Куманово со најзагаден воздух вчера


Скопје, 12 ноември, 2018 - 11:48 (META) 

Енормна загаденост на воздухот беше регистрирана вчера и ноќеска на голем број мерни места во Македонија. Според присуството на ПМ10 честички најзагаден воздух вчеравечер имаше Куманово, со 264 микрограми на кубен метар воздух, по што следуваше мерното место Битола 1 со 205, и Миладиновци со 183 микрограми.

Максималната дозволена вредност е 50 микрограми ПМ10 честички на кубен метар воздух.

Во Битола 1 загаденоста точно на полноќ паднала 91,2 микрограми, а во Миладиновци на 94,7 микрограми ПМ10 честички на кубен метар воздух. На полноќ во Центар биле измерени 96,1 микрограми, во Карпош 112,6 микрограми, кај Ректорат 128,3 микрограми, а на мобилна станица Бутел 96,4 микрограми.

Претпладнево во 8 часот во поглед на загаденоста со со честичките ПМ10 состојбата е лоша во Центар, кај Ректорат, Миладиновци, Бутел, Тетово и Куманово.

Кај Ректорат се измерени 127,61 микрограми ПМ 10, во Центар 95, во Бутел 108, во Тетово 93,2 микрограми, а во Куманово 70,3 микрограми ПМ 10 честички на кубен метар воздух. Максималната дозволена концентрација е 50.


Стартуваат шест проекти за медиумска писменост и критичко мислење


Скопје, 19 октомври, 2018 - 15:17 (META) 

Во организација на Фондацијата за интернет и општество „Метаморфозис“ и „Евротинк – центар за европски стратегии“, шест граѓански организации денеска во Граѓанскиот ресурсен центар во Скопје ги презентираа своите замисли со кои во рамките на проектот „Со критичко мислење до граѓани со медиумска умешност – КриТинк“ во неколку градови во земјава ќе работат на развојот на критичкото мислење и зголемување на медиумската писменост и сузбивање на дезинформациите кои се шират и преку социјалните мрежи и преку медиуми.

Како што истакна Филип Стојановски, програмски директор во „Метаморфозис“, целта на проектот, со финансиска поддршка на Европската Унија преку ИПА Програмата за граѓанско општество и медиуми, е да се работи повеќе со граѓаните, наместо со новинарите, за да се крене нивото на критичко размислување кај граѓаните, оти дезинформациите и другите негативни појави се насочени кон нив, а не толку кон новинарите.

– Младите се авангардата и нивната едукација за критичко размислување е нешто што, се надеваме, ќе има долгорочни ефекти, и овие проекти и нивниот ефект ќе имаат еден свој живот кој ќе продолжи долго – порача Стојановски.

Горан Лазаров од „Евротинк“, кој е еден од координаторите на проектот, рече оти денешниот координативен настан е со цел да се создаде мрежа на соработка меѓу организациите-добитници на грантови, која на локално ниво ќе ги спроведува целите на главниот проект.

– Целта е темата околу критичкото мислење, медиумската писменост да ја спуштиме и на локално ниво. Голем дел од активностите на суб-грантистите се поврзани со создавање на медиумски производи, одржување јавни настани, и целта е да се направи некакво вмрежување на сите активности и преку тоа на национално ниво да се влијае околу целата работа. Секако, очекуваме да се создаде мрежа што ќе се гради и понатаму и ќе ги реализира целите – вели Лазаров.

Проектите, кои ќе наскоро ќе почнат да ги реализираат „Диверзити Медиа“ заедно со „Алсат-М“, ДРОМ од Куманово со телевизијата „Плус“, Фондацијата „Фокус“ од Велес со „Дума“ и телевизијата КТВ, „Ганимед“ од Битола со ТВ „21“, потоа Македонскиот институт за европски студии заедно со „Студентско радио“, но и „Медиа плус“ од Штип заедно со „Канал 77“, ќе бидат насочени претежно кон младите, односно средношколците и бруцоши на факултетите од областа на општествените науки на скопскиот универзитет „Свети Кирил и Методиј“.


