Адвокатите во Србија една недела во штрајк поради убиството на нивни колега


Белград, 30 јули, 2018 - 11:13 (META) 

Адвокатите во Србија денеска почнаа еднонеделен целосен прекин на работата, поради убиството на нивниот колега Драгослав Миша Огњановиќ во саботата, соопшти Адвокатската комора на Србија. Во соопштението се напоменува дека станува збор за целосен прекин на работата, што значи дека адвокатите нема да примаат ниту итни притворски предмети.
Педесет и седумгодишниот Огњановиќ беше застрелан пред влезот на зградата во која живееше во Нов Белград. При нападот е ранет и неговиот 26-годишен син. Во текот на својата кариера Огњановиќ им беше адвокат на водачот на „Земунскиот клан“, Лука Бојовиќ, на поранешниот српски претседател Слободан Милошевиќ пред Хашкиот трибунал, како и на неговата сопруга Мира Марковиќ.


Коѕиас по средбата со Дачиќ: Направен е чекор напред во преговорите на Грција и Македонија


Белград, 11 април, 2018 - 14:14 (META) 

Грчкиот министер за надворешни работи Никос Коѕиас по денешната средба со неговиот српски колега Ивица Дачиќ во Белград изјави дека во преговорите на Грција и Македонија за спорот за името е направен чекор напред, како и дека клучот за решавање на проблемот се „реализмот, прагматизмот и сфаќањето дека треба да се направат компромиси“, пренесуваат српските медиуми.

– Треба да направиме компромиси, но не „гнили“ компромиси, туку такви од коишто ќе добијат двете страни. Компромис значи дека обете страни треба да сфатат дека не може да добијат сè, но дека треба да имаат придобивка – рече шефот на грчката дипломатија.

Коѕиас додава оти се надева дека двете страни во преговорите ќе го сфатат тоа и оти ќе има позитивни резултати.

Српскиот министер за надворешни работи, пак, рече дека најделотворно и најкорисно би било тие разговори да се водат директно и да се мисли на заедничкиот интерес во целиот регион. Дачиќ истакна дека Србија има разбирање за ставот на Грција и го повтори својот повеќепати изнсен став дека било грешка тоа што поранешна Сојузна Република Југославија ја признала Македонија под нејзиното уставно име, нагласувајќи дека тоа било „непромислен и погрешен чекор“.

– Однесувањето на Скопје кон Србија и српскиот национален и државен интерес не беше адекватно. Тие признаа еднострани акти – рече тој, мислејќи на признавањето на Косово од страна на Република Македонија.

Според Дачиќ, Србија сака прашањето за името да се реши, но дека не може многу да помогне, освен да понуди двете страни понекогаш да се состануваат во Србија.


Во Белград програмер убил колега, ранил двајца, па се разнел со бомба


Скопје, 12 март, 2018 - 17:03 (META) 

Младиот програмер Небојша С. (30) денеска во Белград убил свој поранешен колега и ранил двајца, по што се разнел со бомба, јавија српските медиуми.

Убиецот пред неколку дена добил отказ во софтверската фирма „Стопански советник за информациски технологии“, а денеска се вратил таму, прво ја поздравил колешката и ладнокрвно се качил на катот. Потоа влегол во една канцеларија каде имало состанок, па директно во глава застрелал еден колега, продолжил да пука, при што ранил уште еден маж, а еден од вработените за да се спаси скокнал од прозорец од висина од седум метри, при што задобил тешки повреди. Кога ги слушнале истрелите, другите вработени се заклучиле во своите канцеларии.

Потоа убиецот се вратил во својот стан, кој е блиску до фирмата чие седиште е на улицата Рузвелтова, па се обидел да се самоубие со рачна бомба која ја активирал. Полицијата го пронашла и тој бил пренесен на ургентен центар за реанимација. Во експлозијата е направена штета на неговиот стан.


За четири дена двајца починати од мали сипаници во Србија


Белград, 6 март, 2018 - 11:05 (META) 

Четириесетгодишно лице, чиј пол не е соопштен, починало од компликации предизвикани од морбили, односно мали сипаници, и со тоа стана осма жртва на епидемијата на мали сипаници во Србија.

