!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ЕБРД ја намали проекцијата за порастот на домашниот БДП од 3,2 на 2,1 отсто


Лондон, 4 ноември, 2016 - 9:53 (META) 

Европската банка за реконструкција и за развој (ЕБРД) ја намали прогнозата за Македонија за порастот на домашниот бруто-производ (БДП) на 2,1 отсто од 3,2 проценти проектирани во мај, што е резултат на влијанието на политичката криза во државата.

„Во 2016 година голема е веројатноста да има значителен пад на БДП на 2,1 отсто, но веројатно ќе се врати на 3 проценти во 2017 година кога ќе се продолжи со инвестициите и со стабилната потрошувачка“, се вели во последниот регионален извештајот на ЕБРД за економски просперитет на државите.

Во мај банката прогнозираше дека порастот на БДП на земјава ќе се движи од 3,2 до 3,5 процнети.

Во извештајот, исто така, се вели дека на 11 декември ќе се одржат избори кои ќе влијаат на завршување на политичката криза, која, како што се наведува, трае од јануари 2015 година.

Вчера и Народната банка во своите октомвриски макроекономски проекции излезе со предвидување за пораст на БДП на 2,3 проценти.


Ново задолжување од 61,3 милиони евра кај домашните банки


Скопје, 1 ноември, 2016 - 9:54 (META) 

Државата денеска ќе се задолжи со 61,3 милиони евра кај домашните банки и осигурителни компании.

Според Министерството за финансии, околу 10,5 милиони евра од вкупната сума се со рок на достасување од шест месеци, 39,9 милиони евра доспеваат за една година, 5,5 милиони евра за две години, а 5,7 милиони евра за 15 години.

Врз основа на доспеани обврски, утре државата треба да врати 49,26 милиони евра, а за четири дена уште 12,21 милион евра.

Министерството за финансии вчера објави дека со третиот квартал од годинава јавниот долг достигна 4,76 милијарди евра, што е 50,6 отсто од домашниот бруто-производ (БДП).

Дополнителниот заменик-министер за финансии, Кире Наумов, реагираше дека владината политика на континуирано задолжување ги турка сегашните и идните генерации во должничко ропство.


Наумов: Јавниот долг ги надмина критичните 50 проценти од БДП


Скопје, 31 октомври, 2016 - 15:40 (META) 

Министерот за финансии, Кирил Миноски, и официјално објави дека јавниот долг изнесува 4 милијарди и 760 милиони евра или 50,6 проценти од домпашниот бруто-производ (БДП), се вели во соопштението од кабинетот на дополнителниот заменик-министер за финансии, Кире Наумов.

– За само девет месеци, јавниот долг е зголемен за 532 милиони евра. Во текот на 2016 година, јавниот долг дневно се зголемувал за 2 милиони евра. Владината политика на континуирано задолжување ги втурна сегашните и идните генерации во должничко ропство – се додава во соопштението.

Во него, исто така, се вели дека иако црвениот аларм е одамна вклучен и веќе требаше да почне долго најавуваната фискална консолидација, министерот Миноски за утре распиша ново задолжување на домашниот пазар на износ од 61,5 милиони евра.


Глобалниот долг на историски највисоко ниво


Њујорк, 6 октомври, 2016 - 13:24 (META) 

Меѓународниот монетарен фонд (ММФ) е загрижен поради проблемот со зголемување на глобалниот долг, кој достигна 225 отсто од светскиот домашен бруто-производ (БДП), што може да доведе до нова финансиска криза.

Бруто-долгот во нефинансискиот сектор номинално е повеќе од двојно зголемен од почетокот на овој век, достигнувајќи 152 милијарди долари со тренд на зголемување, наведува ММФ во своето најново полугодишно издание на „Фискален монитор“, пренесува агенцијата „Блумберг“.

Овој износ ги вклучува долговите на владите, нефинансиските компании и на домаќинствата.

– Со удел од 225 проценти од светскиот БДП, глобалниот долг моментно е на рекордно ниво на сите времиња. Две третини, односно околу 100 милијарди долари, ги сочинуваат обврските на приватниот сектор, кој може да донесе огромни ризици кога ќе достигне некое претерано ниво – предупредува ММФ.