АМСМ: Во прекин сообраќајот на патот Охрид-Битола поради сообраќајка


Скопје, 20 септември, 2018 - 12:16 (META) 

Денеска од 11.10 часот на магистралниот пат Охрид-Битола, кај селото Опеница, сообраќајот е во прекин, информираат од Авто-мото сојузот на Македонија (АМСМ). Оттаму појаснуваат дека прекинот е поради сообраќајна незгода која се случила на овој патен правец.

Засега нема информации за жртви или материјална штета.


Со евроинтеграциите се добиваат силни институции, наместо силни лидери


Битола, 14 септември, 2018 - 14:53 (META) 

Во Хрватска пред десет години никој не прашуваше со чиј превоз политичарите одат на Светско првенство и кој им ги плаќа картите за натпреварите. Денес тоа сите ги интересира. Луѓето развија свест за корупција, за одговорност, за владеење на законите, нагласи хрватската амбасадорка Данијела Баришиќ на трибина „Перспективите од НАТО интеграцијата – што ќе донесе пристапниот процес за Македонија и нејзините граѓани“, што се одржа денеска во Битола.  Трибината е дел од проектот на УСАИД за граѓанско учество.

– Имате упатство од 28 земји, и ја имате Хрватска за пример. Луѓето денес се свесни што политичарите можат, а што не можат. Имате институции кои работат по закон, без разлика кој е на власт – нагласи Баришиќ.

Националниот координатор за членство во НАТО Стево Пендаровски рече дека постојат неколку алтернативи на членството во НАТО, главно централноазиски воено-политички сојузи, но ниедна друга не е подобра за нас.

– НАТО и ЕУ се школи за демократија – порача  Пендаровски, истакнавајќи дека најбитен проект во процесот на интеграции е создавање професионална, а не партиска администрација.

На трибината учествуваа и Исмет Рамадани, претседател на Евро-атлантскиот совет на Македонија, Горан Илиќ, декан на Правниот факултет на Универзитетот „Св. Климент Охридски“ од Битола и претставници на невладини организации, образовни и културни институции.


Екс-градоначалникот на Битола, Талески доби кривична пријава за „несовесно работење“


Битола, 24 август, 2018 - 13:31 (META) 

Секторот за внатрешни работи Битола поднесе кривична пријава против поранешниот градоначалник на Општина Битола, Владимир Талески за сторено кривично дело „несовесно работење во службата“.

Во период од 2015 до 2017 година, пријавениот спротивно на Законот за локална самоуправа дозволил две правни лица да бидат ослободени од плаќање месечен надомест за вршење линиски превоз на патници во општина Битола, со што нанел штета на општината во висина од 799.200 ден.

Покрај ова, со потпишување на договори со превозници и правни лица кои користат услуги, неосновано створил побарување на општината од 11.329.253 денари.

Исто така, по завршување на проектот „Реконструкција на автобуски стојалишта“ не презел дејствија за вршење на надзор за одржување на автобуските постојки.


Во Битола промоција на фестивалите АКТО и Бош


Битола, 10 август, 2018 - 11:54 (META) 

Во Мезе бар „Јагода“ во Битола, со почеток во 21.30 часот вечерва ќе се одржи забава под наслов „Собиранка“, на која АКТО Фестивалот за современи уметности, Бош Фестивал, ДримON и „Прво па женско“ ќе ги промовираат своите активности, со фокус на претстоечките изданија на Бош и АКТО.

„Идејата на оваа забава е да обедини на едно место фестивали кои во својата основа ја промовираат современата продукција на уметноста во различните појавности и тематски преокупации и да ја покаже на едно место потенцијалноста во различните пристапи на фестивалско програмирање и фунционирање“, велат организаторите.

Забавата ќе се одвива со диџеј сетови на JOSS и Dejan Dex од Битола, а ќе има и визуелни и промотивни материјали.

Во следниот период ќе се одржат годинашните изданија на два од фестивалите, односно АКТО во Битола од 23 до 25 август и Бош Фестивал во Гевгелија од 24 до 26 август.


