Во Грција четирипати повеќе мигранти од истиот период лани


Атина, 25 април, 2018 - 11:45 (META) 

Бројот мигранти кои пристигнуваат на грчките острови сега е за четири пати поголем од истиот период лани. Според грчките власти, на Лезбос, каде што е најголемиот камп за мигранти, лани дневно во просек пристигнувале по 54 мигранти, а сега над 200 секој ден.

Од март годинава грчките острови и северна Грција беа сведоци на пристигнувањето на голем број бегалци од Блискиот Исток, чиј број е значително повисок во споредба со истиот период минатата година.


Хелсиншки комитет: Бегалската криза не е завршена, да се следи ситуацијата на терен


Скопје, 18 април, 2018 - 11:27 (META) 

Бегалската криза не смее да се смета за завршена, иако бројот на бегалци и мигранти кои лани влегоа во Македонија е намален во споредба со 2016 година. Државата мора да продолжи да ги гради своите капацитети за да може непречено да ги гарантира основните човекови права и слободи на бегалците и мигрантите на нејзината територија, како и итно да престане со нелегалното, групно „депортирање“ на овие луѓе кон соседните земји. Ова се дел од заклучоците кои Хелсиншкиот комитет за човековите права на Македонија ги истакна во Годишниот извештај за 2017 за утврдените состојби и почитувањето на правата на бегалците, мигрантите и барателите на азил кои транзитираа низ земјава.

Во рамки на дискусијата за истражувањата беше разгледано и прашањето за продолжување на кризната состојба на јужната и северната граница во земјава. Препораката е дека Собранието треба да прогласи продолжување за да се следи ситуацијата на терен, да се подобри состојбата на транзитните кампови како и третманот на бегалците.

Хелсиншкиот комитет истакнува дека официјалната статистика на институциите покажува оти во Македонија во 2017 година, бројката на бегалци и мигранти во прифатните кампови не надминал 200 лица.

Во текот на минатата година низ Македонија поминале бегалци од повеќе земји, при што најбројни биле луѓето од Авганистан, Сирија, Пакистан, Иран и Ирак. Поретко се среќавале бегалци и мигранти со потекло од Мароко, Алжир, Либија, Палестина, а кон крајот на 2017 биле регистрирани неколку турски државјани кои бегале од политички прогон.

Хелсиншкиот комитет препорачува да се воспостави систем на навремено регистрирање на сите бегалци и мигранти што транзитираат низ земјава, за да може да се следи нивното движење и да се зголеми заштитата на нивните човекови права. Да се гарантира правото на барање азил за сите бегалци, мигранти и странци задржани на територијата на Македонија без условување од страна на државните органи, да се обезбеди надзор и поголема заштита за малолетниците без придружба кои транзитираат низ земјава, а обвинувањата за употреба на прекумерна сила од страна на полициските службеници темелно да се истражат и евентуалните прекршители на законските овластувања да сносат одговорност.

Дополнително, Хелсиншкиот комитет укажува дека неопходно е да се влијае врз јавното мислење за бегалската криза, со оглед на тоа дека минатата година е забележано високо ниво на ксенофобија помеѓу граѓаните, нетолеранција кон бегалците и говор на омраза.


Солунскиот суд изрече затворска казна од 1.489 години за криумчарење мигранти


Солун, 19 декември, 2017 - 14:31 (META) 

Судот во Солун осуди 23 лица на затворска казна од осум до 1.489 години поради криумчарење ирачки и сириски бегалци во Грција.

Осудените криумчареле бегалци од турската граница во 2015 и 2016 година.

Судот најдолга затворска казна му изрекол на 54-годишен Грк, осуден за предводење на групата криумчари кои организирале транспорт за повеќе од 500 бегалци во 43 одвоени случаи.

Според грчкиот закон, максималната казна која може да се отслужи во затвор е 25 години, без разлика на должината на изречената казна. Светските агенции наведуваат дека 23 лица меѓу кои повеќето се такси превозници се ослободени.

Групата е уапсена во јули 2016 година.


Аврамопулос: Да се соочиме со вистината, мигрантите се тука да останат


Брисел, 18 декември, 2017 - 21:32 (META) 

Време е да се соочиме со вистината дека никогаш нема да бидеме во можност да ја запреме миграцијата, порача европскиот комесар за миграција, Димитрис Аврамопулос и додаде дека тоа е новата реалност за која треба да се смислат долгорочни решенија за унапредување на интеграцијата и инклузијата.

