!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Лицата со попреченост четврти пат ќе кампуваат пред Собрание


Скопје, 20 јули, 2017 - 13:49 (META) 

Лицата со посебни потреби и нивните семејства од денеска во 22 јули четврти пат ќе ги постават своите шатори во паркот Жена –  борец, спроти Собранието.

Граѓанската иницијатива „Пет до дванаесет“ ги повикува сите лица со попреченост, хендикеп или посебни потреби, заедно со нивните родители и семејства, да ја поддржат иницијативата и да учествуваат во процесот за изедначување на нивните права.

„Со Вашето присуство на настанот, сите заедно ќе покажеме колку нè има и ќе докажеме дека не отстапуваме од нашите ставови, сè до конечно исполнување на нашите барања“, велат од иницијатавата.

Од „Пет до дванаесет“ ги повикуваат одговорните во Собранието и новата Влада, да ја дадат поддршката за изедначување на правата на лицата со попреченост, хендикеп или посебни потреби.

Лицата со попреченост и минатиот месец со шатори кампуваа во паркот спроти Собранието и се сретнаа со министерката за труд и социјална политика, Мила Царовска, која по состанокот изјави дека системот за заштита на оваа група граѓани затаил во изминатиот период.

– Се договоривме граѓанските здруженија да бидат членови на работната група во Министерството, која ќе работи на сите законски измени и процеси во делот на социјална заштита за лицата со попреченост– изјави Царовска, која им ветила дека дневните центри ќе бидат зајакнати со квалитетен кадар и дека програмата ќе биде усогласена во согласност со потребите.

Граѓанските здруженија бараат отворање дневни центри, подобри услови во училиштата и во клиниките, како и формирање специјална институција што ќе ги брани интересите на лицата со посебни потреби.


Египет, Саудиска Арабија, УАЕ и Бахреин одлучуваат за судбината на Катар


Каиро, 5 јули, 2017 - 18:57 (META) 

Министрите за надворешни работи на Египет, Саудиска Арабија, Обединетите Арапски Емирати и на Бахреин во Каиро имаат состанок за катарската криза.

На состанокот ќе разговараат за реакцијата на Катар на 13 барања што четирите заливски држави ѝ ги доставија на Доха.

Саудиска Арабија. Обединетите Арапски Емирати, Бахреин и Египет на 5 јуни објавија дека ги прекинуваат односите со Катар, а потоа на таа земја ѝ поставија листа од 13 барања.

Овие земји ја обвинуваат Доха за поддржување екстремизам и за блиски односи со Иран, обвинувања кои Катар ги негира.

Откако истече рокот од 10 дена, овие земји му го продолжија рокот на Катар за уште 48 часа за да ги исполни нивните барања, по барање на Кувајт кој дејствува како посредник во кризата.

Четирите заливски земји се заканија дека доколку Катар не ја исполни листата со барања, ќе ги зајакнат санкциите.

Катарскиот министер за надворешни работи, шеикот Мохамед бин Абдулрахман ал-Тани, вчера изјави дека невозможно е да се исполнат барањата на арапските земји и дека листата со барања е нереална и неспроведлива.


Катар ги отфрли барањата на арапските земји, оценувајќи ги како максималистички


Доха, 2 јули, 2017 - 13:29 (META) 

Катар ги отфли барањата на арапските земји, поставени како услов за деблокада на дипломатските односи, оценувајќи ги како максималистички и насочени против суверенитетот на земјата.

Списокот со барања, меѓу кои се и затворање на телевизијата „Ал Џезеира“, прекин на односите со Иран и затворање на турската воена база во Катар, ѝ беше доставен на Доха на 22 јуни, со рок за одговор од 10 дена, кој истекува вечерва.

„Барањата се така напишани за да бидат одбиени“, изјавил синоќа во Рим катарскиот министер за надворешни работи, Мохамед Абдурахман ал-Тани, пренесува балканскиот сервис на „Радио Слободна Европа“.

По неговата изјава, во печатените медиуми во Обединетите Арапски Емирати денеска се појавиле написи, со наслови „Катар го избра непознатото“ и „Катар се фрли во прегратките на Иран“.

Саудиска Арабија, Бахреин, Обединетите Арапски Емирати и Египет на 5 јуни оваа година ги прекинаа дипломатските односи со Катар, обвинувајќи ја Доха дека го поддржува тероризмот и дека е премногу блиска со Иран.

Катар ги отфрли ваквите наводи и соопшти дека никој нема право да ѝ диктира на земјата каква надворешна политика ќе води.

„Целиот свет е свесен дека целта на барањата е да се ограничи суверенитетот на Катар“, рекол шефот на катарската дипломатија.

