!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Сигурноста и приватноста – главни теми на Форумот за управување со интернет


Женева, 5 јануари, 2018 - 14:26 (META) 

Приватноста и сигурноста на интернет, но и влијанието на лажните вести и користењето на дигиталните технологии за манипулација на јавното мислење, заедно со проблемот на намалената доверба кон медиумите и државните институции, беа една од главните теми на 12-от состанок на Форумот за управување со интернет – IGF (Internet Governance Forum), кој се одржа во Женева од 18 до 21 декември.

Околу 2.500 учесници од цел свет, на оваа средба на различни чинители од целиот свет, организирана од Обединетите нации, се обидуваа да формулираат решенија за дигиталната иднина на почитувањето на правата на луѓето, како и соодветни одговори за предизвиците што се среќаваат на интернет.

Во тие рамки беше упатена и порака дека владите треба  повеќе да инвестираат во дигиталната писменост.

На Форумот учествуваше и Бардил Јашари, извршниот директор на Фондацијата за интернет и општество „Метаморфозис“.

Bardil Jashari Geneve dek17 - negova– Приватноста и сигурноста на интернет беа, како и досега, поважните теми на форумот, со тоа што оваа година се дискутираше исто така за влијанието на лажните вести и користењето на дигиталните технологии за манипулација на јавното мислење. Дополнително се нагласи и намалената доверба кон медиумите и државните институции. Голем дел од учесниците истакнаа дека владите имаат важна улога и одговорност во процесот на враќање на довербата и наместо да создаваат нови институции, закони и политики, треба да бидат поотворени, повеќе да соработуваат со невладините организациии да инвестираат во образованието и во медиумската писменост – вели Јашари.

Женевскиот форум, на кој учествуваа владини претставници, невладини организации, експерти, фирми и медиуми, упати до глобалната заедница неколку препораки под името „Женевски пораки“.

– Се заклучи дека не треба само да се зборува за ризиците и прекумерно да се фокусира на нив, туку треба акцентот да се стави на афирмацијата и промоцијата на позитивните аспекти на дигитализацијата – истакна Јашари.


Конференција „Е-општество“ во организација на „Метаморфозис“ се одржува во Скопје


Скопје, 22 ноември, 2017 - 9:29 (META) 

Фондацијата за интернет и општество „Метаморфозис“ денеска 13. пат ја организира меѓународната конференција „Е-општество“, која оваа година ќе биде на тема „Слобода и приватност“, со особен фокус на реформите во областа на медиумите.

Конференцијата ќе се одржи во хотелот „Холидеј ин“, со почеток од 10 часот.

На настанот, во четири одделни сесии ќе дебатираат и ќе дискутираат дваесетина претставници на институциите, медиумските организации и на граѓанскиот сектор, со крајна цел – да придонесат за зајакнување на јавната свест за реформските приоритети и за предизвиците во медиумската сфера. Учествуваат претставници на Комисијата за заштита на правото за слободен пристап до информации од јавен карактер, Агенцијата за аудио и аудиовизуелни медиумски услуги, ЗНМ, ЦРМ, ДЗЛП, Асоцијацијата „Зенит“, „Евротинк“, на кабинетот на министерот задолжен за комуникации, отчетност и за транспарентност, Советот за етика во медиумите, Здружението на обвинители, Здружението на судии и, секако, на Фондацијата „Метаморфозис“.

На отворањето воведен збор ќе дадат министерот за информатичко општество и администрација, Дамјан Манчевски, извршната директорка на Фондацијата „Отворено општество“ – Македонија, Фани Каранфиловска-Пановска, како и претставничката на управниот одбор на „Метаморфозис“, Радмила Живановиќ.

Според извршниот директор на „Метаморфозис“, Бардил Јашари, „Е-општество“ е конференција која е замислена како заеднички простор за вмрежување и за споделување искуства, но и можност за информативна јавна дебата, како основен услов за меѓусебна комуникација помеѓу носителите на одлуки, невладините организации и медиумите.

– На крајот, конференцијата ќе остави можност за креирање коалиција на граѓански организации и на медиуми за надзор и за застапување на исполнувањето на реформите – вели Јашари.


Утре „Метаморфозис“ ќе ја одржи конференцијата „Е-општество“


Скопје, 21 ноември, 2017 - 11:09 (META) 

Фондацијата за интернет и општество „Метаморфозис“ утре, по 13. пат, ќе ја организира меѓународната конференција „Е-општество“, која оваа година ќе биде на тема „Слобода и приватност“, со особен фокус на реформите во областа на медиумите.

Конференцијата ќе се одржи во хотелот „Холидеј ин“, со почеток од 10 часот.

На настанот, во четири одделни сесии ќе дебатираат и ќе дискутираат дваесетмина претставници на институциите, медиумските организации и на граѓанскиот сектор, со крајна цел – да придонесат за зајакнување на јавната свест за реформските приоритети и за предизвиците во медиумската сфера.

