!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Гориватa на полноќ ќе поевтинат за два денари


Скопје, 20 март, 2017 - 15:44 (META) 

Бензинот и дизел-горивата од полноќ ќе поевтинат за два денари по литар, одлучи денеска Регулаторната комисија за енергетика.

Еден литар „еуросупер БС-95“ ќе се продава за 65 денари, а „еуросупер БС-98“ за 67 денари.

Дизелот ќе чини 52 денари за еден литар, а eкстралесното масло за домаќинство ќе се продава по цена од 40,5 денари за еден литар.

Новите цени се резултат на пониските цени на горивата на светските пазари во изминатите две недели.


Дизелот поевтинува за половина денар, цената на бензинот останува иста


Скопје, 20 февруари, 2017 - 13:25 (META) 

Малопродажните цени на дизел-горивата од ноќеска на полноќ се намалуваат за половина денар по литар, а цената на бензот останува иста, одлучи денеска Регулаторната комисија за енергетика (РКЕ).

Цените на „еуросупер БС-95“ и на „еуросупер БС-98“ не се менуваат, односно остануваат 66,5 и 68,5 денари за еден литар.

Како причина за намалување на малопродажните цени на нафтените деривати од РКЕ ја посочуваат за 1,36 отсто пониската просечна цена на суровата нафта на светскиот пазар во изминатите 14 дена.


Авганистанец се запали во супермаркет во Германија


Минхен, 2 јануари, 2017 - 13:56 (META) 

Млад Авганистанец кој во Германија поднел барање за азил, доби тешки рани откако се запали во магацин во супермаркет во Баварија.

Полицијата соопшти дека 19-годишен Авганистанец се полил со бензин и се запалил рано утринава во Гајмершајм, град помеѓу Нирнберг и Минхен.

Бензинот го купил на бензинска пума малку пред да се запали. Луѓето што биле во близина го изгаснале пожарот, но младиот Авганистанец добил тешки телесни повреди.

Полицијата соопшти дека тој со себе носел и нож, но дека не го употребил.


Дизел-горивата поевтинуваат за денар по литар


Скопје, 25 јули, 2016 - 13:05 (META) 

Цените на дизел-горивата од ноќеска на полноќ се намалуваат за еден денар по литар, а цената на бензините останува иста, одлучи денеска Регулаторната комисија за енергетика (РКЕ).

Со одлуката се врши намалување на рафинериските и на малопродажните цени на нафтените деривати во просек за 1,96, односно за 1,2 отсто.

Малопродажните цени на „еуросупер-95“ и на „еуросупер БС-98“ не се менуваат, односно остануваат 61 и 63 денари за еден литар. Новата цена на „еуродизел“ ќе изнесува 48 денари, а на екстралесното масло за домаќинство (ЕЛ-1) 36,5 денари за еден литар.

Како причина за промената на цената на нафтените деривати од РКЕ ги посочуваат за 2,6 отсто пониската просечна цена на суровата нафта на светскиот пазар во изминатите 14 дена и за 0,42 отсто повисокиот курс на денарот во однос на доларот.


Поскапуваат бензинот и дизел-горивото


Скопје, 3 мај, 2016 - 13:46 (META) 

Бензинот од ноќеска на полноќ поскапува за половина денар, а дизел-горивото за три денари по литар, одлучи денеска Регулаторната комисија за енергетика.

Новата малопродажната цена на „еуросупер БС-95“ ќе изнесува 62,50 денари за еден литар.

Малопродажната цена на „еуросупер БС-98“ се зголемува за еден денар за еден литар и со тоа ќе чини 64,50 денари, а дизел-горивото ќе чини 47 денари.


Поевтинуваат горивата


Скопје, 28 декември, 2015 - 13:30 (META) 

Бензинот поевтинува за еден денар, а дизел-горивото за три денари, одлучи денеска Регулаторната комисија за енергетика.

Еден литар „еуросупер БС-95“ ќе се продава за 61,50 денари, а „еуросупер БС-98“ за 63,50 денари.

Новата цена на „еуродизел“ ќе изнесува 43,50 денари за еден литар, а екстралесното масло за домаќинство ќе чини 32 денари за еден литар.


Компанијата „Лукоил“ ги напушта балтичките земји поради анти-руско расположение


Москва, 25 декември, 2015 - 19:40 (META) 

Руската нафтена компанија „Лукоил“ соопшти дека ќе го продаде останатиот имот во Литванија и во Летонија, поради, како што се наведува во соопштението, анти-руско расположение во тие земји.

Извршниот директор на „Лукоил“, Вагит Алекперов, за телевизијата „Русија 24“ изјави дека компанијата не планира ширење на мрежата бензиски пумпи во Европа, туку ќе се фокусира на истражување и на производство на нафта.

Во јуни годинава, „Лукоил“ ја продаде својата естонска филијала „Лукоил ести“ на компанијата „Олерекс“, а минатата година ги продаде бензинските пумпи во Чешка, Словачка, Унгарија и во Украина. Како резултат на продажба на имотот, компанијата лани доби 1,86 милијарди долари.

Според процените на „Форбс“, „Лукоил“ е најголема приватна компанија во Русија, а кон средината на 2000 година, била најголем производител на нафта во таа земја.


Цените на горивата остануваат исти


Скопје, 5 октомври, 2015 - 15:33 (META) 

Цената на бензините и на дизелот останува иста, одлучи Регулаторната комисија за енергетика.

Цената на „еуросупер БС-95“ изнесува 62,50 денари за еден литар, на „еуросупер БС-98“ е 64,50 денари за еден литар, на „еуродизел ДЕ5“ изнесува 50 денари за литар и цената на екстралесното масло за домаќинство изнесува 38,50 денари за еден литар.