Светска банка ни предвидува економски пораст од само 2 проценти, најмал во регионот


Скопје, 27 септември, 2016 - 11:32 (META) 

Економскиот пораст во Македонија се очекува да забави и да достигне ниво од само 2 проценти во 2016 година под влијание на намалувањето на инвестициите, се вели во најновиот економски извештај на Светска банка за Југоисточна Европа, кој денеска беше презентиран во Скопје.

– Првпат по шест години, инвестициите имаа негативен придонес во економскиот пораст, што е спротивно на земјите од регионот. Потрошувачката стана главен двигател на порастот, поддржана од вработувањата и од повисоките јавни плати и трансфери – изјави Бојан Шимбов, економист во канцеларијата на Светска банка во Македонија.

Порастот, главно, се должел и на градежништвото кое се зголемило за 19,3 проценти на годишно ниво, кое било поддржано од јавните инвестиции, а кои, пак, од друга страна, имале влијание и врз зголемување на јавниот долг.

Во извештајот е нотирано дека невработеноста и понатаму се намалува, но невработеноста кај младите се зголемила повеќе од 50 проценти и покрај владините програми за унапредување на вработеноста кај младите.

Шимбов истакна дека оваа година се намалила и стапката на активно работно население што би значело дека тие што биле долгорочно невработени или се откажале од барањето работа или има тренд на иселување од земјата.

89 проценти од новоотворените места се со фискална стимулација, односно поддршка од државата, што на среден рок е притисок врз пензискиот фонд. Во последните години, 45 проценти од приходите во пензискиот фонд се од буџетот, што подразбира негова голема зависност од државата.

И оваа  година има изостанување на фискалната консолидација, што влијае врз зголемување на буџетскиот дефицит и на јавниот долг.

– Фискалниот дефицит се зголеми од првично буџетираните 3,2 проценти од домашниот бруто-производ (БДП) на 4,1 отсто поради поголемите трошења на плати, пензии и социјални трансфери отколку првично буџетираните, како и поради прилагодување на потрошувачката поврзана со справување со поплавите – додаде Шимбов.

Директорот на канцеларијата на Светска банка во Македонија, Марко Мантованели, истакна дека е важно за што се трошат парите од задолжувањата и очекува разврска на кризата, поголема стабилност и почнување на процесот на привлекување инвестиции.

Во поглед на земјите од регионот, за Албанија е предвиден пораст од 3,2 проценти, за БИХ – 2,8 проценти, Косово – 3,6 проценти, Црна Гора – 3,2 проценти и за Србија – 2,5 проценти.

За следната година, Светска банка предвидува пораст од 3,3 проценти, под услов да се одржат избори и да се формира стабилна влада.


Пратениците денеска на пленарна седница ќе расправаат за предлог-ребалансот на буџетот


Скопје, 19 септември, 2016 - 9:56 (META) 

Собранието денеска во рамки на 117. седница треба да почне расправа за новиот ребаланс на буџетот за 2016 година, кој се предлага за да се обезбедат 36,4 милиони евра за целосно обесштетување на штетите од поплавите од 6 август годинава.

Со новиот ребаланс на буџетот, дефицитот ќе се зголеми од 3,6 на 4 проценти од домашниот бруто-производ (БДП) и од 344,4 милиони евра се зголемува на 375,9 милиони евра.

Опозицијата има различно видување од власта за тоа од каде треба да се обезбедат парите за обесштетување без да се зголеми дефицитот во буџетот и според нив, Владата ќе требаше да се откаже само од 1,2 отсто од вкупните расходи во буџетот и ќе ги обезбедеше овие пари.


СДСМ: За подобар живот на граѓаните потребен е пораст на БДП поголем од 5 проценти


Скопје, 9 септември, 2016 - 17:14 (META) 

„Мизерниот животен стандард на граѓаните го потврди и Државниот завод за статистика со само 2,2 проценти пораст на домашниот бруто-производ (БДП). Од 2007 година, поради недомаќинското водење на економијата од страна на неодговорната власт, просечниот пораст на БДП е заглавен на ниво од три проценти, што е премалку за подобрување на животниот стандард на граѓаните“, се вели во соопштението на СДСМ.

