Судбината на рудникот Иловица ќе се решава во договор со сите заинтересирани страни


Скопје, 15 ноември, 2018 - 15:06 (META) 

Владата нема да донесе одлука која е на штета на интересите на граѓаните на Македонија. Тоа значи дека нема да се донесе одлука за судбината на рудникот Иловица се додека не се усогласат ставовите на сите засегнати страни.

Вака ја образложи позицијата на македонската Влада портпаролот Миле Бошњаковски, одговарајќи на новинарско прашање во врска со нерешениот статус на концесијата на компанијата „Еуромакс Рисорсис“ за експлоатација на бакар и злато во близина на селата Иловица и Штука и отпорот на месното население кон отворањето на рудникот во близина на нивните живеалишта.

Бошњаковски негираше дека Владата го игнорира незадоволството на жителите на струмичките села засегнати од отворањето на рудникот Иловица, кои минатата сабота организираа предупредувачка блокада на приодните патишта кон и од Струмица, сакајќи да го потсетат премиерот Зоран Заев на неговото ветување, дадено пред локалните избори во 2017 година, дека рудници во тој крај нема да има.

Минатата недела, Уставниот суд донесе одлука за поведување на постапка за поништување на одлуката на Советот на Општина Гевгелија за распишување на референдум за рудниците на Кожуф. Притоа, беше најавено дека е сосема извесно дека локалниот референдум на кој мнозинството гевгеличани се изјаснија против отворањето рудници на Кожуф, ќе „падне“ пред Уставниот суд како што се случи и со референдумот на Општина Валандово против рудникот Казандол.

Образложението е дека одлуките за референдум се неуставни и незаконити, „бидејќи прашањето на концесии не е од локално значење за да може локалната самоуправа да распишува референдум“. Одлуките на Уставниот суд да ги собори локалните референдуми против рудниците во Југоисточна Македонија, ги подгрејаа стравувањата на жителите од тој крај дека сепак ќе бидат отворени, како што ги нарекуваат тие, „рудниците на смртта“.


Макрадули: Со „Планот за чист воздух“ за 2 години аерозагадувањето ќе се намали до 50%


Скопје, 15 ноември, 2018 - 14:24 (META) 

Намалување на загадувањето на воздухот за 50 отсто во Скопје и од 30 до 50 отсто во другите градови во следните две години, предвидува „Планот за чист воздух“ на Владата кој денеска го презентираше заменикот-министер за животна средина, Јани Макрадули, а започна да се применува од вчера.

За овој план во буџетот за 2019 година предвидени се 1,5 милиони евра почетни средства дополнителни на оние кои веќе постојат од 20 милиони евра во другите министерства.

– Ова е јасен план како да се намали загадувањето и предвидува справување со изворите за загадување од домашното затоплување, транспорт, индустрија, градежништво и отпад – рече Макрадули.

Планот предвидува во 2019 година да се набават комплетно нови инструменти за веќе постоечките 19 мерни станици. Во мониторингот ќе има предвидување во реално време, односно тридневна проекција на загадувањето.

Макрадули вели дека домашното затоплување е најголемиот загадувач на воздухот.

– После овој двегодишен план, 10.000 домаќинства ќе бидат приклучени на постоечкиот топлински оператор, а ДДВ-то за испорачната топлинска енергија да се намали од 18 на 5 отсто за дополнително стимулирање за приклучување. 20.000 домаќинства ќе ги променат старите нееколошки печки на дрва, 15.000 домаќинства ќе ја подобрат енергетската ефикасност на домовите, 3.000 домаќинства ќе бидат приклучени на гас, 20.000 домаќинства ќе користат инвертор клима уреди, а 2.000 домаќинства од социјално ранливите категории субвенционирано ќе го променат начинот на живеење. После две години ниедно домаќинство нема да се грее на јаглен и нафта. Државата ќе биде пример и првите активности ќе ги започнеме со замена на нееколошките извори на затоплување во јавните институции во градинките, училиштата и здравствените домови– наведе Макрадули.

