!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

САД се за дипломатско решение на севернокорејската криза, вели шефот на Пентагон


Њу Делхи, 26 септември, 2017 - 12:48 (META) 

Соединетите Американски Држави се залагаат за дипломатско решение на севернокорејската криза, изјавил денеска американскиот министер за одбрана, Џејмс Матис, јавуваат светските агенции.

„Наша цел е ова прашање да се реши по дипломатски пат“, рекол шефот на Пентагон на прес-конференција во Њу Делхи.

Сепак, тој додал дека САД истовремено ја задржуваат можноста да одговорат на најопасните закани на Северна Кореја.

Инаку, Белата куќа синоќа ги отфрли како „апсурдни“ обвинувањата на Пјонјанг дека претседателот на САД, Доналд Трамп, ѝ објавил војна на Северна Кореја.

Советот за безбедност на Обединетите нации неодмна воведе нов пакет санкации против Северна Кореја, откако Пјонјанг во јули ја изврши шестата, најголема нуклеарна проба и лансираше повеќе балистички ракети.


САД бараат од ирачките Курди да го откажат референдумот за независност


Вашингтон, 16 септември, 2017 - 11:31 (META) 

Белата куќа ги повика ирачките Курди да го откажат референдумот за независност, закажан за 25 септември, оценувајќи го како провокативен и дестабилизирачки, јавуваат светските агенции.

Повторувајќи го уверувањето дека гласањето ќе претставува пречка за борбата против Исламска држава и за стабилизацијата на ослободените подрачја, Вашингтон јасно го изразил своето несогласување со одлуката на парламентот на ирачките Курди за одржување на референдумот.

„Ја повикуваме регионалната курдска влада да се откаже од референдумот и да влезе во сериозен дијалог со Багдад, во кој САД се секогаш подготвени да бидат посредник“, се наведува во денешното соопштение на Белата куќа.

Ирачките лидери ја оценија курдската иницијатива како противуставна.

Инаку, референдумот предизвикува загриженост и во Турција и во Иран, кои веруваат дека тој би можел да ги охрабри курдските малцинства и во тие земји.

Курдски официјални претставници навеле дека успехот на референдумот нема да значи моментално прогласување независност, туку ќе им овозможи од посилна позиција да влезат во преговори со властите во Багдад.


Отпуштен главниот стратег во Белата Куќа, Стив Бенон


Вашингтон, 18 август, 2017 - 20:53 (META) 

Претседателот на САД Доналд Трамп, на виши владини претставници им соопштил дека донел одлука да го отпушти својот главен стратег, Стив Бенон, кој уште од првите денови на оваа администрацијата важеше за негов најконтроверзен советник, јави „Гласот на Америка“.

Во соопштението од портпаролката на Белата куќа Сара Сандерс, се вели дека шефот на кабинетот на претседателот на САД Џон Кели и Стив Бенон, постигнале согласност дека денеска ќе биде неговиот последен работен ден. Сандерс додаде дека Белата куќа е благодарна за службата на Бенон и му посакува се најдобро.

Бенон, кому му се придава заслуга Трамп да биде избран на функцијата, со месеци имал несогласувања со влијателни фигури во Белата куќа.

Според весникот „Њујорк тајмс“, тој инсистирал дека повлекувањето од функцијата е негова идеја, и ја поднел неговата оставка до претседателот уште пред 11 дена, како подготовка тоа да биде објавено на почетокот на оваа недела. Веста била одложена, заради насилните протести во Шарлотсвил, Вирџинија.


Трамп не ја исклучува можноста за воена акција во Венецуела


Вашингтон, 12 август, 2017 - 10:41 (META) 

Американскиот претседател Доналд Трамп изрази загриженост поради хуманитарната криза во Венецуела, додавајќи дека не ја отфрла можноста за воена акција како одговор на политичката ситуација во оваа земја, јавуваат светските агенции.

Трамп изјавил дека сите опции се на маса поради антидемократските случувања во Венецуела, вклучувајќи и воена интервенција.

Министерот за одбрана на Венецуела, Владимир Падрино, пак изјавил дека заканите на Трамп се „акт на лудост и краен екстремизам“.

Белата куќа соопшти дека Трамп ќе разговара со претседателот на Венецуела, Николас Мадуро тогаш кога во земјата повторно ќе биде воспоставена демократија.


Средба на Трамп со украинскиот претседател Порошенко во Белата куќа


Вашингтон, 20 јуни, 2017 - 19:09 (META) 

Претседателот на САД, Доналд Трамп, денеска во Белата куќа се сретна со украинскиот претседател, Петро Порошенко. Непосредно пред средбата, како што јавуваат светските агенции, министерството за финансии на САД ги објави новите санкции против сепаратистичките борци на истокот на Украина и нивните сојузници.

На листата на лица против кои се воведени санкции е и рускиот државјанин Дмитриј Уткин, кој се смета за шеф на нерегистрирана воена агенција која регрутира борци за Источна Украина. На листата е и фирма, поврзана со Евгениј Пригожин, бизнисмен од Санкт Петерсбург, која ја води кетеринг-службата за Кремљ.

Американскиот Сенат претходно со големо мнозинство го усвои проширувањето на санкциите против Русија, но за нив дополнително треба да се гласа и во Конгресот, каде засега не е закажана седница.

Украинскиот претседател изјавил дека е задоволен што неговата средбата со Трамп ѝ претходи на таа помеѓу американскиот претседател и неговиот руски колега, Владимир Путин, која се очекува да се случи на самитот на Г20 во Германија следниот месец.


