!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Кривична пријава против градоначалникот на Берово оти патувал без налози


Берово, 6 октомври, 2017 - 14:07 (META) 

Кривична пријава против Драги Наџински, градоначалникот на Берово, поднела надворешната канцеларија за криминалистички работи (НККР) од Берово во соработка со одделот за економски криминал при Секторот за внатрешни работи (СВР) Штип, соопшти МВР.

Во пријавата поднесена до Основното јавно обвинителство Берово стои дека Д.Н. (59) од Берово сторил злоупотреба на службената положба и овластување.

Според полицијата, Наџински како градоначалник на општина Берово, од 1 јули 2015 до 1 јули 2017 година, повеќепати го користел службеното патничко возило, сопственост на Општина Берово, без да обезбеди решение за службено патување во странство од надлежен орган од Општината, како и без патни налози и без покани за службено патување во странство.

Полицијата го товари за 32 такви прекршоци, при што се вели дека превезувал и други лица.

Претходно МВР поднесе кривични пријави против градоначалниците на Штип, Велес, Крива Паланка, Неготино, Ново Село, а судски пресуди имаше за градоначалниците на Прилеп и на Кавадарци.


Заев: За проблемот на секој граѓанин, ако треба цела држава ќе помогне


Берово, 29 септември, 2017 - 21:52 (META) 

Секој граѓанин, со каков предизвик и да се соочи, градоначалникот, општината, ако треба цела држава, ќе застане зад него да помогне. Граѓаните ќе кажуваат што ќе се гради. Што ќе кажат граѓаните, тоа ќе биде закон и за градоначалникот и за советниците и за извршната власт, порача претседателот на СДСМ, Зоран Заев, на вечерашниот митинг во Берово.

– Ќе изградиме отворени општини, граѓаните секогаш ќе знаат како се трошат нивните пари. Не може да нема асфалт во селата. Ќе има рамномерен регионален развој во Македонија. Локален економски развој значи локални производствени капацитети. Целта мора да биде луѓето да имаат повеќе пари во местото каде живеат. Ако луѓето имаат пари, ќе останат да ни живеат во Македонија – рече Заев.


Градоначалниците од истокот со проглас против двојазичност


Берово, 24 февруари, 2017 - 21:36 (META) 

Дел од градочалниците од Југоисточниот Регион, покрај редовните точки на дневен ред на 30. седница на Советот на Источниот плански регион, која се одржува во Берово, го поставиле и „прашањето за најавеното воведување на двојазичност во јавната администрација на територијата на цела Република Македонија“, се вели во објавата на веб-страницата на Општина Берово.

Во веста се вели дека дел од градоначалниците „енергично и здружено се спротиставуваат на таквите заложби на партиите кои тоа го заговараат,  раководството на Социјалдемократскиот сојуз и на албанските партии“ и дека тоа би бил единствен пример во светот и би било преседан во една суверена унитарна држава, некој да помисли да воведе такво нешто.

„Единствени сме и ќе се заложиме на сите нивоа, ваквите предлози да не поминат на законодавно ниво“, порачуваат градоначалниците.


Жбогар и Тимоние денеска ќе го промовираат „ЕУ за тебе“ во Берово


Берово, 16 февруари, 2017 - 9:55 (META) 

Евроамбасадорот Самуел Жбогар и францускиот амбасадор Кристијан Тимоние денеска, во рамките на кампањата „ЕУ за тебе“ ќе ја посетат општина Берово и ќе се сретнат со градоначалникот Драги Наџински.

Според програмата на ЕУ, во Берово ќе е инвестираат повеќе од три милиони евра за реконструкција и изградба на канализациската мрежа.

Кампањата „ЕУ за тебе“ почна на 27 јануари во Кичево, а нејзината цел е да ги информира граѓаните за помошта што ЕУ и ја нуди на земјава.


Се заканувала зашто внукот ѝ го преместиле во друго одделение


Штип, 27 јануари, 2017 - 15:31 (META) 

Откако дознала дека наставничкиот совет во училиштето решил нејзиниот внук да го премести од едно во друго одделение, 51-годишна штипјанка се јавувала во училиштето и се заканувала на раководството, соопшти СВР Штип.

За заканите упатени во вторникот, беровската полиција поднела кривична пријава против Д.Б., која ја товари за загрозување на сигурноста.


Градоначалникот на Берово ја нарече Такева „новинарска проститутка“


Берово, 11 јануари, 2017 - 16:40 (META) 

Новинарката од Делчево, дописничка на повеќе медиуми, Даниела Такева, доживеа крајно невкусна дискредитација од градоначалникот на Берово, Драги Наџински, кој на „Фејсбук“ ја нарече „новинарска проститутка“.