Во делот на транспортот, ќе се воведе посебен зимски режим на сообраќај во деновите кога загадувањето е повисоко односно контролиран сообраќај во централното градско подрачје со претходно овозможени алтернативни решенија.

Во индустријата ќе се носи закон за индустриски емисии каде што се дефинираат построги правила во одобрувањето на интегрираните еколошки дозволи и ќе има потранспарентен мониторинг, а до тогаш ќе се зајакнат контролите.

-Во декември ќе ги започнеме преговорите за заокружување на оперативниот план за активностите за добивање на А интегрирана дозвола за РЕК Битола – информираше заменик министерот.

Во градежништвото ќе има засилени контроли во градењето и просторот за градење, миење на возила и покривање на товар. Обврска ќе биде да се контролира градежниот шут и другиот отпад на објектот што се гради.

-Апелирам и замолувам, за заедничка акција и за заедничка иднина. Верувам дека се уште не доцна да се делува. Длабоко сум убеден дека ова не е невозможна мисија бидејќи имаме јасен план што треба да се направи – додаде Макрадули.


Со два дрона, камери и со повеќе инспектори, град Скопје ќе се бори против загадувачите


Скопје, 15 ноември, 2018 - 10:07 (META) 

За само пет дена, откако град Скопје упати апел до граѓаните да не ги пријавуваат загадувачите на воздухот во Скопје на социјалните мрежи туку на надлежните инспекции на дежурниот телефон 193, добиени се 42 пријави од граѓани, градската комунална инспекција интервенирала по сите поединечно, при што на 10 локации кои биле на јавни површини, бил изгаснат пожар. Останатите пријави главно се однесувале на палежи на смет во приватни поседи.

И покрај зголемувањето на обемот на работата на инспекциските служби на град Скопје за откривање и казнување на загадувачите во однос на минатата година, граѓаните не се задоволни од тоа како град Скопје се справува со случаите на палењето отворени огнови на кои се согорува разновиден отпад и со тоа се зголемува аерозагадувањето.

– Има евидентно зголемување на бројот на интервенции на градските инспектори за животна средина – 89 проценти во септември годинава во споредба со истиот месец лани и 107 отсто за месец октомври споредено со истиот месец во 2017, но свесни сме дека треба многу повеќе да се зголеми ефикасноста на инспекциите за граѓаните навистина да почувствуваат позитивни резултати – вели Мирослав Богдановски, директор на Инспекциската служба на град Скопје.

Според него, веќе се работи на неколку клучни подобрувања кои ќе значат повеќе откриени и решени случаи на терен и поголем ефект од сработеното. Годинава градската комунална инспекција се опреми со теренско возило, а за 2019 се најавува зголемување на бројката на ангажирани инспектори за животна средина, од сегашните 7 на ниво на град Скопје и 15 комунални редари, а во најскоро време ќе се вклучат во функција и дронови, чија функција ќе биде прецизно утврдување на локациите каде има незаконско палење на огнови.

– Засега се предвидени да функционираат два дрона, од кои секој со едно летање покрива површина од 200 хектари па така ќе можеме попрецизно да ги лоцираме загадувачите на терен – информира Богдановски и додава дека се разгледува можноста за поставување и на камери на повисоките објекти во градот со поголеми геолокациски можности, се со цел да се утврди каде точно се наоѓа загадувачот. Овие мерки значително ќе го зголемат обемот на реализирани интервенции на инспекцијата. Сличен систем веќе функционира во главниот град на Србија, Белград.

Кој е патот на една пријава од граѓанин за загадување?

– Откако граѓанинот ќе се јави и ќе ја каже точната локација од каде чади, диспечерот испраќа возило со комунален инспектор, комунален редар, а бидејќи најчесто се работи за палење огнови од стана на луѓе кои се во тешка социјална состојба со нив се и претставник на Црвениот Крст и на социјалните служби, потоа пожарникари, а во некои случаи се бара и асистенција од полиција – појаснува Богдановски. Засега се работи со по една патрола во смена, со вкупно три смени за 24 часа.

