Рокот за аплицирање за земјоделски субвенции истекува на 12 јуни


Скопје, 8 јуни, 2018 - 11:46 (META) 

На 12 јуни годинава завршува рокот за поднесување барања за субвенции за растително и сточарско производство, соопшти денеска директорот на Платежната агенција, Николче Бабовски.

Тој додаде дека досега аплицирале 64.448 земјоделци, но се очекува бројката да биде зголемена до 8.000. Тој ги повика земјоделците да аплицираат навреме за побрзо да се обработат барањата и средствата да се исплатат.

Апликациите за субвенции може да се поднесуваат електронски, а ако на земјоделците им е потребна помош во пополнувањето на документацијата, може да се обратат во Платежната агенција.

– За годинава се предвидени преку шест милијарди денари поддршка, средства кои со ребалансот би сакале да се зголемат. Искористеноста на субвенциите за 2017-та е 97 отсто или се исплатени 5,902 милијарди денари – истакна Бабовски.

Платежната агенција годишно обработува околу 160.000 барања за субвенции, а апликации поднесуваат повеќе од 70.000 фармери.


Град Скопје има буџет за уште околу 300 барања за субвенции за велосипеди


Скопје, 4 јуни, 2018 - 11:24 (META) 

Град Скопје ги информира граѓаните дека од објавениот jавен повик на 21 април до денеска, се поднесени 2.860 барања за субвенции за купување велосипед.

„Според предвидените финансиски средства за оваа намена во буџетот на Град Скопје, преостануваат средства за уште околу 300 барања. Средствата што Градот Скопје ќе ги субвенционира се во износ од 50 отсто од вредноста на велосипедот, но не повеќе од 3.000 денари по лице, со вклучен персонален данок на доход, како и 50 отсто од вредноста на адаптираниот велосипед за лица со телесна инвалидност, но не повеќе од 90.000 денари по лице, со вклучен персонален данок на доход“ се додава во соопштението.

За субвенционирање на граѓаните за набавка на велосипеди во буџетот на Град Скопје за 2018 година, се предвидени 10 милиони денари, од кои 9 милиони денари се предвидени за субвенции за велосипеди, додека еден милион денари за адаптирани велосипеди за лица со телесна инвалидност.

Јавниот повик се реализира по принципот „прв дојден, прв услужен“.


Судии се јавувале кај Караџовски да прашаат дали навистина ќе има масовни разрешувања


Скопје, 15 февруари, 2018 - 13:04 (META) 

Судскиот совет на денешната седница нема да одлучува по барањата за разрешување на судии, туку ќе ја почне постапката со избор на членови на Советот кои ќе ги застапуваат барањата за разрешување и ќе се бираат комисии кои ќе истражуваат дали има основи за разрешување, по што ќе реферираат до Судскиот совет.

Ова денеска го соопшти претседателот на Судскиот совет, Зоран Караџовски, кој ги оцени како „лажни вести“ информациите во медиумите дека Советот ќе расправа за разрешување на над 100 судии и појасни дека станува збор само за пет барања за утврдување на одговорност на судија, односно за разрешување.

Шпекулациите дека Судскиот совет ќе расправа за разрешување над сто судии ги вознемирило судиите и претседателите на судовите, кои, како што рече Караџовски, се јавувале во Советот за да прашаат дали е ова точно.

– Денеска за оние предмети за кои е доставено барање за утврдување на одговорност на судија од веќе укинатиот Совет за утврдување на факти ќе одлучуваме кој член на судскиот совет ќе го застапува соодветното барање бидејќи тој орган не постои. Потоа се формира комисија од три члена по пат на жрепка, која понатаму ќе има обврска да расправа да поканува, да истражува. Кога ќе ја заврши работата ќе треба да достави извештај до сите членови на судскиот совет на седница – изјави Караџовски.

Одговарајќи на новинарско прашање, тој рече дека нема рокови до кога треба комисиите да ја завршат работата, меѓутоа, како што додаде, во измените на Законот за Судскиот совет се предвидени добри механизми, поради што смета дека постапката во комисиите нема да трае долго.

– По завршувањето на работата на комисијата, рокот во којшто треба да достави извештај до Судскиот совет е 15 дена. Јас, како претседател на Судскиот совет ќе инсистирам, не да се мешам во работата на таа комисија што ќе ја избереме денеска, меѓутоа во најкраток можен рок да си ја заврши својата работа, за сите предмети – појасни претседателот на Судскиот совет.

Инаку, како што појасни Караџовски до овој момент до Судскиот совет има вкупно 217 претставки и поплаки доставени од граѓани и правни лица за работата на судии или претседатели на судови, а во оваа бројка се и незавршените и незапочнати поплаки и претставки од веќе укинатиот Совет за утврдување на факти.

Тој појасни дека претставки и поплаки се една работа, а барања за утврдување на одговорност на судија, односно разрешување е друга работа.

