Во БиХ наскоро ќе се патува само со лична карта


Сараево, 28 декември, 2017 - 20:38 (META) 

Советот на министри на Босна и Херцеговина на денешната седница го утврдил текстот на предлог-договорот со Владата на Македонија за условите при патувањето на државјаните од двете земји, со што би се проширила економската соработка во областа на туризмот и на културата, пренесуваат медиумите во БиХ.

Во соопштението од владината седница се наведува дека на тој начин ќе се олесни патувањето на граѓаните од Македонија и од Босна и Херцеговина со преминување на границите со биометриски пасоши или со биометриска лична карта и престој во една од земјите до 90 дена во период од 180 денови.

Како што пренесуваат медиумите во БиХ, предлог-договорот со извештајот од преговорите ќе биде доставен до
претседателството на Босна и Херцеговина, а за негов потписник од босанска страна е определен министерот за надворешни работи, Игор Црнадак.


Големо невреме во БиХ, урнати дрвја и бандери, летале покриви и фасади


Бања Лука, 12 декември, 2017 - 10:55 (META) 

Во налетот на силните ветришта што ноќеска ја погодија БиХ, претежно нејзиниот источен дел, нанесени се бројни штети, со многу урнати дрвја и бандери и одлетани покриви и парчиња од фасади.

Според Хидрометеоролошкиот завод на Република Српска, во текот на ноќта ветерот во Бања Лука дувал со брзина од 115 километри на час, а претпладнево ослабнал до брзини од 60 до 70 километри на час. Пожарникарите интервенирале 26 пати, главно за отстранување паднати дрвја и гранки на сообраќајниците. Голем број оштетени возила и скршени прозорци има во населбата Обилиќево, а во други населби е сопрена водата.

Три лица се полесно повредени во куќа во која одлетал дел од покривот и пропаднал плафонот, а покривите од ламарина на голем број згради се истргани.

Забранет за сообраќај е патот Бања Лука – Кнежево, поради можноста да паѓаат стебла и да се јават одрони.

Во Зеничко-добојскиот кантон има големи штети во Зеница, Маглај и Тешањ. Во Зеница паднато парче од фасада оштетило автомобил, а има и голем број срушени дрвја. Исто така се забележани и проблеми со пропаѓање на покриви, а во Тешањ ветрот срушил минаре на џамија.

Во општина Соколац 25 села останаа без струја поради штетите што ветриштата ги нанесоа на електропреносната мрежа. Кај болницата во Зворник паднато дрво оштетило три автомобили. Штети има и во општините Скелани и Сребреница, како и во Бајина Башта во Србија.


Почина Слободан Праљак откако испи отров во судницата во Хаг


Хаг, 29 ноември, 2017 - 15:46 (META) 

Слободан Праљак, генерал на војската на босанските Хрвати во војната во БИХ во 1990-тите, почина неколку часа откако во судницата на Меѓународниот трибунал испи отров од шишенце, јавија хрватските медиуми.

Праљак е познат како командантот осомничен за уривањето на стариот мост над Неретва во Мостар, кој сега е обновен.

При изрекувањето на пресудата, 72-годишниот Праљак, во еден момент ја зафрли главата наназад и испи нешто од мало шишенце. Веднаш потоа кажа дека испил отров.

– Судии, јас не сум воен криминалец. Со презир ја отфрлам оваа пресуда – рече Праљак, откако денеска беше потврдена пресудата против него од 2013 година, со која Меѓународниот трибунал за воени злосторства во поранешна Југославија му одреди 20 години затвор.

По инцидентот, рочиштето беше прекинато и Праљак беше префрлен во болница во Хаг, каде што, според хрватските медиуми, починал по неколку часа.

Претходно, Жалбениот совет на Хашкиот трибунал потврди казна од 25 години затвор за Јадранко Прлиќ, како и 20 години затвор за Бруно Соиќ за воени злосторства.


Пронајдена масовна гробница во БИХ


Сараево, 23 ноември, 2017 - 17:04 (META) 

На подрачјето на Власинце во БИХ, на локалитетот Јеловачка чешма, откриена е масовна гробница.