Според Богдановски, ефикасноста во интервенирањето по пријавите на граѓаните би се зголемила доколку би постоела поефикасна соработка со општинските инспекциски служби, кои сега функционираат независно од градската инспекција, како и со повисоки од досега предвидените казни за загадувачите за прекршоци од комуналната сфера.


Не се знае кога, ама ќе се набават нови мерни инструменти за ПМ10 во Гази Баба и Лисиче


Скопје, 14 ноември, 2018 - 11:51 (META) 

Двете најзагадени населби во Скопје, Лисиче и Гази Баба, ќе добијат нови инструменти за мерење на ПМ10 честички, информира за „Мета“, Министерството за животна средина и просторно планирање, но од таму не даваат временски рок кога тоа ќе се случи.

Во Лисиче канцерогените ПМ10 честички не се мерат од 5 октомври односно 41 ден, а во Гази Баба инструментот не функционира од 14 август односно три месеци. Овие две населени места години наназад се едни од најзагадените во Скопје.

„Инструментите за ПМ10 на овие две мерни места се расипани и не се во функција да мерат. Во моментот се прават напори да се обезбедат нови кои треба да се набават од надвор и во моментот не можеме да кажеме колку ќе чинат. Штом ќе бидат обезбедени во нај брз можен рок ќе бидат ставени во функција“, велат од Министерството во изјава за „Мета“.

За ова до Министерството се обратил и авторот на апликацијата „Мој воздух“, Горјан Јовановски, но, до сега нема добиено одговор.

-Без одговор остана и моето официјално барање за пристап до информации од јавен карактер до Министерството за животна средина и просторно планирање, упатено на 1 ноември, во кое барам да ми се одговори колкав буџет има Министерството за 2018 за набавка и поправка на делови и сензори од мрежата на мерните станици за загадување на воздухот – вели Јовановски.

Последното мерење на станицата во Лисиче за ПМ10 честички било на 5 октомври во 8 часот утрото кога мерната станица покажа 137 микрограми на кубен метар. Три часа претходно во 5 часот утрината покажала 629 микрограми, во 3 часот после полноќ 382 микрограми, а во 1 часот 259.

Освен што граѓаните не можат соодветно да се информираат колку е загаден воздухот што го дишат, нефункционирањето на инструментите во Лисиче и Гази Баба е проблематично затоа што според резултатите од овие мерења се воведуваат предвидените итни мерки.

За воведување на итни мерки потребно е бар две мерни станици во Скопје да покажат среднодневна концентрација на ПМ10 честички над 200 микрограми на кубен метар во последните два дена.

Ова значи дека дури и да има вакво надминување на мерните станици во Лисиче и Гази Баба, кои притоа секогаш се едни од најзагадените населби, тоа не е евидентирано и не може да се преземат мерки.

За споредба, мерната станица кај МЗТ во Гази Баба, која е дел од проектот „Скопје Пулс“ и податоците добиени од неа се неофицијални, синоќа покажа 260 микрограми на кубен метар ПМ10 честички.


РЕК Битола и РЕК Осломеј загадуваат како 83 европски централи на јаглен


Битола, 14 ноември, 2018 - 9:10 (META) 

Во Македонија оџаците чадат дваесет пати поцрно од Европа. Во Македонија дваесет пати повеќе домаќинства се греат на огревно дрво отколку во Европската унија, а четирите термоелектрични блокови кои користат лигнит (РЕК Битола 1,2 и 3 и РЕК Осломеј) загадуваат како 83 европски централи на јаглен, покажува споредбата на податоците на Статистичкиот годишник на Државниот завод за статистика со податоците на ЕУРОСТАТ и на Алијансата за здравје и животна средина.

Повеќе од 80 отсто од домаќинствата во земјава се греат на цврсто гориво, далеку најчесто огревно дрво. Просекот во Европската Унија е 4,8 отсто, а водечки се Полска со 45 отсто и Ирска со 21, но, за разлика од Македонија, во греењето со цврсто гориво во Европа доминираат пелети и други обработки од дрво кои загадуваат далеку помалкуод огревното дрво.

