Билен Саљији стана заменик-генерален директор на МЕПСО


Скопје, 11 јули, 2018 - 13:44 (META) 

Поранешниот министер за правда, Билен Саљији е избран за заменик генерален директор и за член на Управен одбор на МЕПСО, потврдија од компанијата.

Саљији беше министер за правда од јуни 2017 година до март годинава кога си поднесе оставка поради одлуката во случајот со малиот Алмир иако се појавија информации дека неговото име беше прво на списокот на премиерот Заев при реконструкцијата на владата.

Во периодот од 2011 до 2017 година бил директор на Државниот инспекторат за шумарство и ловство. Саљији има положено правосуден и нотарски испит. Од 2009 до 2011 бил директор во ЈКП „Врапчиште“, Општина Врапчиште, а од 2005 до 2009 година бил советник за односи со јавноста во Општина Врапчиште


Бошњаковски: Оставката на Саљији нема да влијае на реформите на правосудството


Скопје, 21 март, 2018 - 11:48 (META) 

Судската власт е независна и таква треба да остане, а на реформите на правосудството оставката на сега веќе поранешниот министер за правда Билен Саљији нема да влијае, бидејќи во ниту еден момент ништо нема да биде закочено, рече владиниот портпарол Миле Бошњаковски на денешната прес-конференција во Владата, одговарајќи на новинарско прашање дали вчерашната оставка што ја поднесе Саљији ќе има влијание врз реформите на правосудството.

Бошњаковски нагласи дека оставката на Саљији, како што тој самиот кажа е „негов личен чин, бидејќи чувствува морална одговорност за губење на довербата во однос на одредени делови на реформите на правосудствотои за малиот Алмир“.

Бошњаковски не коментираше дали оставката на Саљији ќе ја забрза реконструкцијата на Владата што ја најави премиерот Заев.

На новинарско прашање Бошњаковски рече дека Зконот за употреба на јазиците „ќе биде испратен до Венецијанската комисија веднаш кога ќе биде објавен во Службен весник“.


Министерот Саљији си даде оставка поради малиот Алмир


Скопје, 21 март, 2018 - 8:36 (META) 

Министерот за правда Билен Саљији синоќа во Владата на конференција за медиуми соопшти дека си поднесува неотповиклива оставка, поради, како што рече,морални причини и разнишаната доверба во судството во врска со случајот на малиот Алмир, кој пред две години беше прегазен во Куманово.

– Довербата во судството почна да се враќа преку случаите „Сопот“ и „Монструм“, но сепак во овие моменти чувствувам дека оваа доверба е разнишана во јавноста, но и кај мене лично, поради одлуката од пред неколку дена републичкиот јавен обвинител да го преквалификува обвинението во случајот на малиот Алмир. Оваа одлука беше оспорена од четирите јавни обвинители. Како прв човек на Министерството за правда поради оваа разнишана доверба чувствувам морална обврска да поднесам оставка од функцијата министер, не како акт на неуспех или притисок, туку како акт за кој се надева ќе биде во правец на подигнување на свеста и вниманието на институциите и целото општество за бескомпромисни реформи на правосудството – образложи Саљији.

Според некои медиуми на македонски јазик, кои се повикуваат на партиски извори, оставката не била по волја на Саљији, туку тоа го побарал премиерот Зоран Заев.

Билен Саљији функцијата ја вршеше од крајот на мај минатата година кога и беше избрана владата на коалицијата СДСМ-ДУИ-Алијанса за Албанците под раководство на лидерот на СДСМ, Зоран Заев.


По тензичниот почеток, напредок на седницата на Советот за реформи во правосудството


Скопје, 19 декември, 2017 - 18:49 (META) 

Професорот Љубомир Фрчкоски оцени дека денешната седница на Советот за реформи во правосудството била „тензично-конструктивна“ и оти е постигнат напредок со формирање на работна група за дефинирање на правилата на работа на Советот.

Работната група, со која ќе раководи професорката Мирјана Најчевска, треба до крајот на месецов да ги изготви и предложи правилата. Сепак, Фрчковски рече дека останува да се види дали истите ќе бидат донесени пред нова година.

