!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Најмалку 160 лица загинаа при уривање на покрив на црква во Нигерија


Ујо, 11 декември, 2016 - 13:18 (META) 

Најмалку 160 лица загинаа кога покров на една црква на југот во Нигерија се урна врз верниците, соопштија денеска властите. Се очекува бројот на загинати да се зголеми.

Црквата која се урнала во градот Ујо, во нигериската сојузна држава Аква Иба, била во изградба, а работниците се брзале да ја дозавршат изградбата за да биде готова за церемонијата на која основачот на црквата, Акан Викс, требало да биде прогласен за бискуп.

Во моментот на падот на металната конструкција, во црквата се наоѓале повеќе од стотина верници, меѓу кои и Викс, како и еден владин претставник, кои останале неповредени.

За причините за несреќата ќе биде поведена истрага, за да се утврди дали се испочитувани стандардите при градење на објектот.

Уривањето згради во Нигерија се случува многу често, поради корупција при склучување на договорите за градење, користење на нестандардни материјали, како и поткуп на инспекторите кои вршат надзор.


Бискуп предупредува за можни терористички напади во Тирана, Приштина и во Скопје


Приштина, 4 јули, 2016 - 10:49 (META) 

Можни се терористички напади во Приштина, Скопје и во Тирана, како последица на тоа што некои луѓе се задоени во духот на нетрпеливоста и на омразата, изјави косовскиот бискуп Дод Ѓерѓи.

Бискупот ги повика државните, политичките, верските и културните инситуции да дејствуваат во насока на спречување на терористичките акти, слични на тие што се случија во Париз, Бангладеш и во Истанбул.

– Овој дух на нетрпеливиот и на омраза на чуден начин навлезе и кај некои наши луѓе. Така, настаните во Истанбул, Бангладеш, Париз набргу може да стигнат во Приштина, Скопје или во Тирана – рече Дод Ѓерѓи за време на мисата посветена на жртвите во Истанбул и во Бангладеш.

Во меѓувреме, косовскиот заменик-министер за внатрешни работи, Нехат Мустафа, соопшти дека сите податоци што ги поседуваат укажуваат дека Косово не е во опасност.

– Статистиките со кои располагаат косовската полиција, косовската тајна служба и меѓународните партнери, покажуваат дека Косово не е и не може да биде база на вакви терористички напади – изјави Мустафа.


Либи Лејн е првата жена-бискуп на Англиканската црква


Лондон, 17 декември, 2014 - 14:46 (META) 

Англиканската црква денеска ја именуваше првата жена на положбата бискуп и со тоа се стави крај на повеќевековната традиција што предизвика длабока поделба во верската организација.

Црквата ја именуваше Либи Лејн за нов бискуп на Стокпорт, на северот на Англија. По долгата и бурна дебата, Синодот на Англиканската црква во јули, со гласање, одлучи да им дозволи на жените да станат бискупи.

Законот е формално усвоен минатиот месец. Жените служат како свештеници во Англиканската црква од 1994 година.