!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Советот за безбедност ја продолжи мисијата на ОН во Авганистан


Њујорк, 18 март, 2017 - 12:00 (META) 

Советот за безбедност на Обединетите нации синоќа едногласно ја донесе резолуцијата со која се продолжува мисијата на ОН во Авганистан (УНАМА) до март 2018 година.

Во неа, како што пренесуваат светските медиуми, се изразува сериозна загриженост поради присуството и потенцијалното зајакнување на разгранокот на Исламска држава, што претставува сериозна закана за безбедноста на Авганистан и на земјите во регионот.

Советот за безбедност на ОН ја повика владата на Авганистан да почне да ги решава алармантните закани, кои доаѓаат од талибанците, Ал каеда и од нејзините разграноци и од други екстремистички групи.

Исто така, Советот за безбедност ја повтори поддршката за авганистанските национални одбранбени и безбедносни сили, особено во борбата против тероризмот и насилниот екстремизам.

Според податоците на ОН, минатата година во Авганистан се убиени 3.498 лица, вклучувајќи 923 деца, а уште 7.920 лица се ранети.


Иванов: Армиите на Македонија и на Египет се во слична позиција и мора да соработуваат


Каиро, 16 јануари, 2017 - 12:44 (META) 

Неопходна е соработка на нашите безбедносни и армиски сили со Египет, која и досега е извонредна, оценува претседателот на државата, Ѓорге Иванов, кој е во работна посета на Египет, каде учествува на меѓународниот форум посветен на безбедноста во време на екстремизам и на насилство.

Според Иванов, армиите на двете држави се во слична позиција и ја имаат клучната улога во справувањето со илегалната миграција

– Досега имаме навистина исклучителна соработка во сферата на безбедноста, затоа што разменуваме информации и искуства во врска со заканите што ги имаме и Египет и ние. Египет, во неговото опкружување, има закани од илегална миграција, нивната армија е на нивната јужна граница, каде ја чува долината на Нил од Рогот на Африка, каде милиони луѓе се поттикнати да одат кон Европа. Нивната армија има улога каква што има и нашата армија. Како што нашата армија е на нашата јужна граница и го чува коридорот низ долината на реката Вардар, така и нивната армија е во слична позиција – вели Иванов.

Македонскиот претседател вели дека според извештаите на ОН, бројот на жители во Африка постојано ќе се зголемува и дека со заканите од миграција ќе се соочуваме и во идните години и децении.

– Состојбите во Африка сè уште не се стабилизираат и тоа ќе поттикне многу млади луѓе да одат во потрага по среќа, односно ќе се упатуваат кон Европа. Македонија како земја ќе продолжи да учествува на вакви форуми и да дава свој придонес, со тоа што ние го имаме како искуство во справувањето со илегалната миграција и со заканите од екстремни и терористички групи – порачува Иванов.


Во денешното бомбардирање на Алепо загинаа 27 цивили, градот остана без болници


Алепо, 19 ноември, 2016 - 17:37 (META) 

Во денешното бомбардирање на кварт во сирискиот град Алепо, каде што се наоѓаат бунтовници, загинаа 27 цивили.

– Ниту еден кварт на истокот на Алепо денеска не е поштеден од бомбардирање од страна на сириските владини безбедносни сили – соопшти опозициската Опсерваторија за човекови права.

Странските медиуми соопштуваат дека градот практично останал без болници. Светската здравствена организација соопшти дека сите импровизирани болници се надвор од употреба по пет дена воздушни напади од владините безбедносни сили.

Од вторникот до денеска во бомбардирањата на Алепо загинале повеќе од 90 цивили.


Димитриев: Обвинителствата не смеат да се претворат во портпароли на партиите


Скопје, 22 октомври, 2016 - 22:26 (META) 

Органите на правдата мора да останат надвор од политичката битка на партиите и не смеат да остават впечаток на политичка обоеност, рече меѓу другото премиерот Емил Димитриев во своето обраќање на Свечената академија во Македонската опера и балет по повод празникот 23 Октомври – Денот на македонската револуционерна борба.

Тој нагласи дека Владата ќе им дава поддршка на сите органи на правдата и „во поглед на финансии и во поглед на логистика“, но ќе реагира кога ќе почувствува дека овие органи ја газат линијата на професионалноста. Димитриев рече дека обидот на која било партија да искористи кој било орган на правдата во функција на својата политичка агенда, ќе биде контрапродуктивен и ќе резултира со губење на поддршката од граѓаните.

– Ангажманот на државните и на специјалните органи кои оставаат впечаток на тенденциозност и на пристрасност во предизборен период, покажуваат очигледна намера која македонската јавност јасно ја гледа. Специјалното јавно обвинителство и Јавното обвинителство не треба и не смеат да се претворат и да добијат улога на портпароли на политичките партии и да бидат алатки во функција на политичките агенди – рече Димитриев.

Премиерот ги повика безбедносните сили во изборниот период да се однесуваат професионално и согласно правилата на службата.

– Како човек кој значителен дел од својата кариера ја поминал во безбедносниот сектор, силно го осудувам секој облик и обид за предизвикување конфликт и конфронтација во редот на безбедносните сили – нагласи Димитриев.


Заложничката драма во Дака заврши со убиство на 20 цивили и на шест милитанти


Дака, 2 јули, 2016 - 11:45 (META) 

Заложничката драма во Дака заврши со убиство на 20 цивили и на шест исламски милитанти, кои ги држеа во заложништво гостите во ресторанот „Холи артисан бејкери“.

Безбедносните сили на Бангладеш употребија сила за да ѝ стават крај на десетчасовната заложничка драма.

Во акцијата биле спасени 13 заложници, а еден од напаѓачите бил уапсен.

Одговорноста за нападот ја презеде Исламска држава.