– И конечно на следниот состанок во рамките на правилникот за работа, кој Најчевска ќе ни го предложи ќе почнеме да расправаме и за составот на работните групи кои треба да ги направат законите. Првично одлучивме членовите на советот да влезат во сите работни групи, таму каде што ги нема, а потоа ќе расправавме и за потребата од бројот на работните групи, дали треба нови, дали некои треба да се укинат, кој треба да ги води… Тоа ќе остане за следните седници. Договориме да се среќаваме почесто и погусто за да може тие планови што сега ги направивме да ги спроведеме – изјави Фрчкоски.

Тој рече се договориле да се формира комисија која, во рамките на законските можности, што треба да ги разгледа опциите за обнова на постапките во оние случаи каде има индиции за сериозно кршење на човековите права. Комисијата, како што соопшти Фрчкоски, ќе биде составена од тројца професори и двајца или тројца судии и еден обвинител.

Министерот за правда Билен Саљији рече дека Советот за реформи во правосудството, кој е во рамките на Министерството за правда ќе продолжи да функционира како што функционирал досега со подобрено и забрзано темпо во насока на спроведување на сите задачи кои се очекуваат во блиска иднина од самото Министерство со цел реформирање на правосудниот систем во Република Македонија.

Прашан дали ќе се повлече од Советот, Саљији изјави дека и понатаму останува претседател на Советот и дека е формирана група која ќе предложи решение за точно утврдување на начинот на работа на советот во иднина.

– Сите членови се исти, останува нејасна изјавата на професорот Гордан Калајџиев кој до денеска до мене не доставил официјално известување дека се повлекува од Советот. Јас ќе настојувам и лично да разговарам со професорот за да го надминеме недоразбирањето. Инаку, постои можноста Советот да се прошири и со други експерти и чинители кои ќе можат да дадат одреден придонес во работењето – рече Саљији.

Денешниот состанок на Советот за реформи во правосудството беше одржан откако дел од членовите обвинија дека Министерството за правда не ја користи и ја избегнува нивната експертиза.


АКМИС им бил само украс: Кривичниот и Врховниот суд рачно распределувале предмети


Скопје, 7 декември, 2017 - 16:02 (META) 

Работната група на Министерството за правда констатирала бројни неправилности во работата на Кривичниот суд Скопје и на Врховниот суд во врска со користењето на АКМИ-системот (Автоматизиран компјутерски систем за управување со судски предмети).

Како што соопшти министерот за правда, Билен Саљији, во Апелацискиот суд комисијата утврдила дека АКМИС е имплементиран и редовно се користи освен во делот за судската управа.

Според наодите на Комисијата, во Кривичниот суд годишен план за движење на предметите бил донесен само во 2013 година. Годишниот распоред за работа на судот во 2016 и 2017 година бил менуван често, односно за две години бил менуван 10 пати. Не се користел модулот за автоматска распределба, туку таа се вршела рачно. Предметите биле распоредувани само со параф на претседателот на судот и со телефонско јавување во судската писарница.

При увидот во судот било утврдено дека 860 предмети не се распределени на судии и како што кажа Саљији со ова се доведува во прашање точноста на статистичките податоци во месечните и во годишните извештаи на судот до повисоките судови, судскиот совет и до Министерството за правда.

Во Врховниот суд, АКМИ-системот се применувал спротивно на судскиот деловник и наместо предметот да оди кај судија по случаен избор, него го добива очекуван судија. Исто така, според извештајот на Комисијата во Врховниот суд не било формирано работно тело за управување на движењето со предметите во судот, а годишниот распоред за работа во 2017 година бил менуван девет пати. Не се почитувало ниту начелото за специјализација на судиите, односно судии кои работеле на граѓански предмети се прераспоредувале да работат на кривични и обратно.

Извештајот ќе биде испратен и до другите надлежни институции, кои ќе треба да утврдат дали наводите упатуваат дека претседателите на судовите извршиле некакво кривично дело.

Прашани да посочат кои се одговорни за ваквата ситуација во судовите, министерот и претседателот на комисијата не сакаа да прецизираат, но кратко рекоа дека јавноста добро знае кој во изминатите две години претседавал со судовите.

Во однос на извештајот Министерството за правда упати конкретни препораки до судовите, доследно да ги почитуваат Законот за судовите, Законот за управување со движењето на предметите во судовите и судскиот деловник, потоа формирање и функционирање на работни тела за управување со движењето на судските предмети, претседателите на судовите да поднесѕваат извештаи за реализацијата на нивната работа до Судскиот совет, да се зајакнат контролите на на повисоките врз пониските судови и да се даваат прецизни мерки за следење на констатираните неправилности.