Такева, пишувајќи репортажа за дрвото секвоја, што во Македонија расте единствено во Малешевијата, згрешила во редот на буквите и напишала „севкоја“.

„Оваа e неписмена. Не знам каква награда добила, но знам кој ѝ ја доделил. Таа е новинарска проститутка, ништо повеќе. Сега знам, за овој мој коментар ќе напише нешто лошо за мене или за Берово, но се навикнавме, не е страшно, ја прочита народот“, пишува на својот профил градоначалникот Наџински.

Такева, инаку, е овластен лектор, магистер по македонистика и комуникологија и веројатно направила печатна грешка, која подоцна ја поправила. Како еден од ретките дописници од овој крај на Македонија, често излегува со критички текстови за работата на општините. Меѓу нив, и за Општината Берово.

Такева денеска, крајно вознемирена, не сакаше да коментира, само рече дека нема да му остане должна на Наџински по бројните јавни навреди и дискредитација. Но, по оваа навреда, која ја оцени како „дно“, ќе бара судска разврска.

Колегите новинари од регионалниот разгранок на Здружението на новинари на Македонија (ЗНМ), давајќи поддршка на Такева, велат дека новинарите од малите средини, кога ќе паднат во немилост на локалните моќници, кои неретко се однесуваат како шерифи, трпат секакви притисоци. Почнувајќи од јавни дискредитации, закани, па сè до потези кои значат останување без егзистенција.


Апели на социјалните мрежи: Парите за Цеца, Северина и Чолиќ да се дадат на поплавените


Штип, 16 август, 2016 - 18:34 (META) 

Парите за Цеца, Северина и Здравко Чолиќ, кои треба да дојдат во Берово, Македонски Каменица и Штип, да се пренаменат за граѓаните од поплавените подрачја. Тоа ќе ја потврди општествената одговорност на општините, кои се организатори на манифестации, каде ќе настапат овие регионални ѕвезди. Ова се дел од ставовите и иницијативите, кои интензивно се вртат по социјалните мрежи.

Општината Штип денеска на прес-конференција најави дека главна ѕвезда на „Штипската пастрмалијада“ ќе биде Здравко Чолиќ. Медиумите веќе објавија дека Здравко во Штип ќе пее за 80.000 евра, меѓутоа од општината не потврдија. Тоа било информација за спонзорот, „Скопска пивара“, која ја носи ѕвездата во Штип. Во замена, овој спонзор добива ексклузивен простор со три големи штанда, веднаш до бината. Општината, сепак соопшти дека ќе издвои 1,2 милиони денари од својот буџет за целата манифестација на која ќе настапат уште петнаесетина други имиња.

На 27-ми август во Берово ќе пее хрватската ѕвезда Северина. Традиционално, ѕвездата на градскиот празник Света Богородица ја носи сопственикот на „Зегин“, Благој Механџиски, кој потекнува од овој крај. Никој не ја соопштува сумата за Северина.

Ден подоцна, во Македонска Каменица, на Денот на рударите, доаѓа турбофолк пејачката Светлана Ражнатовиќ – Цеца. Токму за Цеца се најголемите реакции, со барање „ако пејачката има совест, да го откаже настапот и да бара од општината парите да ги пренамени за поплавените“, се реакциите од социјалните мрежи.

Градоначалникот Дарко Митевски вели дека ова се пишувања од под клима и бара тие автори да излезат на терен во Стајковци и да помогнат, наместо да седат на Фејсбук.

– Општината веќе донираше 40.000 литри на вода, секојдневно се по 20 работници на терен и целата општинска механизација е ангажирана во поплавените подрачја. Ова се единствените три дена во годината, кога граѓаните на Македонска Каменица се домаќини на овој тип на забава и не сакаме тоа да им го скратиме поради повици од социјалните мрежи – рече Митевски.

Парите за главната ѕвезда ги обезбедува рудникот „Саса“. Во трите дена, колку ќе трае одбележувањето на Денот на рударите, Македонска Каменица очекува околу 40.000 гости.


Берово: Пронашол пиштол и куршуми додека собирал печурки


Берово, 31 јули, 2016 - 12:35 (META) 

Четириесет и четиригодишниот беровец Т.Б. на шумскиот пат кај местото Гајски преслап, во атарот на Берово, вчера околу 10.30 часот, додека собирал печурки, пронашол пиштол калибар 7,62 милиметри и една рамка со три куршуми.

