!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Битолскиот музеј ќе ги заѕидува капиите на битолската тврдина Џепане


Битола, 13 февруари, 2017 - 14:20 (META) 

Завод и музеј Битола ќе ги заѕидува капиите на познатата битолска тврдина Џепане, додека не се најдат средства за негова санација и заштита. Ваквиот потег е со цел да се заштити објектот од понатамошни кражби и уништување на имотот.

Директорот на Завод и музеј Битола, Зоран Алтипармаковски, вели дека Музејот изработил елаборат за валоризација на Џепане и го испратил до Управата за заштита на културното наследство, по што се чека овој објект да биде прогласен за споменик на културата од права категорија.

-Пред шест месеци го добивме Џепането од Владата на користење. Сега чекаме од Управата да го прогласи за културен споменик од прва категорија, за да можеме да аплицираме со проекти до Министерството за култура за обнова и ревитализација на овој објект. Во меѓувреме размислуваме како да се заштити од понатамошно уништување, затоа што се е украдено од внатре, сега се носат и ќерамидите – вели Алтипармаковски.

Битолската тврдина, наречена Џепане, е изградена во 1876 година, во форма на крст со вградени четири уникатни објекти од делкан камен. Објектот е сместен на ридот на поранешната битолската касарна и се смета за врвно архитектонско остварување на смилевските мајстори.


Кавги во битолскиот совет за тоа кој е поголем криминалец, Груевски или Заев


Битола, 30 јануари, 2017 - 15:04 (META) 

Каде да се донираат 1 милион денари, пари од откажаната новогодишна прослава во Битола, и како да се поделат овие средства беше една од точките на дневниот ред од седницата на Советот на Општина Битола, која денеска се претвори во жестока расправија меѓу власта и опозицијата, ама тргна и во сосема друг правец, па советниците се расправаа зошто мандатарот Никола Груевски не успеа ноќеска да формира влада.

– Вие не направивте влада поради криминал, а не поради нешто друго, и изборите на 11 декември беа поради криминал – рече Валентин Груевски, советник на ЛДП во Битола.

Дискусијата од говорницата веднаш предизвика реакции кај советниците од власта, па советникот на ВМРО-ДПМНЕ, Пеце Милевски, довикуваше „Поради криминалот на Заев, срамота, срамота“.

Советничката од власта, Соња Трпезановска, дури излезе и на говорница и истакна дека опозицијата има лидер кој е снимен со скриена камера, како бара поткуп.

– Ете, СЈО требаше да открие кој прислушува и кој уценува, и од тоа се откажавте. Значи, темата криминал за вас треба да биде табу-тема – рече Трпезановска.

Инаку, советниците од власта предлагаа 500.000 денари од парите што требаше да се потрошат за новогодишна градска прослава, да се наменат за сензорна соба во Заводот за рехабилитација на деца со оштетен слух „Кочо Рацин“. Опозицијата, пак, предлагаше не делумно, туку собата целосно да се направи со овие пари, односно од вкупната сума за оваа намена да се употребат 800.000 денари, а другите пари да се поделат на семејства кои се социјално загрозени.


Сè уште е во прекин сообраќајот кај Битола


Скопје, 26 јануари, 2017 - 9:41 (META) 

Сообраќајот на патниот правец А3, Прилеп – Битола – Ресен преку обиколницата кај Битола е во прекин, исто како вчера, поради свлечиште. Сообраќајот и денеска се пренасочува преку градот Битола, информираше АМСМ рано утрово.

Сообраќајот на државните патишта се одвива во зимски услови по претежно влажни коловози, а на осојничавите места во западниот дел од земјава, на места со остатоци од кашест снег по интервенција на дежурните екипи на „Македонија пат“.

Во клисурите и во засеците можна е појава на помали одрони, особено на патните правци: Кочани – Македонска Каменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.

Патниот правец Скопје – Македонски Брод преку националниот парк Јасен е непрооден.

