!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Уставен суд постави пречка Владата да прогласува објекти од посебен интерес


Скопје, 6 јули, 2017 - 11:22 (META) 

Уставниот суд вчера го укина членот 50 од Законот за просторно и урбанистичко планирање и од барок „ги спаси“, меѓу другите, Градскиот трговски центар, Универзитетската библиотека и Македонската опера и балет.

На вчерашната седница мнозинството судии гласале за укинување на членот 50 од Законот за урбанизам и просторно планирање, кој на Владата ѝ даваше можност да прогласи објекти од посебен интерес и за нив да ги одземе ингеренциите на општините.

Дури во април годинава, Уставниот суд одлучи да расправа за иницијативата за укинување на членот 50 од Законот.


СДСМ: Музеј на Македонија најдобро говори за односот на ВМРО-ДПМНЕ кон институциите


Скопје, 15 јуни, 2017 - 13:52 (META) 

„Состојбата со Музејот на Македонија, објект од историско и културно значење за граѓаните на Македонија, кој е целосно запуштен и руиниран, со урнати плафони и со мувлосани ѕидови, најдобро говори за тоа во каква состојба ВМРО-ДПМНЕ ги остави институциите и државата и како се однесуваше кон културното и историското наследство“, велат од СДСМ.

Во соопштението на владејачката партија се додава дека додека преку „криминалните тендери за градење лажен барок и споменици, кадрите на ВМРО-ДПМНЕ ги крадеа и ги трошеа парите на граѓаните, значајните културни институции и градбите од историско и културно значење беа занемарени и оставани да скапуваат и да се распаѓаат“.

Министерот за култура, Роберт Алаѓозовски, денеска на својот фејсбук-профил објави фотографии од штетите настанати од поплавата по вчерашното невреме.


СДСМ: Со новиот предлог-ребаланс на буџетот за владата барокот е пред граѓаните


Скопје, 20 август, 2016 - 14:54 (META) 

Наместо владата експресно да им излезе во пресрет на граѓаните обезбедувајќи ги потребните 33 милиони евра преку стопирање на крајно непотребната изградба на панорамското тркало и „Рајската градина“, како и пренамена на средствата во висина од 20 милиони евра веќе обезбедени од четвртата еврообврзница издадена кон крајот на 2015 година, таа скроила план за нови криминали тешки 232 милиони евра, се вели во соопштението на СДСМ.

Од опозициската партија бараат веднаш, без одложување да се прекине изградбата на овие, како што велат, смешни проекти и да се пренаменат средствата на граѓаните кои втора недела се оставени сами на себе.

– Со ребалансот, ставката депозити не само што не предвидува на крајот на годината да останат 167 милиони евра, туку предвидува во 2016 да бидат дополнително искористени уште 65 милиони евра. Владата глумејќи помош, наместо да вложи максимални напори да им помогне на настраданите граѓани, се обидува да си обезбеди 232 милиони евра за предизборни манипулации – се додава во соопштението на СДСМ.

 


Министерство за култура: На националните установи нема да им се менува фасадата


Скопје, 5 јули, 2016 - 20:08 (META) 

Министерството за култура најостро ги демантира информациите дека постојните фасади на националните установи Македонска опера и балет и Национална и универзитетска библиотека „Свети Климент Охридски“ во Скопје ќе добијат барокен изглед.

Од Министерството за култура овие информации ги оценуваат како паушални и невистинити и велат дека станува збор за национални установи чии објекти се изградени според конкретни идејни решенија во втората половина на минатиот век и нивниот изглед е автентичен, па поради тоа нема да има никаква промена на фасадите на овие објекти.

„Министерството за култура континуирано вложува во унапредување на условите во сите установи од областа на културата, а меѓу многубројните проекти, во моментов во тек е целосната обнова на големата сала во Македонската опера и балет, како и проектот за реконструкција на објектот на НУБ „Свети Климент Охридски“, како и целосна обнова на читалните во оваа установа“, пишува во соопштението на министерството.


