НБРМ ја задржува каматната стапка на благајничките записи од 2,75 проценти


Скопје, 12 септември, 2018 - 10:49 (META) 

Комитетот за оперативна монетарна политика на Народна банка оцени дека монетарната поставеност е соодветна на постојните економски и финансиски услови, при што одлучи да ја задржи каматната стапка на благајничките записи на нивото од 2,75 проценти, информираат од Народна банка.

„Споредбата на последните макроекономски показатели за домашната економија со нивната проектирана динамика од априлскиот циклус проекции упатува на одредени отстапувања во одделни сегменти од економијата. Согласно со објавените проценети податоци, по слабиот раст во првиот квартал, во второто тримесечје, растот на БДП значително забрза на 3,1 проценти, што сепак е нешто пониско остварување во споредба со проекцијата. За третиот квартал, при ограничен обем на расположливи податоци, засега не може да се даде попрецизна оцена за состојбата во економијата, но сепак, најголемиот дел од податоците упатуваат на продолжување на поповолните движења во економијата и во овој квартал од годината“, се вели во соопштението на Народна банка.


Анѓушев: Изградбата на автопатиштата и железницата ќе го раздвижат градежништвото


Скопје, 10 септември, 2018 - 10:24 (META) 

Вицепремиерот за економски прашања Кочо Анѓушев рече дека зголемениот домашниот бруто-производ (БДП) од 3,1 проценти се должи на влијателните фактори како што се индустријата, градежништвото, земјоделството и трговијата, каде што се бележи најголем пораст.

– Во делот на градежништвото кога имавме пад од 40 проценти, БДП беше зголемен за 0,1 процент во првиот квартал. Градежништвото се уште има помали резултати во споредба со минатата година од 20 отсто, а веќе имаме 3,1 зголемен БДП во споредба со првиот квартал. Градежните проекти ги ставаме во колосек. Главните проекти се автопатиштата Кичево – Охрид, Миладиновци – Штип и новите кои почнаа да се градат како и железницата кон Бугарија и гасоводот, во кои што проекти има една милијарда евра. Тоа се проекти кои ќе го раздвижат градежништвото – појасни Анѓушев и нагласи дека со нивна реализација се очекува дополнително зголемување  на БДП.


Економијата закрепнува, пораст од 3,1 процент на БДП во вториот квартал


Скопје, 6 септември, 2018 - 17:14 (META) 

Стапката на пораст на бруто-домашниот производ (БДП) за второто тримесечје од 2018 година е 3,1 проценти, објави Државниот завод за статистика.

Финалната потрошувачка на домаќинствата, вклучувајќи ги непрофитните институции кои им служат на домаќинствата, во второто тримесечје од 2018 година, номинално расте за 3,2 проценти, а нејзиното учество во структурата на БДП изнесува 69,6 проценти.

Во истиот период, извозот на стоки и на услуги номинално се зголеми за 13 проценти, а увозот на стоки и на услуги забележа зголемување во номинален износ од 6,6 проценти.

БДП во првиот квартал годинава, имаше пораст од само 0,1 процент.


СКМ ќе ги поттикнува компаниите да аплицираат за државна помош


Скопје, 6 август, 2018 - 12:35 (META) 

Од Стопанска комора на Македонија следниот период ќе ги посетат компаниите кои сметаат дека ги исполнуваат условите за да добијат финансиска помош од државата согласно Законот за финансиска поддршка, во првиот и вториот столб на мерки.

Согласно податоците од Владата, лани 600 компании имале зголемен профит, вработувања и инвестиции, од нив 182 аплицирале за државна помош, а 100 потпишаа договори за државна помош.

„Не е лоша бројката од 182 компании, но е далеку од доволна. Има успешни компании кои спроведуваат инвестиции, остваруваат профити, имаат вработувања. Критериумите за аплицирање се јавни и транспарентни и ги опфаќаат сите производствени компании кои создаваат профит“, рече Љупка Трајковска од Стопанска комора на Македонија.

Таа додаде дека забелешки во однос на законското решение за државна помош нема, критериумите се транспарентни и базирани на податоци на Централен регистар, останува само доследно реализирање согласно роковите и почитување на одредбите од законот.

Трајковска потенцираше дека се чувствува постоење на јавно-приватен дијалог и тридецениските барања од приватните компании се инкорпорирани во законот.

Целта е, како што истакна, зголемување на учеството на индустријата во креирањето на домашниот бруто-производ, бидејќи процентот на учество во 1992 година изнесувал 32 проценти, а во 2016 година 15 проценти.

Стопанска комора издаде и брошура „Време за промена на досегашниот модел на економски развој“ во кој има предложени мерки за економски пораст, а дел од тие мерки биле инкорпорирани и во новиот закон.


