!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Полицијата привела двајца Англичани и двајца Украинци за препродавање билети за Супер купот


Скопје, 8 август, 2017 - 20:27 (META) 

Полицијата денеска привела четири странски државјани поради недозволено препродавање билети за Супер купот.

Како што соопшти МВР, во 17.40 часот на плоштадот Македонија фатени се и приведени двајца англиски државјани, кои им препродале билети на двајца украински државјани.

При извршен преглед кај украинските државјани се пронајдени вкупно пет билети без наведени лични податоци, додека кај еден од англиските државјани се пронајдени шест пликоа со по еден билет на различни имиња. При извршениот разговор, еден од украинските државјани изјавил дека еден или два билети купил од Англичаните.

За настанот известен е јавен обвинител и по брза постапка ќе биде поднесена соодветна пријава за недозволена трговија.


Пријава за скопјанец што препродавал билети за Супер купот


Скопје, 8 август, 2017 - 13:24 (META) 

СВР Скопје извести дека почнала постапка против еден скопјанец за препродажба на билети за Супер купот, по новиот став во Кривичниот законик со кој станува кривично дело препродажбата на билети за спортски и за културни манифестации.

Скопската полиција вчера идентификувала еден скопјанец кој на интернет нудел билети за вечерашниот Супер куп на УЕФА, на кој ќе се соочат „Реал Мадрид“ и „Манчестер јунајтед“. Со наредба од Основен суд Скопје 1 извршен е претрес во неговиот дом, при што биле пронајдени и одземени билети кои ќе бидат дадени на вештачење.

СВР Скопје против скопјанецот ќе поднесе пријава според член 277, став 2 од Кривичниот законик, кој беше внесен во законот на 28 јули годинава.


Џафери го критикуваше Тунтев, пратениците изгласаа казни за препродажба на билети


Скопје, 28 јули, 2017 - 18:11 (META) 

Во десетината минути од продолжението на 10. собраниска седница попладнево, на која единствена точка беше измената на Кривичниот законик со која станува кривично дело препродажбата на билети за спортски и за културни манифестации, во Собранието пред 17 часот повторно имаше мала препирка, па интервенираше и претседателот на Собранието, Талат Џафери, заканувајќи му се на Томислав Тунтев дека ако го троши времето на реплицирање на Илија Димовски, ќе закаже продолжение на седница во 23 часот.

Законот, инаку, беше изгласан со 89 гласа „за“ и немаше воздржани пратеници или такви што гласаа против. Според амандманот што беше прифатен од Законодавно-правната комисија и од Комисија за политички систем и односи меѓу заедниците, измените ќе стапат на сила со објавувањето во „Службен весник“. Тие предвидуваат парична казна или казна до една година затвор за тој што препродава билети, а за тој што организира мрежа за препродажба – парична казна или затвор до три години.

Измените се прават поради барањата на УЕФА за Супер купот, кој ќе се одржи на 8 август во Скопје.

Иако предлог-законот со кој ќе стане казнива препродажбата на билети беше поднесен од координаторите на пратеничките групи на СДСМ, ДУИ, Беса и на првата пратеничка група на ВМРО-ДПМНЕ, пред конечното гласање, Томислав Тунтев, координаторот на СДСМ, се зафати да му реплицира на Илија Димовски, координатор  на првата пратеничка група на опозицијата.

Додека Тунтев реплицираше зошто и овој закон првично поднесен од Владата влегува во процедура како предлог на пратеничките групи, претседателот на Собранието се уфрли за да му укаже дека нема потреба од докажување и натпреварување и дека сите пратеници знаат дека предлог-законот е во скратена постапка и треба побрзо да се пристапи кон гласање.

– Ние баш поради тоа свикавме итна седница и тоа не е седница на која ќе се натпреваруваме, на која ќе се докаже што е што. Мислам дека се договоривме до 17 часот да биде завршена и сега јас Ви укажувам, ако не се заврши до 17 часот, ќе се вратите во 23 часот – рече Џафери.


Поради Супер купот, препродавањето билети ќе биде кривично дело


Скопје, 28 јули, 2017 - 15:49 (META) 

Во Собранието по попладневната пауза експресно беше закажана и се одржа 10. седница, со единствена точка на дневен ред – донесување предлог-закон за изменување и за дополнување на Законот за кривична постапка во скратена постапка, со кој рекламирањето билети за препродажба и нивната препродажба ќе станат кривично дело.

