!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Битолчанец ja нашол сопругата дома мртва и облеана во крв


Битола, 13 март, 2017 - 17:31 (META) 

Битолчанец во семејниот дом ја нашол својата сопруга облеана во крв. Случајот во полиција е пријавен денеска пред 10 часот, при што И.Д. рекол дека неговата 47-годишна сопруга ја нашол на под, облеана во крв во горниот дел на телото.

Полицијата при увидот го утврдила истото, а лекар од брза помош констатирал смрт. Според неофицијалните информации, полицијата засега се сомнева дека се работи за убиство, но велат дека треба да се почека и да се види што ќе покаже истрагата.


Битолските советници даваат „двојазични“ и „криминални“ сугестии за филмот за Талески


Битола, 10 март, 2017 - 14:41 (META) 

Кавгите во битолскиот Совет за документарниот филм на градоначалникот Владимир Талески ги премина локалните граници. На советничката говорница се развиори македонското знаме и се покажуваа лажни банкноти отпечатени на албански јазик.

Откако опозицијата не успеа да го запре снимањето на филмот за трите мандати на битолскиот градоначалник Владимир Талески, таа побара во филмот барем да биде делот за криминалите и за притворот на Талески, кој е под истрага на СЈО. Тогаш на говорницата излезе советникот на ВМРО-ДПМНЕ , Пеце Милевски, го растегна македонското знаме и извади лажни банкноти од 50 и 100 денари напишани на албански јазик.

– За ова ли сакате да снимаме филм, за двојазичноста на Заев и за парите што ќе бидат на албански јазик? Или сакате да снимаме филм за протестите сега, за унитарна Македонија, а? – праша Милевски, предизвикувајќи бурна реакција кај советниците од двете страни.

На Милевски му реплицираше советникот на СДСМ, Томе Наумов, кој го обвини за антипатриотизам.

– Вие не сте против Албанците, Вие сте против Македонците – рече Наумов.

Претседателката на Советот, Силвана Ангелевска, уште еднаш ја прекина седницата, за да ги смири страстите, опоменувајќи ги советниците да се фокусираат на кварталниот извештај за буџетот на Општина Битола и на завршната сметка за 2016 година бидејќи, како што рече, ако не се изгласа до 15 март, потоа не ќе може, зошто ќе се распушти Советот.


Иванов го осуди инцидентот во Битола и повика на одговорно однесување


Скопје, 7 март, 2017 - 16:22 (META) 

Претседателот на Република Македонија, Ѓорге Иванов, остро го осуди денешниот инцидент во Битола во кој беше нападнат објектот на Националната установа „Музеј на албанската азбука“.

Како што се наведува во соопштението, македонскиот претседател верува дека ова е изолиран случај и повикува инцидентот да не се злоупотребува за партиски, политички цели и за манипулација на јавноста.

Иванов, како што соопштуваат од кабинетот на претседателот, смета дека кога државата се соочува со мошне сериозни предизвици, сите политички и општествени фактори се еднакво одговорни за превенирање на какви било тензии и провокации, се наведува во соопштението.

„Претседателот Иванов апелира и до секој поединец да се однесува одговорно и да ги има предвид можните последици од ваквите инциденти. Тој повикува на понатамошно почитување и на унапредување на меѓусебните односи, како и на градење на заедничкиот соживот“, стои во соопштението од кабинетот на претседателот.


СДСМ го осуди инцидентот во Битола и ги повика граѓаните да останат смирени


Скопје, 7 март, 2017 - 14:00 (META) 

СДСМ најостро го осудува инцидентот во Битола, во кој беа фрлени молотови коктели кон Музејот на албанската азбука. Од партијата очекуваат надлежните органи во најкус можен рок да го расветлат случајот.

„Предупредивме дека насилството и омразата поттикнати лично од Никола Груевски и поддржани од Ѓорге Иванов водат кон штетни и опасни последици по граѓаните и по Република Македонија. Сценаријата што имаат намера да предизвикаат конфликт и судир помеѓу граѓаните и да ја продлабочат политичката криза во Македонија за да се спасува Никола Груевски со соработниците од одговорност за криминалите, нема да успеат“, велат од СДСМ.