Лицето било од Белград, а починало на Клиниката за инфективни и тропски болести во Белград, соопшти Институтот за јавно здравје на Србија „Др. Милан Јовановиќ – Батут“. Претходниот смртен случај беше во петокот, кога почина здравствена работничка од Институтот за ревматологија во Белград.

Од почетокот на октомври минатата година заклучно со вчера на територијата на Србија, како и на делот на Косово што гравитира околу Косовска Митровица се регистрирани 3.123 случаи на мали сипаници. Најмалиот пациент е бебе старо 15 дена, а најстариот е на 70-годишна возраст. Сепак, најголемиот број заболени се во групите на помлади од пет години и постари од 30 години.

Според српските медиуми, најголемиот дел заболени, односно 95 отсто од нив се невакцинирани, непотполно вакцинирани или со неутврден вакцинален статус.


Борисов: Да се обединиме и да помогнеме во решавање на проблемот за името


Белград, 9 декември, 2017 - 15:39 (META) 

Прашањето за името меѓу Македонија и Грција мораме да го решиме. Мора да се обединиме и да ѝ помогнеме на Европската комисија да му помогне на Брисел да донесе правилни одлуки, а не да поставува некакви ултиматуми, истакна бугарскиот премиер Бојко Борисов денеска во Белград, по средбата со српскиот претседател Александар Вучиќ и со премиерите на Грција, Алексис Ципрас, и на Романија, Михај Тудосе.

Борисов посочил дека четирите застапени земји на денешната среддба се неразделно парче на Европа и дека треба се покаже на дело дека се научени лекциите.

– Балканот многу векови наназад генерирал само војни. Сега е клучен момент, многу од големите играчи во светот се заинтересирани за Балканот, а ние сакаме обединет Балкан, модерна инфраструктура, дигитална инфраструктура. Лидерите на Западен Балкан сознаваат дека доцнат со остварувањето на обврските и треба да се ангажираат. Продолжуваме, испраќаме кон нашите пријатели во Европа порака дека имаат еден мудар, сигурен Балкан, кој не генерира проблеми, туку ги почитува сите правила – рече Борисов.


Дачиќ смета дека треба да има меѓународна конференција за Косово


Белград, 5 ноември, 2017 - 10:15 (META) 

Министерот за надворешни работи на Србија, Ивица Дачиќ, смета дека е потребно да се организира нова меѓународна конференција за да се најде решение за Косово, што би спречило евентуална војна во иднина.

На конференцијата, според Дачиќ, би учествувале ЕУ, САД и Русија.

– Србија, која Косово и Метохија исторски ги смета за нејзин нераскинлив дел, треба да побара меѓународна конференција за наоѓање решение, кое ќе спречи можни војни за многу векови – изјавил Дачиќ.

Ваквиот предлог на Дачиќ го отфрли вицепремиерот на косовската влада и поранешен министер за надворешни работи, Енвер Хоџај, нарекувајќи го „непотребно нешто“.

„Нема потреба од друга меѓународна конференција. Дијалогот со посредство на ЕУ треба да заврши со договор за целосна нормализација на односите и за реципрочно признавање. Србија историски никогаш не била за мировни договори и никогаш не ги признавала договорите со меѓународни преговори“, напиша Хоџај на „Твитер“.


Бошњаците од Санџак бараат автономија од Србија


Белград, 4 ноември, 2017 - 11:50 (META) 

Претседателот на Бошњачкиот национален совет во Србија, Сулејман Угљанин, вчера побара од српските власти и од Европската Унија да се распишат „избори за формирање на територијална автономија на српската областа Санџак“, каде мнозинството од жителите се Бошњаци.

Угљанин, кој е и лидер на Партијата за демократска акција на Санџак (СДА), го темели барањето на резултатите од референдумот за автономија на Санџак од 1991 година, кој не е признат од страна на Белград.

Тој тврди дека Бошњаците се „туѓо тело во земја во која институциите се нарекуваат српска војска и српска полиција“ и дека државните органи кон бошњачкото малцинство се однесуваат непријателски и дискриминаторски.

Овие изјави на Угљанин, српскиот министер за одбрана Александар Вулин ги оцени како провокативни. Тој додаде дека претседателот на Бошњачкиот национален совет сака да предизвика „неред и немир“, затоа што му пречи мирот и законитоста во Србија.