Ваквата препродажба досега воопшто не беше опфатена со законите, рече Томислав Тунтев, координаторот на пратеничката група на СДСМ. Тој предлогот на четирите најголеми партии во Собранието, ВМРО-ДПМНЕ, СДСМ, ДУИ и Беса, го образложи со барањата на УЕФА за одржувањето на Супер купот, а со тој закон ќе се овозможи на Фудбалската федерација на Македонија да ги исполни барањата на Европската федерација.

Откако предлогот беше прифатен, претседателот на Собранието, Талат Џафери, побара матичната комисија и Законодавно-правна комисија да го известат кога ќе ја продолжат процедурата за измената на Кривичниот законик и потоа ја прекина седницата и прогласи дека Собранието ќе продолжи со работа на точката од петтата седница, но набргу даде пауза за да овозможи комисиите да се координираат.


„Еуровингс“ ќе почне да лета од Скопје до Минхен од октомври


Скопје, 17 март, 2017 - 13:46 (META) 

„ТАВ Македонија“ најави дека германската нискобуџетна авиокомпанија „Еуровингс“ ќе почне да лета на релација Скопје – Минхен од 31 октомври годинава.

Патниците од аеродромот „Александар Велики“ во Скопје ќе бидат поврзани со главниот аеродром во Минхен, „Франц Јозеф Штраус“.

Авиокомпанијата ќе оперира на оваа линија двапати неделно, во вторник и во петок, со воздухоплов „ербас A320-200“, со капацитет од 174 седишта.

Како што информираат од „Еуровингс“, продажбата на билети за дестинацијата Скопје – Минхен почна на 15 март и е отворена на веб-страницата на авиокомпанијата (www.eurowings.com).

– Оваа линија е директен доказ за успешното завршување на преговорите што ги имавме со авиокомпанијата во изминатиот период и се надеваме дека ова е само почеток на нашата успешна соработка, како и на инвестициите на „Еуровингс“ во Македонија – изјави генералниот директор на „ТАВ Македонија“, Алп Ер Тунга Ерсој.

„Еуровингс“ е со седиште во Келн и е дел од групацијата „Луфтханза“, а се смета за нискобуџетна авиокомпанија. Лета до повеќе од 150 дестинации во повеќе од 40 земји во Европа, а позната е по добрата мрежа на рути до атрактивни туристички локации.


„Виз ер“ воведува три нови линии до Рим, Малта и до Ваксјо


Скопје, 28 февруари, 2017 - 14:51 (META) 

Три нови авиолинии од Скопје до Малта, Рим и до Ваксјо (Шведска) ќе воведат „Виз ер“ и „ТАВ Македонија“, информираа од компанијата. Летовите ќе почнат да се реализираат на 14 и на 16 јули годинава, кога ќе се базира и четвртиот авион на оваа компанија.

– Нашата инвестиција во базата во Скопје со дополнителниот воздухоплов, трите нови линии и зголемените фреквенции на постојните летови, значи повеќе работни места во Македонија и во „Виз ер“. Ја прославуваме успешната приказна на „Виз ер“ во Македонија со специјална продажба на авионски билети со 20 проценти попуст на цената за сите нови резервации направени денеска, 28 февруари, до која било од 27 дестинации достапни од Скопје – изјави главниот директор за корпоративни прашања на „Виз ер“, Овен Џонс.

Продажбата на билетите за овие три нови линии почнува денеска, на wizzair.com, со цени кои почнуваат од 1.799 денари.

Покрај воведувањето на новите линии, летовите од Скопје до Ајндховен, Брисел-Шарлероа, Меминген (Минхен Запад) и Копенхаген ќе бидат со зголемени фреквенции до три летови неделно.

Конекциите од Скопје до Гетеборг Ландветер, Братислава и од Охрид до Базел-Милхаус-Фрајбург ќе бидат со зголемени фреквенции до четири летови неделно. Летови од Скопје до Малме и до Милхаус сега ќе сообраќаат секој ден.

„Овие три нови рути, заедно со веќе најавената нова линија на „Виз ер“ до Будимпешта, која ќе почне од 2 април, се навистина атрактивни дестинации, барани од пазарот и ќе бидат вистински погодок во контекст на проширувањето на нашата мрежа на авиолинии од двата македонски аеродроми. Ова е резултат на нашите постојани маркетинг-студии и активности“, изјави генералниот директор на ТАВ Македонија, Алпер Ерсој.