Од 15 ноември на сила стапи законската обврска за задолжително поседување зимска опрема во возилата, без оглед на моменталната временска состојба. Оваа обврска ќе трае до 15 март годинава.

АМСМ препорачува исклучително внимателно возење, прилагодена брзина на движење и почитување на поставената сообраќајна сигнализација.

 

Интензитетот на сообраќај на патните правци надвор од градските средини е умерен. На граничните премини од кедонската страна нема подолги задржувања за влез и за излез од земјава.


Пронајден мртов бездомник во Битола, најверојатно е убиен


Битола, 25 јануари, 2017 - 15:10 (META) 

Основното јавно обвинителство од Битола отвори случај за бездомник кој е пронајден мртов во руинирана куќа во Битола.
Според соопштението, надлежен обвинител, заедно со екипа од МВР, извршил увид во куќата, при што на мртвото тело се констатирани траги на насилство.
Случајот е пријавен од друг бездомник, кој живеел во руинираната куќа заедно со починатиот. По наредба на јавниот обвинител, извршен е лекарски преглед и на пријавителот, кој, исто така, имал телесни повреди и е пренесен в болница. Обвинителството издало наредби за вештачење на траги од местото каде е најден починатиот, како и наредба за обдукција.


Во прекин сообраќајот на обиколницата на Битола, се вози низ градот


Скопје, 25 јануари, 2017 - 10:23 (META) 

Сообраќајот на патниот правец А3, Прилеп – Битола – Ресен, преку обиколницата кај Битола, е во прекин поради свлечиште и сообраќајот се пренасочува преку градот Битола, извести претпладнево службата за помош и информации на АМСМ.

Сообраќајот на државните патишта се одвива во зимски услови, по влажни коловози. На повисоките места во западниот и во југозападниот дел од земјава некаде има остатоци од кашест снег по интервенција на дежурните екипи на „Македонија пат“. Врнежи од снег со слаб интензитет се бележат во Битола, Железнец и на планинските премини Буково и Ѓавато. Намалена видливост поради појава на магла од 150 до 200 метри има на патниот правец Гостивар – планински премин Стража и до 70 метри на планинскиот премин Плетвар.

Во клисурите и во засеците можна е појава на помали одрони, особено на патните правци: Кочани – МакедонскаКаменица – Делчево, Виница – Берово, Гостивар – Стража, Маврово – Дебар – Струга, Демир Капија – Удово, Катланово – Велес, Крушево – Демир Хисар и Ресен – Буково.

Патниот правец Скопје – Македонски Брод преку националниот парк Јасен е непрооден.

Од 15 ноември на сила стапи законската обврска за задолжително поседување зимска опрема во возилата, без оглед на моменталната временска состојба. Оваа обврска ќе трае до 15 март.

Интензитетот на сообраќај на патните правци надвор од градските средини е умерен. На македонската страна на граничните премини нема подолги задржувања за влез и за излез од земјава. АМСМ препорачува исклучително внимателно возење, прилагодена брзина на движење и почитување на поставената сообраќајна сигнализација.


Крадци оперираат во завеани возила на патот Битола – Прилеп


Битола, 9 јануари, 2017 - 13:02 (META) 

Крадци удрија по завеани и оставени возила на патиштата во Битолско. Неколку автомобили кои поради мали сообраќајни несреќи, лизгање или завеани од снегот биле оставени на патот Битола – Прилеп, во текот на ноќта биле мета на крадци кои ги оставиле без делови и опрема. Крадците ваделе гуми, бандажи, радија и дополнителна опрема.

Возачи кои утрово патуваа за Прилеп сведочат дека неколку возила кои биле покрај автопатот биле без гуми, со скршени стакла и ветробрани.

Портпаролот на битолската полиција, Сања Стаматова, вели дека досега немаат пријави од сопствениците за кражби во вакви случаи, но дека полицијата фатила крадец на автопатот Битола – Прилеп кој сакал да ограби еден автомобилот.

– Полицијата фати крадец додека од возило кое било оставено на автопатот по сообраќајна незгода, сакал да ги украде гумите и бандажите – вели Стаматова.