Според извршниот директор на „Метаморфозис“, Бардил Јашари, „Е-општество“ е конференција која е замислена како заеднички простор за вмрежување и за споделување искуства, но и можност за информативна јавна дебата, како основен услов за меѓусебна комуникација помеѓу носителите на одлуки, невладините организации и медиумите.

– На крајот, конференцијата ќе остави можност за креирање коалиција на граѓански организации и на медиуми за надзор и за застапување на исполнувањето на реформите – вели Јашари.


АЕК донирала 2,8 милиони евра за изградба на панорамското тркало


Скопје, 28 јуни, 2017 - 16:41 (META) 

Директорот на АЕК, Сашо Димитријовски, ѝ доделил донации на Велосипедската федерација, на која тој е претседател, а од вкупно 180 милиони денари донации, Агенцијата дала 175 милиони денари или 2,8 милиони евра на ЈСП, за изградба на панорамското тркало, покажува извештајот од надзорот спроведен од невладините организации „Евротинк“, „НВО Инфоцентар“, „Транспарентност Македонија“ и Хелсиншки комитет за човекови права.

На презентацијата на извештајот од надзорот на четирите невладини организации, извршниот директор на Фондацијата за интернет и општество „Метаморфозис“, Бардил Јашари, кој зборуваше за Агенцијата за електронски комуникации, рече дека регулаторните тела треба да се ефикасни и транспарентни и дека на тој начин корисните информации ќе стигнат до граѓаните.

– Веб-страницата на АЕК треба да е ефикасна и ефективна. Освен организирање на консултативни состаноци, граѓаните и невладините организации треба да се информирани или „вооружени“ со информации. АЕК треба да ги користи социјалните мрежи за дистрибуција на информации, а не само да се објават информациите и само одредени луѓе кои се заинтересирани да ги гледаат – рече Јашари.

Според организациите што го вршеле надзорот, за донациите на АЕК нема информации за критериумите според кои се доделуваат, за подносителите на барањата, за целта на донациите и за износот на побараните и одобрените средства.


„Метаморфозис“ и „Мајкрософт“ нудат можности за донации на софтвер за граѓанските организации


Скопје, 15 мај, 2017 - 12:44 (META) 

Во Конгресниот центар на Скопски саем утре ќе се одржи „Ден на Мајкрософт“, посветен на граѓанскиот сектор, на тема „Технологијата во облак (cloud) го помага општеството“.

„Денот на Мајкрософт“ посветен на НВО-секторот, организиран од Фондацијата „Метаморфозис“ со поддршка на „Мајкрософт“, ќе им овозможи на претставниците на граѓанскиот сектор да научат повеќе за можностите да добијат софтверски донации и донација во вредност од 5.000 долари на „Microsoft Azure“ од програмата на „Мајкрософт“ за поддршка на граѓанскиот сектор, кој во Македонија и на Балканот се спроведува од страна на Фондацијата „Метаморфозис“, преку платформата „Теchsoup Balkans“.

Настанот ќе го отворат генералниот менаџер на „Мајкрософт Македонија“, Љупчо Георгиев, и Бардил Јашари, извршен директор на Фондацијата „Метаморфозис“.


„Метаморфозис“ промовираше четири веб-апликации со отворени податоци


Скопје, 1 март, 2016 - 13:50 (META) 

Фондацијата за интернет и општество „Метаморфозис“ денеска промовираше четири веб-апликации како дел од проектот „Мрежа на граѓански организации за отворени податоци“.

Граѓанската организација „ИКТ за промени“ направи апликација за истражување на јавните набавки, Институтот за развој на руралните заедници промовираше апликација за директни плаќања во земјоделството преку ИПАРД, „Зип институт“ презентираше апликација за известување за услугите на угостителските објекти, а коалицијата „Сите за правично судење“ промовираше апликација за резултати од набљудувањето на судството во Македонија во текот на една деценија.

Амбасадорот на Велика Британија, Чарлс Гарет, рече дека отворените податоци се нова област која има директно влијание врз граѓаните, но дека треба дополнително да се истражува.

– Отворените податоци имаат директно влијание на одлуките што луѓето секојдневно ги прават и тоа на значителен начин. Овие апликации кои денеска беа промовирани преку овој проект ќе го променат животот на луѓето. Многу сум задоволен од резултатите што ги постигнаа тимовите – рече Гарет.

Бардил Јашари, директор на Фондацијата „Метаморфозис“, вели дека преку отворените податоци ќе се зајакне довербата помеѓу граѓаните и институциите, а тоа ќе придонесе да се зајакне демократијата.

– Овој проект придонесува директно во остварувањето на мисијата на „Метаморфозис“, а тоа е поддршка и придонес во подобрување на квалитетот на живеење на граѓаните. Овие четири апликации го прават токму тоа. Тој е многу важен во услови кога довербата кон државните институции е на многу ниско ниво. Проектот придонесува преку отварање на тие институции, да се зајакне довербата на граѓаните  – рече Јашари.