МВР: Не сме навлегле во Грција, оградата е пет метри на наша територија


Скопје, 11 април, 2016 - 11:16 (META) 

Министерството за внатрешни работи ги демантира и ги отфрла како невистинити тврдењата на грчките медиумите дека при вчерашната интервенција за спречување на мигрантите нелегално да влезат во земјава кај котата 59, македонските безбедносни сили навлегле на грчка територија. Ова е официјалниот став на МВР во врска со овие наводи, велат за „Мета“ од Министерството.

– Оградата на границата е поставена пет метри во внатрешноста на територијата на Република Македонија, така што невистинити се кажувањата дека полициските службеници при спречувањето нелегален влез на мигранти на територијата на РМ, навлегле на грчка територија – велат од МВР.

Оттаму повторно истакнуваат дека за време на вчерашните инциденти немало никаква реакција од грчката полиција ниту, пак, биле известени дека се можни тензии и немири на границата.

– А каде била грчката полиција да преземе какви било мерки и да ги извести македонски власти дека кон граничната линија се движи поголема група мигранти со намера да предизвикаат насилни инциденти? – додаваат од МВР.

Вчера, околу 11 часот, група од 1.000 до 2.000 мигранти почнаа со насилни протести на 100-200 метри од граничен камен 59, со фрлање камења и разни предмети кон припадниците на македонските безбедносни сили. По ова, полицијата и војската почнаа со мерки за одбивање на мигрантите, при што беше употребен и солзавец.

Околу 15 часот вчера, безбедноста на границата беше подигната на највисоко ниво по добиена информација дека мигрантите подготвуваат молотови коктели, но до тоа не дошло.

Каменувањето од страна на мигрантите кон македонските безбедносни сили, како што информираа од МВР, траело до 18 часот.

При интервенцијата на македонските безбедносни сили кон толпата од неколку илјади мигранти, кои се обидоа нелегално да влезат на македонска територија од Грција, беа повредени вкупно 14 полицајци и девет припадници на АРМ, а оштетени биле и осум возила на МВР и на АРМ.

Од Грција вчеравечер соопштија дека преку амбасадорот во земјава, Теохарис Лалакос, до македонските власти упатила два демарша поради ситуацијата на Идомени.

Лалакос истакнал дека употребата на насилство не помага да се реши проблемот со бегалците и дека оди против меѓународното и хуманитарното право.


Експлозија на бомба во Дијарбекир – четворица загинати и 14 повредени


Анкара, 31 март, 2016 - 17:55 (META) 

Четворица полицајци загинале, а најмалку 14 лица се повредени во експлозија на бомба што денеска одекнала во градот Дијарбекир, во југоисточниот дел на Турција, со мнозинско курдско население, јавува „Би-би-си“, повикувајќи се на безбедносни извори.

Според информациите, бомбата детонирала во близина на автобуска станица во моментот кога на местото поминувало оклопно полициско возило.

Засега нема информации кој стои зад експлозијата.

Турските власти спроведуваат операции во регионот на Дијарбекир против милитантите на курдската работничка партија (ПКК), откако во јули, минатата година, пропадна договорот за прекин на огнот меѓу двете страни.


Меркел е задоволна од придонесот на Германија во борбата против исламистите


Берлин, 12 декември, 2015 - 15:04 (META) 

Придонесот на Германија во борбата против Исламската држава постигнува успех, изјави денеска германската канцеларка Ангела Меркел, сугерирајќи на обуката на курдските сили во Ирак.

– Успеавме да дадеме своја поддршка со обука на војниците во Пешмерга, делови од градот повторно се освоени и луѓето можат да се вратат во своите домови – истакна Меркел.

Исламската држава, Меркел ја опиша како „голема закана“ и наведе дека германските војници и полицајци во странство ја чуваат безбедноста „надвор од Германија“.

 

 


Тодоров: Поставувањето на оградата е во согласност со одлуките на ЕУ


Гевгелија, 28 ноември, 2015 - 19:38 (META) 

Министерот за здравство, Никола Тодоров, кој е раководител на управувачкиот комитет за справување со мигрантската криза и заменик-министерот за внатрешни работи, Митко Чавков, попладнево пристигнаа во Гевгелија каде неколку часа претходно магрантите се судрија со полицијата поради поставувањето на жичаната ограда кај котата 59 на границата со Грција.

Состојбата на јужната граница сега е мирна, но со засилено присуство на специјалните полициски сили кај котата 59.

Во инцидентот, како што предходно информираа од МВР, повредени се 18 полициски службеници, а биле демолирани и неколку полициски и армиски возила.

Полицијата со кордон, а потоа и со шок бомби интервенирала кон групата од стотина мигранти кои од грчката страна на границата ги нападаа и ги каменуваат припадниците безбедносните сили.

– Со употреба на сила предизвикан е инцидент во кој што полесно се повредени припадници на безбедносните сили кои што согласно Уставот и согласно законот имаат право и обврска да ја чуваат и обезбедуваат државната граница. Да ја штитат Република Македонија, но, во исто време да помогнеме и на нашите пријатели и партнери од Европската унија. Безбедноста и хуманоста не се исклучуваат, тие одат заедно и за нас се подеднакво значајни – изјави Тодоров, кој потенцираше дека поставувањето на оградата е заради поголема безбедност и контрола на мигрантите кои влегуваат на македонска територија и е во согласност со одлуките на другите земји-членки на ЕУ, како и на земјите на балканската рута.

Армијата на Република Македонија (АРМ) утрово почна со поставување жичена ограда од левата и од десната страна на кота 59 на македонско-грчката граница за да се спречат економските мигранти илегално да влегуваат во земјава и за насочување на бегалците кон контролните пунктови заради нивна регистрација.