!На 1 февруари 2017 година, завршува промотивниот период на слободно користење, без регистрација и без претплата, на содржините на „Мета“, кое беше воведено за да им овозможиме полесен пристап на корисниците до навремени и проверени вести. За начинот на пристап и за претплата, од 1 февруари 2017 година ќе информираме дополнително. При пренесувањето и преземањето на содржините од „Мета“, задолжително е атрибуирање и линкување.

Нигериската војска „случајно“ бомбардирала бегалски камп, повеќе од 100 загинати


Абуџа, 17 јануари, 2017 - 20:20 (META) 

Авион на нигериската војска во акција против Боко харам „случајно“ бомбардирал бегалски камп, при што биле убиени повеќе од 100 бегалци, соопштија нигериските власти.

Командант Лаки Ирабор потврди дека владин авион по грешка бомбардирал бегалски камп во североисточната област Ран, во близина на границата со Камерун.

Во бомбардирањето се повредени повеќе бегалци и хуманитарни работници, меѓу кои и персонал на организацијата „Лекари без граници“ и на Црвениот крст.

Претставниците на државата Борно помагаат во координација и во евакуација на повредените.
Ова е првпат нигериските претставници да признаат ваква грешка.


Снегот дополнително ги отежна условите за живот во бегалскиот камп Морија


Атина, 8 јануари, 2017 - 11:24 (META) 

Илјадниците бегалци во бегалскиот камп Морија на Лезбос викендов се соочуваат со уште потешки услови за живот поради поларната температура и снегот на островот. Тенките летни шатори во кои живеат повеќе од 8.000 бегалци на Лезбос викендов се прекриени со снег и нов предизвик за бегалците е како да се заштитат себеси и своите работи од студот и од снегот. Некои од нив поставуваат големи пластични ќеси над шаторите, но и тоа не е доволно за да го избегнат студот во кампот.

Голем број од бегалците и од волонтерите протестираат и реагираат затоа што државата нема направено нешто досега за да ги заштити од очекуваните лоши зимски временски услови, иако неколку дена однапред имаше најави за опаѓање на температурата под нулата и снег во целата држава. Иако владата вети дека од септември бегалците ќе бидат преместени во нови кампови во кои ќе има бунгалови наместо шатори, тој план е пролонгиран и засега сè уште нема најава кога ќе се случи тоа. Во најголемиот број случаи, низ камповите во земјата бегалците се сместени или во пластични контејнери или во тенки шатори на УНХЦР на отворено, или во празни индустриски хали, иако има и случаи каде бегалците се сместени во контејнери каде има греење.

Снегот во Грција предизвика голем број проблеми, сообраќаен хаос на автопатиштата низ земјата, дел од автопатот Патра – Коринт на Пелопонез беше и затворен, а во голем дел од Северна Грција и на Халкидики, иако времето почнува да се подобрува, неопходно е поседување зимска опрема. Овие два дена поради лошото време животот го загубија две лица, еден 77-годишен човек, кој почина од хипотермија откако се изгуби во шумски предел и една постара жена од задушување поради начинот на греење на домот.


Избоден бегалец од Сирија на островот Хиос


Атина, 27 декември, 2016 - 14:55 (META) 

Нов инцидент се случи во бегалскиот камп Суда на островот Хиос, кога пет лица брутално нападнаа бегалец од Сирија. Момчето на 26-годишна возраст било прободено повеќепати во градниот кош и во раката.

Повредениот бегалец сам успеал да дојде до болницата на островот и колабирал само што стигнал пред влезот. Извори од болницата за локалните медиуми на островот изјавиле дека бегалецот се појавил доцна вечерта сам и веднаш бил префрлен на интензивна нега поради големиот број рани, кои, за среќа, не биле премногу длабоки и не претставувале опасност за неговиот живот. Сепак, момчето било задржано во болница од безбедносни причини.

Грчката полиција објави дека бегалецот бил нападнат од пет лица, кои, според тврдењето на нападнатото момче, биле со потекло од Алжир. Засега нема информации дека се најдени напаѓачите.