Битолскиот градоначалник Талески купи нов службен автомобил


Битола, 26 декември, 2016 - 11:47 (META) 

Битолскиот градоначалник Владимир Талески се поднови со нов автомобил од буџетот на Општина Битола. Само неколку месеци пред крајот на неговиот трет мандат, Талески службениот „цитроен ц4“ го замени со „пежо 508“, но нема прецизни податоци колку пари потрошил за новото возило.

Советникот од ЛДП, Валентин Груевски, во петокот од советничката говорница обвини дека буџетот за 2016 година бил „список на желби составен од градоначалникот Владимир Талески“.

– Што кажуваат бројките за оваа година? Битола ќе има еден од двата најлоши буџети во последните седум години. Битола ќе има убедливо најлоша реализација на капиталните расходи од 40 отсто. Битола има остварено само 11 отсто од даночните приходи. Единствено во ова образложение има 100 отсто остварување – во купувањето возила. И Владимир Талески сега се вози со нов автомобил – рече Груевски на расправата за извршување на буџетот на Општина Битола за третиот квартал од тековната година.

Од службите на градоначалникот кои се задолжени за кроење на буџетот велат дека трите автомобили што ги купил Талески не се новост бидејќи се набавени пред неколку месеци, само што сега опозицијата ја актуализирала темата.

Координаторот на советничката група на ВМРО-ДПМНЕ, Игор Хаџиев, пак, вели дека не знае колку чини новото „пежо“ на Талески, но дека Советот го изгласал купувањето на автомобилот.

– Ако во буџетот имало ставка за нов автомобил, ние сме ја ставиле на гласање и сме ја изгласале, а колку чини автомобилот, тоа знаат службите во Општината – вели Хаџиев.

Советниците од власта во петокот не коментираа за новиот автомобил на Талески.

Но, советничката на ВМРО-ДПМНЕ, Соња Карапашовска, пред една година на седница на Совет, кога се расправаше за носење на буџетот за 2016 година, потврди дека 3,5 милиони денари ќе се потрошат за купување на три автомобили, од кои еден ќе го вози градоначалникот Талески.

Продолжението на седницата е закажано за денеска, а утре Советот се очекува да расправа за енормното загадување на градот, по што, по барање на опозицијата, најавено е донесување на краткорочни мерки за справување со аерозагадувањето во Битола.


Не бараме 63 пратеници, туку поддршка за реформска влада, порача Заев од Битола


Битола, 3 декември, 2016 - 22:22 (META) 

Не барам 63 пратеници, туку подобар живот за 1,5 милиони граѓани во Македонија и за сите што си заминаа од државата, истакна лидерот на СДСМ и носител на листа во четвртата изборна едница, Зоран Заев, на вечерашниот митинг на партијата и на Коалицијата за живот во Македонија во Битола.

Тој истакна дека по проектот „Скопје 2014“, „најголемиот криминал што го направила власта на Никола Груевски е во РЕК Битола“.

„Македонија стана модерно робовладетелско општество… По „Скопје 2014“ најголемиот криминал што власта го направи е во РЕК Битола. Затоа ви давам збор дека ќе ги вратиме сите украдени пари и ова ќе заврши… Давам збор дека режимот ќе падне, но тоа не е доволно бидејќи вие очекувате чесни политичари, со одговорност. Знам дека ќе победиме на 11 декември, но ми треба поддршка од вас за реформска влада за да носиме решителни одлуки. Да оставиме печат и да покажеме дека Македонија може да биде земја за почит – рече Заев.

Кандидатот за пратеник во петтата изборна едница, Александар Кирацовски, најави ревизија не само на тендерите во РЕК Битола, туку и на приватизацијата на „Стопанска банка АД Битола“ и на земјоделскиот комбинат „Пелагонија“.

– Кажете им „не“ на Груевски, на Сашо Мијалков и на Владимир Талески. Ќе ги вратиме сите пари што ги украдоа од Битола и од државата – рече Кирацовски.