– Министерството за правда му препорачува на Судскито совет постојано да ја следи работата на судовите во имплементацијата на АКМИС-от и спроведувањето на законот за управување со движењето на предметите во судовите и судскиот деловник-рече Саљији.

Тој нагласи дека Министерството за правда во иднина ќе воспостави пракса на постојан увид во функционирањето на АКМИС-от и додаде дека уводот на комисијата ќе продолжи и во останатите судови во државата.


Османи, Спасовски, Саљији и Манчевски ќе му реферираат на Хан за „3-6-9“


Скопје, 19 ноември, 2017 - 16:10 (META) 

Вицепремиерот за европски прашања, Бујар Османи, заедно со вицепремиерот и министер за внатрешни работи, Оливер Спасовски, министерот за правда, Билен Саљији, како и со министерот за информатичко општество и администрација, Дамјан Манчевски, утре во Секретаријатот за европски прашања ќе има средба со еврокомесарот за проширување и за соседска политика, Јоханес Хан.

Од СЕП информираат дека Османи ќе ги презентира новите реформски пакети „6-9“, кои претставуваат дополнување на планот „3-6-9“.

Спасовски, Саљији и Манчевски ќе го информираат Хан за реформските приоритети во правосудството, реформата на безбедносните служби, како и за реформите во јавната администрација.


Министерството за правда може да ангажира меѓународни експерти за „Диво Насеље“


Скопје, 3 ноември, 2017 - 16:13 (META) 

За сите случаи за кои постојат одредени сомневања за нерегуларности, односно не се докрај расветлени, Владата ќе вклучи меѓународни експерти од одредени области за нивно расветлување, изјави министерот за правда Билен Саљији, одговарајќи на новинарско прашање за барањата меѓународна експертска група да го истражи случајот „Диво Насеље“.

– Министерството за правда, во согласност со неговите ингеренции, како составен дел од Владата на Република Македонија, активно ќе помага во тоа – рече Саљији по презентацијата на извештајот за соработката меѓу Академијата за судии и француската Национална академија за правосудство, во Амбасадата на Франција во земјава.

Францускиот амбасадор Кристијан Тимоние смета дека решенијата треба да се бараат првенствено во внатрешниот правосуден систем во Македонија.

– Јас, како набљудувач, можам да ви кажам дека ги следиме сите аспекти од тоа прашање. Од она што го читаме од медиумите дека се бара своевидна ревизија на судската одлука, милам дека тоа е можност која е отворена. Но, пред да бараме да се решаваат прашања во меѓународни рамки, треба да се обидеме да ги решиме во постојниот правосуден систем – рече Тимоние.


Саљији: Деновиве ќе биде испратено барањето за екстрадиција на Грујовски и на Бошковски


Скопје, 3 ноември, 2017 - 12:54 (META) 

Министерот за правда, Билен Саљији, денеска потврди дека министерството ја добило од Кривичниот суд документацијата за екстрадиција на поранешните началници во УБК, Горан Грујовски и Никола Бошковски, од Грција во Македонија и дека деновиве официјално ќе биде потпишано и доставено барањето за екстрадиција до грчките власти.

Саљији денеска присуствуваше на презентацијата на извештајот за соработка со француската Национална академија за правосудство.

Кривичниот суд, во средата оваа недела соопшти дека ја комплетирал документацијата за екстрадиција на Грујовски и на Бошковски и ја доставил до Министерството за правда.

Грујовски и Бошковски беа уапсени на 18 октомври на аеродромот во Солун, додека со лажни бугарски пасоши се обидувале да отпатуваат за Будимпешта. Тие во моментов се во екстрадициски притвор во Солун, а на почетокот на декември треба да се појават пред солунскиот суд во врска со лажните бугарски пасоши, постапка која беше двапати одложувана бидејќи судот не успеа да обезбеди преведувач.

Грујовски и Бошковски се обвинети во случаите „Тврдина“ и „Таргет“ на Специјалното јавно обвинителство, за незаконското прислушување и за уништување на опремата од прислушувањето.