Катар, во конкретниот случај, ја има поддршката на Иран и на Турција, додека од САД стигнуваат контрадикторни пораки. Американскиот претседател Доналд Трамп од Катар побара да прекине со финансирање на екстремистички движења, додека Стејд департментот повика на дијалог за решавање на кризата.

Досега како посредник во кризата дејствуваше Кувајт, а помош понудија и САД, Турција, Франција и Русија.


И Канческа-Милевска и Пешевски останаа без пасоши, засега нема притвори


Скопје, 1 јули, 2017 - 12:57 (META) 

Кривичните совети на Основниот суд Скопје ги одбија како неосновани барањата на Специјалното јавно обвинителство да им биде одредена мерка притвор на поранешната министерка за култура, Елизабета Канческа-Милевска и на поранешниот вицепремиер за економски прашања, Владимир Пешевски.

На Канческа-Милевска и на Пешевски, кои се обвинети во случаите „Тендери“ и „Траекторија“ на СЈО, судот наместо притвор им одредил мерки на претпазливост – одземање на пасошите и обврска секој понеделник, односно вторник да се јавуваат кај надлежно службено лице во судот.

Според одлуките што денеска ги објави судот, прифатени се барањата за одредување мерки на претпалзивост против три лица обвинети во случајот „Тарифа“, на кои им се одземени пасошите и им е наложено секој понеделник да се јавуваат кај службено лице во судот.

Идентични мерки му се одредени и на Н.С., обвинет во случајот „Трезор“, додека барањата за мерки за претпазливост против седум лица, обвинети во случајот „Титаник 2“, судот ги одбил како неосновани.

Како што информираат од Кривичниот суд, прифатени се предлозите на СЈО за определување мерки за претпазливост против Т.Ѓ., Д.Д., М.Т., Д.Г. и В.Т., на кои исто така им се одземени пасошите и треба секој понеделник да се јавуваат во судот.

Судот ги прифатил мерките за претпазливост и за четири лица обвинети во случајот „ТНТ“, додека барањето за притвор против градоначалникот на општина Гази Баба, Тони Трајковски, обвинет во истиот случај, е отфрлено како неосновано и, како и на другите четворица, му е одземен пасошот и има обврска секој вторник да се јавува во судот.

Кривичните совети го одбиле и барањето за притвор на обвинетиот Ѓ.П. во случајот „Триста“ и го замениле со мерки на претпализвост, односно привремено одземање на пасошот и обврска секоја среда да се јавува во судот.

Од Основниот суд Скопје 1 соопштија дека СЈО синоќа доставило два нови обвинителни акти поврзани со случаите „Титаник“, „Таргет“ и „Тврдина“ (овие два предмети се споени во едно обвинение).

Обвиненијата, преку електронскиот систем за водење предмети, се распределени кај судиите Ивица Стефановски и Горан Бошевски. Со двете обвиненија се доставени и барања за одредување притвор и мерки за обезбедување на присуство за обвинетите во случаите, а кои кривичните совети денеска ги разгледуваат и ќе одлучуваат по нив.

Инаку, во предметот „Титаник“, обвинети се лидерот на ВМРО-ДПМНЕ и поранешен премиер, Никола Груевски, поранешниот шеф на неговиот кабинет, Мартин Протогер, поранешните министри за внатрешни работи и за транспорт и врски, Гордана Јанкулоска и Миле Јанакиески, како и поранешниот генерален секретар на Владата, Кирил Божиновски.  Во „Таргет“ и во „Тврдина“ првообвинети се поранешниот директор на Управата за безбедност и контраразузнавање, Сашо Мијалков, и поранешниот началник на петтата управа, Горан Грујовски. За сите нив СЈО бара притвор.

Основен суд Скопје 1 синоќа ги соопшти одлуките за пет барања од СЈО, според кои не е прифатено ниту едно од барањата за притвор, а во некои случаи наместо тоа изречени се мерки на претпазливост.


СЈО бара притвор за Груевски, Мијалков, Јанакиески, Јанкулоска, Канческа-Милевска…


Скопје, 29 јуни, 2017 - 13:32 (META) 

Специјалното јавно обвинителство денеска со 17-те обвиненија до Кривичниот суд ќе поднесе и барање за одредување притвор за вкупно 18 лица, меѓу кои и лидерот на ВМРО-ДПМНЕ и поранешен премиер, Никола Груевски, поранешниот директор на Управата за безбедност и контраразузнавање, Сашо Мијалков, ексминистрите за внатрешни работи, култура и за транспорт и врски, Гордана Јанкулоска, Елизабета Канческа-Милевска и Миле Јанакиески.

Според збирниот извештај на СЈО, за Груевски, за поранешниот шеф на неговиот кабинет, Мартин Протогер, за поранешниот генерален секретар на Владата, Кирил Божиновски, за Јанакиески и за Јанкулоска, се бара притвор како осомничени во случајот „Титаник“, за фалсификување на избори.