НБРМ: Слаба приватна потрошувачка, пад на инвестициите и минимален пораст на БДП


Скопје, 11 јули, 2018 - 12:03 (META) 

Домашниот бруто-производ (БДП) во првиот квартал на годината имал минимален раст, што е под проектираното движење, било констатирано на редовната седница на Комитетот за оперативна монетарна политика на Народна банка.

Ваквата состојба, велат од НБРМ е одраз на послабиот раст на приватната потрошувачка и поголемиот пад на инвестициите.

„Ваквите отстапувања создаваат и надолни ризици за проектираниот раст за целата 2018 година од 3,2 отсто. Расположливите податоци за вториот квартал не се многубројни и воедно се дивергентни, но главно упатуваат на нешто поповолна состојба во економијата во споредба со првиот квартал. На ваква констатација упатува прометот во трговијата, чиј што раст е нешто посилен во однос на првиот квартал, значителното забавување на падот на вредноста на извршените градежни работи, како и подобрувањето на показателот за економската доверба“, се вели во соопштението на НБРМ.

Во однос на движењето на стапката на инфлација, според податоците за јуни, просечната годишна стапка на инфлација во првата половина од годината изнесува 1,5 отсто, при што и натаму се движи под нивото од априлската проекција.


„Фајненс тинк“: Потребни се мерки за поттикнување на инвестициите и извозот


Скопје, 8 јуни, 2018 - 15:38 (META) 

Економскиот пораст од само 0,1 процент во првиот квартал од годинава се должи на тоа што лани економијата во целост била ставена во заден план, сметаат од Институтот за економски истражувања и политики „Фајненс тинк“.

Оттаму посочуваат дека, на позитивната страна, извозот продолжува да расте со слично темпо како и претходно, главно воден од активностите во економските зони, додека на негативната страна, падот кај бруто-инвестициите продолжува да биде значаен (-9 проценти), додека падот во градежништвото е рекорден досега (-37,2 проценти).

„Особено е загрижувачки што раст нема во првиот квартал годинава, дури и при многу ниска споредбена основа од 2017 година (кога растот изнесуваше 0 отсто)“, велат од таму.

Според „Фајненс тинк“, главните двигатели на отсуство на растот, се запирањето или забавувањето на важните инфракструктурни проекти и забавеноста во реализацијата на странските инвестиции.

„Дополнително загрижува растот на потрошувачката на домаќинствата (2,3 отсто), во услови на пораст на платата кај сегменти од населението кои се повеќе склони кон потрошувачка“, посочуваат од Институтот.

Од „Фајненс тинк“ сметаат дека, сега од кога било претходно е потребен владин фокус врз економијата и повторно зажувување на растот. Фокусот, како што наведуваат, мора да биде ставен врз тоа како да се креира нова вредност во економија, главно преку мерки за поттикнување на домашните и странските инвестиции и извозот.


Мицкоски: Македонија е на дното во Европа по економскиот пораст


Скопје, 7 јуни, 2018 - 16:06 (META) 

Денеска Државниот завод за статистика повторно ја потврди лошата економска политика на СДСМ, вели лидерот на ВМРО-ДПМНЕ, Христијан Мицкоски во неговото видео-обраќање.

Тој додава дека со пораст на домашниот бруто-производ од 0,1 отсто „убедливо сме на дното“.

„Притоа, од приходна страна, пад од цели 37 отсто забележува градежниот сектор, што всушност и ја отсликува не-работата на Владата. Немањето на сопствени проекти и стопирањето на проектите од претходната Влада негативно влијаат врз македонската градежна оператива и македонската економија во целост“, вели Мицкоски.

Тој додава дека, дополнително, пад од седум отсто забележува просперитетниот сектор на информации и комуникации, за кој, како што вели СДСМ во својата кампања посветил големо внимание.

„Од расходна страна, падот повторно е алармантен кај бруто-инвестициите. Имено во првиот квартал од 2018 година, бруто-инвестициите забележуваат пад од 9 отсто, со што продолжува политиката на деинвестирање, својствен за СДСМ. Дополнително исполнувањето на капиталните инвестиции од само 7,4 отсто во првиот квартал од 2018 година придонесе јавната потрошувачка негативно да влијае врз БДП, односно да забележи пад од 1,4 отсто“, додаде Мицкоски.

Тој направи споредба со економиите во регионот и вели дека растот во првиот квартал во соседна Србија е за 46 пати поголем од тој за истиот период во Македонија.

„Слична е ситуацијата и во Бугарија. За 35 пати поголем раст има соседна Бугарија отколку што имаме ние во првиот квартал од 2018 година. Хрватска 25 пати, Полска, пак е рекордер каде што БДП во првиот квартал од 2018 година е за 51 пат повеќе од истиот во Македонија за истиот период во 2018 година“, додава Мицкоски.

