Постигнат е договор со БЕСА на Касами за уставните измени


Скопје, 11 јануари, 2019 - 16:27 (META) 

Постигнат е договор со крилото на БЕСА на Биљал Касами да се гласа за измените на уставот, изјави на прес-конференција попладнево портпаролот на СДСМ Костадин Костадинов. Тој не прецизираше што е договoрено, но истакна оти тоа ќе биде објаснето преку партиски соопштенија.

Рече дека продолжението на седницата на која ќе се гласа за уставните измени треба да биде закажана од претседателот на Собранието, Талат Џафери.

Костадинов рече дека најостро ги демантираат, како што рече, „изнесените лаги на претседателот на ВМРО-ДПМНЕ Христијан Мицкоски и на раководството на партијата дека се вршел притисок врз пратениците да гласаат за уставните измени“.


БЕСА на Африм Гаши: Ние ќе гласаме за уставните измени


Скопје, 11 јануари, 2019 - 14:05 (META) 

Тројцата пратеници од БЕСА кои припаѓаат на делот што за претседател го признава Африм Гаши, а не Биљал Касами, ќе гласаат за уставните измени.

Како што соопшти Гаши, тие се цврсто решени за евроинтеграциите и ќе ги поддржат измените на Уставот заради исполнување на обврските од Преспанскиот договор. Тоа е од висок интерес за Албанците, нагласи тој.

„БЕСА со своите три пратеници останува силно посветена на усвојување на уставните измени и членството на земјата во НАТО, убедена дека на тој начин се реализира и еден дел од нашата програма, но и еден висок интерес на Албанците во Македонија, кој воедно е и стратешка цел на државата.Сега, кога е актуелна улогата на пратениците за очекуваните уставни измени, а двајца пратеници, дојдени некогаш од една друга партија во Движењето БЕСА му се спротивставуваат на овој процес, бараме од медиумите да имаат разбирање за овие разлики и секогаш кога треба да информираат за ставот ПРОТИВ на тие пратеници, да ги споменуваат преку нивните лични имиња или преку фракцијата која ја претставуваат“, порача Гаши.


За утре одложена седницата за уставни измени, неизвесно двотретинското мнозинство


Скопје, 10 јануари, 2019 - 16:53 (META) 

Претседателот на Собранието Талат Џафери, по двете одложувања денеска, продолжението на седницата на која треба да се расправа за финалната фаза од уставните измени предвидени со Договорот од Преспа помеѓу Македонија и Грција го закажа за утре во 12 часот.

Во меѓувреме премиерот Зоран Заев ќе продолжи со координативните состаноци со БЕСА на Биљаљ Касами и со пратеничката група составена од осум пратеници што се одделија и што беа исклучени од ВМРО-ДПМНЕ и коалицијата.

Премиерот претходно денеска изјави дека се уште се во разговори со БЕСА на Биљал Касами за изнаоѓање техничка формулација во однос на државјанството со цел обезбедување на потребните 80 пратеници за донесување на уставните амандмани.

Тој рече дека не може во моментов да каже дека се обезбедени 80 пратеници, но и дека е подготвен да го презеде својот дел од одговорноста.

– Секој треба да ја преземе одговорноста за процесот. Ако нема мнозинство следува Централен одбор на СДСМ и понесување одговорност. Ставивме се на оваа карта. Или ќе не има 80 или ќе следува одговорност – вели  Заев, и при тоа подвлече дека сепак верува и очекува да биде обезбедено потребното мнозинство.

Пред Собранието се одржува протест против промена на името во организација на здруженијата „Tврдокорни” и „Македонија блокира“. На протестите од вчера им се приклучи и опозициската ВМРО-ДПМНЕ. Во 16.30 часот се очекува говор да одржи и лидерот на ВМРО-ДПМНЕ и Коалицијата „За подобра Македонија“, Христијан Мицкоски.