„Го сакам ГТЦ“ повика на протест в среда заедно со „Шарена револуција“


Скопје, 4 јули, 2016 - 19:00 (META) 

„Оваа влада е целосно исклучена од реалноста. Дента кога ЕУ ги блокираше ИПА-фондовите и блокираше големи инфраструктурни проекти, како автопатот кај Демир Капија и пругата кон Бугарија, тие ѝ ги одзедоа надлежностите на Општина Центар за да потрошат нови десетици милиони евра на уништување на културно наследство. Со оваа влада нема разбирање, а „Скопје 2014“ може да се спречи само ако владата падне. Затоа, ги повикуваме сите наши поддржувачи да се приклучат на протестот на „Шарената револуција“ в среда. Покрај правда и слобода, од улица да се избориме и за нашиот ГТЦ!“, се вели во повикот кој го објави здружението „Го сакам ГТЦ“ на својот фејсбук-профил.

„Досега пробавме сè за да го заштитиме нашиот сакан ГТЦ. Го гушкавме, го браневме, му пеевме песни, правевме едукативни прошетки, издававме книги, обединивме стручна и општа јавност за негово зачувување. Што е најважно, минатата година организиравме референдум каде ГТЦ доби повеќе гласови од кој било политичар или партија претходно. Сепак, со инаетот на владата не може да се натпреваруваме. Во услови кога т.н. Триумфална порта се смета за културно наследство, а се притвораат активисти што ја шараат, како треба да реагираме на очигледноста на изиграните закони? Како системското уништување на еден град не е поголем вандализам од фрлањето боја?“, се вели во фејсбук-стаусот на „Го сакам ГТЦ“.


ВМРО-ДПМНЕ: Безидејноста и деструкцијата на СДСМ не поминуваат кај народот


Скопје, 4 јули, 2016 - 17:35 (META) 

„СДСМ единствено што знае и умее е да ја спроведува политиката на деструкција по наредба на аболираниот криминалец Зоран Заев. СДСМ – Сорос и нивните сателити се противеа на изградбата на жичарница на Водно. СДСМ – Сорос и нивните сателити се противеа на изградбата на арената „Филип Втори“, најавувајќи дека таа ќе се урне“, се вели во реакцијата на ВМРО-ДПМНЕ, на прес-конференцијата на потпретседателот на СДСМ, Дамјан Манчевски.

„СДСМ – Сорос и нивните сателити се противеа на изградбата на Плоштад Македонија кој носи неколкукратно повеќе туристи во главниот град. СДСМ – Сорос и нивните сателити беа против изградбата на новиот објект на Македонскиот народен театар, кој сега ги има најмодерните услови за сценски изведби на Балканот и пошироко, факт кој е признаен од сите театарски работници во регионот. СДСМ – Сорос и нивните сателити беа против изградбата на Музејот на македонската борба и десетици други градби кои се места што се препорачуваат во странски списанија и кои ги посетуваат илјадници туристи.
Од СДСМ – Сорос не се очекува ништо друго освен насилство, палење, ограбување на институции и деструкција. Граѓаните ги прочитаа намерите на единствената партија предводена од аболиран криминалец и организацијата која учествува во иницирање нереди во кои најголеми жртви се граѓаните. Затоа СДСМ – Сорос ќе бидат катастрофално поразени на следните избори. Безидејноста и деструкцијата не поминуваат кај народот“, стои во реакцијата на ВМРО-ДПМНЕ.


Манчевски: По смената на власта средствата за барокни фасади ќе бидат пренаменети


Скопје, 4 јули, 2016 - 15:09 (META) 

Новата лудост на власта на Никола Груевски нема да успее, затоа што граѓаните нема да дозолат Градскиот трговски центар, МОБ и Универзитетската библиотека да ги сменат фасадите во барок, изјави денеска Дамјан Манчевски, потпретседател на СДСМ.

Тој рече дека пред да има можност да се реализира ова безумие, ќе дојде до смена на власта на фер и демократски избори.

– Новата демократска власт веднаш ќе ги стопира овие криминални проекти. Ги повикуваме сите домашни и странски градежни компании да не учествуваат на повикот кој евентуално би го распишала криминалната власт. Веднаш по смената на владата, средствата за овие барокни фасади ќе бидат пренаменети за гасификација на Скопје и за други неопходни проекти на граѓаните – изјави Манчевски.