Кризата со гасот може да биде поголема од кризата со бензини


Скопје, 17 август, 2015 - 13:09 (META) 

Блокираната сметка на „Макпетрол“, повеќе може да предизвика криза во однос на испораката на гас, отколку на бензини, сметаат експертите за енергетика кои ги контактираше „Мета“.

Според Атанаско Тунески, професор на Машинскиот факултет и поранешен директор на МЕПСО, доколку се случи криза со бензините, таа ќе ја решат другите помали приватници кои ќе надоместат со зголемен увоз. Тој не очекува дека ваквата криза може да потрае, туку дека ќе се реши брзо.

– Проблемот со бензинот и дериватите, не очекувам да биде толку голем. Другите помали увозници ќе го покријат недостатокот на бензин, па можеби ќе се случи мала криза. За малите потрошувачи, не значи многу на која бензинска пумпа ќе стават гориво – вели Тунески.

Според информациите од компанијата, во моментов на бензиските станици на „Макпетрол“, кои сочинуваат 60 проценти од пазарот во земјава, има залихи на нафтени деривати доволни само за наредните пет дена.

Заради блокираната сметка, „Окта“ денеска прекина со испорака на гориво на „Макпетрол“.

Состојбата со снабдување со гас, според Тунески е уште поголем проблем, бидејќи без овој енергенс ќе останат голем број на институции и компании.

– Состојбата со испораката на гасот е поголем проблем, бидејќи ќе се оневозможи снабдување на институциите и компаниите со гас. Блокираната сметка ќе оневозможи плаќање на гасот спрема „Газпром“ што би ја довело во прашање испораката – додава нашиот соговорник.

Тунески не гледа зошто е блокирана сметката на „Макпетрол“, кога во случајот спорен е „Оилко“.

– Можеби подобро решение ќе беше да се оневозможи само трансферот на пари од „Макпетрол“ кон „Оилко“, или пак да се види дали парите се во „Оилко“. Не гледам зошто е блокирана сметката на „Макпетрол“, кога во случајот, „Оилко“ е спорен. Исто така, физичките лица се гонат кривично, но тие се уште се невини, се додека не се докаже спротивното – додава тој.

Константин Димитров, професор на Машинскиот факултет, вели дека не е многу упатен во случајот со „Макпетрол“, но како што вели, негово лаичко размислување е дека „состојбата со бензините ќе ја решат другите увозници, а со гасот државата или пак други трговци поединци кои имаат пари да вложат.“

Со решение на судија за предистражна постапка донесено во петокот на 14 август, замрзнати се сметките во деловните банки на „Макпетрол“ АД Скопје и „Оилко“, како и целиот движен и недвижен имот. Мерките од решението ќе важат до завршување на постапката.

Од компанијата предупредија дека училишта, болници, аеродроми, енергетски капацитети ќе останат без неопходните енергенси, доколку ваквата состојба потрае.

Телевизија „Телма“, чијшто сопственик е „Макпетрол“, објави дека блокираната сметка ќе доведе до прекин во снабдувањето со природен гас на почетокот на септември, бидејќи договорот на компанија со „Газпром“ предвидува авансно месечно плаќање на планираните количини од овој енергенс.

Природниот гас го користат десетици големи компании, Клиничкиот центар, Министерството за одбрана, Градската општа болница „8 ми септември“, четири чилишта во Скопје, дистрибутерот „Куманово гас“, како и сите фабрики во слободната економска зона „Бунарџик“.

Покрај ова, наведува „Телма“, за една недела без млазно гориво ќе останат аеродромите во Скопје и во Охрид, со оглед на тоа што „Макпетрол“ е единствен снабдувач со керозин во Македонија.

Исто така, нема да може да се реализира договорот меѓу „Макпетрол“ и ЕЛЕМ за испорака на околу 50.000 тони мазут за потребите на РЕК„ Битола“ и ТЕЦ „Осломеј“.

 


Грците по златници и по бензин во Битола


Битола, 6 јули, 2015 - 15:33 (META) 

Грците купуваат златници во Македонија за да не им пропаднат заштедите во евра, тврдат во битолската чаршија.

– Кризата ги натера Грците, заштедите во евра да ги преточат во златници. Кај нас златото е поевтино, па бараат златници по нашите златарници или купуваат големи парчиња златен накит. Половина златник кај нас чини околу 10.000 денари – вели наш соговорник, дуќанџија во Старата битолска чаршија.

Според него, по злато Грците почнале да одат и во Прилеп, Кичево и во Дебар.

Грците доаѓаат и по поевтин бензин и по цигари во Битола. Продавач на бензин во една од бензинските пумпи лоцирани накај граничниот премин Меџитлија, тврди дека Грците од северот на земјата доаѓаат само до бензинските пумпи и веднаш се враќаат назад.

-Ние не чувствуваме некоја разлика од порано пред грчката криза. Автомобили со грчки регистарски таблички доаѓаат, точат бензин и купуваат цигари – вели нашиот соговорник.

Наспроти ваквата слика, Грците сè поретко може да сретнат на зелениот пазар во Битола и по бутиците за облека и за чевли.

Со стравувања дека преку граница не можат да изнесат зеленчук, овошје и храна од Македонија, битолските дуќанџии велат дека прометот им е паднат на половина. Според нив, грчката криза удира и по нашата економија во пограничниот регион.

– Од Грците го вадевме ќарот, ама сега ги нема, не трошат ниту евро. Ако поминат на пазар, ги молам да земат грав и ориз, ама не купуваат, велат дека на граница им ги фрлаат најлоните со храна. Затоа велам дека нивната криза е и наша криза – вели продавачка на зелениот пазар во Битола.