Притвор се бара и за две лица во „Титаник 3“, потоа за градоначалникот на Гази Баба, Тони Трајковски, кој е обвинет во случајот „ТНТ“ за уривањето на комплексот „Космос“ на бизнисменот Фиат Цаноски.

За поранешната министерка за култура, Елизабета Канческа-Милевска и за уште дено лице, СЈО бара да им биде ореден притвор како обвинети во случајот „Тендери“.

Притвор се бара и за уредникот на телевизијата „Сител“, Драган Павловиќ-Латас, обвинет во случајот „Тотал“.

СЈО бара притвор и за поранешниот вицепремиер за економски прашања, Владимир Пешевски, како обвинет во случајот „Траекторија“.

СЈО бара да им се одреди притвор на Сашо Мијалков, поранешниот началник на петтата управа, Горан Грујовски, и за уште три лица обвинети во „Таргет“ и во „Тврдина“, случаи кои се однесуваат на незаконското прислушување и за уништувањето на опремата во УБК со која биле следени комуникациите.

Покрај притвори, СЈО бара да им бидат одредени мерки на претпазливост на уште 47 лица.


Арапските земји испратија листа со барања до Катар, вклучувајќи и затворање на „Ал Џезеира“


Доха, 23 јуни, 2017 - 10:09 (META) 

Четирите арапски држави кои воведоа санкции кон Катар поради наводна поддршка на тероризмот, ѝ испратиле на Доха 13 барања, вклучувајќи и затворање на телевизијата „Ал Џезеира“ и намалување на врските со Иран, изјавил официјален претставник на една од четирите држави.

Листата со барањата, како што пренесуваат светските агенции, ја составиле Саудиска Арабија, Обединетите Арапски Емирати, Египет и Бахреин.

Од Катар се бара и затворање на турската воена база во оваа земја и испорачување на сите терористи од нејзина територија.

Четирите држави ѝ дале на Доха рок од десет дена да ги исполни барањата.

Листата на раководството на Катар ја предал претставник на Кувајт, земјата посредничка во спорот меѓу земјите во овој регион. Од Катар претходно ги демантираа наводите дека поддржуваат терористички групи.


Одлуката за изборот на Џафери стигнала, „Службен весник“ ќе ја објави наредната недела


Скопје, 4 мај, 2017 - 11:22 (META) 

„Службен весник“ денеска соопшти дека е доставено барање за објавување на одлуката за избор на претседател на Собранието и дека таа ќе биде објавена на почетокот од наредната недела во првиот број на „Службен весник“.

„Во согласност со позитивните законски прописи во однос на поднесеното барање, одлуката за избор на претседател на Собранието на Република Македонија ќе биде објавена во првиот нареден број на „Службен весник“ на почетокот од наредната недела“, се вели во соопштението.

Поранешниот генерален секретар на Собранието, Александар Новаковски, во изјава за телевизија „Телма“ вели дека „Службен весник“ може да објави вонредно издание за да ја објави оваа одлука, која е битна.

„Роковите тука воопшто не се битни. „Службен весник“ може да објави и вонредно издание за да ја објави оваа одлука која е исклучително битна, имајќи ја предвид ситуацијата во која се наоѓа државата. Со оглед на тоа на што сè бевме сведоци и какви сè случувања имаше, нема дилема – таа треба веднаш да се објави“, изјави Новаковски.

Инаку, претседателот на Собранието, Талат Џафери, денеска е во прва официјална посета на Брисел, на покана на високите претставници на Европската Унија и на Европскиот парламент.


Груевски: Нови избори се решение – ако СДСМ победи, нека направи влада


Скопје, 25 април, 2017 - 15:22 (META) 

Најдобар излез од оваа ситуација е да се оди веднаш на брзи предвремени избори, заедно со редовните планирани локални избори, кои, патем, заради чекорите на СДСМ се одложија, изјави денеска лидерот на ВМРО-ДПМНЕ, Никола Груевски, одговарајќи на новинарско прашање за време на неговата посета на Општината Ѓорче Петров.

Тој го повика СДСМ да прифати нови избори и, како што рече, „ако го добије мнозинството, да направи влада“.

– Нека излезат тие со она што го нудат, со она што го прифатиле, со тиранската палтформа, со сè што сакаат. Ако граѓаните тоа им го одобрат, ако добијат мнозинство гласови, нека направат влада и нека го исполнат тоа што го наумиле и тоа што некаде го ветиле – рече Груевски.

Тој истакна дека и граѓаните кои секој ден протестираат на улиците ги преформулирале своите барања и сега бараат одржување на нови предвремени парламентарни избори.

