потсети дека градежништвото во вториот квартал годинава бележи пад од околу 13 проценти. Комората предупреди и дека македонската економија е во тешка состојба поради актуелните политички и социјални случувања.

Од таму, како еклатантни примери ги посочија станбениот објект во Општина Карпош и оној спроти Мајчин дом, чија изградба е спорна и времено стопирана. Компаниите сметаат дека граѓаните реагираат зашто биле изманипулирани и доведени во заблуда од страна на политичките партии, а најгласни на протестите биле оние советници што ги поддржале ДУП-овите.

– За оваа локација цела година подготвувавме документи. Многу пари вложивме и многу работници ангажиравме. Правиме и повеќе зеленило отколку што има. Не е целта да земаме обесштетување, туку да ја развиваме економијата, да вработиме луѓе и да придонесуваме за државата. Во моментов имаме времено стопирање на изградбата поради неправилно поставување на оградата, но ќе продолжиме со работа за 15 дена – изјави инвеститорот на објектот кај Мајчин дом, Фатмир Етеми, кој досега вложил, како што рече, 5,5 милиони евра, а вкупната инвестиција е околу 12 милиона.

Според него, не може откако ќе се завршат сите постапки и откако инвеститорот ќе ги добие сите одобренија, некој да му каже дека не може да гради.

– Ако не сум имал право законски да градам, не требало да ми издадат одобрение за градба, истакна Етеми.

Објасни и дека се работи за 5.000 квадрати земјиште, при што не се гради на целата парцела, туку на само 1.700 метри квадратни. Другиот дел, од околу 3.000 квадрати ќе биде зеленило и паркинг. Проектот дополнително предвидува и хоризонтални и вертикални градини што е многу скапа инвестиција.


Жените претприемачи во земјава треба да се насочат кон ИКТ и СТЕМ секторот


Охрид, 3 октомври, 2018 - 15:56 (META) 

Пазарот е заситен од нано професиите како малите салони за убавина и малите фризерски салони. Марта Пејоска веќе четири години е сопственичка на единствената галерија и атеље за изработка и дизајн на современ накит и филигран во Охрид. Вели дека единствен начин да ја оствари својата визија е преку претприемништвото.

Пејоска е само една од храбрите млади девојки и жени, потенцијални и постојни претприемачи, како и заинтересирани страни од државните институции и граѓанското општество, која преку проектот WE MAKE ќе бидат поттикнати да се насочат кон женското претприемништвото, извозот и иновациите, вклучувајќи го ИКТ и СТЕМ секторот, зелената економија, како и социјалното претприемништво.

-Сакаме да направиме продор на младите девојки, на младите жени, да влезат во една сфера којашто е попрофитабилна и која што е нормално носи еден бенефит како и за нив како прептриемачи исто така и за фамилијата и исто така и за опшптеството – потенцира Валентина Дисоска – претседател на Здружение на бизнис жени.

Податоци за тоа колку од жените претприемачи се дел од ИКТ и СТЕМ секторот, се уште нема, па така иако во едукациските процеси односот е 50-50%, сепак со нив во земјава се уште суверено владее посилниот пол. Пазарот е доволно заситен со професиите кои на еден начин го одбележаа женското претприемништво во ова измината деценија, како козметичари, фризерки итн. Другите професии нудат можности за посериозен бизнис кој пак нуди поголема заработувачка, но и поголема одговорност.

-Токму кон тоа сме насочени да ги поттикнеме младите жени да сфатат дека одговорноста не е нешто од кое што треба да се плашат, тоа е пат кој треба да се изоди, а бенефициите се многу поголеми. Од оние микропертпријатија или нано претпријатија од типот, правиме нокти, шминкаме итн, дури и тие компании можат да пораснат во големи бизнис центри како велнес центри итн – објаснува Дисоска.

