Владата на Орбан лани потрошила 40 милиони евра на анти-Сорос пропагандата


Будимпешта, 7 февруари, 2018 - 10:50 (META) 

Вкупно 40,5 милиони евра потрошила минатата година Владата на Унгарија на пропагандата против невладините организации и Институтот „Отворено општество“ на американскиот мултимилијардер роден во Унгарија, Џорџ Сорос, пишува унгарскиот центар за истражувачко новинарство „Atlatszo“, изнесувајќи ги резултатите од своето истражување.

Притоа, истражувачките новинари утврдиле дека третина од тие пари завршиле во џебот на Леринц Месарош (Lőrinc Mészáros), близок пријател на унгарскиот премиер Виктор Орбан.

„Atlatszo“ во текот на целата 2017 година следел колку владата троши на пропагандата, а откако на крајот на минатата година го побарале последниот комплет податоци, требало за него да платат 375 евра.

Во рамките на владините кампањи минатата година од април до ноември, со мала пауза во текот на летото, улиците во Унгарија беа исполепени со плакати против Сорос и против мигрантите.
Најголем дел од парите завршиле во џебот на Месарош, градоначалник на Фелчут, родниот град на Орбан и сопственик на неделник, портали и телевизијата „Ехо“. Станува збор за вкупно 12,8 милиони евра исплатени за реклами. На второ место е Андраш Томбор, бизнис-партнер на Арпад Хабоњи, советник кој работи за Орбан. На трето место е компанијата Одекс, која работи со билборди, а на четвртото е Енди Вајна, филмски автор кој тесно соработува со владата и сопственик на казина, кој „спечалил“ 3,3 милиони евра.


ДИК ги распредели рекламните паноа и билборди на партиите за локалните избори


Скопје, 16 септември, 2017 - 18:47 (META) 

Државната изборна комисија (ДИК) денеска со жрепка ги распредели локациите на паноата и на билбордите за политичко рекламирање понудени од фирмите што стопанисуваат со нив, за потребите на партиите за претстојните локални избори.

Распределбата на локациите на рекламните паноа и на билбордите беше извршена според принципот – 40 отсто за партиите од власта, 40 отсто за партиите во опозиција во Собранието, 10 отсто за парламентарните партии кои немаат пратеничка група и 10 отсто за вонпарламентарните партии.

Независните кандидати за градоначалници ќе можат да се рекламираат на билбордите и на паноата кои бесплатно ги огласуваат општините.

Партијата која нема да го искористи вкупниот добиен процент за реклама е должна во рок од 48 часа да ја извести ДИК за просторот да се понуди на другите партии.

Државната изборна комисија денеска одржа и седница на која донесе одлука за објавување на описите на избирачките места, а го усвои и извештајот за избирачкиот список по завршениот јавен увид.


ДИК: Денеска е последен рок за објавување на цените за закуп на рекламен простор за локалните избори


Скопје, 11 август, 2017 - 14:33 (META) 

Државната изборна комисија се обратила до сите општини за да обезбедат соодветни просторни и технички услови за работа на општинските изборни комисии, за непречено организирање и спроведување на локалните избори на 15 октомври, информираат комисијата.

ДИК ги известила сите општини и Градот Скопје дека се должни најдоцна денеска јавно да ги објават локациите и цените за закуп на рекламните паноа и билборди, додека најдоцна до 25 август, општините и Градот Скопје се должни да ги објават условите за добивање право за користење на местата за истакнување изборни плакати.

„Истовремено, Државната изборна комисија, известува дека денеска е крајниот рок до кога печатените медиуми и електронските медиуми (интернет-порталите) се должни ценовниците да ги достават до ДИК, Државниот завод за ревизија (ДЗР) и до Државната комисија за спречување на корупцијата (ДКСК), а радиодифузерите да ги достават и до Агенција на аудио и аудиовизуелни медиумски услуги (АВМУ)“, се вели во соопштението.