Во него, исто така, се додава дека како резултат на „промашените економски политики“, државата денеска се соочува со брзорастечки јавен долг, забавен економски пораст, домашна неликвидност и намален меѓународен рејтинг.

– На Македонија ѝ се потребни и економски промени преку просечни стапки на економски пораст поголем од 5 проценти, кои ќе ги постигнеме преку структурни реформи и промена на структурата на домашниот бруто-производ. Преку поврат на дел од данокот на додадена вредност (ДДВ) кон граѓаните, ќе воведеме сегментиран државен стимул кај граѓаните со понизок доход, со што вистински ќе се стимулира потрошувачката компонента на БДП – се вели во соопштението на СДСМ.

Од опозициската партија додаваат дека ќе работат на зголемување на инвестицискиот потенцијал во приватниот сектор, со што ќе ги зголемат бруто-инвестициите како важна компонента на БДП.


БДП се зголеми за 2,2 отсто во второто тримесечје


Скопје, 9 септември, 2016 - 14:12 (META) 

Стапката на пораст на домашниот бруто-производ (БДП) за второто тримесечје годинава изнесува 2,2 проценти, објави Државниот завод за статистика.

Најголем пораст е забележан во секторите градежништво, од 31 процент, стручни, научни и технички дејности, административни и помошни услужни дејности, од 11,5 проценти, и финансиски дејности и дејности на осигурување од 4,9 проценти.

Во истиот период, извозот на стоки и на услуги номинално се зголеми за 4,2 проценти, а увозот на стоки и на услуги забележа зголемување во номинален износ од 6,6 проценти.


Јавниот долг на Македонија достигна 6,7 милијарди евра


Скопје, 30 август, 2016 - 13:55 (META) 

Во првиот квартал од годината, надворешниот бруто-долг изнесува 6.707, 4 милиони евра или 70,9 проценти од домашниот бруто-производ (БДП), што претставува пораст од 1,1 процентен поент од домашниот бруто-производ на квартална основа, објави Народна банка.

Споредено со крајот на првиот квартал на 2015 година, надворешниот бруто-долг се зголемил за 1,8 процентни поени од домашниот бруто-производ, во услови на пораст на јавниот и на приватниот долг.

– Годишниот пораст на јавниот долг во најголем дел е предизвикан од порастот на долгот на државата поради емисијата на четвртата еврообврзница во декември 2015 година и понатамошниот пораст на долгот на јавните претпријатија за поддршка на патната инфраструктура. Кај приватниот долг, порастот најмногу се должи на заемите помеѓу поврзани субјекти, односно забележан е значителен пораст на меѓукомпанискиот долг – се вели во кварталниот извештај на Народна банка.

Во него се додава дека показателите за надворешната задолженост на домашната економија и понатаму покажуваат дека надворешниот бруто-долг се наоѓа во „безбедната зона“.

– Единствен показател според кој економијата се класифицира во групата на високо задолжени земји претставува учеството на надворешниот бруто-долг во домашниот бруто-производ – се додава во извештајот.


СДСМ: Богов призна дека јавниот долг достигнал 50 отсто од БДП


Скопје, 31 јули, 2016 - 14:02 (META) 

Опозициската партија СДСМ денеска излезе со соопштение во кое се наведува дека гувернерот на Народната банка, Димитар Богов, во синоќешното интервју за телевизијата „Алфа“ ги потврдил нивните тврдења дека со издавањето на еврообврзницата јавниот долг на Македонија изнесува 50 проценти од домашниот бруто-производ (БДП).

„Признанието на Богов е директна потврда на тврдењата на СДСМ. Со ова Богов ги разобличи манипулациите на Миновски кој еден ден претходно на веб-страницата на Министерството објави намалување на јавниот долг. Власта на Груевски со најновото задолжување од 450 милиони евра преку еврообврзницата го зголеми јавниот долг на историски највисоко ниво досега“, велат од СДСМ.

Од партијата истакнуваат дека сите инволвирани во издавањето на незаконската еврообврзница и во другите неразумни задолжувања што влијаат на зголемување на јавниот долг на 50 отсто од БДП, ќе одговараат.