Портпаролката на Институтот за исчезнати лица во БИХ, Лејла Ченгиќ, рече дека досега се воочени пет жртви, а станува збор за комплетни посмртни остатоци.

Во текот на вчерашниот ден, ексхумирани се некомплетни посмртни остатоци на една жртва.

Ченгиќ истакна дека станува збор за примарна масовна гробница и оти посмртните остатоци се пронајдени на длабочина од околу три метри.

– Според нашите информации, се претпоставува дека станува збор за цивили од бошњачка националност, убиени во текот на 1992 година на ова подрачје – рече Ченгиќ.


Ќе има и заедничка седница на владите на Македонија и на Босна и Херцеговина


Скопје, 22 ноември, 2017 - 14:08 (META) 

Премиерот Зоран Заев и босанската амбасадорка Лепа Бабиќ денеска ги потврдија заложбите на Македонија и на Босна и Херцеговина за унапредување на меѓусебната соработка и за заеднички напредок во евроинтегративните процеси.

Како што соопштуваат од владината прес-служба, двајцата соговорници констатирале дека е од голема важност, земјите од целиот регион да добијат позитивни препораки во настојувањата кон евроинтеграциите.

– Владата на Република Македонија работи на реформскиот процес, на доброседски односи и се заложува за европски перспективи на целиот регион – рече премиерот Заев.

На средбата се разговарало за конкретни чекори во интензивирањето на соработката меѓу двете земји, како што е организирање заедничка владина седница и унапредување на односите во областа на економијата, образованието, туризмот.

Констатирано е дека спогодбата за признавање на возачките дозволи меѓу двете земји, како и претстојното овозможување на граѓаните на двете држави да патуваат со лични карти, значително ќе ја олесни комуникацијата меѓу граѓаните и меѓу ресорската соработка, што се очекува да дава побрзи и повидливи резултати од интерес на потребите на граѓаните и на двете земји.


БИХ немаат намера да го признаат Косово


Сараево, 29 септември, 2017 - 15:01 (META) 

БИХ нема да ја признаат независноста на Косово ниту, пак, ќе го разгледуваат ова прашање до крајот на мандатот на актуелниот Совет на министри, односно владата, порача денеска босанскиот министер за надворешни работи, Игор Црнадак, откако косовскиот премиер Рамуш Харадинај повика БИХ да го признаат Косово.

Причината е несогласувањето на Република Српска, која е еден од двата федеративни дела на БИХ.

– Босна и Херцеговина нема да го признаат Косово, не поради ставот на Босанците или Хрватите, туку поради ставот на претставници на Република Српска, како од власта така и од опозицијата. Во врска со ова прашање, ние сите сме единствени и нема никакви шанси оваа состојба да се смени – изјави Црнадак, кој е еден од српските претставници во босанската влада.


Немало прислушување политичари и бизнисмени во Хрватска, вели министер од БИХ


Сараево, 26 септември, 2017 - 18:48 (META) 

Директорот на Безбедносно-разузнавачката агенција на Хрватска, Даниел Маркиќ, денеска се сретнал со својот колега од БИХ, Осман Мехмедагиќ, откако хрватските медиуми објавија дека Разузнавачко-безбедносната агенција на БИХ (ОСА) прислушувала хрватски бизнисмени и политичари од Хрватска и од БИХ.

По средбата, министерот за безбедност на Босна и Херцеговина, Драган Мектиќ, рече оти челниците на разузнавачките агенции на БИХ и на Хрватска заклучиле дека немало незаконско прислушување на хрватски политичари и бизнисмени.

– Нема никаква разузнавачка афера и сите служби работат во рамките на законот. Констатирано е дека соработката меѓу двете служби е многу добра и ќе продолжи и во иднина. Исто така е констатирано дека на некој начин треба да се „спушти“ медиумски испровоцираната анкета – вели Мектиќ.

