Дачиќ: Србија нема да го признае Косово поради „европскиот морков“


Белград, 26 октомври, 2018 - 16:43 (META) 

Реагирајќи на изјавата на германскиот пратеник Петер Бајер дека „Србија не може да биде дел од ЕУ додека не ја признае ,де јуре‘ независноста на Косово“, српскиот министер за надворешни работи Ивица Дачиќ денеска порача дека „Србија нема да ги згази својот Устав и образ признавајќи ја лажната држава Косово поради некаков европски морков“.

– Изјавата на германскиот пратеник секако треба да се сфати сериозно бидејќи тој е функционер на ЦДУ, партијата на германската канцеларка Ангела Меркел, но зошто тогаш треба дијалог во Брисел, зошто треба исцрпувачки и многу фрустрирачки процес, ако однапред се знае крајот – вели Дачиќ.

Тој во изјавата за весникот „Вечерње новости“ потенцира дека дипломатска битка за Косово допрва претстои и дека сигналите од некои клучни западни држави, а пред се САД „кои досега цврсто стоеја на позицијата дека за нив независноста на Косово е завршена работа“ на Србија и даваат право да се бори „почитувајќи ја реалноста на терен и темелите на меѓународното право“.


Лажни вести за мигрантите потпалуваат омраза во Србија


Белград, 24 октомври, 2018 - 9:47 (META) 

Комесаријатот за бегалци и миграции на Србија предупреди вчера дека на социјалните мрежи се шири лажна вест за наводен напад од група мигранти врз 17-годишна девојка во центарот на Белград.

„Ова не е прв случај на ширење на лажни вести на социјалните мрежи за мигрантите во Србија. Социјалните мрежи се користат како место за непопречено излевање омраза и ксенофобија кон овие луѓе, а главното оружје се токму лажните вести – од тоа дека на мигрантите им се делат пари, по 10 евра дневно на рака, до тоа дека се потпишуваат договори за нивно трајно населување во Србија“, соопшти српскиот комесаријат.

Српското Министерство за внатрешни работи завчера ја демантираше информацијата објавена на социјалните мрежи, дека група мигранти во центарот на Белград, пред очите на бројни минувачи, силувале 17 годишна девојка, и наведе дека на подрачјето на Белград не е евидентиран таков случај.

Министерството нагласи и дека полицијата, по налог на Вишото јавно обвинителство за високотехнолошки криминал, ќе изврши службени разговори со лицата што овие тврдења ги објавиле на социјалните мрежи.


Белград без официјален став за одлуката на македонскиот парламент


Белград, 22 октомври, 2018 - 10:34 (META) 

Официјален Белград сè уште не се изјаснил за одлуката што македонското Собрание ја донесе во петокот, да го почне процесот за уставни измени, според Договорот со Грција. На политичката сцена во Србија имаше реакции само од две помали опозициски партии, кои излегоа со спротивставени ставови.

Либерално-демократската партија (ЛДП) на Чедомир Јовановиќ оцени дека Македонија покажала политичка храброст и дека Србија треба да учи од нејзиниот паример, додека Демократската партија на Србија (ДСС) соопшти дека одлуката на Собранието „е во спротивност на волјата на огромно мнозинство граѓани изразена на референдум“ и дека претставува предупредување оти „европскиот пат за некои држави е пат во неслобода, неправда и нееднаквост“.

Медиумите во Србија за одлуката на Собранието известуваа главно на основа на агенциските вести и на пишувањата на македонските медиуми. Оние најблиски до српската власт го истакнуваа реагирањето на претседателот на ВМРО-ДПМНЕ, Христијан Мицкоски дека петок, 19 октомври, „е најлошиот ден во историјата на Македонија“ и дека „одлуката е донесена под притисок, за што е одговорен премиерот Зоран Заев“. Пишуваа и дека „Запад ја турка Македонија во ЕУ и НАТО спротивно на волјата на граѓаните и и го украле името, а опозициските пратеници добиле милион валкани пари за да ја издадат земјата“.

Наспроти ваквите пишувања на српските медиуми, голем дел од пратениците од ВМРО-ДПМНЕ, рекоа дека гласале по своја слободна волја и не им бил нуден поткуп.

Само мал број медиуми во Србија вчера ја пренесоа веста дека поради заканите, некои македонски пратеници поради закани се под полициска заштита.


Вучиќ: Спогодба со Приштина мора да се постигне кога-тогаш


Белград, 13 септември, 2018 - 16:35 (META) 

Претседателот на Србија, Александар Вучиќ, денеска порача дека дијалогот со Приштина ќе биде продолжен но и дека се мали шансите да се сретне со претседателот на Косово, Хашим Тачи, во Њујорк, во текот на Генералното собрание (ГС) на Обединетите Нации (ОК), како што денеска најави приштинска „Коха диторе“.