– Како што видовме пред некој ден, граѓаните веќе ги преформулираа своите барања. Тие сфаќаат дека Заев не може да се откаже од тиранската платформа, дека ја има преземено, дека има дадено цврсти ветувања, практично дека можеби е уценет или на некој начин нема излез. И затоа, претпоставувам, се преформулира нивното барање во барање за предвремени избори… Меѓу 100.000 и 200.000 граѓани секој ден маршираат низ улиците во околу 30 градови во Македонија. Тоа е нешто за што опозицијата, односно СДСМ и партиите со неа треба да се замислат и треба да излезат во пресрет на народот, во пресрет на граѓаните, бидејќи, на крајот на краиштата, тие се тие што не само во декември, туку и во иднина треба да гласаат во Македонија и да даваат поддршка на една или на друга партија – изјави Груевски.


Врховниот суд официјално кажа дека одбил буквално сè, но не и зошто


Скопје, 11 април, 2017 - 16:26 (META) 

Врховниот суд попладнево и официјално соопшти дека ги одбил сите барања и приговори што беа на дневен ред на денешната општа седница.

Имено, на седницата се одбиени барањето на Специјалното јавно обвинителство (СЈО) за изземање на претседателот на Врховниот суд, Јово Вангеловски, приговорот на судијката на Врховниот суд, Лидија Неделкова, и приговорите на 17-те судии од Основниот суд Скопје 1 против годишниот распоред на работа, што го донесе в.д. претседателот на судот, Стојанче Рибарев.

Во соопштението на Врховниот суд не е наведено никакво образложение зошто и врз основа на што се одбиени барањата и приговорите.

„Врховниот суд на Република Македонија ја информира јавноста дека денеска беше одржана општа седница на Врховниот суд на Република Македонија, на која: Барањето за изземање на претседателот на Врховниот суд на Република Македонија, поднесно од Јавното обвинителство за гонење кривични дела поврзани и кои произлегуваат од содржината на незаконското следење на комуникациите, беше одбиено; Приговорот на судија на Врховниот суд на Република Македонија (Лидија Неделкова, н.з.) изјавен против одлуката за изменување и за дополнување на одлуката за распоредот за работа на судиите и судската администрација во Врховниот суд на Република Македонија за 2017 година, беше одбиен; Сите 17 приговори на судиите на Основен суд Скопје 1 изјавени против годишниот распоред за работа на судиите на Основен суд Скопје 1 за 2017 година, се одбиени“, стои во соопштението на Врховниот суд.

Претседателот на Врховниот суд треба да одлучува по барањето за заштита на законитоста што на 27 март оваа година го поднесе Републичкото јавното обвинителство, со кое се бара поништување на одлуките на Основниот суд Скопје 1 и на Апелацискиот суд Скопје, а со кои му беше одреден притвор на бизнисменот Сеад Кочан, осомничен во случајот „Труст“ на СЈО,  и кој веќе месец и пол е во бегство.

Специјалното јавно обвинителство бараше изземање на Вангеловски, бидејќи е дел од прислушуваните разговори што ги објави СДСМ, а кои биле снимени во период кога тој, исто така, ја извршувал функцијата претседател на судот. Според СЈО, тој разговор ја доведува во прашање непристрасноста на судијата Јово Вангеловски.


Продолжуваат протестите против Вучиќ во Белград, Ниш и во Нови Сад


Белград, 6 април, 2017 - 20:08 (META) 

Неколку илјади претежно млади лица, незадоволни од победата на Александар Вучиќ на претседателските избори во Србија, и денеска излегоа во центарот на Белград, на четвртиот по ред „Протест против диктатурата“, јавува дописникот на „Мета“ од Белград.

Учесниците на протестот, кој е организиран преку „Фејсбук“, носеа знамиња на Србија и транспаренти со натписи „О (не)свести се“, „Вучиќ арамијо“, „Долу диктатурата“, „Денеска сум на улица за утре да не живеам на неа“…

Демонстрантите бараат намалување на бројот на членови во Републичката изборна комисија (РИК) и во Регулаторното тело за електронски медиуми (РЕМ) поради неправилности за време на кампањата за претседателските избори, смена на претседателката на српското собрание, Маја Гојковиќ, и против раководството на српската национална радиотелевизија поради „режимското известување и нерамномерната застапеност на кандидатите“, како и за средување на избирачкиот список.

Демонстрантите денеска се движеа по малку изменета рута, која се држи во тајност за да се избегнат инциденти.

„Протестите против диктатурата“ продолжија и во Ниш и во Нови Сад, каде за сабота е најавен контрамитинг на приврзаниците на Александар Вучиќ.

Вучиќ денеска повторно изјави дека протестите на улиците се доказ дека Србија е демократска држава. Сепак, двајца од неговите министри, за полиција, Небојша Стефановиќ, и за труд, Александар Вулин, ја обвинија опозицијата за организирање на протестите и предупредија дека изборната волја не може да се смени на улица.