Нападите меѓу бегалците во камповите стануваат сè почеста појава, а неретко се и причина за поголеми демонстрации, масовни насилни судири кои водат до палење и до уништување на дел од камповите. Причините некогаш се финансиски, некогаш етнички, а некогаш и банални, како земање туѓо место во редот за храна.


Мигрант ранет со огнено оружје во близина на селото Хоргош, на српско-унгарската граница


Белград, 3 декември, 2016 - 13:45 (META) 

Непознато лице на 29 ноември пукало во група мигранти во близина на селото Хоргош, на српско-унгарската граница. Во инцидентот еден од мигрантите биле ранет, потврдиле за телевизијата Н1 од српското министерство за внатрешни работи.

Како што информирале оттаму, мигрантот бил ранет со куршум од мал калибар и кај него лекарите констатирале полесни повреди. Полицијата го истражува случајот, а било известено и надлежното обвинителство.

Информацијата за инцидентот е објавена дури денеска од страна на порталите во Унгарија, кои, како што пренесува балканскиот сервис на „Радио Слободна Европа“, навеле дека српските власти „одредиле ембарго“ за објавување информации за случајот.

Според информациите што ги пренесуваат српските медиуми, непознато лице пукало врз тројца мигранти од Иран додека тие се движеле од бегалскиот камп кон блиската бензинска пумпа. Во инцидентот биле ранет 36-годишен маж, а мигрантите забележале три лица како бегаат од надвозникот во близина.

Унгарската телевизија навела дека не се исклучува можноста нападот да бил извршен од шверцери на мигранти.


Борисов предупреди дека е можен терористички напад по немирите во бегалскиот камп


Софија, 25 ноември, 2016 - 15:48 (META) 

Состојбата во бегалскиот камп во Харманли на југот на Бугарија се нормализира по безредијата и немирите, кои избувнаа вчера и продолжија во текот на ноќта. Повеќе од 400 мигранти се задржани во притвор поради вандалско однесување, а во нередите се повредени 24 полицајци, од кои најтешко настраданиот има скршеница на раката.

Од Министерството за внатрешни работи на Бугарија соопштија дека се формирани две предсудски постапки за лицата кои учествувале во нередите.

Бугарскиот премиер во оставка, Бојко Борисов, кој ноќеска за време на немирите пристигна во бегалскиот камп, соопшти дека против сите што учествувале во безредијата ќе бидат поднесени обвиненија.

Тој повика и предупреди да се внимава на повиците за напади и на она што се објавува на социјалните мрежи бидејќи вакви настани вообичаено се проследени со терористички напади.

„Обично, онаму каде што има зголемување на насилствата, секогаш има и терористички акт, секогаш се активираат ќелиите со спијачи… Мрежите на Исламска држава многу внимателно го следат „Фејсбук“ и она што излегува во медиумите. Таквите, кои се прават големи херои, треба да знаат дека со вакво поведение можат да изложат на ризик огромен дел од населението“, изјави премиерот во оставка.

Претседателката на Агенцијата за бегалци, Петја Прванова, истакна дека најверојатно постои поврзаност меѓу мигрантските протести во Бугарија со оние во камповите во другите европски земји.

„Кога се запали кампот во Кале (Франција), инциденти имаше и во Харманли, кога имаше инцидент во Германија, имаше и тука. Вчера се запали камп на островот Лезбос, сега и тука. Очигледно има врска меѓу овие настани“, изјави Прванова за БТВ.

Немирите во кампот во Харманли биле предизвикани главно од мигранти од Авганистан.

„Групи Авганистанци тепаа Сиријци, за да излезат да се бунтуваат“, изјави Борисов.

Според него, постои можност бунтот да е организиран од надвор. Како аргумент за ова, тој го посочи фактот дека самите мигранти преку мобилни телефони пуштале снимки на социјалните мрежи.

Во декември треба да почне екстрадицијата, односно враќањето назад во нивната земја, на мигрантите од Авганистан. Како што соопшти Борисов, веќе бил нарачан авион од Кабул, а летот е организиран од бугарските власти во координација со Европската агенција за гранична и крајбрежна заштита.