Во однос на крајниот рок за поднесување листи на кандидати за локалните избори, ДИК известува дека во согласност со роковникот за извршување изборни дејства, крајниот рок е 14 септември, а не како што беше објавено во дел од медиумите 9 септември.


СДСМ Аеродром и Општина Аеродром се расправаат за „бесплатното“ рекламирање


Скопје, 12 јули, 2017 - 16:09 (META) 

Со остра реакција за рекламирањето на Општина Аеродром во медиумите, на билборди и на автобуси на ЈСП „Скопје“ се огласи општинската организација на СДСМ во општина Аеродром, прашувајќи „зошто се трошат народни пари за рекламирање општина“ или, ако навистина рекламирањето е бесплатно, зошто и со што ги задолжила Општината медиумите и огласувачите да го даваат рекламниот простор бесплатно.

– Повеќе од еден месец гледаме реклами на ТВ, радио, на „Фејсбук“, автобуси, билборди, во кои Ивица Коневски се промовира себеси. Во период кога централната власт крати на трошоци за рекламирање, Коневски продолжува да фрла пари на скапи реклами, како што ВМРО-ДПМНЕ правеше повеќе од десет години. Коневски вели дека овие реклами се бесплатни. Тоа значи дека бесплатно ги снимаат, бесплатно ги пуштаат на ТВ, бесплатно ги лепат на автобуси, можеби дури и бесплатно ги објавува на „Фејсбук“. Ако е така, се поставува прашањето зошто толку фирми и медиуми бесплатно работат за Коневски и со што ги има задолжено? – праша на прес-конференција Златко Марин, претседател на општинската организација на СДСМ во Аеродром.

Општина Аеродром реагираше прашувајќи зошто на СДСМ му пречи Општината да се пофали со реализираното. Нагласи дека целото рекламирање е бесплатно, оти медиумите донирале, а рекламирањето на „Фејсбук“ на градоначалникот Ивица Коневски е од негов џеб.


Ждрепка за 400 изборни билборди до 1 ноември


Скопје, 26 октомври, 2016 - 10:11 (META) 

Најдоцна до 1 ноември, Државната изборна комисија (ДИК) треба да организира ждрепка на која ќе им се поделат билбордите на политичките партии, на кои тие ќе можат да се рекламираат за изборната кампања.

– Сè уште не сме одредиле кога ќе биде ждрепката, но тоа мора да биде најдоцна до 1 ноември – велат од ДИК.

Според Изборниот законик, најдоцна пет дена по распишувањето на изборите компаниите треба јавно да ги објават локациите за билборди што ќе бидат достапни за изнајмување од политичките партии.

Со оглед на тоа дека претседателот на Собранието, Трајко Вељаноски, изборите ги распиша на 18 овој месец, компаниите требаше да ги објават локациите најдоцна до 23 октомври.

Од сите 800 билборди, компаниите можат да понудат најмногу 50 отсто за изборно рекламирање, односно 400.  Од нив 40 отсто ќе бидат наменети за владејачката коалиција, исто толку за опозицијата, а по 10 отсто за парламентарните и за вонпарламентарните опозициски партии.

Во Скопје со билбордите стопанисуваат четири компании, „Акцент медиа“, Скрин медиа“, „Калаплакат“ и „ Медиа С“, кои имаат и 252 светлечки паноа и 48 ЛЦД-панели.

Цената за изнајмување на еден билборд се движи околу 1.000 евра.


„Блиц“: Хајка против Србите во Македонија


Белград, 6 февруари, 2015 - 11:19 (META) 

Ултрадесничарската партија ВМРО-НП почна хајка против Србите во Македонија, пишува српскиот весник „Блиц“.

Билбордите со пораки „Стоп за српската асимилација на македонската нација“, како и фејсбук-групата „Сакаме да слушаме македонска музика, а не српски кич“, според „Блиц“, претставуваат јасни антисрпски пораки кои имаат цел да предизвикаат омраза и нетрпеливост кон Србите и кон Србија.