Власта незаинтересирана да ги прифати измените на законот за казина


Тетово, 9 јануари, 2019 - 20:50 (META) 

Опозициските партии најавуваат амандмани на нацрт-законот за игрите на среќа, Министерството за финансии не е заинтересирано да ја информира јавноста за текот на законот, додека Движењето за борба против коцкање ги потсетува пратениците да прифатат нивните барања истакнати за време на протестот од 21 декември минатата година во Тетово, кој освен од граѓаните беше масовно поддржан и од верски заедници, но и од локалните власти, пишува  „Порталб.мк“.

Министерството за финансии веќе една недела не им одговора на прашањата во која фаза е Предлог-законот за игрите на среќа, дали има некоја промена од првата верзија и дали ќе се промени на оддалеченоста на казината и објектите за игри на среќа од образовните институции, повеќе од сегашната верзија, односно 500 метри.

Движењето против коцкањето, денес на прес-конференција ги потсети централните власти на нивните барања.

1. Сите објекти на игри на среќа (казина, спортски обложувалници и сите слични игри на среќа) да се оддалечат 3 км од населбите.
2. Распределба на 5% од буџет што доаѓа од игрите на среќа за поправка на објекти од јавен интерес (училишта, градинки, библиотеки, болници како и здруженија и центри кои организираат активности за рехабилитација на зависници од игрите на среќа.
3. Развивање на национална стратегија за едукација на учениците, студентите и сите граѓани за штетите што ги предизвикува коцкањето.

Иако Министерот за финансии, Драган Тевдовски, рече дека ќе ги анализира овие барања, сепак до сега Министерството не реагираше.

Во однос на предлозите од Либералната партија, но и од граѓаните за примена на законот како и во Албанија, според кој, од 2019 година се стави клучот на сите казина и обложувалници, власта има резерви.

Како што изјави премиерот Зоран Заев, оваа мерка е радикална, истакнувајќи го податокот дека оваа активност се вработени околу 6.000 граѓани и дека тие ќе останат без работа.

Ваквата изјава на премиерот, според Движењето е неодговорна.

Албанските опозициски партии најавуваат амандмани, владејачката партија молчи
иако потпретседателката на ДУИ, Теута Арифи, учествуваше на протестот на 21 декември.

“Во моментов сме во процес на подготовка на амандмани и разгледување на формите за тоа како може да се регулира оваа појава, што предизвикува сериозни последици за семејствата на граѓаните. Ги разгледуваме различните начини, од целосно затворање до оддалечување на локациите за игри на среќа од населените места, училиштата, универзитетите, студентски центри и така натаму. Исто така, во овој период, како основа за регулирање на игрите на среќа ги земаме искуствата од развиените земји, вклучувајќи го и моделот на Албанија кој го спроведува владата на премиерот Еди Рама од 1 јануари оваа година, што е се чини дека дава резултати. Во моментот кога ќе ја имаме конечната верзија на амандманите и законот, ќе ја објавиме за јавноста”, рече Орхан Муртезани од БЕСА на Африм Гаши.

Од БЕСА на Билал Касам, велат дека формирале работна група за ова прашање, но дека во иднина ќе бараат “поддршка за усвојување на закон што ќе и рече стоп на оваа појава”.

И од Алијансата за Албанците “веруваат” дека ќе имаат амандмани за овој закон, но сега се фокусирани на уставните измени.

Инаку, неколку пати граѓаните на Тетово и некои општини во Скопје протестираа против казината и обложуваниците во близина на образовните објекти. Со новиот предлог-закон се очекува истите да се оддалечат на растојание од 500 метри, но ова, според граѓаните, се уште не е доволно.


Заев ќе го убедува Касами да ги поддржи уставните измени


Скопје, 4 јануари, 2019 - 10:16 (META) 

Премиерот Зоран Заев денеска ќе одржи средба со претседателот на БЕСА, Билал Касами, на која ќе се обиде да го убеди да ги поддржи уставните измени.

Средбата е закажана за во 16 часот во Владата.

Заев е оптимист дека ќе обезбеди двотретинско мнозинство и дека процесот на имплементацијата на Преспанскиот договор ќе заврши успешно, но вели дека бројката на пратеници ќе се знае на денот на гласањето.