По нередите, кампот во Хармални е целосно оштетен. Нанесена е сериозна материјална штета, а според зборовите на Борисов, не е останат ниту еден здрав прозорец.

Во моментов во центарот во Хармални има околу 2.700 лица, кои се разделени и групирани според нивната националост за да не дојде до нови судири. Во кампот има околу 600 деца и од 400 до 500 жени, кои, како што соопшти Прванова, се сместени на безбедно.


Бугарската полиција притвори 200 мигранти по немири во бегалски камп


Софија, 25 ноември, 2016 - 10:55 (META) 

Бугарската полиција притвори 200 мигранти по судирите во бегалски камп на југот на Бугарија, во кој биле повредени и 14 полицајци, соопштија бугарски официјални претставници.

Според портпаролката на бугарската полиција, Нина Николова, во нередите учествувале околу 2.000 мигранти, кои скандирале, палеле гуми и фрлале камења кон полицијата.

Тензиите, како што пренесуваат локалните медиумите, ескалирале вчера, поради што полицијата употребила водени топови за да ги прекине насилствата.

Се очекува во текот на денот бугарскиот премиер Бојко Борисов да го посети бегалскиот камп каде се случија нередите.


Жена и дете загинаа во пожар во бегалски камп на Лезбос


Атина, 25 ноември, 2016 - 9:57 (META) 

Жена и малолетно дете изгореа живи во пожар што синоќа избувна во бегалскиот камп Морија на островот Лезбос. Починатите бегалци се 60-годишна жена и нејзиниот 5-годишен внук, двајцата Курди од Ирак, кои биле во Морија четири месеци.

Трагедијата се случила ноќта, околу 23 часот, кога, според очевидци, експлодирала плинската боца на која жената готвела во нејзиниот шатор, а нејзиното внуче спиело внатре со неа. Пожарот се проширил низ голем дел од кампот, уништувајќи повеќе шатори. Во болница во Атина, со сериозни изгореници веднаш биле пренесени мајката на починатото дете и нејзиното второ четиригодишно дете со уште две лица, а со помали повреди и со респираторни проблеми во болница на Лезбос се лекуваат уште десетина лица.

Покрај пожарот, во кампот почнале и демонстрации, во кои дополнително биле уништени шатори на бегалците.

Противпожарните служби успеале да го изгаснат силниот пожар во кампот околу 3 часот утринава, а поради големата штета голем дел од бегалците ноќта ја поминале под ведро небо.

Според официјалните бројки на грчката влада, на Лезбос има повеќе од 6.000 бегалци, иако бегалскиот камп на островот има капацитет за 3.500 луѓе. Лезбос е остров со најголем број бегалци и мигранти кои се заглавени со месеци и според договорот меѓу Европската Унија и Турција, доколку не добијат азил, ќе мора да бидат вратени во Турција. Во Морија често има проблематични демонстрации, главно поради гневот на бегалците кои со месеци се заглавени без некаква перспектива и надеж дека наскоро ќе може да заминат на саканата дестинација.

Во цела Грција има повеќе од 62.000 бегалци.


Нови инциденти во бегалскиот центар на Хиос


Атина, 18 ноември, 2016 - 9:45 (META) 

Тензична е ситуацијата на островот Хиос, каде два дена по ред има постојани напади и немири во бегалскиот центар во Суда. Кампот вчера вечерта беше мета на непознати напаѓачи, кои фрлаа молотови коктели и други предмети, предизвикувајќи пожар и уништувајќи неколку шатори на бегалците.

Покрај нападот на бегалскиот камп, на Хиос биле нападнати и двајца активисти кои им помагаат на бегалците. Според информациите, напаѓачите биле најверојатно ултрадесничари. Активистите се префрлени во болницата на Хиос со сериозни повреди.

Нападите доаѓаат еден ден откако група бегалци во средата украдоа пиротехнички материјал од продавница на островот и почна бунт и палење и во кампот и во куќи и автомобили околу кампот, а нападнаа и дел од локалните жители кои се обидувале да го одбранат личниот имот. Во бунтот изгоре дел од кампот, беа повредени неколку бегалци, причинета е материјална штета на домовите и на автомобили, а полицијата уапси и приведе десетици мигранти и активисти кои учествуваа во немирите.

