!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Пучдемон и министрите се предале на белгиската полиција


Брисел, 5 ноември, 2017 - 14:29 (META) 

Според медиумите во Белгија, сменетиот претседател на каталонската влада, Карлес Пучдемон, ѝ се предал на полицијата. Освен Пучдемон, уапсени се и четворицата министри со кои тој пребега во Белгија, откако шпанските власти наредија апсење на неговиот кабинет.

Обвинителството во Брисел за денеска најави дополнителни информации за ектрадицијата на Пучдемон и на министрите во Шпанија.

По поранешниот каталонски лидер, властите во Мадрид распишаа европска потерница. Десет од поранешните министри во кабинетот на каталонската влада се во затвор, а еден е пуштен со кауција да се брани од слобода.


Шпанскиот премиер ја распушти каталонската влада


Мадрид, 27 октомври, 2017 - 21:42 (META) 

Премиерот на Шпанија, Маријано Рахој, вечерва соопшти дека ја распушта владата на регионот Каталонија, откако регионалниот парламент прогласи „Каталонска Република“, односно независност од Шпанија, јавија светските медиуми.

Парламентот на Каталонија исто така е распуштен, според гласањето на Сенатот на Шпанија, кој изгласа овластувања за шпанската влада да преземе директна контрола врз сепаратистичкиот регион, односно ја укина автономијата и им ги одзеде овластувањата на сепаратистичките водачи на Каталонија.

Парламентот е распуштен, а новите избори ќе се одржат на 21 декември, рече премиерот на Шпанија.

Централната влада ќе го преземе управувањето со регионот поради, како што рече Рахој, „враќање во нормала“.


Светот глув на прогласувањето независност на Каталонија


Скопје, 27 октомври, 2017 - 19:58 (META) 

Србија, САД, Германија и Франција денеска соопштија дека ја поддржуваат владата на Шпанија и не го поддржуваат прогласувањето независност на Каталонија.

Српскиот министер за надворешни работи, Ивица Дачиќ, рече дека за Србија објавувањето на независноста на Каталонија нема правен легитимитет.

– Србија го поддржува шпанскиот територијален интегритет и оваа акција не е во согласност со шпанскиот устав – рече тој.

Министерот за надворешни работи на Србија не пропушти да каже дека има „сличности“ меѓу „едностраното дејствување на Приштина“ и објавувањето на независноста на Каталонија.

Американскиот Стејт департмент денеска соопшти дека ја поддржува Шпанија и е против отцепувањето на Каталонија. Официјален Вашингтон смета дека Каталонија е интегративен дел од Шпанија и ја поддржува Владата во напорите таа да остане единствена.

Според портпаролот на германската влада, Штефен Зајберт, потегот на Каталонија претставува кршење на принципите на суверенитет и на територијален интегритет на Шпанија.

– Германската влада не ја признава оваа декларација за независност. Берлин има јасен став дека го поддржува премиерот Маријано Рахој во обидите да поврати мир и ред – изјави Зајберт.

Слична изјава дојде и од Париз.

– Единствениот соговорник на мојата влада и на мене лично во Шпанија е Маријано Рахој. Ние нема да се мешаме, затоа што ова е внатрешно прашање на Шпанија – изјави францускиот претседател Емануел Макрон.


Сенатот на Шпанија ја укина автономијата на Каталонија


Мадрид, 27 октомври, 2017 - 17:01 (META) 

Кратко откако попладнево парламентот на Каталонија прогласи независност, Сенатот на Шпанија изгласа овластувања за шпанската влада да преземе директна контрола врз сепаратистичкиот регион, односно ја укина автономијата и им ги одзеде овластувањата на сепаратистичките водачи на Каталонија.

С0 214 гласа „за“ и 47 „против“, Сенатот за Шпанија се повика на членот 155 од Уставот на Шпанија и му даде вонредни овластувања на премиерот Маријано Рахој да постапува во однос на сепаратистичките постапки на регионалната власт на Каталонија.