Весникот наведува дека Град Скопје и Министерството за внатрешни работи на Македонија се изјасниле како ненадлежни за ситуацијата бидејќи „надлежноста на пораките ја имаат нарачателите и фирмата што ги издава билбордите и која одлучува што ќе се рекламира, а што не“.

Во официјалната реакција на МВР, испратена до српскиот весник, се наведува дека „немаат никаква надлежност сè додека не добијат жалба од граѓани“.

– Министерството може да постапи доколку некој од граѓаните на Скопје се повика на член 319 од Кривичниот законик, кој се однесува на ширење верска, расна и национална омраза и ги пријави овие пораки како вознемирувачки – изјави за „Блиц“ Марија Јаковлевска, портпаролка на МВР, додавајќи дека досега немаат добиено пријава.

Весникот наведува дека „српската музика“ била само евтин изговор за ширење омраза и анимозитет кон Србите, имајќи предвид дека набргу по појавувањето на билбордите, фејсбук-страницата била отстранета.

Претседателот на Демократската партија на Србите во Македонија, Иван Стоиљковиќ, најави дека ќе поднесе тужба за ширење говор на омраза доколку не се отстранат спорните пораки, за кои ВМРО-НП најави дека ќе стојат цела седмица.

– Ќе побарам од фирмата што ги изработила билбордите, од ВМРО-НП и од нивниот претседател, Георгиевски, да се извинат и да ги отстранат, во спротивно ќе покренам постапка пред надлежните органи за ширење говор на омраза – рече Стоилковиќ, додавајќи дека активистите на неговата партија досега избројале 18 билборди во Скопје.


Во Гренобл ќе се садат дрвја на местото на билбордите


Гренобл, 26 ноември, 2014 - 19:28 (META) 

Францускиот град Гренобл ќе стане првиот град што целосно го отстранува уличното комерцијално рекламирање, откако така одлучи градскиот совет, пренесува „Радио МОФ“.

Градоначалникот од Зелената партија, Ерик Пиол, вети дека на местото на билбордите ќе бидат засадени дрвја и поставени паноа кои ќе ги информираат граѓаните за случувањата во нивниот град.
– Општината одбира да го ослободи јавниот простор во Гренобл од рекламите и да дозволи развој на области за јавно изразување. Околу 50 млади дрвја ќе бидат засадени пред зимата на локациите што ќе бидат ослободени – изјави градоначалникот.

Од јануари до април идната година, градот ќе се ослободи од сите 326 билборди поставени на улиците и на тротарите во Гренобл, вклучувајќи и 64 големи билборди. На некои од локациите, градот ќе им дозволи бесплатно рекламирање на локалните културни и општествени групи, а паноата ќе бидат помали и повеќе насочени кон пешаците, отколку кон возачите.

Договорот на компанијата што ја има концесијата за поставување билборди истекува на крајот на годинава и нема да биде продолжен. Сепак, таа ќе продолжи да поставува реклами на автобуските постојки во градот затоа што тие се регулирани со друг договор, кој важи до 2019 година.

Со овој потег, општинските власти во Гренобл, кој има околу 150.000 жители, се откажуваат од годишни приходи во висина од 600.000 евра, колку што носело изнајмувањето на билбордите.


Еди Рама во Прешево, пречекан со билборди и со знамиња


Прешево, 11 ноември, 2014 - 9:54 (META) 

Албанскиот премиер Еди Рама денеска ќе ги посети општините Прешево, Бујановац и Медвеѓа.

Мерките за безбедност се на високо ниво.

За пречекот на Рама во Прешево поставени се и билборди „Добредојде, премиере“ и фотографии со неговиот лик, пренесе српски „Блиц“.

Билбордите ги поставила Општина Прешево каде живее албанско население, а на една куќа во центарот на Прешево, на сто метри оддалечена од Домот за култура, во којшто ќе се обрати Рама, истакнато е албанското знаме со двоглав орел.