– Конечниот број ќе го видиме на денот на гласањето. Седницата е закажана за 9 јануари, а според најавите за неприсуство на опозицијата, очекувам дека расправата би траела два-три дена. Чинот на гласањето ќе го покаже резултатот од дебатата, усвојувањето на амандманите, забелешките, вербата. Разговорите со политичките партии продолжуваат – рече Заев на вчерашната прес-конференција во Министерство за финансии.


Партиите бараат во пописот да се вклучи етничката припадност


Скопје, 22 ноември, 2018 - 10:38 (META) 

Предлогот на директорот на Државниот завод за статистика, Апостол Симовски во пописот од 2020 година да нема изјаснување за верската и етничката припадност на населението предизвика негативни реакции, главно кај албанските партии, со оглед на тоа дека Република Македонија е мултиетничката држава, но и непостоење на регистрација, известува Порталб.мк“.

ДУИ:

Формиравме партиска комисија со луѓе со искуство и знаење во овој поглед, која ги анализира сите аспекти на пописот. Оваа недела Комисијата ќе се сретне со раководството на Заводот за статистика за да ги слушне нивните идеи и ќе продолжи со бројни состаноци, анализи и потоа ќе искаже својот став за организирањето на овој важен процес – велат од ДУИ.

Алијанса за Албанците:

Алијансата за Албанците, се категорични против предлогот, проценувајќи дека нема причина поради која на пописот на населението не треба да има изјаснување на етничката припадност.

АА не прифаќа таков попис, бидејќи не гледа ниту причина да нема графа за етничка и религиозна припадност. Алијансата ќе се обиде да ги побие тврдењата дека етничката и верската припадност не се значајни, апелираме до сите Албанци да не го потпишат е поништувањето на идентитетот на Албанците – вели потпретседателот на АА, Елми Азири.

БЕСА (Гаши):

Сметаме дека недостатокот на пописот од 2002 година веќе имплицира таква определба. Треба да знаеме кој и колку е во оваа држава. Ако оваа држава во преамбулата е дефинирана според етничката припадност, не гледаме причина зошто во пописот треба да се кријат етничките идентитети. Во тој случај би требала да се договориме во преамбулата “Македонија да биде држава на граѓаните”, и на ниту една определена етничка групаМислиме дека етничката припадност е важна за иднината на земјата, уште повеќе што етничкиот идентитет не се менува со јазичниот идентитет – вели Орхан Муртезани од движењето Беса чиј претседател е Африм Гаши.

БЕСА (Касами)

Во сите земји во светот пописот е статистички процес, додека кај нас е политички бидејќи колективните права на Албанците во многу сегменти се поврзани со процентот. Затоа сакаме да ги отстраниме навредливите термини од уставот и откако ќе ги регулираме отворените прашања на Албанците тогаш нема да има проблем да се реализира статистички процес кој исто така треба да го содржи графата на етничките заедници што живеат. Предлогот на Заводот за статистика е неодмерен и остава простор за сомневање дека со ова се подготвува сценарио на штета на Албанците. Движењето Беса ќе се ангажира со сиот капацитет во пописот да се содржи и етничката и религиозната припадност и да се реализира откако Албанците да бидат соодветно потставени во раководни позиции – вели Елмедин Мемиши, портпарол на движењето Беса со претседател Билал Касами.

НДП:

Весел Мемеди од Националната демократска преродба (НДП), вели дека Албанците немаат дилема дека етничката припадност е тема од суштинско значење, а законот за регистрација го усвојува Собранието, а не Заводот за статистика.

Законот за регистрација го усвојува Собранието, а не Заводот за статистика. Конкретна акција се води во Парламентот, а не на социјалните мрежи. Јавноста треба да разбере кои се суштинските теми што ги бара ЕУРОСТАТ и кои се секундарните. Ништо од тоа што се говори во јавноста не е суштинска тема за ЕУРОСТАТ, вклучувајќи го и јазикот, и затоа нема потреба за паника. За Албанците, не постои дилема дека етничката припадност е суштинска тема, и никој не се сомнева во тоа – вели Мемеди.