Ердоган вели дека соработката меѓу Анкара и Белград е клучна за Балканот


Белград, 10 октомври, 2017 - 11:11 (META) 

Турција и Србија се двете клучи земји за Балканот и нивната соработка е од суштинско значење за одржување на мирот, стабилноста и на просперитетот на полуостровот и во Европа, наведува турскиот претседател Реџеп Таип Ердоган, во авторскиот текст за весникот „Политика“ објавен по повод неговата денешна посета на Белград.

„Врските меѓу Турција и Србија се силни и со длабоки корени. Во долгата историја на тие територии, Турците и Србите живееја заедно. И денес можат да се забележат траги од нашата заедничка историја во јазикот, архитектурата, кујната, културата и во многу други области“,  пишува Ердоган.

Според турскиот претседател, иако немаат заедничка граница, Турција и Србија „се сметаат за соседи, а тајната е скриена токму во тие блиски врски“.

– Несомнено, соработката е неизбежна и поради геополитичката позиција на две земји. Заедничката историја носи и одредена чувствутелност и некои различни разбирања кои се однесуваат и за Турција и за Србија – пишува турскиот претседател.

Тој пристигна вчеравечер во Белград, а беше пречекан од српскиот колега Александар Вучиќ, премиерката Ана Брнабиќ и дел од српската влада.

Во делегацијата на Ердоган има 185 бизнисмени и осум турски министри. Официјалните разговори на турскиот претседател почнуваат денеска, на тет-а-тет средба со Вучиќ, по што ќе одржат заедничка прес-конференција.


Брнабиќ: Србија ќе даде сѐ од себе за да има најдобри односи со Македонија


Белград, 9 септември, 2017 - 11:50 (META) 

Српската премиерка Ана Брнабиќ вчеравечер на приемот организиран во Белград по повод Денот на независноста на Република Македонија. порача дека Србија ќе даде сѐ од себе за со Македонија да има само најдобри односи. Таа рече дека не разговарала со својот македонски колега Зоран Заев, ниту со амбасадорката на Македонија во Белград, Вера Јовановска-Типко околу можноста Македонија да го поддржи членството на Косово во Интерпол.

– Вечерва не сакам да зборувам за тоа. Вечерва ги славиме нашите добри односи и Денот на Македонија. Србија е отворена, флексибилна и ќе дадеме сè од себе да имаме најдобри односи – истакна Брнабиќ, која во име на српската Влада го честиташе празникот на Република Македонија.

Таа нагласи дека завчера разговарала со амбасадорката Јовановска-Типко за натамошната соработка меѓу двете земји и потсети дека му упатила официјален повик на македонскиот премиер Зоран Заев да го посети Белград во ноември.

На приемот што го организираше во Белград, македонската амбасадорка во Србија, Вера Јовановска-Типко рече дека трајна определба на Македонија е развој на добрите односи со сите соседи.

– Тие добри односи не подразбираат илузија за некоја идилична атмосфера, туку односи во кои отворените прашања се решаваат преку искрен дијалог, заемно почитување и меѓусебна доверба. Токму кон такви односи стремиме со пријателска Србија, со која не поврзуваат многу елементи од минатото, сегашноста и иднината, а најмногу човечките релации и взаемните симпатии кои се трајна вредност и поттик за континуирано подобрување на односите – порача Јовановска-Типко.

Покрај српската премиерка, на приемот беа и претседателката на српскиот парламент Маја Гојковиќ, како и министерот за труд Зоран Ѓорѓевиќ и претставници на дипломатскиот кор.


МНР: Персоналот на амбасадата на Србија повикан на консултации во Белград


Скопје, 20 август, 2017 - 23:26 (META) 

Министерството за надворешни работи денеска добило нота од амбасадата на Република Србија во Скопје, во кое било известено дека персоналот на амбасадата е повикан на консултации во Белград, соопштуваат од МНР.

„МНР на Република Македонија не е запознаено со причините за оваа одлука и во тој правец, воспоставува комуникација со МНР на Република Србија во насока на утврдување на причините за оваа постапка. Согласно релевантните одредби на Виенската конвенција за дипломатски односи, соодветните институции на Македонија преземаат мерки за заштита на безбедноста и интегритетот на амбасадата на Република Србија во Скопје“, се вели во соопштението на МНР.