Според неговите зборови на денешниот Меѓународен ден на мигрантите, повеќе од 244 милиони луѓе живеат надвор од нивните земји на потекло. Повеќе од 32.000 бегалци се распоредени низ Европа, а уште 50.000 се очекуваат во наредните две години.

-Глупаво е да се мисли дека миграцијата ќе исчезне ако започне острата реторика. Наивно е да се мисли дека нашите општества ќе останат хомогени и слободни од мигранти само ако подигнат ограда. Не е мудро да се мисли дека миграцијата ќе остане на едната страна на Медитиранот ако се покаже солидарност само во финансиска смисла – наведлува Аврамопулос.

Според него сите мораме да ја прифатиме миграцијата, мобилноста и диверзитетот како нова норма и додаде дека треба да се прилагодуваат политиките спрема неа.


Во Грција уапсен возач на комби кој пренесувал 50 бегалци


Атина, 6 ноември, 2017 - 11:30 (META) 

Грчката полиција соопшти дека синоќа уапсила возач на комби кој се обидел илегално во земјата да воведе 50 бегалци од Блискиот Исток.
Полицијата навела дека го забележала комбито на автопат во близина на грчко-турската граница. Возилото е запрено по полициска потера.
Во комбито се пронајдени бегалци 50 лица: 30 од Сирија, 19 од Ирак и едно лице од Авганистан.
Полицијата соопшти дека бегалците платиле по 1.500 евра за илегален влез во Грција.
Уапсениот возач е обвинет за загрозување на животите на патниците, кои морале да стојат во комбито.


Анкета: Младите ги стигматизираат бегалците поради засилени национални чувства и страв од тероризам


Скопје, 26 октомври, 2017 - 14:03 (META) 

Стравот и предрасудите кон луѓето од исламска вероисповед се најголем извор на стигматизација кон бегалците и кон мигрантите кај младите луѓе од осум европски земји, четири од Западен Балкан, меѓу кои и Македонија, и четири земји членки на ЕУ, покажува интернет-анкетата на Институтот за демократија „Социетас цивилис“, изработена во рамки на проектот „Поттикнување на промена на стигматизирачки ставови“.

Наодите покажуваат дека стравот и предрасудите кај младите луѓе се зголемуваат во најголем дел поради засилувањето на националните чувства и загриженоста поради тероризмот во светот. Ваквиот однос и чувства се поизразени кај младите што живеат во рурални средини, отколку кај тие од градски средини. Притоа, контактот со бегалците го намалува нивото на исламофобија и на стигма на младите кон овие луѓе.

Исламофобијата кај младите луѓе на вкупниот примерок на скала од 1 до 5 е оценета со средна оценка од 2,75. Младите луѓе од Западен Балкан се помалку исламофобични отколку нивните врсници од Европа. Нивото на исламофобија кај младите луѓе во Западен Балкан е 2,5, а за младите луѓе од европските земји нивото е 2,9.

Според истражувањето, просечното знаење за исламската религија е релативно ниско, односно на скала до 6, тоа е на ниво 2,2.

Анкетата покажува дека младите луѓе во Западна Европа имаат поголема веројатност да поддржат насилни протести, додека младите луѓе од Западен Балкан обично се склони кон „нарушување на редот“.

Младите луѓе од земјите од Западен Балкан сметаат дека најголема безбедносна закана е организираниот криминал, потоа тероризмот и, на трето место, емиграцијата.


Меркел: Неприфатливо е Унгарија да ја игнорира пресудата за бегалците


Берлин, 12 септември, 2017 - 14:08 (META) 

Германската канцеларка Ангела Меркел оцени дека е неприфатливо Унгарија да ја игнорира пресудата на Европскиот суд на правдата, според која Будимпешта мора да ги прифати бегалците во рамки на програмата на Европската Унија за нивно релоцирање.

– Неприфатливо е една влада да рече дека не ја интересира пресудата на Европскиот суд на правдата – вели Меркел за денешното издание на весникот „Берлинер цајтунг“.

Прашана дали тоа значи дека Унгарија мора да ја напушти ЕУ, Меркел одговори дека тоа значи дека е „погодено особено важно европско прашање“.

– Европа за мене е место во кое владеат законите – рече Меркел и додаде дека прашањето ќе биде разгледано на самитот на ЕУ во октомври.

