!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Донирање храна за бездомници денеска на пет пункта во Скопје


Скопје, 17 октомври, 2017 - 10:52 (META) 

На пет локации во Скопје, во 10 часот денеска почна голема хуманитарна акција „Нахрани 1.000“, во која се собира храна за бездомни лица. По повод Светскиот ден на борба против сиромаштијата – 17 Октомври, акцијата ја организираат граѓанската иницијатива „Мрдни со прст“, Црвен крст на Град Скопје, организацијата „Ајде Македонија“, Здружението на граѓани за помош на бездомници и загрозени семејства „Љубезност“, Сојуз на извидници на Република Македонија и организацијата АДРА.

Штандовите на кои ќе може да се донира храна за бездомници и за сите загрозени семејства на кои храната им е најпотребна, се поставени на Плоштад Македонија, пред „Сити мол“ кај „Плеј кафе“, во Аеродром пред „Веро“, пред Дом на градежници и во Ѓорче Петров пред „Тинекс“.

Организаторите замолуваат на пунктовите да се носат нерасипливи продукти, како ориз, грав, сол, шеќер, брашно, тестенини, масло за готвење, грашок, конзервирана риба, супа во ќесичка, бисквити, кечап, леќа, конзервирано овошје и зеленчук.

Во рамките на одбележувањето на Светскиот ден на сиромаштијата, организацијата „Ајде Македонија“, чија главна цел е решавањето на проблемот со отпадот од храна, утре во социјалниот центар „Дуња“, на улица Рајко Жинзифов бр. 22 во Скопје, со почеток во 17 часот, ќе одржи настан за информирање и за ангажирање на сите потенцијални волонтери и заинтересирани граѓански организации, кои сакаат да се вклучат во активностите.


Градот Скопје ќе ги донира парите од новогодишната прослава на пунктот за бездомници


Скопје, 18 јануари, 2017 - 17:41 (META) 

Средствата планирани за новогодишната прослава во износ од 2 милиони денари Град Скопје ќе ги донира за проширување на капацитет на Прифатилиштето за бездомни лица лоциран на Момин Поток.

– Имаме нов проект од Црвен крст за проширување на капацитетот за сместување на бездомни лица, односно за уште еден контејнер со 16 легла и повеќе туш-кабини и јас на следната седница на Советот на Град Скопје ќе предложам средствата во износ од 2 милиони денари кои беа предвидени за новогодишната прослава во градот да ги намениме за проширување на капацитетот за сместување на бездомни лица во пунктот во Момин Поток – истакна градоначалникот на Град Скопје, Коце Трајановски.

Пунктот за бездомници на Црвен крст на Град Скопје е отворен во 2008 година и во текот на работната недела работи во понеделниците кога бездомниците добиваат хигиенски услуги и секој петок кога добиваат и чисти алишта, лекарски преглед и неопходни лекарства, разговор и совети од психолог, оброк и топол напиток.

Црвениот крст на Град Скопје, со поддршка на Град Скопје, и годинава од 30 декември 2016 година, поради екстремно ниската температура им понуди 24-часовно згрижување на бездомниците.


Општина Центар и ПОЦ ќе ги згрижуваат бездомниците


Скопје, 10 јануари, 2017 - 15:04 (META) 

Јавното претпријатие „Паркинзи на Општина Центар“ и Општина Центар од денеска почнуваат акција за згрижување на бездомните лица во општината.

Директорот на ЈППОЦ, Саша Богдановиќ, и градоначалникот на општина Центар, Андреј Жерновски, најавија дека преноќувалиштето за бездомници ќе функционира за да им се помогне на овие лица за време на деновите со екстремно ниската температура.

„Преноќувалиштето ќе работи според стандардните процедури за вакви пунктови, од 16 часот попладне до 10 часот наутро. Обезбедуваме и пакети храна за вечера и за појадок, како и топли напитоци, ќебиња, тоалети, медицинска нега. Посебни лица ќе се грижат за безбедноста на овие наши граѓани“, изјави директорот на ЈППОЦ, Саша Богдановиќ.

Јавното претпријатие и Општина Центар ги повикуваат сите граѓани што имаат информации за бездомници, да пријават во Општината или претпријатието.