Партијата ги повика граѓаните да останат смирени и да не потпаѓаат на провокации и додаваат дека во Македонија ќе има мирен трансфер на власта и нова, совесна, реформска влада, која ќе обезбеди стабилност и напредок на државата и на граѓаните.


Маскирани лица фрлиле молотови коктели врз Музејот на албанската азбука во Битола


Битола, 7 март, 2017 - 12:30 (META) 

Четири маскирани лица фрлиле два молотови коктели врз Музејот на албанската азбука во Битола. Настанот се случил утрово, околу 4 часот, потврдуваат од раководството на Музејот. Сторителите, според вработени во Музејот, сакале да го запалат објектот, ама не успеале.

Битолската полиција потврдува дека настанот е евидентиран и дека е почната истрага.
Портпаролот на СВР Битола, Сања Стаматова, вели дека има оштетување на стаклото на влезната врата и на прозорско стакло на вториот кат.

– Фрлени се две шишиња со непозната течност. Едното шише не се запалило, а другото удрило во ѕидот и направило штета на асфалтот. Наша екипа излезе на местото на настанот – вели Стаматова.

Според неа, за настанот ќе се огласи директно Министерството за внатрешни работи, и тоа за кратко време.

Музејот на албанската азбука беше мета на напади и пред неколку месеци, кога непознати сторители, исто така, ги искршија стаклата пред одржувањето на минатогодишната свеченост за албанската азбука. Засега полицијата во Битола не излезе со информација кои се сторителите.


Ученици од техничкото училиште во Битола протестирале против двојазичноста


Битола, 1 март, 2017 - 11:14 (META) 

Неколку десетици ученици од средното техничко училиште „Ѓорги Наумов“ од Битола претпладнево, околу 10 часот, ја прекинале наставата и излегле во училишниот двор на протест против двојазичноста.

Учениците велат дека сами се организирале преку социјалните мрежи, бидејќи не се согласуваат со моменталната политика во државата „да учат албански јазик“. Учениците кои не протестирале, останале во училишните клупи.

Еден од учениците, учесник во протестот, вели дека протестите ќе продолжат и во наредните денови.

– Нашето училиште е најхрабро, протестите почнуваат, а ќе продолжиме и утре и задутре. Се организираме да излеземе и на плоштадот Магнолија и да протестираме на Широк сокак. Се надеваме дека во наредните денови ќе ни се приклучат и други училишта – вели тој.

Директорот на училиштето не одговараше на нашите телефонски повици, додека професори во училиштето велат дека денеска во училиштето има просветни инспектори.


Филмска потера од Битола до Прилеп, брканите на крајот избегале


Битола, 27 февруари, 2017 - 15:20 (META) 

Потера како во криминалистички филмови се случувала вчера рано утрото од Битола до Прилеп, каде автомобилот конечно застанал, но луѓето во него, сепак, ѝ избегале на полицијата.

Како што извести СВР Битола, сè почнало вчера околу 4.50 часот, на улицата 8 Септември во Битола, кога полицајци дале знак за сопирање на автомобил „даеву есперо“, но возачот забрзал и автомобилот се упатил кон магистралниот пат Битола – Прилеп. Битолските полицајци им јавиле на колегите во Прилеп да подготват блокада и тие го блокирале патот со службени автомобили кај раскрсницата за селото Ново Лагово. Но, автомобилот со бегалците ја пробил блокадата од возила, влегол во Прилеп, ја поминал пругата и застанал во нива.

Тројцата мажи што биле во автомобилот излегле и почнале да бегаат, при што еден полицаец фатил еден од нив, но бил нападнат од друг од бегалците, кој со остар предмет му нанел повреди на рацете. Покрај тоа, почнал и да го дави.

Фатениот тогаш избегал, а полицаецот го зграпчил напаѓачот, но и тој успеал да избега.

Полицијата вели дека трага по бегалците.


Битолскиот музеј ќе ги заѕидува капиите на битолската тврдина Џепане


Битола, 13 февруари, 2017 - 14:20 (META) 

Завод и музеј Битола ќе ги заѕидува капиите на познатата битолска тврдина Џепане, додека не се најдат средства за негова санација и заштита. Ваквиот потег е со цел да се заштити објектот од понатамошни кражби и уништување на имотот.