„Порталб.мк“, исто така, побара мислење и од ДПА, но тие не беа достапни. 

СДСМ:

Владејачкиот Социјалдемократски Сојуз на Македонија (СДСМ) смета дека е “логично во пописот да се вклучи и етничката припадност”, додека опозицијата ВМРО-ДПМНЕ вели дека немаат став, но дека оваа идеја според нив е “чудна и опасна“.

Ова е предлог на Државниот завод за статистика, станува збор за тестирање на системот пред спроведување на општиот попис. До крајот на оваа година, Владата треба да подготви нов предлог-закон за попис. Според нас, како СДСМ, пологично е да имаме графа на етничка припадност – вели портпаролот на СДСМ, Костадин Костадинов.

ВМРО-ДПМНЕ:

Во овие денови ќе се состаната органите на ВМРО-ДПМНЕ и ќе излезат со конечен став во врска со графата националност. Она што можам да го кажам сега е дека ова чудно и опасно – вели портпаролот на ВМРО-ДПМНЕ, Димче Арсовски.

Инаку, минатата недела директорот на Заводот за статистика изјави дека пописот на населението ќе се спроведува од 1 до 21 април година од 2020 година и нема да ја содржи графата за етничка и верска припадност, бидејќи според него, овие графи се злоупотребени за политички цели. За да се разбере припадноста на граѓанинот, ќе се праша кој јазик му е мајчин јазик.

За пописот на населението ќе бидат ангажирани околу пет илјади лица, и овој пат ќе се користи комбиниран метод, што значи дека покрај користењето на теренските податоци ќе се користат и податоци од регистрите. Се проценува дека за овој процес ќе бидат потребни околу 8,5 милиони евра.

За да се спроведе пописот, Владата прво треба да усвои нацрт-закон, а потоа истиот да се усвои во Собрание.

„Порталб.мк“, го контактираше владиниот портпарол, но тој сè уште не прецизира до каде е процедурата за нацрт-законот. Нацрт-законот за попис официјално ќе биде подготвен од Министерството за правда до 31 јануари следната година. Откако ќе се подготви истиот треба да биде ставен на увид на јавноста во Електронскиот национален регистар, каде што ќе биде отворен за дискусија и јавен надзор 20 дена. Потоа, истиот ќе треба да се достави во Влада за усвојување, а потоа ако владата го усвои, ќе биде испратен во собраниска процедура. Последниот попис на населението во Македонија беше реализиран во 2002 година, а во 2011 година започна, но не беше реализиран.


Беса ќе поднесе четири амандмани за Уставот, очекува Владата да ги прифати


Скопје, 24 октомври, 2018 - 14:50 (META) 

Пратеникот Фадил Зендели од Беса изјави дека тие ќе поднесат четири амандмани за Уставот – концепт на граѓанска држава, албанскиот јазик да биде рамноправен со македонскиот јазик, државата да се грижи за сите нејзини граѓани во дијаспората, како и тоа претседателот на државата по второто гласање на закон или друг акт во Собранието да нема право на вето, како за Законот за јазици и Договорот од Преспа.

На прашањето дали пратениците од нивната партија ќе ја условуваат Владата со овие амандмани во следните фази од носење на уставните измени, Зендели вели дека тоа нема да се случи бидејќи условувањето не е филозофија на нивната партија.

– Тоа не е речник или филозофија на нашата политичка партија. Ние сметаме дека ова е демократско право и дека со години се наметнува и ја оптоварува политичката сцена и дека во овој момент кога се отвора Уставот би требало да се решат. Ние се уште немаме предлог од Владата за да можеме да постапиме. Ова се наши предлози – вели пратеникот кој рече дека нивното барање е нивните предлози да бидат прифатени и како предлози од Владата да бидат доставени до Собранието.

Во однос на политичкото помирување, Зендели вели дека пратениците од оваа партија сакаат да придонесат за ова прашање.