Тој ги повика функционерите на ВМРО-ДПМНЕ, чесните и одговорни поддржувачи да ја откажат послушноста на Никола Груевски во спроведувањето, како што рече, на лудилото „Скопје 2014“. Манчевски додаде дека скопјани, но и цела Македонија се спротивставуваат на трошењето пари за раскош и за луксуз.


Владата донесе одлука ГТЦ да добие барокна фасада


Скопје, 3 јули, 2016 - 10:30 (META) 

Владата донесе одлука Градскиот трговски центар (ГТЦ) да добие барокна фасада, јави телевизија „Телма“.

Одлуката за продолжување на изградбата на проектот „Скопје 2014“, во чии што рамки е и измената на ликот на ГТЦ, е објавена во „Службен весник“.

Општина Центар лани во април распиша референдум за изгледот на Градски трговски центар, но тој не успеа, бидејќи околу 40 отсто од 43.560 запишани гласачи го искористија своето право на глас, што беше за 10 отсто помалку од неопходниот цензус за успешност на референдумот.

Тогаш градоначалникот на Општина Центар, Андреј Жерновски, истакна дека повеќе од 95 проценти од оние што излегле на референдумот гласале за зачувување на автентичноста на ГТЦ.

По неуспешниот референдум, активистите од иницијативата „Го сакам ГТЦ“ побараа прогласување на ГТЦ за културно наследство, во насока на зачувување на автентичниот изглед.

Граѓаните организираа и протести под слоганот „Големо гушкање за ГТЦ“.


„Скопје 2014“ продолжува со „Рајска градина“


Скопје, 1 јуни, 2016 - 16:26 (META) 

Реплика на Милоска Венера, антички ликови, лавови и грифони ќе ја красат „Рајската градина“ во општина Аеродром. Зад идејното решение е фирмата „Архитектоника“ која заедно со главниот проектант, Жарко Чаушевски, стои зад повеќе „барокни“ зданија во Скопје, објави „Призма“.

Декоративни елементи во стилот на неокласицизам, павилјон, летниковец, статуи и скулптури во фонтани се предвидени да го красат најавениот парк во општина Аеродром, илустративно именуван како „Рајска градина“.

Управител на „Архитектоника“ и главен проектант е Жарко Чаушевски кој освен објектите на архитектонското биро, потпишува и голем број фасади во централно градско подрачје. Зад идејното решение на паркот, освен Чаушевски, се потпишува и Филип Богатинов и Македонка Чаушевска, сите дипломирани архитекти.

Паркот ќе се гради со пари на Општина Аеродром, која предвидела дека цената на проектот ќе се движи околу 14 милиони евра, колку што е проценетата вредност на тендерот, и дека „Рајската градина“ треба да биде готова во рок од две години.


Манчевски: Со парите за барокна Народна банка можеше да се рестартира РЕК Осломеј


Кичево, 10 февруари, 2016 - 14:58 (META) 

„Нови повеќе од 35 милиони евра ќе се потрошат за раскошна и луксузна зграда, овојпат за Народна банка, покрај веќе потрошените 630 милиони евра, народни пари на „Скопје 2014“, пари со коишто можеа да се отворат стотици илјади нови работни места. Бараме веднаш да запре изградбата на луксузната зграда за Народна банка“, изјави потпретседатлот на СДСМ, Дамјан Манчевски.

Според него, овие пари можат да се искористат за изградба на филтри на оџаците на РЕК Осломеј

– Оваа инвестиција ќе значи повторно рестартирање со целосен капацитет на РЕК Осломеј. Оваа инвестиција може да значи и нови работни места за сите граѓани на Кичево, но и заштита на животната средина – изјави Манчевски.

Според него, на овој начин ќе се зголеми и производството на електрична енергија и ќе се намали увозот на струја, којшто само на годишно ниво достигнува околу 300 милиони евра.

– Македонија години наназад увезува повеќе од 40 проценти од потребната електрична енергија и затоа мораме да инвестираме во овие капацитети кои веќе постојат, а кои пропаѓаат – изјави Манчевски.