Според Вкупниот годишен извештај за квалитетот на животната средина за 2017 година, подготвен од Министерството за животна средина и просторно планирање, домаќинствата се најголем загадувач со цврсти честички во земјава:

Уделот на емисиите од секторот домаќинства и административни објекти, (особено од согорување на дрвата) во 2016 година во вкупните емисии на вкупните цврсти честички (TSP) изнесува 43,7 отсто, во емисиите на цврсти честички со големина до 10 микрометри (ПМ10) изнесува 46,6 отсто и 63,3 отсто во емисиите на цврсти честички со големина до 2,5 микрометри (ПМ2,5).

Македонија е во врвот и според измерената концентрација на ПМ10 честички на една мерна станица. Според последниот Извештај за квалитет на воздухот на Европската агенција за животна средина, само шест отсто од мерните станици на континентот во 2016 година регистрирале годишни концентрации на ПМ10 честички поголеми од дозволената од 40 микрограми на кубен метар. Од нив, 92 отсто биле во четири земји; Турција (116 станици), Полска (29), Македонија (13) и Бугарија (11 станици)

Дваесет пати е разликата и во загадувањето од македонските термоелектрични централи, кои користат лигнит, и европските, кои главно користат покалорични типови јаглен, но и далеку посовремени технологии. Во моментов четирите термоелектрични блокови на лигнит емитуваат 3.342 тони ПМ 2,5 честички годишно. Според стандардите за животна средина, нивната вкупна годишна емисија треба да биде 167 тони. РЕК Битола и  РЕК Осломеј немаат добиено А-интегрирана еколошка дозвола, но, благодарение на Енергетската заедница, меѓународно тело за енергетика, имаат рок до 2028 година да ги намалат емисиите на потребното ниво.

АД ЕЛЕМ вчера почна акција за садење на 50.000 багремови садници околу РЕК Битола. Покрај тоа што садат дрвца, РЕК Битола и АД ЕЛЕМ имаат обврска да ги намалaт емисиите на штетни материи од централата преку десулфуризација,поставување филтри, конвертори, одпепелување, можна замена на горива и други мерки.

Според Алијансата за здравје и животна средина, 16 термоцентрали на лигнит во Западен Балкан, со моќност од 16 GW,  испуштаат речиси двојно повеќе ПМ 2,5 честички од сите 296 термоцентрали на јаглен во ЕУ, кои имаат можност од 156 GW. Балканските централи се меѓу десетте најголеми загадувачи во Европа, а РЕК Битола е втора, по Косово А, по количеството ПМ 2,5.

Покрај утврдените извори на загадување, ревизорскиот извештај „Квалитет на воздух – кооперативна ревизија“, наведува дека „Катастарот на загадувачи е нецелосен затоа што недостасуваат податоци за непроизводните извори на емисии и податоци од мерењата на дел од производните извори“.


Шесте нови приватни станици мерењата ги почнаа со високо ниво на загадување на воздухот


Скопје, 13 ноември, 2018 - 12:05 (META) 

Шесте нови мерни станици, кои го мерат загадувањето на воздухот во Скопје, поставени од страна на проектот „Скопје пулс“ утринава и синоќа измерија високо ниво на загадување.

Тоа се мерните станици кај Металски Завод Тито во општина Гази Баба, кај полициската станица во Ѓорче Петров, населба Козле во општина Карпош, како и три мерни станици во Центар- кај кафулето „Излет“, кај фонтаната во Градски парк и кај Клинички Центар. Претходно беа инсталирани 10 вакви станици – во Црниче, Драчево, Сопиште, Железара, две во Аеродром, во Кисела Вода, Илинден, Бардовци, две во Ѓорче и во Гази Баба.

На Водно синоќа беа измерени 108 микрограми на кубен метар, во Козле 241, МЗТ-Гази Баба 260, во Парк 102, кај „Излет“ 145 и во Ѓорче Петров 158 микрограми на кубен метар.