„Владеењето на правото ќе ја врати легалноста во Каталонија“, напиша Рахој на „Твитер“.

 


Масовен протест во Барселона против отцепувањето на Каталонија од Шпанија


Барселона, 8 октомври, 2017 - 17:26 (META) 

Стотици илјади лица денеска излегоа на улиците на Барселона за да протестираат против плановите на регионалната каталонска влада да се отцепи од Шпанија.

Ова е најмасовниот протест против отцепувањето на просперитетниот регион од Шпанија, што ја доведе оваа европска земја на раб на национална криза.

Барселонската полиција соопшти дека на протестот учествувале околу 350.000 луѓе, додека организаторите на протестот, „Каталонското цивилно општество“, велат дека присуствувале околу 930.000 лица.

Присутните на протестот, кој се одржа под мотото „Доста е! Да се вразумиме!“, носеа шпански и каталонски знамиња и транспаренти, на кои беше испишано „Каталонија е Шпанија“ и „Заедно сме посилни“.

– Каталонија и Шпанија се обединети пет векови. Никој и ништо не може да ги раздели – рече писателот нобеловец Марио Варгас Љоса, истакнувајќи дека денешниот протест е доказ дека голем број Каталонци се против независноста и превратот и дека ги поддржуваат Уставот, законите и правната држава.

Минатата недела во Каталонија се одржа референдум за независност, кој Уставниот суд на Шпаија го прогласи за нелегален. Референдумот мина во знакот на полициско насилство и со голем број повредени цивили и полицајци. Европската комисија во понеделникот соопшти дека референдумот за независност на Каталонија од Шпанија е нелегален, особено зашто излезноста била помала од 50 отсто.


Дури 460 луѓе биле повредени од полицијата, тврди каталонската влада


Барселона, 1 октомври, 2017 - 22:07 (META) 

Во акцијата на шпанската полиција во Каталонија да го спречи референдумот за независност на оваа покраина, се користеше и директно физичко насилство и пендреци и гумени куршуми, јавуваат медиумите.

Во пресметката што се случуваше кога на гласачките места полицијата интервенираше за да го одземе гласачкиот материјал, а граѓани се спротивставуваа, се повредени најмалку 460 цивили и 11 полицајци.

Полицијата дејствуваше по наредба на шпанската влада, откако шпанскиот Уставен суд го прогласи референдумот за нелегален.

Откако гласачките места беа затворени во 20 часот по локално време, шпанскиот премиер Маријано Рахој порача дека Каталонците биле заведени да гласаат на нелегален референдум.

Проблемот со Каталонија, богатиот североисточен регион со 7,5 милиони луѓе, ја втурна Шпанија во најголемата политичка криза уште од времето на судирите со баскиската ЕТА.

Шпанија жестоко одговори на обидот да се организира референдум, со полиција што брутално се нафрли на демонстрантите кои сакаа да ги „осигураат“ гласачките места, преку користење пендреци, жива сила и гумени куршуми.

Во училиштето „Пау Кларис“ во Барселона, според снимката од еден гласач, полицијата многу насилно отстранува луѓе од нејзиниот пат, во еден случај влечејќи лице за коса, а во друг случај туркајќи ги низ скалите.


МНР: Нема повредени македонски државјани во инцидентите во Каталонија


Скопје, 1 октомври, 2017 - 16:52 (META) 

Македонското министерство за надворешни работи (МНР) до попладнево нема информации за повредени граѓани во судирите во Каталонија, каде се одржува референдум за независност, кој шпанската влада го прогласи за нелегален.

Како што соопшти МНР преку својот твитер-профил, досега ниту еден македонски државјанин не побарал помош од македонската амбасада во Шпанија. МНР е во редовен контакт со амбасадата, а сите македонски граѓани на кои им е потребна помош, може да се јават на телефонскиот број +34639255299.