– Сметаме дека сите во македонската, па и во албанската заедница треба да најдеме помирување за да придонесеме и да имаме предуслови за нормално политичко и демократско функционирање – рече Зендели, кој нагласи дека е за помирување, но не и за амнестирање и оти сите што се огрешиле пред законот треба да одговараат.


Алијанса за Албанците и БЕСА на Касами ќе поднесат амандмани за Албанците


Скопје, 22 октомври, 2018 - 17:11 (META) 

Алијанса за Албанците (АА) и крилото на БЕСА предводено од Биљал Касами ќе поднесат амандмани за албанскиот јазик и за преамбулата, во текот на расправата за уставните измени кои се прават поради исполнување на обврските од Преспанскиот договор, јави „Порталб“.

ДУИ, крилото на БЕСА предводено од Африм Гаши, НДП и ДПА сметаат дека сега не е време за поднесување амандмани, туку е многу побитно да се отвори евроатлантскиот пат за Македонија. Артан Груби од ДУИ дури најавите за „албански амандмани“ ги нарече „неписмен, незналечки фолклоризам на ситните партии, отсуство на политичко-партиски идентитет, недостиг на знаење, некреативност и за неуспешен обид да се наметнат како фактор на мала врата, но го немаат клучот да го отклучат“.

БЕСА на Касами ќе поднесе амандмани за целосна еднаквост на Албанците во Македонија и целосна официjализација на албанскиот јазик, а не како што се наведува сега, за „јазикот што го зборуваат 20 отсто од граѓаните“.

-Како политичка партија најавивме дека ќе бидеме дел од процесот на усвојување на уставните измени, при што ќе интервенираме со уставни амандмани за подобрување на правата на Албанците. Не можеме да прифатиме по 27 години да ги оставаме овие права за „подобри времиња“. Цениме дека сега е времето да се отворат овие прашања. Го поддржуваме Договорот од Преспа, но напоредно ќе интервенираме со амандмани откако Владата ќе го достави предлогот. Не кажуваме ништо ново, нема нови работи. Ќе бараме целосна еднаквост на Албанците во Македонија, Албанците не може да се третираат како малцинство и ќе бараме албанскиот јазик да биде официјален – вели Фадил Зендели, заменик на Касами, за „Порталб“.

Тој не кажува дали својата поддршка за другите амандмани ќе ја условат со поддршката на нивните.

И Алијанса за Албанците, како што претходно најавуваше, ќе поднесе амандмани за албанскиот јазик и за преамбулата на Уставот.

– Ние предупредивме дека ќе поднесеме амандмани, но првин ќе го видиме владиниот предлог, за да видиме што содржи, и потоа ќе решиме. Ќе поднесеме амандмани за преамбулата и за албанскиот јазик – изјави пратеникот Сурија Рашиди за „Порталб“.

Албанските партии од владината коалиција, пак, порачуваат дека сега е најважно да се донесат уставните измени за да стапи на сила Договорот од Преспа и да се отвори евроатлантската патека на Македонија. Артан Груби од ДУИ порачува дека амандмани за албанското јазично прашање и за менување на преамбулата ќе бидат само дневно-политичка пропаганда и се „продавање магла“.

-Амандмани треба да се поднесуваат само за предложените членови на Уставот, а не и за други нешта. Овој неписмен, незналечки фолклоризам на ситните партии зборува за отсуство на политичко-партиски идентитет и зборува за недостиг на знаење, некреативност и за неуспешен обид да се наметнат како фактор на мала врата, но го немаат клучот да ја отклучат. Оние што ги затвораа очите и молчеа кога се остваруваа националните права, денес, заостанати и со незнаење, откако преспаа 15 години, се обидуваат да продаваат магла. Патот на земјата кон НАТО и ЕУ не смее на никој начин да биде попречен, а најмалку за сувопарна пропаганда – вели Груби во изјава за „Порталб“.

И од БЕСА на Африм Гаши велат дека е битно да се усвои Преспанскиот договор и, според нив, сега нема поголем интерес за Албанците од влезот на Македонија во НАТО.

Весел Мемеди од НДП, вели дека не треба процесот на спроведување на Договорот од Преспа да се условува со други амандмани, оти тоа би им служело на деструктивните сили во земјава и во регионот.