Хрватскиот неделник „Национал“ неодамна објави документи кои наводно потекнуваат од ОСА, за прислушување на хрватски бизнисмени и политичари. „Национал“ наведе дека ОСА веќе подолго време илегално спроведувала мерки за следење и за прислушување. Весникот тврди дека врз основа на увидот во повеќе тајни извештаи на ОСА, имаат докази дека таа служба „води специјална војна против Хрватска, хрватскиот премиер Андреј Пленковиќ и надворешната политика на хрватската Влада, но и хрватскиот народ во БИХ“.


Толушиќ до Шаровиќ: Хрватска ќе ги намали таксите за извоз на овошје и зеленчук


Сараево, 8 август, 2017 - 14:57 (META) 

Таксите за извоз на овошје и зеленчук во Хрватска, од земји кои не се во ЕУ, ќе бидат намалени, му соопштил денеска хрватскиот министер за земјоделство, Томислав Толушиќ, на босанскиот министер за надворешна трговија и економски односи, Мирко Шаровиќ.

Како што јавува „Радио Слободна Европа“, сепак, засега не се знае дали Хрватска ќе ги задоволи барањата на земјите од регионот, Македонија, Србија, Црна Гора и БИХ, за таксите да бидат усогласени со европскиот правилник. Одговорот на ваквите барања ќе биде познат на состанокот кој во следните недели ќе се одржи во Подгорица и во Дубровник.

Босанскиот министер Шаровиќ за РСЕ рече дека преговорите со Хрватска продолжуваат и во следните денови, имајќи предвид дека и самиот министер Толушиќ рекол дека „цените на таксите се превисоки“.

И македонскиот министер за земјоделство, шумарство и водостопанство, Љупчо Николовски, денеска телефонски разговарал со својот хрватски колега Толушиќ, поради зголемените хрватски такси. Толушиќ, како што соопштија од македонското Министерство за земјоделство, шумарство и водостопанство, покажал интерес за наоѓање решение за настанатиот проблем.


Заев денеска е во официјална посета на Босна и Херцеговина


Сараево, 22 јули, 2017 - 11:35 (META) 

Владина делегација предводена од премиерот Зоран Заев денеска ќе престојува во официјална посета на Босна и Херцеговина (БИХ), информираат од Владата.

Свечениот пречек ќе се одржи на платото пред зградата на заеднички институции на БИХ, по што следува средбата на македонската делегација со членовите на делегацијата на Советот на министри на БИХ.

Во состав на македонската делегација се и министерот за внатрешни работи, Оливер Спасовски, министерот за економија, Крешник Бектеши, министерот за земјоделство, Љупчо Николовски, министерот за култура, Роберт Алаѓозовски, и министерот задолжен за дијаспора, Едмонд Адеми.

Во рамки на посетата предвидено е да биде потпишан меморандум за разбирање помеѓу македонското Министерство за земјоделство, шумарство и водостопанство и Министерството за надворешна трговија и економски односи на БИХ, како и потпишување на програма за културна соработка меѓу македонското Министерство за култура и Министерството за цивилни работи на БИХ.

Според агендата, предвидено е попладне кај Ротимље, Заев заедно со претседавачот на Советот на министри на БИХ да положи цвеќе на спомен-обележјето на трагично загинатиот претседател Борис Трајковски и на членовите на неговата делегација.

 


Претседавачот на Претседателството на БИХ во посета на Македонија


Скопје, 19 април, 2017 - 10:00 (META) 

Претседателот на Република Македонија, Ѓорге Иванов, денеска и утре ќе биде домаќин на претседавачот на Претседателството на Босна и Херцеговина, Младен Иваниќ, кој ќе престојува во дводневна официјална посета на Република Македонија.

Иванов и Иваниќ денеска ќе остварат тет-а-тет средба, како и пленарен состанок на официјалните делегации на двете држави.

На вториот ден од посетата, ќе се одржи бизнис-форум со учество на стопанственици од Република Македонија и од Босна и Херцеговина, на кој свои обраќања ќе имаат претседателот Иванов и претседавачот со Претседателството на Босна и Херцеговина, Иваниќ.