Полска: Шест лица починале од студ во последните 24 часа


Варшава, 10 јануари, 2017 - 11:22 (META) 

Во последните 24 часа, во Полска од премрзнување починале шест лица, јавуваат светските агенции. Со ова вкупниот број на починати лица од студ, од ноември до сега, во земјата се искачил на 71 лице, соопштиле полциските власти.

Полицијата упатила апел до граѓаните на земјата да им помогнат на најзагрозените, особено на бездомниците, имајќи ја предвид екстремно ниската температура во Полска, која е под минус 20 Целзиусови степени.


Графити: Кризата им годи само на атинските ѕидови


Атина, 10 јули, 2015 - 10:56 (META) 

Атинските ѕидови се непресушен извор на идеи, политички пораки, мали филозофски дискусии и на дилеми. Секоја пора од градските ѕидови дише во бунтовен дух, прекриена со графити и со шаблони кои се занимаваат со политичките или социјалните прашања во државата. Речиси секој проблем, секоја вознемиреност може да се прочита на ѕидовите. Дали е преплашеноста за пребродување на месецот со скратените плати, револот од владините политики, тажните слики од зголемениот број бездомници кои се „вдомуваат“ под ведро небо и на влезовите пред деловните згради, атинските ѕидови тоа веднаш го впишуваат, креирајќи активна јавна дебата, борејќи се за поактивно будење и за освестување на народот.

Во екот на политичките подготовки на новиот пакет мерки за штедење, на ѕидовите на бунтовната Ексархија, квартот на бунтовниците, уметниците и на анархистите, осамна огромен мурал на атински бездомник, фрлајќи уште едно силно потсетување на тешката секојдневна реалност со која се справуваат голем број атински граѓани.

Авторот на муралот, Wild Drawing, WD, еден од најактивните графити-уметници во Атина, вели дека не гледа друг начин освен својот револт од секојдневнието да го преточи во уметност која можеби ќе креира дијалог со минувачите и ќе ги предизвика граѓаните да подзастанат и да размислат малку поинаку за работите.

– Живеејќи ја грчката реалност, ги чувствувам сите последици на социјалната и на финансиската криза. Не можам и не сакам да ги игнорирам порастот на сиромаштијата и невработеноста, зголемувањето на бројот на бездомниците, зголемениот број на самоубиства, популарноста на неонацистичката Златна зора, убиствата на имигранти кои се обидуваат да дојдат до Европската унија преку Грција. Едноставно не можам да ги затворам очите пред тоа – вели WD во разговор за „Мета“.

Потекнува од Бали, но со години живее во Атина и сурово, но прецизно, преку своите мурали и графити ја пресликува темната слика на грчкото општество. Еден од неговите 3Д-графити, момче кое жонглира со молотови и посакува добредојде во Атина, кој осамна за време на насилните протести против финансиската криза, останува еден од најпрецизните графити за бунтовната природа на квартот Ексархија, но и на Атина во целост.

– Графитот „Welcome to Athens“ беше поттикнат од насилните протести по убиството на Александрос Григоропулос во 2008 година. Не знам дали градот секогаш ќе остане таков, но убеден сум дека општествениот отпор ќе продолжи и во иднина – вели WD.

Од графити-уметниците и анархистите со силните пораки, до оние кои без големи уметнички аспирации, само со спреј и со шаблон пишуваат куси пораки, сите имаат една заедничка цел, а тоа е да го разбудат и да го освестат народот.

М.П.


Црвен Крст на Град Скопје ќе згрижува бездомници


Скопје, 29 декември, 2014 - 18:56 (META) 

Црвениот крст на Град Скопје ќе згрижува бездомници во Прифатилиштето за бездомници во Момин Поток. Тимови на Црвен крст ќе патролираат низ улиците на Скопје од 19 до 22 часот за да ги згрижуваат бездомниците. Доколку некој забележи бездомник, може да ја пријави локацијата на телефонските броеви 070/250-054 и 070/317-803.
Бездомниците во прифатилиштето ќе добијат топол кревет, бања, облека, храна и пијалаци. Во прифатилиштето ќе биде обезбедена и поддршка од лекар, психолог и од социјален работник.
Тие што нема да сакаат да се сместат во прифатилиштето од Црвен Крст, ќе добијат ќебиња, вреќи за спиење и топол чај.
Во акцијата можат да се вклучат сите граѓани со донирање облека, храна, средства за хигиена и ќебиња.