Овие мерни станици на „Скопје пулс“, проект на компанијата „Нетцетера“, се независни од мрежата мерни станици на Министерството за животна средина независни и мерат концентрации на ПМ10 и ПМ 2,5 честички, како и квалитет на воздухот (AQI) по што информациите кои тие ги испраќаат веќе можат да се следат на апликацијата „Мој воздух“.

На апликацијата „Мој воздух“, станиците што се дел од волонтерската „Скопје пулс“ мрежа, во името содржат “(Pulse)”.

Сега во Скопје, има вкупно 22 мерни станици во Скопје од кои 16 се независни. Во моментов постојат вкупно 35 мерни станици во државата чиишто податоци можат да се следат на апликацијата „Мој Воздух“, со тоа што мерните станици на Министерството во некои од најзагадените делови на Скопје – Гази Баба и Лисиче не работат од 14 август односно 5 октомври.


Трпевски: Постои опасност да влеземе во магичен круг од лоши закони


Скопје, 13 ноември, 2018 - 10:14 (META) 

Во Македонија законите многу често се носат без соодветна подготовка на трошоците што ќе ги предизвикаат за граѓаните и компаниите, но и за администрацијата и воопшто без проценка на влијанието на новата регулатива врз секојдневниот живот.

Ваквата состојба трае со години, а ништо не е поразлична и минатата година, период во кој Македонското здружение на млади правници истражуваше како министерствата соодветно ги подготвуваат законите.

По тој повод поразговаравме со Бојан Трпевски, координатор од Македонското здружение на млади правници за проектот „Со квалитетна проценка на влијанието на регулативата до подобро законодавство во РМ” спроведуван од  Институтот за демократија Социетас Цивилис и Центарот за економски анализи, а финансиран од Европската Унија.

Македонското здружение на млади правници анализираше како министерствата во 2017 постапуваа при спроведување на обврските што произлегуваат од актите кои го уредуваат процесот за процена на влијание на регулативата (ПВР). Какви беа главните наоди?

– Анализата ги следеше и оценуваше документите кои министерствата се должни да ги изготват при спроведување на ПВР процесот. Покрај тоа, за потребите на анализата беше спроведен и прашалник за лицата одговорни за ПВР во сите министерства во Македонија, со цел да ги слушнеме проблемите со кои тие се соочуваат при неговата имплементација. Она што произлезе од анализата е дека министерствата се соочуваат со сериозни предизвици при имплементација на ПВР, почнувајќи од процесот на планирање па се до процесот на изготвување на самите извештаи.

Она што можеби би го издвоиле како клучно е тоа што и покрај задолжителноста на спроведување на ПВР, за 6 закони воопшто не бил спроведен процесот; во 75 отсто на ЕНЕР не се објавени Извештајот за ПВР и предлог законот; министерствата во извештаите за ПВР не посветуваат доволно внимание на точно и детално утврдување и опис на проблемот поради кој се јавува потребата од измена на одреден закон, ниту пак целите во најголем број од случаите не се марливи, реални и остварливи; не е посветено доволно внимание во анализирањето на влијанијата (социјални, економски, фискални, административни и сл.) кои одреден закон ќе ги произведе при неговата имплементација; министерствата немаат детален план како ќе го следат спроведувањето на законот, а консултациите не секогаш се спроведуваат целосно и не секогаш се вклучени сите засегнати страни во него.

Кај колку министерства наместо суштинска се прави проформа процена на влијанието и трошоците од новите закони?

– Министерствата генерално суштински не го спроведуваат ПВР процесот, особено во извештаите за ПВР многу малку внимание е посветено на трошоците и влијанијата кои ќе ги произведе одреден закон. Секако дека постојат исклучоци и постојат ПВР процеси и извештаи за ПВР кои се соодветно спроведени, но ваквите добри практики се многу малку.

Какви се последиците од несоодветната подготовка на новите закони?

