Повеќе од 80 лица се повредени при рушење на тераса во зградата на индонезиската берза


Џакарта, 15 јануари, 2018 - 19:51 (META) 

Повеќе од 80 лица се повредени при рушење на тераса во зградата на индонезиската берза.

Во моментот на рушење на терасата, имало голем број на студенти кои биле во посета на берзата во Џакарта. Полицијата ги евакуирала луѓето и ги утврдува причините за несреќата.

Според информациите од портпаролката на индонезиската берза, немало застој во работата на системот и берзата продолжила непречено да работи.


Манчев: Струјата произведена на мазут би била поскапа од увезената


Скопје, 13 јануари, 2017 - 19:15 (META) 

„Неуките експерти на СДСМ целосно промашуваат кога станува збор за вклучувањето на ТЕЦ Неготино. Вистината е дека според цената на мазутот, струјата произведена на мазут би била многу поскапа од увезената, која е купена на берза“, изјави на прес-конференција Ванковер Манчев од ВМРО-ДПМНЕ, како реакција на изјавата на Митко Андреевски од СДСМ за цената на увезената струја.

Според Манчев, „безобразно е СДСМ да критикува за ТЕЦ Осломеј, кога токму во нивно време, таа термоелектрана беше оставена без грам јаглен и без каква било можност за ископ на потребните ресурси“.

– За разлика од СДСМ, ВМРО-ДПМНЕ континуирано работи на подобрување на енергетската слика на Македонија, а така и ќе продолжи во иднина, со реализирање на бројните мерки и проекти предвидени со досега најобемната програма „Реално“ – додаде Манчев.


Фудбалскиот клуб „Брегалница“ ќе се продава на берза


Штип, 31 август, 2016 - 13:06 (META) 

Општината Штип, преку основен пакет на акции во износ од 25.000 евра, на берза ќе го продава акционерското друштво „Брегалница 2008“. Оваа одлука ја официјализираше мнозинството на седницата на Советот на Општината Штип.

Ова е обид прволигашот „Брегалница“ да стане вториот градски фудбалски клуб, по примерот на „Вардар“, кој ќе се продава на Македонската берза за хартии од вредност.

Општината Штип секоја година троши меѓу 300.000 и 500.000 евра за клубот, кој не носи приходи. Како што во една пригода изјави градоначалникот Илчо Захариев, сите пари што Општината ги собира од граѓаните на име данок на имот, одат во касата на клубот „Брегалница“.

– Основен критериум за избор на најдобар понудувач е висината за пакетот акции, кој не смее да биде понизок од 300.000 евра годишно за инвестирање, исплата на плати и на премии и за други трошоци. Закупувачот се обврзува да работи со клубот најмалку 10 години – ја образложи одлуката претседателот на Комисијата за спорт, Борче Коцев.

Комисија, формирана од градоначалникот со членови од власта и од опозицијата, ќе работи на изборот на најдобриот понудувач. Веќе подолго време во Штип се зборува дека турски инвеститор е заинтересиран за „Брегалница“.

Општината, која заедно со УЕФА го реновира стадионот, останува сопственик на спортскиот терен. Таа е должна и да го одржува, без оглед кој и да биде новиот инвеститор.

– Секој што ја купува „Брегалница“, ја презема со сите нејзини долгови. Точно е дека „Брегалница“ има долг од четири милиони денари. Општината ќе има само една обврска, а таа е да ги одржува терените, бидејќи тие се наши – изјави од советничката говорница градоначалникот Илчо Захариев.

Фудбалскиот клуб „Брегалница“ пред десетина години направи обид да се натпреварува со странски инвеститор. По повеќе од една година работење со клубот, бугарскиот бизнисмен Јордан Андреев си замина, со образложение дека станува збор за инвестиција без заработка.


Американските берзи рушат рекорди во тргувањето, а европските стагнираат


Њујорк, 16 август, 2016 - 10:15 (META) 

Акциите на американските берзи на почетокот на денешното тргување се вратија на рекордно високо ниво, бидејќи повисоките цени на нафтата ја зголемија вредноста на акциите на енергетските компании.

Истовреме акциите на европските берзи главно стагнираат, при што лондонскиот и франкфуртскиот индекс оствариле само мало зголемување, додека парискиот индекс стагнирал.

Цената на акциите на нафтените компании се зголемија, бидејќи Организацијата на земји извозници на нафта (ОПЕК) најави дека следниот месец ќе презеде мерки за ограничување на производство, пренесуваат светските агенции.


