Цената на литар дизел пораснала за 15,5 денари во споредба со лани


Скопје, 11 јуни, 2018 - 16:38 (META) 

Цената на барел нафта од 2011 година до сега бележи опаѓање, но цената на литар дизел во Македонија во последните седум години не е значително намалена, покажува најновата анализа и визуелизација на „Дата“.

Во 2011 година барел нафта чинел 117,74 долари, а литар дизел 66,5 денари. Во 2018 година, цената на барел нафта се намалила на 74,95 долари за барел, но дизелот не претрпел некоја голема промена и за литар сега се плаќа 63,5 денари.

Регулаторна комисија за енергетика денеска ги намали цените на горивата за 1,5 денари по литар, но сепак граѓаните плаќаат дури 15,5 денари повеќе во споредба со истиот период минатата година.

Според податоците, од секој литар дизел најмногу плаќаме за рафинериската цена која е речиси половина од вкупната цена, а најмалку се издвојува за животна средина – од сто литри продаден дизел само 3 денари се одвојуваат за животната околина.

Малопродажната цена за литар дизел е 63,5 денари.

Од нив 34,66 денари одат за рафинериската цена, 15,12 денари за акцизата, 9,69 денари за ДДВ, 3,2 денари за трговска маржа, 0,5 денари за транспорт, 0,3 за нафтени резерви и 0,03 за животната средина.


Цената на нафтата на највисоко ниво во последните три години


Лондон, 21 мај, 2018 - 11:46 (META) 

На лондонскиот пазар, цената на нафтата се зголеми за разлика од претходните шест недели, па достигна на највисоко ниво во последните три и пол години.

Зголемување на цената на нафтата е последица на падот на производство во Венецуела, зголемената глобална побарувачка и најава за повторно воведување на санкции кон Иран од страна на САД.

На лондонскиот пазар, цената за барел нафта се зголеми за 2,5 отсто, односно по прв пат од декември 2014 година се зголеми на повеќе од 80 долари.

На американскиот пазар, барелот поскапе за 0,8 отсто односно на 71,30 долари.


Ирак е подготвен да го намали производството на нафта


Багдад, 23 ноември, 2016 - 17:50 (META) 

Ирак е подготвен да го намали производството на нафта и на тој начин ќе го поддржи планот на Организацијата на земјите извознички на нафта (ОПЕК), кој предвидува да се намали прекумерната глобална понуда и да се зголеми цената на нафтата, изјави ирачкиот премиер Хајдер ал Абади во Багдад.

– Она што во намалување на производството ќе го изгубиме, ќе го надоместиме во приходите од нафтата. Нашиот приоритет е да се зголеми нејзината цена – изјавил премиерот Ал Абади.

Членките на ОПЕК треба да се состанат во Виена на 30 ноември, каде што Ал Абади ќе го соопшти планот за поддршка.


Слабеењето на доларот ја зголеми цената на нафтата во Азија


Женева, 4 февруари, 2016 - 11:55 (META) 

Цената на нафтата денеска закрепнува во Азија, што е поттикнато од слабеење на доларот, како и од шпекулациите за можно намалување на производството од членките на Организацијата на земјите-извозници на нафта (ОПЕК).

Трговците одлучиле да ги игнорираат информациите за уште едно зголемување на американските комерцијални резерви на сурова нафта.

Американското министерство за енергетика соопшти дека комерцијалните резерви на таа суровина во САД, кои се најголем светски потрошувач на нафта, се зголемиле на 7,8 милиони барели во неделата, заклучно со 29 јануари.

Нафтата се тргува со долари, па падот на американската валута ја прави поевтина за купувачите чиишто земји имаат послаба валута, што, пак, ја поттикнува побарувачката.

 


Цената на нафтата пониска од 30 долари за еден барел


Женева, 3 февруари, 2016 - 9:36 (META) 

Ценaта на нафтата денеска во Азија е пониска од 30 долари за еден барел, забележувајќи нов пад при очекувањето на дополнителен пораст на резерви во САД и на влошување на ситуацијата на и онака презаситениот глобален пазар.

Трговците очекуваат дека извештајот на американското министерство за енергетика ќе укаже на неделен пораст на резерви на нафта во САД, а секое зголемување значи помала побарувачка во земјите кои се најголеми светски потрошувачи на енергенти.

Русија вчера соопшти дека во јануари било произведено рекордно количество на нафта од околу 18,9 милиони барели дневно, бидејќи се бори да го задржи пазарниот удел.

Организацијата на земји извозници на нафта (ОПЕК) во декември ги отфрли повиците да се намали производството.


Нафтата најевтина во последните 11 години


Вашингтон, 21 декември, 2015 - 13:55 (META) 

Европската нафта „брент“ денеска поевтини на 36 долари и 29 центи за еден барел, што е најниска цена во последните 11 години.

Во однос на тргувањето во петокот, цената на еден барел се намали за 59 центи и моментно е на ниво од јули 2004 година.

Еден барел сурова нафта во САД моментно чини 34 долари и 37 центи, пренесува АФП.

Американскиот конгрес минатата недела ја укина 40-годишната забрана за извоз на нафта, што е историски потег.

Аналитичарите сметаат дека презаситеноста на светскиот пазар и понатаму е главен фактор кој ја урива цената, но тоа нема да ја спушти цената на помалку од 30 долари за еден барел.

Нафтата поевтини за повеќе од 60 проценти од летото 2014 година, кога еден барел чинеше повеќе од 100 долари.

Цените почнаа значајно да опаѓаат по 4 декември, кога земјите на ОПЕК одлучија да не го ограничуваат призводството и покрај нарушениот однос на побарувачка и на снабдување.


Цената на нафтата ќе се намали на 40 долари


Лондон, 12 март, 2015 - 10:52 (META) 

„Интернешнел бизнис тајмс“ (The International business times) објави дека цената на суровата нафта ќе почне да опаѓа кога глобалните резерви ќе почнат да се зголемуваат, така што на пазарот во САД таа наскоро ќе достигне 40 долари за еден барел.
Според весникот, цената на нафтата од типот „брент“ исто така ќе се намали под притисок на зголемените резерви, а нафтата од типот „wti“ наскоро ќе дојде до 40 долари за еден барел, ниво кое не е видено од почетокот на 2009 година.

Во моментов нафтата во САД се тргува по цена пониска од 50 доалри, а „брент“ се наоѓа на ниво пониско од 60 долари.