Просекот на разрешени судии во изминатите 4-5 години, изјави Караџовски, бил еден до еден ипол судија, за разлика од, како што додаде, претходниот период пред десеттина година, кога имало „поголем број на такви разрешувања“.


Николовски: Рекорден број на барања за средства од програмата ИПАРД


Охрид, 8 февруари, 2018 - 19:17 (META) 

На првиот јавен повик од програмата ИПАРД- 2014-2020 биле пристигнати рекордно голем број на добиени барања за ко-финансирање, изјави денеска министерот за земјоделство, шумарство и водостопанство, Љупчо Николовски на регионалната Работилница за имплементација на програмите ИПАРД, што се одржа во Охрид.

Тој додаде дека, биле пристигнати 1.649 барања и побарани над 55 милиони евра за ко-финансирање, а целата програма ИПАРД-2014-2020, која може да се користи до 2023 година, изнесува 60 милиони евра.

„Пред нас е предизвикот да се обработат сите барања и да се потпишат договори со корисниците, и оваа година да имаме исплати, за што Платежна агенција прави големи напори за да се забрза овој процес“, изјави Николовски.

Тој информираше дека програмата ИПАРД 1 завршила и последните исплати кон крајните корисници биле реализирани. Според податоците, биле доставени 3.069 барања за користење на средства ИПАРД, а се исплатиле 1.052 барања, во вредност од 16 милиони евра.

Како проблем кој што го истакна при реализацијата на програмата ИПАРД е недоволен број на кадри во Платежната агенција и Телото за управување со ИПАРД, за што во тек е процес на нови вработувања.


Ансамблот на албански песни и ора и Советот за јавни финансии денеска на владина седница


Скопје, 6 февруари, 2018 - 11:59 (META) 

Владата денеска ќе ја одржи 53. редовна седница, на која, според најавата, има вкупно 73 точки на дневен ред, меѓу кои и предлог-одлуките за формирање на Совет за управување со јавните финансии и за основање на национална установа „Ансамбл на албански народни ора и песни во Република Македонија“.

Министрите денеска ќе ја разгледуваат и информацијата за квалитетот на воздухот за месец декември 2017 година, како и потребата од воспоставување на единствениот комуникациско-информативен систем со единствениот европски број за итни повици Е-112 во земјава.

Владата повторно ќе разгледува барања за прием на македонско државјанство, кои на денешната седница се четири: Есер Џевахир, Мустафа Иршат Канџа, Букет Геренџи и Дјуана Тенис Бонер.

На седницата Владата, на предлог на Министерството за труд и социјална политика, ќе ја разгледа и информацијата за ревидираниот Акциски план за вработување на млади 2016-2020 година, информацијата за имплементација на Националната стратегија за намалување на сиромаштијата и социјалната исклученост 2010-2020, како и годишната програма за работа на Управата за финансиско разузнавање за 2018 година.


Во Кривичен досега пристигнале 1.985 барања за амнестија, советите ќе работат и за викендот


Скопје, 2 февруари, 2018 - 16:15 (META) 

До денеска во Кривичниот суд во Скопје пристигнале 1.985 барања поврзани со Законот за амнестија, соопштија денеска од судот. Оттаму појаснуваат дека дел од барањата може да се однесуваат на исто лице кое е осудено во повеќе предмети.

Кривичните совети од одделот за кривично полнолетни и одделението за организиран криминал и корупција, кои што постапуваат по барањата, работат постојано и сите донесени решенија веднаш се доставуаат до затворските установи, од каде се и пристигнати.

Имено, кривичните совети на судот треба да утврдат дали осудените лица кои поднеле барања ги исполнуваат условите од Законот за амнестија за да добијат помилување.

Поради големиот број на пристигнати барања од судот велат дека кривичните совети ќе работат и за време на викендот за да се запази рокот од 5 дена за одговор, а кој почнува со денот на приемот на барањата.

„Откако ќе биде постапено по сите пристигнати барања, ќе може да излеземе со конкретна бројка на донесени решенија“, велат од судот.

Според проценките на Владата и на Министерството за правда, со Законот околу 670 лица треба да бидат целосно ослободени од издржување на затворска казна, додека на 3.097 ќе им биде намалена казната за 30 отсто.


Кривичен решава за продолжување на притворите на осомничените од 27 април


Скопје, 26 јануари, 2018 - 13:12 (META) 

Кривичниот совет на Основниот суд Скопје 1 денеска ќе одлучува по барањата на ОЈО за организиран криминал и корупција за продолжување на притворите за осомничените за минатогодишните насилства во Собранието на 27 април, беше потврдено на денешниот брифинг на претседателот на Судот, Иван Џолев со новинарите.

Барањата на обвинителството се доставени до Кривичниот совет и се очекува до крајот на денешниот ден да бидат донесени и одлуки.