Вредноста на акциите на Лондонската берза се зголеми, фунтата падна


Лондон, 6 јули, 2016 - 12:48 (META) 

Најновите мерки на Централната банка на Англија денеска ја подигнаа вредноста на акциите на Лондонската берза, но фунтата повторно падна.

Индексите на европските берзи во Европа, САД и во Азија паднаа бидејќи трговците продолжија да ја следат кризата во италијанскиот банкарски сектор.

Имено, Европската централна банка предупреди дека банката „Монте деи Паски де Сијена“, која е трета најголема италијанска банка, има исклучително високо ниво на „лош“ долг.

На валутните берзи, фунтата се најде под притисок, повторно паѓајќи на 31-годишен минимум од 1,3055 долари.

 


Британска компанија сака да го преземе „Макпетрол“


Скопје, 9 јуни, 2016 - 13:51 (META) 

Британската компанија „Балкан петролеум холдинг лимитед“ (Balkan Petroleum Holding Limited) сака да го преземе акционерското друштво „Макпетрол“ АД – Скопје по цена од 25.908 денари за една акција, се соопштува на Македонска берза.

– Во согласност со член 22, став 1 од Законот за преземање на акционерските друштва, ги известуваме сите акционери на „Макпетрол“ АД – Скопје дека имаме намера да објавиме понуда за преземање на акционерското друштво „Макпетрол“ АД – Скопје по цена од 25.908 денари за една акција. Понудата за преземање ќе биде објавена по добивањето дозвола од страна на Комисијата за хартии од вредност – се вели во намерата за преземање објавена на берзата, која е објавена и како оглас во дневните весници.


Пад на акциите на светските берзи поради неизвесноста од останувањето на Лондон во Унијата


Лондон, 19 февруари, 2016 - 18:00 (META) 

Акциите на светските берзи денеска загубија од вредноста поради понатамошниот пад на цената на нафтата и како резултат на очекувањето на исходот од преговорите за спречување на излегување на Обединетото Кралство од Европската унија.

Британскиот премиер Дејвид Камерон порача дека договор со европските лидери сè уште нема и дека нема да се откаже од британските барања за понатамошно членство во Унијата.

Трговците на светските берзи ги игнорираа оптимистичките податоци за порастот на малопродажбата во Обединетото Кралство за 2,3 отсто на месечно ниво, што е најголем шпраст во последните две години.


Продолжува падот на берзата во Атина


Атина, 4 август, 2015 - 14:17 (META) 

Главниот атински индекс утринава падна за четири отсто откако вчера, на првиот ден од тргувањето по пауза од пет недели, заврши со загуба од 16,2 отсто.

Берзата во Атина е затворена на 29 јуни, кога должничката криза ја достигна кулминацијата и беше воведена контрола на капиталот за да се спречи колапс на банкарскиот систем. Банките во меѓувреме се отворени, но е задржано ограничувањето за повлекување пари.

Грчката влада почна преговори со меѓународните кредитори за третиот пакет помош за следните три години, во вредност од околу 85 милијарди евра. Преговорите мора да бидат завршени до 20 август, кога доспева големата рата од долгот кон Европската централна банка, во износ од 3,2 милијарди евра.


Цената на нафтата на најниско ниво во последните шест месеци


Лондон, 28 јули, 2015 - 18:54 (META) 

Цената на нафтата на меѓународните пазари денеска се спушти на најниска вредност во последните речиси шест месеци, откако падот на цената на кинеските акции го зголеми сомнежот во изгледите за побарувачка на сурова нафта од Кина, водечкиот светски потрошувач.

Цената на барел сурова нафта во Лондон падна за 78 центи, на 52,69 американски долари, а кратко време изнесувала и 52,28 долари, што е најниска вредност од почетокот на февруари.

На американскиот пазар била во минус за 36 центи и чинела 47,03 долари за еден барел.


Продолжува падот на кинеските берзи


Хонг Конг, 8 јули, 2015 - 10:37 (META) 

Вредноста на акциите на кинеските компании денеска падна на најниско ниво во последните четири месеци и покрај мерките што властите ги презедоа за стабилизирање на пазарот.

Речиси половина од кинеските компании го стопирале работењето на берзите за да се заштитат од колапс.

Негативното влијание се прели и на пазарот во Хонг Конг, чијшто берзански индекс падна за повеќе од четири проценти.

Губитокот го забележаа и кинеските фирми што работат во странство.