Европскиот суд на правдата минатата недела го отфрли барањето на Унгарија и на Словачка да бидат изземени од програмата на ЕУ за задолжителни квоти за релоцирање бегалци кои стигнале од Грција и од Италија во други земји на ЕУ.

Унгарскиот премиер Виктор Орбан рече дека нема да го промени својот став, без разлика на пресудата на Европскиот суд на правдата.


Хелсиншки комитет: Во изминатите три години само на пет лица им е доделен статусот бегалец


Скопје, 7 септември, 2017 - 16:20 (META) 

Во текот на изминатите три години во Македонија биле поднесени вкупно 2.243 барања за признавање на правото на азил од страна на 2.717 лица. Од нив, на само пет лица им е доделен статус на признаен бегалец, а на само 11 лица им е доделена супсидијарна заштита, информираат од Хелсиншки комитет, од каде нагласуваат дека Македонија е транзитна земја за бегалците, а не крајна дестинација.

„Спротивно на ова, во јавноста се поведе инцијатива заснована врз лажни податоци, според која Република Македонија требало да се подготви за сместувањето и за интеграцијата на бегалци. Јавната дебата која се разгоре беше проследена со високо ниво на ксенофобичен говор на омраза кон бегалците, поистоветувајќи ги со терористи, со навредливи и понижувачки пораки, кои повикуваат на спречување на нивното населување во државата. Се поведоа неколку граѓански иницијативи, наменети за собирање потписи на граѓаните против населување на мигранти, кои непрекинато поттикнуваа и провоцираа говор на омраза. Иако поведувањето граѓански иницијативи и распишувањето референдум за испитување на мислењето на граѓаните се демократски и законски дозволени механизми, неопходно е тие да не провоцираат и да не поттикнуваат омраза кон одредена целна група, во овој случај бегалците“, велат од Хелсиншкиот комитет.

Хелсиншкиот комитет предупредува дека континуираното ширење и поттикнување на говорот на омраза кон бегалците, може лесно да води кон дела од омраза. Од почетокот на 2015 година до денес Комитетот има регистрирано 34 дела од омраза, сторени кон бегалци или мигранти на територијата на Република Македонија.


ОН: 87.000 лица од Мјанмар побегнaле во Бангладеш


Њујорк, 4 септември, 2017 - 10:43 (META) 

Од 25 август, кога почнаа судирите во Мјанмар, во Бангладеш стигнале вкупно 87.000 бегалци, претежно припадници на муслиманскиот народ Рохинџа, соопштија Обединетите нации.

Светските агенции наведуваат дека преполни се камповите во Бангладеш со Рохинџа-муслимани.

Во текот на претходната недела, повеќе од 2.600 куќи се запалени на северозападот на Мјанмар, во областа каде живеат Рохинџа-муслимани, соопшти претставник на УНХЦР.

Властите на Мјанмар за палењето на куќите ја обвинија исламистичката група Војска за спас на Аракан Рохинџа, истата група која ја презеде одговорноста за координираните напади на безбедносните пунктови, што ги предизвика минатонеделните судири.

Сепак, Рохинџа-муслиманите кои пребегнале во Бангладеш велат дека кампањата на палење куќи и убиствата ги врши војската на Мјанмар, која се обидува да ги протера од таа област.

Генералниот секретар на ОН, Антонио Гутереш, претходно предупреди за можна хуманитарна катастрофа на западот на Мјанмар и инсистира безбедносните сили на земјата да запрат со насилството, откако 400 лица, претежно Рохинџа-муслимани загинаа во судирите.


Советниците во Општина Штип гласале за распишување референдум за мигрантите


Штип, 30 август, 2017 - 20:03 (META) 

Советот на Oпштина Штип, со 13 гласа „за“, денеска изгласал да почне постапка за распишување референдум, на кој граѓаните ќе се изјаснат за „Стратегијата за интеграција на бегалци и странци 2017-2027 година“.

Советниците од редовите на ВМРО-ДПМНЕ гласале „за“, а советниците од СДСМ пред гласањето ја напуштиле салата.

Граѓанската иницијатива „Будење“ од Штип до Советот на Општината приложила 356 потписи од граѓани кои ја поддржуваат иницијативата за референдум.

Денеска и Советот на Општина Кавадарци гласал против населување мигранти во нивниот град, а воедно Советот ја усвоил одлуката за распишување референдум.