Обвинителството, како што денеска соопштија оттаму, бара продолжување на притворот на поранешниот министер за внатрешни работи Митко Чавков, Богдан Илиевски – Бетмен, актерот Владо Јовановски, режисерот Борис Дамовски, пратениците Крсто Мукоски, Љубен Арнаудов, Сашо Василевски и куќните притвори на Јохан Тарчуловски и Љупчо Димовски и на уште дваесетина осомничени.

Единствено промени има кај пратеничката Жаклина Пешевска, поранешниот директор на Македонска опера и балет, Игор Дуловски и за службеничката од Собрание, Елена Доцевска-Божиновска за кои Обвинителството бара поблаги мерки.


„Ние сме Македонија“ бара прекин на разговорите за името, попис и избори


Вашингтон, 15 јануари, 2018 - 10:26 (META) 

Движењето „Ние сме Македонија“, составено од повеќе македонски организации од дијаспората одржаа мирен протест пред Амбасадата на Македонија во Вашингтон, на која ја искажаа својата „загриженост од политичките настани во матичната татковина“, како и од тековните разговори околу спорот за името со Грција и Законот за јазиците.

„На амбасадорот на Република Македонија во САД, Васко Наумовски, му беше предадена декларација во која се наведени 5 барања до претседателот, Владата и Собранието“, стои во соопштението на Обединетата македонска дијаспора (ОМД).

Во декларацијата се бара итен прекин на разговорите за решавање на спорот за името со Грција, претседателот Ѓорге Иванов да стави вето на „противуставниот закон за јазици, организирање попис на населението во Македонија под мониторинг на реномирана меѓународна организација во следните шест месеци и „неменување на историјата на Македонија, статусот на Македонската православна цркца – Охридска архиепископија и интензивирање на грижата за Македонците во соседните држави.

Доколку Владата не е способна да го стори горенаведеното, движењето повикува на итно самораспуштање на Собранието и организирање на непосредни избори каде што и на „македонските граѓани од дијаспората ќе им бидат овозможени свои претставници во новиот парламентарен состав, според принципот на пропорционалност“.

„Движењето “Ние сме Македонија,” ги повикува сите Македонци во светот и матичната држава, организирани преку македонски здруженија и организации во светот, да се приклучат на ова движење и да дадат поддршка за декларацијата“, стои во соопштението.

Од ОМД најавуваат дека следниот протест на движењето ќе биде в среда пред седиштето на Обединетите нации во Њујорк.


ДОМ бара нова опрема за уништување на отпадот во Дрисла


Скопје, 10 јануари, 2018 - 13:54 (META) 

Демократската обнова за Македонија (ДОМ) смета дека поради загадениот воздух, потребни се интервентни набавки на опрема за уништување медицински и друг биолошки отпад во Дрисла, пречистувачи на воздух, апсорбери на чад од оџаци на домаќинствата, филтри на индустриски оџаци и слична опрема.

Од таму потсетуваат дека финската студија за загадувањето на воздухот во скопскиот регион од 2016 година покажа дека извори се загревањето на домаќинствата (32 отсто ), сообраќајот (20 отсто), градежништвото (19 отсто) и индустријата (18 отсто).

„Затоа од денес до крајот на февруари да важат итните мерки пар- непар, за да биде поефикасен бесплатниот јавен превоз, забрана за тешки товарни возила низ град, забрана за возила под стандард „еуро 4“, затворање на градилиштата, преполнување на производството или затварање на загадувачки погони“, се вели во соопштението на ДОМ.

Во него се додава дека е потребно редовно собирање на отпадот, редовно миење на улиците и зголемени инспекциски контроли на општинските и државните инспектори за животна средина.


ВМРО-ДПМНЕ без најава за блокирање на раскрсници, ќе протестира пред Министерството за правда


Скопје, 11 декември, 2017 - 11:09 (META) 

Опозициската ВМРО-ДПМНЕ за денеска нема најавено блокирање на раскрсници во Скопје, а протестот против притворањето на триесетина лица поради насилствата во Собранието од 27 април е закажан во 18 часот пред Министерството за правда.

Од партијата велат дека „Македонија е земја на политички затвореници, со монтирани обвиненија за тероризам“ и нагласуваат дека остануваат на улиците „се додека хунтата ги гази законите и се изживува со граѓаните“.

„Се притвораат уметници, актери, режисери, архитекти, припадници на полицијата, се притвораат луѓе кои дале и даваат свој придонес за општеството, само затоа што не се согласуваат со политиките на СДС. Судовите не одлучуваат согласно закон, туку по диктат, затоа се и смешните и апсурдни обвиненијата за тероризам против 36-те македонски патриоти“, стои во соопштението од ВМРО-ДПМНЕ.

Од партијата бараат безусловно запирање на сите овие процеси на политичкиот прогон, итно и безусловно стопирање на малтретирањата, на теророт и изживувањето кое го прави СДС и итно пуштање на слобода на сите лица кои се опфатени со овој класичен политички прогон.