WE MAKE проектот ќе биде имплементиран во избрани општини од осумте плански региони: Битола, Струга, Велес, Тетово, Куманово, Штип, Струмица и Скопје. За време на овој проект активно ќе бидат споделени најдобрите практики од Хрватска и ЕУ. Една од специфичните цели на овој проект е формирање на Националната асоцијација за женско претприемништво (ЖП) и Платформите за зајакнување на екосистемот за претприемништво во Македонија и имплементација на Нацрт Националната Стратегија за развој на ЖП 2017-2020.


Петер: Европските пари ќе секнат и државата ќе оди во изолација ако кажете не ЕУ


Скопје, 25 септември, 2018 - 13:24 (META) 

Компаниите членки во Советот за странски инвестиции се за полесно водење на бизнис во Македонија, а  НАТО и ЕУ се вратата кон полесно водење на бизнис, рече денеска на прес-конференција претседателот на Советот на странски инвеститори, Штефан Петер.

Тој додаде дека Македонија во Европска Унија би била постабилна отколку надвор од неа, што би значело пристап до евтини кредити, финансиска помош од ЕУ за проекти како и стабилен пазар за извоз.

– Доколку Македонија каже НЕ на претстојниот референдум ќе го изгуби кредибилитетот, а со тоа и довербата односно вербата во иднината. Ако младите и децата немаат верба во иднината, најпаметните ќе заминат, ќе дојде до изолација. Едена милијарда евра финансиска помош од ЕУ за различни проекти, нема да дојдат во Македонија. Стабилноста на денарот би можела да биде нарушена, притисокот врз банкарскиот сектор ќе се зголеми, а ќе се намалат увозот и извозот. Компаниите ќе ја изгубат конкурентноста, ќе се намалат странските директни инвестиции бидејќи земјата ќе нема долгорочни перспективи, а ќе ја изгуби и конкурентноста во однос на други земји-кандидати за членство во ЕУ. Банкарскиот сектор ќе се стесни и кредитите ќе бидат поскапи – рече Петер.

Тој вели дека ќе ги нема и позитивните аспекти кои сега ЕУ ги поттикнува во државата, а тоа е владеење на правото, поттикнување на подобра животна средина, како и подобрување на правото на потрошувачите.

– Важно е да излезете да гласате, активно да учествувате во демократијата, не да бидете себични и да размислувате за себе, туку за последиците од гласањето за иднината. За демократијата да функционира нацијата треба да учествува, а не да набљудува. Оној кој нема да гласа го губи правото да се жали. Гласајте, па потоа жалете се за резултатот – рече Петер.


Анкета: Економската состојба е лоша, но компаниите очекуваат дека ќе се подобри


Скопје, 10 мај, 2018 - 14:48 (META) 

Сегашната економска ситуација е оценета како полоша во однос на минатата година, покажува Анкетата за деловната клима во Македонија спроведена помеѓу членките на Македонско – германското стопанско здружение.

Само 7 отсто од компаниите, моменталната економска состојба ја оцениле како добра, а 50 отсто ја оценуваат како лоша.

– Кај компаниите има позитивното расположение во однос на очекувањата дека деловната клима значително ќе се подобри оваа година и тие се многу повисоки во однос на минатогодишната анкета. Дури 45 отсто од извршните директори очекуваат подобрување, а само 12 отсто очекуваат полоши макроекономски услови – рече директорот на Делегацијата на германското стопанство во Македонија, Патрик Мартенс.

Зголемена продажба очекуваат 68 отсто од испитаните компании, а 5 отсто стравуваат од пад на продажбата. Производителите оваа година очекуваат зголемен извоз во споредба со лани.

– Годинава, некои од факторите кои минатите години беа оценети како негативни се подобрени но, повторно, испитаниците не се задоволни од сузбивањето на корупцијата и криминалот, правната сигурност и ефикасноста на јавната администрација. И покрај наведените проблеми, сепак е охрабрувачки фактот дека 72 отсто од компаниите кои работат во Македонија повторно би инвестирале во Македонија – додаде Мартенс.

Сепак, процентот на компании кои повторно би инвестирале во државата е намален за 12 отсто во однос на 2016 година.