Заменик-претседателката на СДСМ и ностител на листа во петтата изборна единица, Радмила Шекеринска, истакна дека Груевски самиот си признал дека најмногу се плаши од истрагите на Специјалното јавно обвинителство (СЈО).

– Груевски си призна што најмногу го боли и зошто лаже низ целата кампања. Призна дека се плаши од истрагите на СЈО. Ако тој се прашува, СЈО од утре ќе престане да работи. Бараат власт за да избегаат од затворски казни. Гласот за Груевски е глас за амнестија на најкорумпираните политичари, градоначалници и криминалци – истакна Шекеринска.


Активистите на „За нас се работи“ најавија радикализирање на протестите во Битола


Битола, 3 декември, 2016 - 16:58 (META) 

Здружението „За нас се работи“, на третиот ден од протестите за чист воздух, најави радикализирање на активностите, бидејќи, како што велат од здружението, надлежните не се заинтересирани за овој проблем во Битола.

Битолчани првите пораки за чист воздух ги упатија до политичарите и предложија потпишување на меморандум, но засега од политичките партии нема никаков одговор. Активистите на „За нас се работи“ на почетокот на денешниот протест најавија и директна блокада на РЕК Битола.

– За некој кој седи дома ова е радикализација, но оној кој има потреба од чист воздух, ќе му стане јасно што сакаме. Блокада на комбинатот веројано носи и кривична одговорност, не знаеме, но, исто така, во паника не знаеме што ќе направите, како ќе реагирате, бидејќи сè повеќе луѓе заминуваат на лекување во Скопје – рече Душко Груевски од здружението.

Активистите за чист воздух се разочарани од политичарите бидејќи во нивните програми за овие предвремени избори проблемот со аерозагадувањето воопшто не е приоритет.

– Ги повикуваме сите мудри луѓе во оваа држава да дојдат и заедно да се справиме со овој проблем бидејќи очигледно е дека политичарите не нè ставиле како приоритет во нивните програми – рече Душко Груевски.

Три дена битолчани го блокираат патот кој од градот води кон РЕК Битола, како и патот на влезот на градот, кој води од Прилеп.

Протестите за чист воздух се совпаднаа со митинзите на двете најголеми поллитички партии од македонскиот блок, односно со митингот на ВМРО-ДПМНЕ, кој се одржа во четвртокот, и со денешниот митинг на опозицискиот СДСМ.

Протест против енормното загадување на воздухот за понеделник е најавен и во Скопје. Протестот, кој е организиран од неколку еколошки организации, е закажан за 17 часот пред бараките на администрацијата на Град Скопје.


Поради големото загадување, битолчани од четврток со блокада на патот за РЕК Битола


Битола, 28 ноември, 2016 - 14:33 (META) 

Битолчани ги рективираат протестите против загадениот воздух. По неколкунеделното енормно загадување на амбиенталниот воздух во градот, здружението „За нас се работи“ повикува на блокада на патниот правец кој од Битола води до РЕК Битола, со слоганот „Битола се задушува, Битола умира“.

Блокадите се најавуваат од четврток до сабота, во период од 15 до 17 часот, кога битолчани, и особено вработените во РЕК, завршуваат со права смена и одат на работа во втора смена. Битолчани поставија барања до надлежните и се закануваат дека доколку не ги исполнат, следува целосна блокада на РЕК Битола.

Тие бараат субвенционирање на електрична енергија до спроведување на гасификација, како и спроведување на режим на сообраќај во централното градско подрачје.

Од здружението „За нас се работи“ велат дека ултиматумот е упатен до Општината и до Владата, при што се дистанцираат од каква било политичка конотација поврзана со предвремените парламентарни избори.

– Не нè интересира политика, ниту кампања. Приоритет ни е здравјето на луѓето. Надлежноста за исполнување на едната мерка е на Општина Битола, а за другата – на Владата – вели за „Мета“ Илија Балтовски од „ За нас се работи“.