– Последиците од несоодветно спроведување на ПВР процесот и несоодветната подготовка на законите може да бидат многубројни. Она што би го извдвоиле како најважно е дека поради несоодветно подготвен закон, државата би се соочила со проблеми при неговата имплементација, со што всушност ние како држава се соочуваме во сите овие 27 години независност, незадоволство кај лицата или групите кои директно се засегнати и над кои се применува одреден закон, што пак на крајот резултира со измена на конкретниот закон. Доколку и за оваа измена не е соодветно спроведен ПВР процесот, постои опасност да влеземе во „магичен круг“ во кој за еден закон може да треба да се направат повеќе измени, што пак влијае и на правната сигурност на граѓаните.

Според вас, како би требало министерствата да се поттикнат да вршат правилна проценка на влијанието на регулативата односно каде треба да се бара решението на овој проблем?

– Од анализата би можеле да се издвојат два типа на препораки: краткорочни и долгорочни или системски кои произлегоа од компаративната анализа на добри практики која ја спроведовме, а со која се опфатени земји од регионот, но и едни од најразвиените земји како Обединетото Кралство и Франција. Од она што го детектиравме како моментална ситуација, потребна е доследна примена на обврската за ажурирање на годишниот план за спроведување на ПВР, независно дали промената произлегува од годишната програма за работа на Владата или од друга иницијатива.

Она на што државата треба да размисли во иднина е дали се потребни некои системски промени во ПВР процесот. Би било корисно обврската за ПВР да се издигне на ниво на закон, а не како што е сега на ниво на Деловник на Владата односно на подзаконски акт. Она што исто така сметаме дека би било корисно е да се подготвуваат Стратегија и Акциски план за спроведување на ПВР.


Ѓорчев: Налепниците на возилата се директен удар врз средната класа и сиромашните


Скопје, 12 ноември, 2018 - 17:13 (META) 

Пратеникот и член на Извршниот комитет на ВМРО-ДПМНЕ, Влатко Ѓорчев, на прес-конференција денеска ги повика премиерот, заменик-министерот за животна средина и просторно планирање и скопскиот градоначалник Петре веднаш да се откажат од планот за воведување еколошки категории за возилата, нарекувајќи го тој чекор „стигматизирање на сиромашните“.

– ВМРО-ДПМНЕ ги повикува Зоран Заев, Јани Макрадули и Петре Шилегов веднаш, веднаш уште денес или уште утре да престанат со нивниот проект за стигматизирање на цели категории на граѓани, а кој што се однесува на налепниците на возилата поврзани со издувните гасови. Оваа нивна мерка е директно насочена против средната класа во Република Македонија и против сиромашните. Затоа што нивните возила нема да можат да бидат забележани со зелена налепница. Тие луѓе со месеци, и со месеци нема да можат да ги користат нивните возила, нема да можат слободно да се движат и ќе имаат реални конкретни, практични проблеми во нивното дневно функционирање. И тие и нивните семејства – рече Ѓорчев.

По прес-конференцијата реагираа од Градот Скопје, порачувајќи дека мерката е непопуларна, но здравјето на граѓаните е најбитно.

„Сигурни сме дека дел од решенијата нема да бидат популарни, но здравјето на граѓаните е од највисок приоритет и само со заеднички напори и жртва може да се постигнат резултати и подобрување на состојбата во оваа област. Конкретните измени во Законот за возила, кои се на иницијатива на Град Скопје, се далеку поефективни и поправични во однос на алтернативата која се спроведува во некои метрополи, а тоа е забрана за користење на возилата по принципот „пар-непар“, се вели во реакцијата, во која се посочува дека се спроведува план за подобрување на квалитетот на воздухот со 53 мерки.


Мерната станица во Лисиче не работи од кога почна енормното загадување


Скопје, 12 ноември, 2018 - 15:31 (META) 

Инструментите со кои се мерат канцерогените ПМ10 честички во скопските населби Лисиче и Гази Баба не се во функција од 5 октомври, односно од 14 август.

Информациите од веб-апликацијата „Мој воздух“, која податоците ги добива од инструментите на Министерството за животна средина и просторно планирање, покажуваат дека мерната станица во Лисиче престана да работи кога загадувањето почна да ја надминува максимално дозволената концентрација на ПМ10 честички од 50 микрограми на кубен метар.