Тие три месеци беа во бегство за да го избегнат притворот што им го одреди Апелацискиот суд, а беше потвреден и од Врховниот суд.


СЈО да работи во рамки на ОЈО, предвидува стратегијата за реформи во правосудството


Охрид, 11 септември, 2017 - 19:17 (META) 

Работната група за подготвување на стратегијата за реформи на правосудниот сектор во Македонија денеска во Охрид ја презентираше нејзината нацрт-верзија, според која треба да се изработат законски решенија за судовите, јавното обвинителство, јавните обвинители и за судскиот совет.

Стратегијата за реформи во правосудството и акцискиот план предвидуваат подобрување на условите за работа на судиите, јавните обвинители, судската и на јавно-обвинителската служба, распределба на судските предмети (АКМИС) без надворешни влијанија, избор и унапредување на судии и на јавни обвинители според повисоки законски критериуми, донесување на нов кривичен законик, укинување на Вишиот управен суд, поништување на целиот процес на лустрација, како и избор и разрешување на судии и обвинители врз основа на објективни и мерливи критериуми.

Во однос на СЈО, стратегијата предвидува продолжување на работа на оваа институција во рамките на јавното обвинителство на Република Македонија со автономна надлежност проширена и со гонење на кривични дела од висок профил на корупција (white-collar crime).

Министерот за правда, Билен Саљији, рече дека Владата е цврсто одлучена реформите во овој сектор да бидат со цел враќање на довербата на граѓаните во правосудниот систем, подобрување на пристапот до правда за сите граѓани, целосно владеење на правото и инсталирање на меритократијата во правосудниот сектор.

– Ова се едноставни принципи, но нивната имплементација е бескрајно компликувана. Оваа реформа е еден од клучните делови на планот „3-6- 9“ на Владата и донесувањето на оваа стратегија и нејзината имплементација ќе значат огромен чекор напред во приближувањето на владеењето на правото во Република Македонија со развиените западни демократии, па со тоа ќе биде совладана уште една препрека на патот кон евро-атлантските интеграции на Република Македонија – рече Саљији, кој ја повика опозицијата да даде поддршка во подготовката и во носењето на сите идни законски проекти кои произлегуваат од стратегијата.

Претседателката на работната група, Ана Павловска-Данева, ја повика јавноста да ја прегледа, прочита и да ја анализира стратегијата и порача дека во наредниот период работната група ќе биде на располагање да ги слушне сите сугестии и каде што е соодветно – да ги имплементира.


Македонија стана членка на Агенцијата за фундаментални права


Скопје, 7 август, 2017 - 17:58 (META) 

Македонија денеска стана членка на Агенцијата за фундаментални права (АФП) на Европската Унија, информираше вицепремиерот задолжен за европски прашања, Бујар Османи.

Вицепремиерот рече дека зачленувањето во Агенцијата ја покажува посветеноста на Владата за приближување на земјата кон Европската Унија на сите нивоа.

– Членството во ова институција не е изолиран настан што се случи одеднаш, туку тоа е круна на еден процес кој е почнат уште во 2008 година, кога и формално како држава имаме побарано членство во Агенцијата. Низ овој процес поминавме бројни блокади, но, еве, конечно, го откочивме процесот и станавме членка на оваа важна европска институција – изјави Османи.

Тој го оцени зачленување во Агенцијата за фундаментални права на ЕУ како важен чекор од страна на Европската Унија бидејќи Македонија во моментов е единствената земја – кандидат за членство во ЕУ која стекнала право за учество во работата на Агенцијата.

Министерот за правда, Билен Саљији, истакна дека вклучувањето на Република Македонија во работата на оваа агенција како единствено тело што се занимава со почитувањето на човековите права во Европската Унија, кореспондира со евроинтегративниот процес на Владата и со активностите на усогласување на македонското со европското законодавство.

– На овој начин, Република Македонија, како единствена од земјите – кандидатки за членство, ќе има директен увид во работата на Агенцијата и можност европските стандарди и практиките да ги пренесе во домашната законодавна и институционална рамка – изјави Саљији.

Тој информираше дека поголемиот дел од финансиските обврски на Република Македонија за членството во агенцијата се обезбедени во вид на грант преку ИПА од страна на Секретаријатот за европски прашања, додека остатокот од околу 20 отсто ќе го обезбеди Министерството за правда.