Директорот на Завод и музеј Битола, Зоран Алтипармаковски, вели дека Музејот изработил елаборат за валоризација на Џепане и го испратил до Управата за заштита на културното наследство, по што се чека овој објект да биде прогласен за споменик на културата од права категорија.

-Пред шест месеци го добивме Џепането од Владата на користење. Сега чекаме од Управата да го прогласи за културен споменик од прва категорија, за да можеме да аплицираме со проекти до Министерството за култура за обнова и ревитализација на овој објект. Во меѓувреме размислуваме како да се заштити од понатамошно уништување, затоа што се е украдено од внатре, сега се носат и ќерамидите – вели Алтипармаковски.

Битолската тврдина, наречена Џепане, е изградена во 1876 година, во форма на крст со вградени четири уникатни објекти од делкан камен. Објектот е сместен на ридот на поранешната битолската касарна и се смета за врвно архитектонско остварување на смилевските мајстори.


Кавги во битолскиот совет за тоа кој е поголем криминалец, Груевски или Заев


Битола, 30 јануари, 2017 - 15:04 (META) 

Каде да се донираат 1 милион денари, пари од откажаната новогодишна прослава во Битола, и како да се поделат овие средства беше една од точките на дневниот ред од седницата на Советот на Општина Битола, која денеска се претвори во жестока расправија меѓу власта и опозицијата, ама тргна и во сосема друг правец, па советниците се расправаа зошто мандатарот Никола Груевски не успеа ноќеска да формира влада.

– Вие не направивте влада поради криминал, а не поради нешто друго, и изборите на 11 декември беа поради криминал – рече Валентин Груевски, советник на ЛДП во Битола.

Дискусијата од говорницата веднаш предизвика реакции кај советниците од власта, па советникот на ВМРО-ДПМНЕ, Пеце Милевски, довикуваше „Поради криминалот на Заев, срамота, срамота“.

Советничката од власта, Соња Трпезановска, дури излезе и на говорница и истакна дека опозицијата има лидер кој е снимен со скриена камера, како бара поткуп.

– Ете, СЈО требаше да открие кој прислушува и кој уценува, и од тоа се откажавте. Значи, темата криминал за вас треба да биде табу-тема – рече Трпезановска.

Инаку, советниците од власта предлагаа 500.000 денари од парите што требаше да се потрошат за новогодишна градска прослава, да се наменат за сензорна соба во Заводот за рехабилитација на деца со оштетен слух „Кочо Рацин“. Опозицијата, пак, предлагаше не делумно, туку собата целосно да се направи со овие пари, односно од вкупната сума за оваа намена да се употребат 800.000 денари, а другите пари да се поделат на семејства кои се социјално загрозени.


Сè уште е во прекин сообраќајот кај Битола


Скопје, 26 јануари, 2017 - 9:41 (META) 

Сообраќајот на патниот правец А3, Прилеп – Битола – Ресен преку обиколницата кај Битола е во прекин, исто како вчера, поради свлечиште. Сообраќајот и денеска се пренасочува преку градот Битола, информираше АМСМ рано утрово.

Сообраќајот на државните патишта се одвива во зимски услови по претежно влажни коловози, а на осојничавите места во западниот дел од земјава, на места со остатоци од кашест снег по интервенција на дежурните екипи на „Македонија пат“.

Во клисурите и во засеците можна е појава на помали одрони, особено на патните правци: Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.

Патниот правец Скопје – Македонски Брод преку националниот парк Јасен е непрооден.

Од 15 ноември на сила стапи законската обврска за задолжително поседување зимска опрема во возилата, без оглед на моменталната временска состојба. Оваа обврска ќе трае до 15 март годинава.

АМСМ препорачува исклучително внимателно возење, прилагодена брзина на движење и почитување на поставената сообраќајна сигнализација.

 

Интензитетот на сообраќај на патните правци надвор од градските средини е умерен. На граничните премини од кедонската страна нема подолги задржувања за влез и за излез од земјава.