Хигиеничар турнал ученик по скали


Битола, 16 април, 2018 - 14:41 (META) 

СВР Битола соопшти дека во саботата хигиеничар во училиштето „Коле Канински“ во Битола турнал ученик по скалите. Според полицискиот билтен, околу 15 часот 14-годишен ученик додека чекал наставник, случајно турнал лименка од прозорецот.

Во тој момент хигиеничарот Ј.Т. почнал да му вика, барајќи да ја фрли лименката во ѓубрето. Откако не го послушал, хигиеничарот најпрвин го турнал по скалите, по што го удирал по лицето.

Малолетникот се здобил со повреди и отишол во Клиничката болница во Битола за укажување лекарска помош, а го известил и родителот за настанот. Подоцна, настанот бил пријавен и од директорот за училиштето.


Скопје, Битола и Штип одбележуваат 75-години од депортирањето на Евреите од Македонија


Скопје, 12 март, 2018 - 0:44 (META) 

Со симболичниот „марш на живите“ и положување цвеќе на споменикот на 7.144 македонски Евреи кои биле депортирани во Треблинка продолжуваат сеќавањата и одбележувањето на холокаустот и заложбата за борба против антисемитизмот.

Денеска пред споменикот ќе се обратат претседателката на Еврејската заедница во Македонија, Берта Романо Николиќ, премиерот Зоран Заев и неговиот бугарски колега, Бојко Борисов, по што ќе се упатат кон комеморативната седница во Собранието на Република Македонија.

По повод 75-годишнината од холокаустот на македонските Евреи во Втората светска војна, владини делегации вчера присустуваа на комеморативните настани во Скопје, Битола и Штип.

Делегација предводена од министерката за странски инвестиции Зорица Апостолска, во придружба на заменик министерот за информатичко општество и администрација Александар Бајдевски и заменик министерот локална самоуправа Дејан Павлески, положија свежо цвеќе пред споменикот на депортираните Евреи и споменикот на паднатите борци во НОБ на градските гробишта Бутел во Скопје.

Во Битола, министерот за култура Роберт Алаѓозовски, министерот за транспорт и врски Горан Сугарески и државниот секретар одво МНР, Виктор Димовски, учествуваа на комеморативните настани, положија цвеќе пред споменикот на депортираните Eвреи од Битола и споменикот на народниот херој Естреја Овадија – Мара. Присутните продолжија со симболичниот „марш на живите“, а по молитвата на еврејските гробишта и отворањето на Ерусалимската патека, владината делегација присуствуваше и на отворањето на изложбата „Дипломати праведници помеѓу народите“ во Музејот на Битола.

Министерот за здравство Венко Филипче и државниот секретар од министерството за здравство Владо Милошев присуствуваа на комеморативните настани во Штип и положија цвеќе пред споменикoт на депортираните Евреи од овој град.


Свлечиште го прекина сообраќајот на обиколницата во Битола


Скопје, 2 февруари, 2018 - 19:48 (META) 

Сообраќајот на патниот правец Прилеп – Битола – Ресен преку обиколница Битола е во прекин поради свлечиште кое е расчистено. Од превентивни причини сообраќајот се пренасочува преку градот Битола.

Како што информира Автомото сојузот на Македонија, на самото место поставена е соодветна сообраќајна сигнализација.

Поради оштетување на мостот на автопатот А-1 Градско – Неготино, кај Стоби на река Црна, десната лента се затвора за сообраќај, a сообраќајот ќе се одвива по левата коловозна лента.


Малолетник и 19-годишник ги испишале графитите во Битола


Битола, 22 јануари, 2018 - 14:10 (META) 

На разговор во полициска станица во врска со графитите со говор на омраза што беа испишани во петокот на Широк Сокак во Битола, битолската полиција повикала еден малолетник и еден 19-годишник.

Случајот потоа бил расчистен и било утврдено дека младите битолчани ги испишале графитите, и по документирање на случајот, против нив ќе бидат поднесени пријави.