Последните мерења на инструментот за ПМ10 во Лисиче за 4 и 5 октомври покажува високо ниво на загадување. Овие два дена загадувањето во Лисиче го надминува условот за воведување мерки од 200 микрограми на кубен метар. На 4 октомври во 10 часот утрото биле измерени 233 микрограми, а во 21 часот 184 микрограми на кубен метар.

Последното мерење на станицата било на 5 октомври во 8 часот утрото кога мерната станица покажа 137 микрограми на кубен метар. Три часа претходно во 5 часот утрината покажала 629 микрограми, во 3 часот после полноќ 382 микрограми, а во 1 часот 259.

Од тогаш наваму, инструментот не е во функција. Денеска навршуваат 39 дена откако станицата не мери ПМ10.

За споредба, минатата година само четири дена во месец ноември концентрацијата на ПМ10 честички била пониска од дозволените 50 микрограми на кубен метар, а во некои денови се движела над 250 микрограми.

Освен што граѓаните не можат соодветно да се информираат колку е загаден воздухот што го дишат, нефункционирањето на инструментите во Лисиче и Гази Баба е проблематично затоа што според резултатите од овие мерења се воведуваат предвидените итни мерки.

За воведување на итни мерки потребно е бар две мерни станици во Скопје да покажат среднодневна концентрација на ПМ10 честички над 200 микрограми на кубен метар во последните два дена.

Ова значи дека дури и да има вакво надминување на мерните станици, во Лисиче и Гази Баба, кои притоа секогаш се едни од најзагадените населби, тоа не е евидентирано и не може да се преземат мерки.

Ако се исполнат условите се преземаат следните мерки:

  • Се ослободуваат од работни обврски бремените жени, лицата постари од 60 години, лицата со хрoнична астма, лицата со прележан инфаркт или мозочен удар, без разлика на возраста.
  • Се реорганизираат работното време – лицата на отворено смеат да работат од 11 до 17 часот.
  • Се спроведува забрана за одржување спортски натпревари и други манифестации на отворено.
  • Се воведува бесплатен јавен превоз.
  • Дневно се чистат улиците и пешачките површини.
  • Се зачестува контролата на инсталациите кои што поседуваат А–ИСКЗ дозвола – односно најголемите загадувачи.
  • Се спроведат контролни мерења на емисиите на загадувачки супстанции во амбиентниот воздух со акредитирана лабораторија со цел да се утврди дали се применуваат пропишаните услови/мерки во дозволата по однос на емисиите во воздухот, и истите ќе добијат и препорака да го намалат производството за 50 отсто.

На 2.000 евра приход – 240 евра вкупен данок


Скопје, 11 ноември, 2018 - 10:30 (META) 

Не стивнуваат реакциите од бизнис-секторот, но и од граѓаните кои имаат поголеми месечни приходи по најавата на Владата дека од 1 јануари 2019 стапува на сила нов закон за данок на личен доход со кој се укинува рамниот данок и се воведува прогресивно оданочување. Даночните промени предизвикаа и повеќе дилеми околу износот и начинот на плаќање на даноците за личен доход.

Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 1.500 евра, за делот над 1.500 евра ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 2.000 евра , исплатувачот ќе треба да плати вкупен данок од 240 евра (10 отсто односно 150 евра за делот што е до 90.000 денари и 18 отсто односно 90 евра за делот што го надминува прагот од 90.000 денари).

На крајот на годината, со годишната даночна пријава ќе се врши пребивање помеѓу вкупниот доход што го остварило едно лице и вкупниот данок што бил платен, и доколку постои разлика помеѓу платениот данок и данокот што треба да се плати за остварениот доход, на лицето ќе му се врати повеќе платениот данок, или пак лицето ќе треба да доплати.

Од Министерството за финансии тврдат дека директно зголемување на даноците ќе има само за 38.000 лица, а кај 453.000 лица ќе има намалување на ефективната даночна стапка.