Порастот на БДП во првото тримесечје е 3,2 проценти


Скопје, 12 јуни, 2015 - 14:49 (META) 

Според проценетите податоци на Државниот завод за статистика, стапката на пораст на домашниот бруто-производ (БДП) за првото тримесечје од 2015 година изнесува 3,2 проценти.

Во првото тримесечје од годинава, најголем пораст е забележан во секторите: стручни, научни и технички дејности; административни и помошни услужни дејности од 9,9 проценти, уметност, забава и рекреација; други услужни дејности; дејности на домаќинствата како работодавци; дејности на домаќинствата кои произведуваат разновидна стока и вршат различни услуги за сопствени потреби од 6,6 проценти; трговија на големо и трговија на мало; поправка на моторни возила и мотоцикли; транспорт и складирање; објекти за сместување и сервисни дејности со храна од 6,3 проценти и финансиски дејности и дејности на осигурување од 6,2 проценти.

Финалната потрошувачка на домаќинствата, вклучувајќи ги непрофитните институции кои им служат на домаќинствата, во првото тримесечје од 2015 година, номинално порасна за 1,6 отсто, а нејзиното учество во структурата на домашниот бруто-производ изнесуваше 69,6 проценти.

Во истиот период, извозот на стоки и на услуги номинално се зголеми за 13,4 проценти, а увозот на стоки и на услуги забележа зголемување во номинален износ од 5,5 проценти.


ММФ: Пад на украинскиот БДП за девет отсто


Киев, 1 јуни, 2015 - 14:56 (META) 

Украина годинава ќе има пад на домашниот бруто-производ (БДП) од девет отсто, соопшти Меѓународниот монетарен фонд (ММФ).

Априлската, а сега ревидирана процена на ММФ за економските движења во Украина превидувала речиси двојно помал пад на БДП во Украина од 5,5 отсто.

ММФ очекува инфлацијата во Украина, која е економски опустошена од едногодишната војна, да достигне дури 46 отсто поради неповолниот курс на нејзината валута и поради поскапувањето на горивото.

Шефот на мисијата на ММФ во Украина, Николај Гуеоргуиев, наведе дека разговорите на делегацијата на Фондот и на украинските претставници биле конструктивни и оти се воочени некои знаци на зголемена стабилност на украинската економија.


ММФ: Русија годинава ќе има пад на БДП за 3,4 отсто


Москва, 21 мај, 2015 - 20:56 (META) 

Меѓународниот монетарен фонд (ММФ) проценува дека годинешниот домашен бруто-производ (БДП) на Русија, која е во економска криза, ќе се намали за 3,4 отсто и оти следната година ќе биде забележан помал пораст, беше објавено денеска во Москва.

ММФ ги ревидираше своите претходни предвидување за пад на БДП од 3,8 проценти за оваа година и за 1,1 отсто во 2016 година. Економскиот пораст во 2014 година изнесуваше 0,6 отсто.

– Мерките кои ги презедоа руските власти против економската криза помогнаа да се стабилизира ситуацијата – изјави шефот на мисијата на ММФ во Русија, Ернесто Рамирез Риго.

Русија е во монетарна криза која е предизвикана од западните санкции кон неа, воведени поради кризата во Украина, но и од падот на цената на нафтата на светскиот пазар.

Риго предвидува дека Русија следната година ќе има пораст од 0,2 отсто.


Ставрески: 2014 година на економски план е успешна


Скопје, 13 декември, 2014 - 16:04 (META) 

На економски план, 2014 година е успешна, а тоа го потврдуваат последните објавени статистички податоци, кои бележат намалување на невработеноста и пораст на македонската економија, изјави денеска вицепремиерот на Владата и министер за финансии, Зоран Ставрески, пренесуваат медиумите.

– Невработеноста е намалена на историски најниско ниво од 27,9 отсто, а македонскиот БДП расте со стапка од 4,1 отсто што е меѓу трите највисоки во Европа. Во услови кога во европската економија имаме стагнација, ова е исклучително добар резултат и потврда дека економските политики се добро поставени. Пред сè, мислам на поддршката што македонското стопанство ја добива од Буџетот за реализација на крупни инфраструктурни проекти, со што
градежништвото и индустријата можеа да остварат добри економски резултати, како и поддршката од кредитната линија што ја обезбедивме со субвенционирана камата од 5,5 отсто, од која средства користат стотици македонски фирми што им помогна да остварат добри резултати и, трето, тоа е работењето на странските компании во слободните индустриски зони – изјави Ставрески.


Абот: На светот му се потребни два билиони долари за БДП


Бризбен, 15 ноември, 2014 - 16:54 (META) 

Премиерот на Австралија, Тони Абот, е уверен дека лидерите на Г20 ќе го исполнат ветувањето за издавање дополнителни 2.000 милијарди (2 билиони) долари за глобалниот домашен бруто-производ (БДП).

Според Абот, тоа ќе овозможи слободна трговија и зголемување на инвестициите во инфраструктурата.

Абот, кој е домаќин на дводневниот самит Г20 најразвиени земји во светот, рече дека би требало во следните пет години да се отворат неколку милиони нови работни места во светот и оти глобалниот БДП ќе се зголеми за повеќе од два отсто во тој период.

– Очекуваме неколку милиони нови работни места. Сакаме уште послободна трговија и уште поголема инфраструктура – рече Абот.

Земјите Г20, кои претставуваат 85 проценти од светската економија, се наоѓаат под притисок конечно да преземат конкретни мерки бидејќи, според аналитичарите, собирите на овие земји често завршуваат со „нејасно одредени цели“.


Хрватска и официјално со најлоши економски прогнози во ЕУ


Брисел, 4 ноември, 2014 - 13:09 (META) 

Хрватска има најлоши економски прогнози од сите членки во Европска Унија, се наведува во есенските прогнози на Европската комисија, а прогнозираниот пад на домашниот бруто-производ (БДП) е зголемен од 0,6 на 0,7 отсто за оваа година.

Зголемена е и процената на стапката на невработеност, од минатогодишните 17,3 отсто на 17,7 отсто, јавуваат хрватските медиуми.

Европската комисија најдобра оцена даде за ирската економија, предвидувајќи пораст од 4,6 отсто во 2014 година. Очекуваниот пораст на ниво на 28 земји-членки на ЕУ изнесува 1,3 отсто, додека во земјите од еврозоната е 0,8 отсто.

БДП во Хрватска би требало да порасне дури во текот на следната година и тоа за 0,2 отсто, што, исто така, е намалена процена во однос на претходната прогноза од 0,7 отсто. Во 2016 година ЕК очекува раст на хрватскиот БДП за 1,1 отсто.

Хрватскиот јавен долг годинава би можел да достигне 81,7 отсто од БДП, следната година 84,9 отсто, додека во 2016 година тој би изнесувал 89 отсто од БДП. Минатата година јавниот долг на Хрватска изнесуваше 75,7 отсто, но годинава порасна поради загубите на двете најголеми државни претпријатија, како и поради зголемениот буџетски дефицит.

Според комисијата, лошите прогнози за Хрватска се темелат на големите акумулирани надворешни и внатрешни нерамнотежи, слабото бизнис-опкружување и пазарот на труд.