Проектот „Мрежа на граѓански организации за отворени податоци“, Фондацијата „Метаморфозис“ го спроведува во соработка со Фондацијата „Отворено знаење“ (Open Knowledge Foundation) и со поддршка на Амбасадата на Велика Британија во Скопје.


„Е-општество“: Мора да има рамнотежа меѓу слободата на изразување и правото на приватност


Скопје, 10 декември, 2015 - 13:11 (META) 

Треба да се постигне рамнотежа меѓу слободата на изразување и правото на приватност, е заклучокот од денешната единаесетта меѓународна конференција „Е-општество“, посветена на слободата и на приватноста на интернет, во организација на Фондацијата за интернет и општество „Метаморфозис“ и на Меѓународниот институт за човекови права и мир од Каен, Франција.

Амбасадорката на Франција во Македонија, Лоренс Оер, вели дека интернетот е нов начин на дијалог и на информирање, но претставува и своевиден ризик кога терористите го користат како алатка за дискусија.

– Сведоци сме на доближување на границата помеѓу виртуелното и реалното. Медиумите се првиот вектор за информирање на граѓаните, а во овие шест месеци до избори тие треба да се трудат да информираат реално и објективно и да се чувствуваат супериорно во однос на политичките партии – вели Оер.

Вицепремиерот за евроинтеграции, Фатмир Бесими, рече дека светот пред и по интернетот не е ист и тој овозможува правото на говор да биде послободно, а дека социјалните мрежи влијаат врз демократските процеси.

Интернетот дава и придонесува за слободата на изразување и тој претставува одличен извор на информации. Затоа важно е тој да биде заштитен, смета Жонас Боша, директор на Меѓународниот институт за човекови права и мир.

Бардил Јашари, директорот на Фондацијата „Метаморфозис“, вели дека клучно е да се најде рамнотежа помеѓу слободата на изразување и правото на приватност.

– Интернетот треба да биде слободен, а граѓаните на Македонија треба да можат слободно да се изразуват. Во име на сигурноста и на безбедноста, директно се загрозува слободата на изразување и слободата на интернетот. Треба да најдеме начин како интернетот да остане слободен, а правото на приватност на граѓаните да биде обезбедено. Интернетот мора да биде ослободен од говорот на омраза – додава Јашари.


Промовирана веб-страницата на Школата за податоци


Скопје, 4 јуни, 2015 - 15:12 (META) 

Концептот на отворени податоци е генератор на просперитетот и на демократизацијата на општеството, рече амбасадорот на Обединетото Кралство во Македонија, Чарлс Едмунд Герет, на денешната промоција на веб-страницата на Школата за податоци – Македонија. Таа нуди константна поддршка на граѓанските организации, новинарите и на сите заинтересирани граѓани во употреба на податоците како дел од проектот „Мрежа на граѓански организации за отворени податоци“, кој го спроведува Фондацијата „Метаморфозис“ во партнерство со Фондацијата Open Knowledge, а е поддржан од Британската амбасада во Македонија.

– Можноста цивилното општество да побара податоци кои се релевантни за јавните политики и постапки е суштинска за владеењето на демократијата – рече амбасадорот Герет на промоцијата.

Британскиот амбасадор истакна дека отворените податоци се „двонасочна улица“ – од една страна владите и институциите ја зголемуваат транспарентноста, а од друга, граѓанското општество го зголемува своето учество во процесот на донесување одлуки и го истакнува гласот на маргинализираните групи.

– Овој проект се темели врз претходниот ангажман на Велика Британија во оваа област низ т.н. „Партнерство за отворена влада“ и се надевам дека нашата соработка ќе продолжи и ќе влијае на зголемување на транспарентност на владата и на зголемување на учеството на граѓаните во преиспитувањето на владините активности и информираноста при донесувањето на одлуките – рече амбасадорот Герет.

Директорот на Фондацијата „Метаморфозис“, Бардил Јашари, додаде дека отворениот пристап до податоците е битен за двете страни – и за граѓаните и за институциите, бидејќи им помага на граѓаните да се изедначат во знаењето со политичарите кои ги имаат во секое време на располагање податоците од државните институции.

На промоцијата беа присутни претставници од граѓански здруженија, асоцијации и од медиуми, но и заинтересирани поединци.

На веб-страницата можат да се најдат курсеви за основи на податоци, како и информации за алатки и за апликации за употреба и за обработка на податоци.

Покрај веб-страницата, беше промовиран и конкурс за поддршка на проекти поврзани со отворени податоци.

Рокот за пријавување е до 22 јуни, а сите граѓански организации можат да аплицираат со конкретна идеја за проект поврзан со отворени податоци.

По завршувањето на конкурсот, ќе бидат селектирани четири проекти кои ќе добијат поддршка од Фондацијата „Метаморфозис“.