Заменикот-амбасадор на Германија во Македонија, Марко Акватичи рече дека од денешната посета на државниот министер за европски прашања во МНР на Германија, Михаел Рот имаат информации дека ќе се реши спорот со името, а евроатлантската перспектива е позитивен знак за економијата.

„Кога ја спроведовме анкетата тогаш на власт дојде новата Влада. И од тогаш до сега се случија позитивни работи како препораката од Европска комисија за почеток на преговорите и волјата за решавање на спорот со името“, додаде Акватичи.

Во земјата работат повеќе од 200 компании со германски капитал кои вработуваат 20.000 лица. Трговската размена помеѓу Македонија и Германија, лани се зголемила за 10 отсто во однос на 2016 година.


Анѓушев: Продажбата на ЕДС беше максимално транспарентна


Скопје, 25 април, 2018 - 15:49 (META) 

Вицепремиерот за економски прашања, Кочо Анѓушев за продажбата на неговата компанија ЕДС на грчката национална компанија за производство на електрична енергија ППЦ рече дека транзицијата на сопственоста ќе трае дваесетина дена.

– По финасиската трансакцијата, согласно законите во Македонија ќе си платам персонален данок и средствата што сум ги добил од продажбата ќе ги прикажам во мојот анкетен лист. Им посакувам на сите,  политиката да не се меша во реалниот бизнис. Трансакцијата беше максимално транспарентна и евалуацијата на цената беше извршена од две меѓународни куќи што беа ангажирани од грчката компанија да направат проценка – рече Анѓушев одговарајќи на прашање пред почетокот на форумот „Инвестиции за долгорочен економски развој“.

Од продажбата, 90 отсто од средствата, или 4,8 милиони евра, ќе легнат на негова сметка, а 10 отсто на сметката на „Фероинвест“.

– Преговарањето за цената не беше лесен процес, бидејќи станува збор за интернационална компанија која е присутна во неколку држави во ЈИЕ. Компанијата сум ја развивал од нула, како старт-ап во сите држави во време кога беше стопирана либерализацијата. Доколку продолжеше либерализацијата на пазарот на електрична енергија, веројатно ќе имаше поголема вредност, – додаде Анѓушев.

Тој објасни дека грчката компанија ППЦ е гигант во енергетскиот сектор во регионот со годишен промет од пет милијарди евра и 15 милијарди евра капитал во електрани и далекуводи.

– Со таков ветер зад грбот, ЕДС ќе има прекрасна иднина, бидејќи пазарот на електрична енегија во Југоисточна Европа допрва ќе се развива. Тоа е шанса за компанијата, за сите вработени и за земјава – рече Анѓушев.

Вицепремиерот додаде дека директорот на ППЦ им дал гаранции на 40-на вработенти во ЕДС дека ќе се ги задржат работните места


Солун, преку Србија, ќе се промовира како балканска бизнис дестинација


Солун, 13 март, 2018 - 10:10 (META) 

Грција и Србија ќе одржат бизнис-форум на 19 март (понеделник) во Солун, на кои ќе учествуваат претставници на двете влади и бизнисмени, пишува грчкиот сајт „Вориа.гр“

Тие ќе разговараат за проблемите со кои се соочува регионот, специфичното деловно опкружување, како и подобрување на условите за бизнис. Околу 150 грчки компании ќе разговараат за можна соработока со околу 75 српски компании активни во енергетиката, земјоделството, туризмот, пазарот на недвижнини, телекомуникациите и информатичката технологија и фармацијата.

Според „Вориа“, „Солун и Северна Грција одржуваат блиски контакти со регионот, главно поради изборот на соседите за да се одморат на Халкидики, Пиреја, Кавала, Тасос но и поминатите викенд и празници во Солун, на забава и шопинг.“

„Во процесот на целосно интегрирање на земјите од Западен Балкан во евроатланските структури, Белград е еден од клучните играчи. Поради големината и квалитетот на бизнисот, Србија најмногу извезува во еврозоната, но има и напредокот на структурните реформи во земјата“, пишува „Вориа“.