– Уште не сум сосема сигурен, но веројатно во Њујорк ќе оди премиерката Ана Брнабиќ, а не јас, бидејќи, просто сакам да бидам повеќе во земјава – рече Вучиќ одговарајќи на новинарски прашања по посетата на болницата во Земун.

Тој порача дека Белград ќе ги продолжи разговорите со Приштина и дека спогодба кога-тогаш мора да се постигне, бидејќи „без долгорочно градење мир нема да бидеме во ситуација да продолжиме со олку успешни економски резултати.

Последната рунда на дијалогот меѓу Белград и Приштина на највисоко ниво беше закажана за 7 септември во Брисел, но Вучиќ и Тачи не се сретнаа, поради најавите од Приштина дека во рамките на претстоечката посета на српските средини на Косово на српскиот претседател нема да му се дозволи посета на хидроакумулацијата и браната „Газиводе“. Тогаш високата претставничка на ЕУ, Федерика Могеринни, порача дека повторно ќе ги повика двајцата претседатели на средба во Брисел пред последната седмица на септември.

Вучиќ денеска на новинарите им изјави дека „многумина во регионот не сакаат стабилност и мир, туку продолжување на постојаниот политички суди на Србите и Албанците“.

– Тие би сакале Србите и Албанците никогаш да не се договорат и сите да напредуваат, а Србите и Албанците не. На некои не им е мило што Србија, која што заостануваше, има најбрзо растечка економија, што го намалува долгот и невработеноста и привлекува инвестиции. Затоа им е потребна Србија која би војувала. И затоа смислуваат дека сум рекол нешто за што на сите им е јасно дека не била таа смислата – рече Вучиќ.

Српскиот претседател денеска негираше дека во говорот во Косовска Митровица минатиот викенд пофално зборувал за поранешниот претседател на Србија, Слободан Милошевиќ, порачувајќи дека било спротивното и дека поставил „во суштинска смисла, линија на дисконтинуитет со политиката на Милошевиќ, но без лична омраза и презир.

– Да, имаше ретка харизма, можеше да собере најмногу луѓе и гласови, но резултатите за Србија и за народот беа лоши – додаде Вучиќ.


Успешен референдум ќе значи мир и за Косово, вели Тачи


Скопје, 12 септември, 2018 - 12:22 (META) 

Претседателот на Косово, Хашим Тачи по средбата со премиерот Зоран Заев ги повика граѓаните на Македонија да гласаат „за“ на референдумот и додаде дека успешен референдум ќе значи мир и за Косово.

-Иднината на Косово и Македонија е да се стремат кон ЕУ и НАТО. Косово дава поддршка да се движите напред кон НАТО за европска иднина. Ги повикувам граѓаните да учествуваат на референдумот и да гласаат за Македонија во НАТО. Овој е историски момент, кој треба да се искористи – рече Тачи.

Косовскиот претседател се осврна и на односите помеѓу Белград и Приштина, посочувајќи дека нема да биде лесен процесот да се донесе конечна историска одлука и да се затворат прашањата на Косово и Србија, но затоа тука е дијалогот.

– Вие ја завршивте спогодбата со Грција, сега следува Косово и Србија да го завршат дијалогот. Знаете дека ова нема да биде лесен процес да се донесе конечна историска одлука да се затворат прашањата на Косово и Србија, но затоа тука е дијалогот. Ние имаме многу бариери, но јас сум оптимист, бидејќи подобро сега да се постигне договор отколку по три децении. Јас ќе направам огромни напори за да се постигне договор со Србија што значи реципрочно признавање – додава Тачи, кој вели дека го осигурил Заев дека евентуалната спогодба меѓу Косово и Србија нема да биде со минирање на соседните земји.

Премиерот Зоран Заев најави интензивирање на економската соработка преку воспоставување на мешовит комитет, како и градење на стратегии за интеракција меѓу бизнис заедниците со Косово.

Тој изрази уверување дека новиот граничен премин и инфраструктурната поврзаност со патот Блаце – Скопје ќе има позитивно влијание врз обемот на трговијата.

– Косовскиот лигнит за македонските компании е од особено значење. Ние пак ќе ја поддржиме изградбата на гасовод кон Косово – рече Заев кој најави дека сите овие прашања ќе бидат разгледувани и на заедничка владина седница која треба да се одржи наскоро.

Тој додаде дека Македонија го поддржува позитивното решение за Косово кое ќе ја подобри благосостојбата во регионот и за сите засегнати страни.

-Македонија го поздравува дијалогот меѓу Приштина и Белград, кој го сметаме за клучен за стабилноста. Тоа ќе биде решение за зајакнување на мирот во Србија и Косово – додаде Заев.