Од СДСМ реагираа на видео-обраќањето на Мицкоски и велат дека „економијата се опоравува од пустошот и штетите што ги предизвика криминалното владеење на ВМРО-ДПМНЕ.“

„Преземените мерки од Владата ги санираат штетите и ја поставуваат економијата на здрави и реални основи. Нема веќе провизии и проценти за криминални, измислени и нереални проекти. Податоците од Државниот завод за статистика го покажуваат токму тоа. Во првиот квартал од оваа година забележан е раст во сите сектори, освен во нискоградбата. Причината за тоа се должи на запирањето на активностите на промашените, криминални прoекти на власта на ВМРО-ДПМНЕ, како автопатот Кичево – Охрид но и некои други патишта, каде што имаше огромни пропусти. По моменталниот застој, изградбата на автопатите ќе продолжи реално и правилно и тоа наскоро ќе рефлектира со раст и во делот нискоградбата со што ќе се интензивира и растот на БДП, кој на крајот ќе биде во рамките на предвиденото“, велат од СДСМ.


Во првиот квартал, БДП со пораст од 0,1 отсто


Скопје, 7 јуни, 2018 - 12:32 (META) 

Домашниот бруто-производ во првиот квартал годинава забележал стапка на пораст од 0,1 процент, објави Државниот завод за статистика. 

Во првото тримесечје од 2018 година, најголем пораст е забележан во секторите уметност, забава и рекреација од 12,1 отсто, трговија на големо и трговија на мало, поправка на моторни возила и мотоцикли, транспорт и складирање, објекти за сместување и сервисни дејности со храна од 10,5 отсто и стручни, научни и технички дејности, административни и помошни услужни дејности од 8,5 отсто.

Финалната потрошувачка на домаќинствата, вклучувајќи ги непрофитните институции кои им служат на домаќинствата, во првото тримесечје од 2018 година, номинално растел за  четири отсто, а нејзиното учество во структурата на домашниот бруто- производ изнесува 64,3 отсто.


Експерти од Светска банка прават анализи ќе понудат различни модели на оданочување


Скопје, 11 април, 2018 - 13:00 (META) 

Светска банка смета дека Владата оди во добра насока со заложбите за воведување на прогресивен данок, имајќи ги предвид податоците за приходната страна на буџетот.

При презентацијата на редовниот економски извештај за Западен Балкан, на новинарско прашање, дали Светска банка смета дека прагот од 1.000 евра за воведување на прогресивен данок е добар,  директорот на Канцеларијата на Светска банка во Македонија, Марко Мантованели, рече дека тој праг детално треба да се разгледа.

– Министерство за финанасии оди во правилна насока, имајќи ги предвид податоците за приходите денес, но прагот треба дополнително да се разгледа – изјави Мантованели.

Тој додаде дека вкупните приходи се со низок процент на учество во домашниот бруто-производ (БДП).

– Рамниот данок има предности и неповолности, и е поголемо оптоварување за сиромашните – додаде Мантованели.

Според Светска банка, резултатот од рамниот данок врз македонската економија е константно намалување на приходите и поради тоа сме таму каде што сме.

Во 2016 и 2017 година имало намалување на приходната страна, а исклучок бил данокот на добивка на данокот на капитал.

– Има можност за зглемување на оданочувањето на капиталот, данок кој би бил таргетиран, а не да се однесува на општата популација – изјави економистот во канцеларијата на Светска банка во Македонија, Бојан Шимбов.

Во однос на даночните реформи во државата, од Светска банка велат дека тим од експерти од Вашингтон ја разгледуваат даночната политика и ќе понудат различни модели, како и објаснување и како ќе влијаат врз различни групи даночни обврзници.

Студијата наскоро ќе биде објавена од Светска банка и ќе биде презентирана пред јавноста.


Да се искористи потенцијалот за економска соработка со Турција, порача Заев


Скопје, 15 март, 2018 - 11:43 (META) 

Во Македонија веќе работат сериозен број на турски компании кои плаќаат плата на вработените, плаќаат даноци во буџетот и учествуваат во севкупното производство и во извозот, рече премиерот Зоран Заев по состанокот со компаниите членки на Стопанска комора Македонија – Турција, МАТТО.

Тој додаде дека уште повеќе треба да се зголемува бројот на турски инвестиции и да се искористи големиот потенцијал за соработка што двете земји го имаат.

„Импресионирани од мотивацијата која што ја добивме од неодамнешната посета на Турција, наша заедничка должност е да разработиме конкретни проекти и активности кои за деловната заедница ќе значат бизнис и повеќе профит, за Република Македонија нови работни места, зголемување на БДП и севкупниот извоз“, изјави Заев.

Тој ги информирал компаниите за можностите што ги отвора Планот за економски раст и законското решение кое што помина на владина седница. Заев очекува дека стопанствениците ќе ги пронајдат своите можности за инвестирање преку поддршката што ја овозможува овој План и ќе преземат храбри чекори за нови инвестиции во Македонија.

На средбата со компаниите присуствувале и министерот без ресор задолжен за странски инвестиции, Аднан Ќахил и советникот за економија и финансии, Фатмир Бесими.