Според неофицијални информации, во Шпанија има околу 1.000 македонски државјани кои престојуваат туристички или работат. Во Шпанија живеат и повеќе илјади бугарски државјани, а со оглед дека одреден број Македонци имаат бугарски пасош, можно е некои од нив при влез во земјата да го употребиле тој пасош.


Во акцијата на полицијата во Каталонија најмалку 38 лица се повредени


Барселона, 1 октомври, 2017 - 12:39 (META) 

Досега се регистрирани 38 повредени лица, најголемиот дел од нив со помали повреди, сооштија здравствените органи во Каталонија, додека во оваа шпанска покраина се случува масовна полициска акција со брутално насилство за да се спречи референдумот за осамостојување на Каталонија од Шпанија.

Каталонскиот водач Карлес Пуџдемон го осуди, како што рече, „неоправдливото насилство“ од шпанската држава.

Гласачкото ливче за референдумот има само едно прашање „Дали сакате Каталонија да стане независна држава, со републиканско уредување?“, под кое има два квадрати за штиклирање на одговорите „Да“ или „Не“.


Полицијата пука со гумени куршуми по граѓаните во Барселона


Барселона, 1 октомври, 2017 - 12:13 (META) 

Крвави судири се случуваат во Барселона помеѓу шпанската полиција и поборниците за независност на покраината Каталонија, откако полицијата изврши неколку брутални упади на избирачки мести и почна да се пресметува со граѓаните на улиците, а почна и да пука со гумени куршуми по луѓето. Според извештаите на светските медиуми, веќе има десетици ранети луѓе.

Демонстранти низ улиците на Барселона извикуваат „Ние сме луѓе на мирот“ и „Не се плашиме“. На голем број места во градот се забележливи амбулантни возила.

По претходните инциденти со полициски интервенции на гласачките места, каде се одржува референдумот за независност на Каталонија, кој шпанската власт го прогласи за нелегален, на улиците на Барселона, вториот најголем град во Шпанија, почнаа да се слушаат и истрели на гумени куршуми и испукување гранати со солзавец. Граѓаните поставуват метални бариери на улиците, а полицијата со комбија со засилени браници напред ги истуркува.

– Полицајците со пендреци ги тепаа луѓето кои седеа на улиците – вели еден учесник на големиот мирен протест во Барселона, кој почна да се омасовува по извештаите за полициските акции на гласачките места.

Но, не била насилна само полицијата. Многу демонстранти фрлале камења и други предмети кон металните бариери и кон полицајците.

Во акцијата се вклучени полицајци од цела Шпанија. На избирачкото место во колеџот „Џауме Балмес“ во Барселона, во судир со полицијата се повредени неколку лица. Полицијата во Каталонија насилно упаднувала на избирачки места и запленила гласачки ливчиња и кутии.
Националната полиција успеа да затвори околу 15 избирачки места и да заплени материјал за гласање.

 

 


Гласањето за независност на Каталонија почна со силна полициска интервенција


Барселона, 1 октомври, 2017 - 11:39 (META) 

Референдумот за независност во Каталонија утрово почна хаотично кога полицијата се обиде да ги затвори гласачките кутии, по наредба од шпанската влада. Полицијата ги спречува граѓаните да се доближат до местата за гласање и одзема материјали подготвени за гласање.

Во Џирона, полицијата насилно влезе во гласачко место каде требаше да гласа лидерот на Каталонија, Карлес Пуџдемон. Шпанската цивилна гарда влета на гласачкото место неколку минути пред каталонскиот лидер Карлес Пуџдемон да гласа за референдумот за независност. Откако не можеше да гласа на регуларното гласачко место близу Сент Хулиа де Рамис, Пуџдемон гласаше во Корнела дел Тери, на 110 километри североисточно од Барселона.

Каталонската влада ги покани гласачите да гласаат на кое било избирачко место што е отворено во случај шпанската полиција претходно да го затворила нивното избирачко место. Во заштитата на правото на глас, учествува и цивилното население, кое со трактори и со автомобили ги штити гласачките места од полицијата. Организаторите на референдумот бараат мирен отпор на секоја полициска акција.