На аеродромот „Александар Велики“ денеска беше пречекан тримилионитиот патник.


ЈСП нема да враќа пари за „пропаднатите“ возења


Скопје, 6 февруари, 2017 - 17:22 (META) 

Од денеска, поради одлуката на градоначалникот на Скопје за бесплатен превоз во автобусите, Јавното сообраќајно претпријатие (ЈСП) сè до следното соопштение патниците ќе ги превезува бесплатно, ќе работат само четири билетарници, а неискористените возења од купените билети нема да се рефундираат, односно ЈСП нема да враќа пари.

Во соопштението на веб-страницата на ЈСП е наведено дека додека трае мерката за бесплатен превоз ќе работат само четири билетарници, во периодот од 6 до 17 часот. Тоа се билетарниците кај Зелен Пазар, во Ѓорче Петров, кај пазарот Бутел и кај Транспортен центар.

Исто така, доколку на одредени билети, како што се тие за 10 возења, дневен и неделен билет, има неискористени возења и билетите истечат додека трае мерката за бесплатен превоз, ЈСП нема да враќа пари ниту, пак, ќе им ја продолжи важноста. Образложението е дека нема технички можности за тоа.

„Напоменуваме дека од системски, т.е. технички причини, ЈСП „Скопје“ нема да може да изврши рефундирање на средствата на веќе набавените привремени билети, ниту пак пролонгирање на нивната важност“, се вели во известувањето.


Од следната недела возење во ЈСП само со електронска картичка


Скопје, 26 декември, 2016 - 10:41 (META) 

Eлектронската наплата во автобусите на Јавното сообраќајно претпријатие (ЈСП) и приватните превозници ќе почне задолжително да се применува од следната недела. Првичната цена на електронска картичка ќе изнесува 150 денари.

Покрај во возилата, картичките ќе може да се купат и во сите 26 билетарници на ЈСП, во инфо-центрите, како и во продавниците кои имаат склучено договор со ЈСП, информираат од ова претпријатие.

Секој патник во јавниот градски превоз ќе биде должен да поседува ваква карта, персонализирана или неперсонализирана за лица кои поретко користат јавен градски превоз и на која нема да има фотографија.

Возењето и понатаму ќе чини 35 денари, а кредитот на картичките ќе може да се дополнува со најмалку 100 денари. Ќе постои и опција за плаќање со помош на мобилен телефон, но истото ќе чини 40 денари.

За официјалниот почеток на новиот начин на наплата граѓаните дополнително ќе бидат информирани преку плакати во возилата.


Од 1 септември со картичка „скопска“ во сите автобуси


Скопје, 24 јули, 2016 - 15:55 (META) 

Од 1 септември целосно се укинуваат хартиените билети. Сите граѓани што се возат со јавниот превоз, задолжително ќе мора да користат персонализирана или непресонализирана картичка „скопска“, која ќе важи и за државните и за приватните автобуси. На тој начин ќе се забрза автобускиот превоз, а граѓаните ќе заштедат време, нерви и пари.

– Почнувајќи од 1 септември 2016 година, сите лица што ќе го користат јавниот превоз во Град Скопје, задолжително ќе мораат да ги користат картичките „скопска“, без разлика дали ќе користат возила од ЈСП Скопје или, пак, од приватните превозници – велат од Град Скопје.

Цените на услугите на ЈСП- Скопје и на приватните превозници ќе се изедначат.


Поскапен возниот билет за бегалците од 10 на 25 евра


Скопје, 13 септември, 2015 - 15:47 (META) 

По дводневниот штрајк во „Македонски железници, спроведен од незадоволните машиновозачи кои си ги побараа заостанатите лични доходи и неплатеното здравствено осигурување за јули и за август, од вчера, според изјавите на граѓанските активисти, возниот билет за бегалци е поскапен и сега изнесува 25 евра.

Возовите на „Македонски железници“ од вчера повторно се на шините.

Цената на возните билети беше зголемена и пред неколку месеци, од 5 на 10 евра. Тоа поскапување беше објаснето со зголемените трошоци на „Македонски железници“. За последново зголемување на цената, сè уште нема објаснување.