Путин и Трамп ќе имаат телефонски разговор денеска попладне


Вашингтон/Москва, 2 мај, 2017 - 10:54 (META) 

Портпаролот на Кремљ, Дмитриј Песков, потврдил дека рускиот претседател Владимир Путин за денеска попладне планира телефонски да разговара со својот американски колега, Доналд Трамп, јавуваат светските агенции.

„Го потврдуваме разговорот“, рекол Песков за порталот „Спутник“, откако Белата куќа го објави денешниот дневен распоред, кој почнува со разговор на Трамп со Путин, во 14.20 часот по средноевропско време.

Ова, како што јавуваат агенциите, ќе биде трет разговор помеѓу двајцата претседатели, по инаугурацијата на Трамп, во средината на јануари годинава.

Првиот беше одржан во јануари, а двајцата лидери развораа за борбата против тероризмот, конфликтот во Сирија и за ситуацијата во Украина и разменија мислења за главните прашања околу билатералните односи помеѓу САД и Русија.

Вториот разговор беше одржан на почетокот на април, по терористичкиот напад во Санкт Петерсбург.


Натрапник со спреј за самоодбрана уапсен во дворот на Белата куќа


Вашингтон, 12 март, 2017 - 10:27 (META) 

Натрапник со ранец во кој носел две шишенца спреј за самоодбрана бил уапсен во дворот на Белата куќа во петокот пред полноќ по локално време, јавија светските медиуми.

Тој бил пронајден и уапсен близу јужниот влез на Белата куќа, кога во претседателката резиденција бил претседателот на САД, Доналд Трамп.

Натрапникот Џонатан Т. Трен (26) од Калифорнија, им рекол на агентите на тајната служба што го уапсиле дека сакал да го види претседателот.

– Не, не сум пријател на претседателот. Но, имам закажано – одговорил тој на прашањето што бара таму.

На полицајците на кои им бил предаден подоцна, им рекол дека во дворот на претседателската резиденција влегол прескокнувајќи ја оградата. Во ранецот, покрај спрејовите, имал и пасош.


Ќе ги зајакнеме нашите клучни сојузници на Пацификот, порача Белата куќа


Вашингтон, 12 февруари, 2017 - 18:32 (META) 

Ќе ги зајакнеме нашите клучни сојузници на Пацификот, одговори Белата куќа на лансирањето на балистичката ракета од страна на Северна Кореја.

„Нашата порака е дека ќе ги зајакнеме нашите клучни сојузници во пацифичкиот регион, што е дел од нашата стратегија за спречување на растечкото непријателство кое го видовме изминатите години од режимот на Северна Кореја“, изјави советникот во Белата куќа, Стивен Милер за „Фокс њуз“.

Северна Кореја истрела балистичка ракета од базата Бангјон кон Јапонското море. Проектилот поминал 500 километри пред да падне во морето.


Тереза Меј е првиот странски лидер кого Трамп ќе го прими в петок во Белата куќа


Вашингтон, 22 јануари, 2017 - 14:38 (META) 

Претседателот на САД, Доналд Трамп, в петок во Белата куќа ќе се сретне со британската премиерка Тереза Меј, соопшти портпаролот на Белата куќа, Шон Спајсер.

Тој додаде дека Тереза Меј ќе биде првиот странски лидер кого Трамп ќе го прими, откако стапи на должноста претседател.

Меј денеска за „Би-би-си“ изјави дека со Трамп ќе разговараат за слободната трговија меѓу Велика Британија и САД и за значењето на НАТО. Таа изрази уверување дека американскиот претседател, иако неодамна изјави дека алијансата е „застарена и надмината работа“, ќе умее да ја препознае нејзината важност.

Премиерката на Велика Британија наведе дека администарцијата на Трамп е заинтересирана за заклучување на договорот за слободна трговија со Велика Британија, и покрај политиката „Америка на прво место“, за која Трамп рече дека ќе биде негов приоритет.

Меј одби директно да одговори на прашање дали со Трамп ќе разговара и за неговите претходни коментари на сметка на жените.

На 31 јануари, Трамп во Белата куќа ќе се сретне со претседателот на Мексико, Енрике Пена Нието, а според Спајсер, главни теми на состанокот ќе бидат трговската размена, миграцијата и безбедноста.


Трамп го именуваше својот зет за виш советник во Белата куќа


Вашингтон, 10 јануари, 2017 - 10:34 (META) 

Новоизбраниот претседател на САД, Доналд Трамп, синоќа го потврди именувањето на својот зет Џаред Кушнер за виш советник во Белата куќа, јавуваат светските медиуми.

„Кушнер беше советник од доверба во текот на кампањата и во периодот на транзиција и горд сум на тоа што има клучна улога во мојата админстрација“, соопштил синоќа Трамп. Кушнер, според медиумите, се одрекол од платата за време на извршувањето на должноста виш советник.

Младиот бизнисмен, кој в недела ќе наполни 36 години, е сопруг на ќерката на Трамп, Иванка, со која има три деца.

Кушнер, како што пренесуваат светските агенции, немал искуство во политиката пред да се вклучи во предизборната кампања и е најмлад на листата на соработници што ќе му помагаат на Трамп во водењето на земјата.

Инаку, зетот и нов виш советник на Трамп е ортодоксен Евреин чие семејство е поблиско до конкурентската Демократска партија на САД.

Медиумите за него претходно пишуваа дека Кушнер е директор на семејната фондација која давала добротворни донации за еврејските населби на окупираниот Западен Брег, како и тоа дека е можно да биде пратеник за Блискиот Исток во администрацијата на новоизбраниот американски претседател.

Демократите апелираа да се разгледа именувањето на Кушнер за советник и го обвинија Трамп за непотизам и за судир на интереси.