И од ДПА велат дека не е променет нивниот став дека ќе го поддржат Договорот од Преспа, пишува „Порталб“.


Двете крила за БЕСА не го поддржуваат Заев за амнестирањето


Скопје, 15 октомври, 2018 - 15:36 (META) 

Двете крила на БЕСА, тоа на Биљал Касами и тоа на Африм Гаши сметаат дека е неприфатлива понудата на премиерот Зоран Заев да се „амнестираат“ обвинетите за насилствата на 27 април 2017 во Собранието.

Според групата предводена од Африм Гаши, политичарите не смее да се мешаат во работата на правосудството, а помирување е можно само по преземање одговорност, извести „Порталб“.

– Во суштина, во оваа ситуација политиката не е во право и не смее на никаков начин да им се меша на судовите. Ослободувањето на правосудството од политиката е услов за владеење на правото и за европска перспектива. Помирувањето е можно само ако се побара прошка и ако некој преземе одговорност. Се надеваме дека ќе се постигне правдата – вели портпаролот Орхан Муртезани.

Инаку, премиерот Зоран Заев на почетокот на денешната собраниска седница за уставните измени повика на помирување, но воопшто не спомена амнестија.

Групата предводена од Биљал Касами, пак, отворено е против повикот за простување. Велат дека амнестирањето на насилниците е нарушување на евроатлантските вредности, пренесува „Порталб“.

-Предлогот за амнестирање на учесниците во насилствата од 27 април во Собранието ги нарушува вредностите за кои се залагаме со интеграцијата на земјата во НАТО и ЕУ – вели портпаролот Елмедин Мемиши.

Прашан дали пратениците на БЕСА ќе гласаат за таква амнестија, тој категорично одговара со „не“.


Не работевме против референдумот, го демантираат Коѕиас двете крила на БЕСА


Скопје, 4 октомври, 2018 - 13:51 (META) 

И двете крила на движењето Беса реагираа на изјавата на грчкиот министер за надворешни работи Никос Коѕиас дека движењето БЕСА водело кампања против референдумот, порачувајќи дека тоа не е точно, јави „Порталб“.

– Помалите албански партии, како партијата БЕСА, за која турскиот печат вели дека е финансирана од Турција, повика на бојкот на референдумот. Нашите граѓани треба да се запрашаат дали тоа е поврзан со црни сценарија од Турција – рече Коѕиас во интервјуто за грчката државна телевизија ЕРТ.

– Во овој момент нема да се спуштиме на тоа ниво на комуникација со првиот човек на грчката дипломатија. Бројот на Албанците што излегоа на референдумот е точно или приближно колку на парламентарните избори, па сметаме дека Коѕиас е дезинформиран во врска со движењето БЕСА и неговата вистинска вклученост во референдумската кампања – вели за „Порталб“ Елмедин Мемиши, портпарол на крилото на БЕСА предводено од Биљал Касами.

Другото крило, предводено од Африм Гаши, исто така реагира на изјавата на Коѕиас, посочувајќи дека ги вклучиле сите капацитети во поддршка на референдумот. Дополнително, ќе испратат и протестна нота до грчката Канцеларија за врски во Скопје.

– Покрај тоа што е ова недостојно за еден министер за надворешни работи – бидејќи движењето БЕСА, како партија од владината коалиција ги вклучи сите капацитети за поддршка на референдумот во сите области каде има освоено гласови, а референдумот надмина 50%, несериозноста на грчката дипломатија да гради дипломатски ставови врз основа на медиумски шпекулации и оцрнување на домашните политички опоненти во Македонија, Движењето БЕСА денеска ќе испрати протестна нота до грчката амбасада во Скопје и ќе побара министерот Коѕиас да се извини или да приложи докази за кои би ја поткрепиле неговата изјава. Ако се зборува за бројките, треба да се запрашаме какво странско влијание имаше во Кичево и Струга, каде БЕСА нема стабилно гласачко тело – велат од крилото на Гаши.