Затворен белградскиот аеродром поради инцидент со египетски авион


Белград, 12 септември, 2018 - 10:26 (META) 

Аеродромот „Никола Тесла” во Белград е привремено затворен за полетување и слетување поради инцидент на авион на египетскиот авиопревозник „Иџипт Ер“. Воздушниот сообраќај се пренасочува на соседните аеродроми, а не се знае кога најголемиот аеродром во Србија ќе биде повторно во функција.

На авионот Боинг 737-800 додека слетувал празен му се блокирале тркалата, по што се запалиле пневматиците и останатл на пистата.


Путин доаѓа во Србија во октомври или ноември?


Белград, 4 септември, 2018 - 15:21 (META) 

Претседателот на Русија, Владимир Путин, ќе ја посети Србија во октомври или ноември оваа година, рече денеска рускиот амбасадор во Белград Александар Чепурин.

– Претседателот Путин го очекуваме овде во Србија во октомври или во ноември – рече Чепурин за време на обиколката на градилиштето на железничкиот тунел Чортановци кој е дел од идната брза пруга Белград – Будимпешта, а се финансира со руски кредит за модернизација на железницата.

Од Москва претходно беше соопштено дека Путин ја прифатил поканата да ја посети Србија, но не беше соопштен датумот. Српските медиуми како можни датуми го спомнуваат 1 ноeмври – кога се навршуваат 100 години од ослободувањето на Белград во Првата светска војна, или 11 ноември – Денот на примирјето во Првата светска војна.

Путин во Белград беше во 2014 година кога присуствуваше на воената парада по повод 70 години од ослободувањето на градот во Втората светска војна.


Двајца мртви, во центарот на Белград се сруши ѕид при изградба


Белград, 29 август, 2018 - 11:14 (META) 

На градилиште кое се наоѓа меѓу Сараевската улица и улицата Кнез Милош во самиот центар на Белград се сруши ѕид и затрупа најмалку две лица.

Се срушил ѕид од зграда која се прави на местото на некогашната амбасада на САД.

Според неофицијалните информации во оваа несреќа има дека има уште затрупани.

Операцијата за спасување е во тек.


Адвокатите во Србија една недела во штрајк поради убиството на нивни колега


Белград, 30 јули, 2018 - 11:13 (META) 

Адвокатите во Србија денеска почнаа еднонеделен целосен прекин на работата, поради убиството на нивниот колега Драгослав Миша Огњановиќ во саботата, соопшти Адвокатската комора на Србија. Во соопштението се напоменува дека станува збор за целосен прекин на работата, што значи дека адвокатите нема да примаат ниту итни притворски предмети.
Педесет и седумгодишниот Огњановиќ беше застрелан пред влезот на зградата во која живееше во Нов Белград. При нападот е ранет и неговиот 26-годишен син. Во текот на својата кариера Огњановиќ им беше адвокат на водачот на „Земунскиот клан“, Лука Бојовиќ, на поранешниот српски претседател Слободан Милошевиќ пред Хашкиот трибунал, како и на неговата сопруга Мира Марковиќ.


Коѕиас по средбата со Дачиќ: Направен е чекор напред во преговорите на Грција и Македонија


Белград, 11 април, 2018 - 14:14 (META) 

Грчкиот министер за надворешни работи Никос Коѕиас по денешната средба со неговиот српски колега Ивица Дачиќ во Белград изјави дека во преговорите на Грција и Македонија за спорот за името е направен чекор напред, како и дека клучот за решавање на проблемот се „реализмот, прагматизмот и сфаќањето дека треба да се направат компромиси“, пренесуваат српските медиуми.

– Треба да направиме компромиси, но не „гнили“ компромиси, туку такви од коишто ќе добијат двете страни. Компромис значи дека обете страни треба да сфатат дека не може да добијат сè, но дека треба да имаат придобивка – рече шефот на грчката дипломатија.

Коѕиас додава оти се надева дека двете страни во преговорите ќе го сфатат тоа и оти ќе има позитивни резултати.

Српскиот министер за надворешни работи, пак, рече дека најделотворно и најкорисно би било тие разговори да се водат директно и да се мисли на заедничкиот интерес во целиот регион. Дачиќ истакна дека Србија има разбирање за ставот на Грција и го повтори својот повеќепати изнсен став дека било грешка тоа што поранешна Сојузна Република Југославија ја признала Македонија под нејзиното уставно име, нагласувајќи дека тоа било „непромислен и погрешен чекор“.

– Однесувањето на Скопје кон Србија и српскиот национален и државен интерес не беше адекватно. Тие признаа еднострани акти – рече тој, мислејќи на признавањето на Косово од страна на Република Македонија.

Според Дачиќ, Србија сака прашањето за името да се реши, но дека не може многу да помогне, освен да понуди двете страни понекогаш да се состануваат во Србија.