Азески побара со Грција да се склучи договор за одбегнување на двојното оданочување


Скопје, 8 февруари, 2018 - 15:04 (META) 

Повторно интензивирање на активностите за склучување на Договор за одбегнување на двојното оданочување помеѓу Македонија и Грција, побара претседателот на Стопанската комора на Македонија, Бранко Азески, од претседателот на Унијата на Грчките трговско-индустриски комори, Константинос Михалос.

„Стопанската комора на Македонија и Унијата на грчките трговско-индустриски комори уште во 2007 година пред надлежните органи го покренаа прашањето за склучувањето на Договор за одбегнување на двојното оданочување, но заложбите досега останаа без успех. Бизнисот беше тој кој во изминатите години непрекинато ја одржуваше билатералната соработка помеѓу двете земји, дури и кога политичките процеси затајуваа“, се вели во соопштението на Стопанската комора.

Азески во писмото до неговиот колега Михалос напишал дека бизнис-заедниците од двете држави од надлежните органи очекуваат создавање на поволно деловно опкружување и инвестициска клима.

– Нашите компании заеднички можат да постигнат многу, тие можат да бидат клучниот фактор за достигнување на посакуваното ниво на економски раст и развој во двете земји, но за тоа да се случи, на бизнисот мора да му бидат обезбедени потребните услови. Создавањето на предуслови за зголемување на обемот на размената и на инвестициите помеѓу нашите две земји треба непречено да се одвива, без оглед на развојот на политичките процеси – наведува Азески во писмото.

Грција е третиот трговски партнер на Македонија.

Обемот на размена е во постојан пораст – во 2017 година, вкупниот извоз изнесуваше 180,04 милиони евра, со пораст од 21,9 проценти во споредба со 2016 година, додека вкупниот увоз од 546,09 милиони евра има раст од 21,4 проценти во споредба со претходната година.

Обемот на грчките инвестиции во периодот од 2003 заклучно со 2016 година изнесува 157,41 милион евра, при што стотици компании со грчки капитал успешно работат во банкарскиот сектор, енергетиката, секторот на прехранбената и текстилната индустрија, градежништвото и трговијата на мало, вработувајќи повеќе десетици илјади работници.


Бизнисмени во трка за градоначалничка функција


Скопје, 4 октомври, 2017 - 10:42 (META) 

Вклучувањето на бизнисмени во партискиот и во политичкиот живот има повеќе аспекти. Од една страна, ако станува збор за успешни бизнисмени, нивната кандидатурата е и политички профитабилна, особено на локални избори кога мал број гласови прават голема разлика. Освен што нивните вработени се и нивни потенцијални гласачи, фактот што се успешни работодавци праќа добра порака и кон сите други граѓани, во чии приоритети, според сите релевантни испитувања на јавното мислење, влегува и локалниот економски развој, пишува „Вистиномер“.

Меѓутоа, релацијата политика – власт, од една страна, и бизнис – компанија, од друга страна, има и една друг агол на перцепција. Имено, бизнисмените кога ќе дојдат на јавна функција, може да ја (зло)употребат позицијата во корист на својата или своите компании или, пак, на компаниите на блиски роднини. Тие не мора да го направат тоа на груб и директен начин, туку постојат безброј креативни начини како, со помош на функцијата што ја вршат и моќта што извира од неа, евентуално да го поддржат или барем да го заштитат бизнисот, без притоа да го прекршат законот.

Компании на неколку актуелни градоначалници и кандидати за градоначалници добивале тендери од државни органи и институции, раководени од нивни сопартијци, што претставува судир на интереси во поширока смисла на зборот. Потоа, некои од нив добивале и државни концесии во време кога партијата од која доаѓаат била централна власт, односно имале пристап до ресурс за развивање на бизнисот.

(Целиот текст од „Вистиномер“ можете да го прочитате и да го преземете ТУКА)