МВР денеска соопшти дека се преземаат мерки за расчистување на случајот.


Ребаланс на буџетот ќе го реши штрајкот на беровските комуналци


Берово, 5 април, 2016 - 16:39 (META) 

Преку ребаланс на општинскиот буџет, ќе се решаваат долговите на Јавното комунално претпријатие „Услуга“ од Берово, чии работници веќе четврти ден штрајкуваат, барајќи ги неисплатените четири плати.

Ова е одлуката на синоќешната вонредна седница на Советот на Општина Берово. Зголемување на цените на водата и на другите комунални услуги, исто така, според претседателот на Советот, Јован Матеничарски, е едно од можните решенија.

– Предлог на советничката група на ВМРО-ДПМНЕ беше да се разгледаат одлуките на управниот одбор на јавното претпријатие од 2013 година за зголемување на цената на водата и на другите комунални услуги – изјави Матеничарски.

Попладнево заседава управниот одбор на комуналното претпијатие, чии заклучоци ќе бидат доставени до Советот. Уште во 2013 година одборот предложил цената на кубик вода да се зголеми за седум денари.

Работниците кои штрајкуваат бараат исплата на платите и обезбедување на основните услови за работа. Претпријатието има загуба од 3,5 милиони денари, што, според СДСМ, се должи на превработеноста и на максималниот број од 84 вработени за едно мало комунално претпријатие.

На синоќешната вонредна седница на беровскиот Совет имаше инцидент, бидејќи на новинарот на веб-порталот „Малеш нет“, Јане Мамутчевски, не му било дозволено следење на седницата, иако, според статутот, седниците се јавни.

– На влезот бев сопрен од општинското обезбедување, кое ми побара акредитација. Им реков дека седниците се јавни и може секој да присутвува. Сепак, ја извадив акредитацијата и тогаш од обезбедувањето ми рекоа да почекам за да се јават кај градоначлникот Драги Наџински. Градоначалникот кажа дека мене ми е забрането да присутвувам во оваа зграда – рече Мамутчевски.

Новинарот бил поканет од претседателот на Советот, Матеничарски, кој потврди дека бил добредојден да ја следи седницата.

– На влезот го забележав Јане и реагирав да биде пуштен, бидејќи седниците се јавни. Влегов внатре и не ја почнав седницата сè додека не испратив луѓе од општинската администрација да го повикаат да влезе. Додека влегував, слушнав од обезбедувањето дека градоначалникот наредил за Јане седницата да е затворена – изјави Матеничарски.

Новинарот Мамутчевски сведочи оти му било пренесено дека може да ја следи седницата, но без новинарската опрема, како обичен граѓанин, а тој го одбил тоа и си заминал.

Ова, според новинарот на „Малеш нет“, не е единствениот конфликт што го имал со локалната власт откако јавно ја критикувал работата на Општината и на јавното претпиријатие. Неодамна била нападната веб-страницата, а му бил хакиран и фејсбук-профилот.

– Пред некој ден, кога ја објавив веста за штрајкот во јавното претпријатие и дека Берово се задушува во смет, дури ми беа избришани текстовите од веб-страницата. Запрепастен сум од цензурата на локалната власт кон мене и гласилото во кое работам – изјави Мамутчевски, кој за ова ги информирал и институциите.

Регионалниот центар на новинари „Исток“ во состав на ЗНМ, побара јавно извинување од градоначалникот кон новинарот Мамучевски, а во спротивно, оттаму велат дека новинарите членови на ЗНМ нема да ги следат неговите активности и да известуваат од нив, што ќе биде на штета на граѓаните на општина Берово.


Спасовски: Фер и демократски избори се единствен излез од кризата


Берово, 21 февруари, 2016 - 14:47 (META) 

Голем е интересот да има фер и демократски избори што ќе се одржат во атмосфера во која ќе се елиминираат сите досегашни притисоци што ги има и граѓаните ќе можат да носат одлука самостојно, во согласност со сопственото убедување, рече министерот за внатрешни работи и генерален секретар на СДСМ, Оливер Спасовски, при денешната посета на Берово.

Според Спасовски, единственото решение за излез од политичката криза е одржување на фер и демократски изборен процес.

– Затоа сметам дека ВМРО-ДПМНЕ нема веќе легитимитет да се крие зад народот. ВМРО-ДПМНЕ мора да се соочи со реалноста, мора да сфати дека Македонија ќе ја реши политичката криза само ако имаме фер и демократски изборен процес и од тоа отстапување нема. Нема отстапување заради граѓаните на Република Македонија и заради нејзината иднина – изјави Спасовски.