Немирите и нападите од одредени насилни групи создаваат тензија и вознемиреност и кај бегалците и кај локалните жители на островот. Градоначалникот на островот во телефонски разговор со министерот за миграција, Јанис Музалас, побара бегалскиот центар итно да биде затворен за да се стави крај на инцидентите на Хиос.

Во бегалскиот центар на Хиос има повеќе од 1.000 бегалци и мигранти, а на целиот остров има повеќе од 4.000 бегалци.


Бунт и пожар во бегалскиот центар на Лезбос


Атина, 24 октомври, 2016 - 14:34 (META) 

Бавната процедура за азил во Грција предизвика нови немири во бегалскиот камп Морија на Лезбос. Група од стотина бегалци, главно од Пакистан, подметнаа пожар во дел од кампот, во кој целосно се уништени осум од вкупно 12 контејнери на Европската служба за азил.

Во кампот владее хаос и паника, пожарникарските служби се обидуваат да го стават пожарот под контрола, а присутни се и специјалните полициски сили во обид да воспостават ред во бегалскиот центар.

Вработените во службата за азил, според информациите во Грција, го напуштиле кампот кога почнал бунтот на бегалците. Нивните канцеларии, сместени во контејнери во кампот, потоа се нашле на мета на групата мигранти од Пакистан, кои почнале да ги вандализираат и да ги палат.

Бунтот на бегалците се должи на нивниот гнев и незадоволство од бавното разгледување на барањата за азил, што значи дека уште долг период ќе мора да останат заглавени во камповите во неизвесност што и како ќе се случува со нив.

Минатата недела од исти причини, разочараност што службата за азил разгледува само по пет барања дневно, бунт почнаа и бегалците во центарот во Хиос. Тие го блокираа влезот во кампот и не им дозволуваа ниту на вработените, ниту на полицијата да влезат во центарот.


Двајца бегалци прегазени пред  бегалскиот камп Ореокастро во Солун


Скопје, 17 октомври, 2016 - 9:42 (META) 

Нова бегалска трагедија се случи во бегалскиот центар Ореокастро во Солун. Една Сиријка и нејзиното малолетно дете загинаа во сообраќајна несреќа, кога возилото на грчки возач удри во нив на патот надвор од бегалскиот камп. Полицијата веднаш го приведе и го уапси 76-годишниот возач, а неколку моменти пред апсењето, човекот успеа за влакно да избегне линч од групата гневни бегалци, со помош на еден постар и двајца помлади бегалци.

Во сообраќајката е повредено уште едно 13-годишно девојче, кое се лекува во болница во Солун и е надвор од животна опасност.

Кобната сообраќајка предизвика нова тензија и вознемиреност меѓу бегалците, кои почнаа насилни демонстрации и инциденти. Во демонстрациите беше запалено возилото што ги усмрти Сиријката и нејзиниото дете. Бегалците палеа контејнери за ѓубре, а се судрија и со полицијата, фрлајќи камења и други предмети кон нив. За да ја смири ситуацијата, полицијата одговори со шок-бомби. Групата гневни бегалци го нападна и возилото на брза помош, кое требаше да ги земе телата на починатите и повреденото девојче. Според сведочењата на членови од екипата за брза помош, бегалците го нападнале и возилото, а потоа и медицинските лица што го внесувале телото на починатото дете со клоци, тупаници и со ножеви. Членовите на екипата едвај успеале да избегаат без да го земат и телото на починатата мајка. Двајца од нив се повредени и се пренесени во болница во Солун.

Според локалните медиуми во Солун, бегалците денеска ќе одржат мирен протест пред бегалскиот камп во Ореокастро, за да побараат возачите да ја намалат брзината во близина на кампот бидејќи често поминуваат покрај него со голема брзина, ставајќи ги во опасност животите на бегалците што се движат по уличките надвор од него.