Иницијативата „Да ја спасиме Попова Шапка“ бара од Владата решение за скијачкиот центар


Скопје, 8 јануари, 2019 - 10:56 (META) 

Граѓанската иницијатива „Да ја спасиме Попова Шапка“ ќе изготви конкретни барања, за да се решат актуелните проблеми на Попова Шапка, кои ќе ги пратат до Владата и до премиерот.

Тие предвидуваат да постават ултиматум за исполнување на овие барања, бидејќи сметаат дека до денес не се преземени потребните чекори за решавање на оваа прашање преку дијалог и средби, известува „Порталб.мк“.

По средбата со граѓаните и невладиниот скетор, за денес најавија прес-конференција на која ќе ги објават нивните барања.

„ЕЛЕМ турс“ која стопанисува со скијачкиот центар, најави отворање на сезоната во недела со бесплатно скијање, но таа почна неславно. Ски-лифтот „Тетекс“, работеше по принципот тргни-застани, за потоа по еден час, целосно да прекине со работа, по што скијачите беа приморани со скиите на рамо да ги качуваат терените.


Обвинителствата дадоа позитивно мислење за уште четири амнестии


Скопје, 28 декември, 2018 - 14:03 (META) 

Основните јавни обвинителства, согласно пред некој ден изгласаниот Закон за амнестија, денеска до Основниот суд Скопје 1 доставиле мислења за преостанатите барања за амнестија и позитивно мислење дале само за четири од нив. Интересното е што Основното јавно обвинителство – Скопје, од 37-те барања се изјаснило позитивно само за едно, а другите ги оценило како неприфатливи.

Основното јавно обвинителство за гонење на организиран криминал и корупција денеска ги достави мислењата по преостанатите 17 барања за амнестија. Дадено е позитивно мислење по три барања, а негативно за 14. Со тоа, од вкупно примени 29 барања за амнестија, доставени од надлежниот суд, Основното јавно обвинителство за гонење на организиран криминал и корупција даде позитивно мислење по 15 барања за амнестија, а за другите 14 дадено е мислење дека по барањата не се исполнети условите од Законот.

Основното јавно обвинителство Скопје постапуваше по 37 барања за амнестија. Денеска по сите е испратено мислење до Основниот суд Скопје 1 Скопје.

Само во еден случај надлежен обвинител има дадено позитивно мислење, а за другите 36 лица мислењето од надлежните јавни обвинители е негативно.


Во Јавно обвинителство пристигнале вкупно 66 барања за амнестија


Скопје, 27 декември, 2018 - 17:06 (META) 

Јавното обвинителство извести дека пристигнале вкупно 66 барања за амнестија доставени согласно Законот за амнестија од страна на Основниот суд Скопје 1 Скопје.

„Во Основното јавно обвинителство за гонење на организиран криминал и корупција пристигнаа 29 барања, од кои до овој момент е дадено позитивно мислење за 12. Во Основното јавно обвинителство Скопје пристигнати се 37 барања за амнестија. Поднесените барања се доставени до надлежните обвинители кои постапувале по предметите. По нивното разгледување, ќе биде доставено соодветно мислење до судот“, се вели во соопштението на ОЈО.


„Го сакам Водно“ на Шилегов му испорача новогодишно пакетче со 13 барања


Скопје, 27 декември, 2018 - 14:05 (META) 

Активистите на граѓанската иницијатива „Го сакам Водно“ денеска на градоначалникот на Град Скопје му предадоа „новогодишно пакетче“ од 13 барања за трајно решавање и заштита на парк-шумата Водно.

Тие бараат итно да се донесе закон за Водно, а во меѓувреме Министерството за животна средина да издаде привремен заштитен статус на Водно, како би се оневозможила понатамошна узурпација на парк-шумата.

Дел од барањата се и преиспитување на постапката за Сончев град и патот до Сончев град и решение за ублажување и санација на штетата предизвикана со тој проект.

Активистите бараат да се лоцираат, мапираат, исчистат и отстранат сите депонии кои се формирани во парк-шумата и да се обезбеди стратегија за спречување на нивно повторно формирање.

„Го сакам Водно“ предлага формирање на Јавно претпријатие „Водно“ кое ќе биде задолжено за редот и чистотата на парк-шумата и формирање на ренџерска служба на Водно, во рамките на новото ЈП, со сопствен возен парк во форма на АТМ и теренски возила, соодветни за заштитено подрачје.

„Во однос на вашето прифаќање гасоводната траса да минува низ Водно, уште еднаш гласно ви кажуваме дека продолжуваме да се бориме со сите расположиви средства да го спречиме тоа зошто ниту еден момент не дадовте издржан одговор зошто го сменивте ставот, а напротив, максимално издржано претходно објаснивте зошто сте против тоа“, велат активистите.


Новогодишно пакетче ќе добие Шилегов утре од „Го сакам Водно“


Скопје, 26 декември, 2018 - 14:55 (META) 

Активистите на граѓанската иницијатива „Го сакам Водно“ соопштија дека подготвиле новогодишно „пакетче“ со барања до градоначалникот на Скопје Петре Шилегов, кои се однесуваат на парк-шума Водно и дека симболично ќе му ги предадат утре во 11 часот во просториите на Град Скопје, во присуство на медиумите.

„Незадоволни од бројните нерегуларности кои го следат функционирањето на нашата парк шума Водно, решивме да ги изнесеме сите нешта кои би можеле да придонесат во решавањето на проблемите. Ги срочивме овие точки во облик на наши барања до Град Скопје, како институција надлежна за парк шумата Водно и единствена која има инструменти за нивна реализација. Барањата се конкретни, бараат вложувања на време, пари и човечки ресурси но бенефитите од нив сметаме дека се конечни и далекусежни“, се вели во соопштението испратено до медиумите од страна на еколошките активисти од оваа иницијатива.

Од „Го сакам Водно“ се уште не ја откриваат содржината ниту бројот на барањата, но најавуваат дека тие се однесуваат на сите проекти кои се во тек на реализација на падините на Водно, како што се гасоводот, Сончев град, телекомуникациската кула, но и на ветеното донесување на законот за заштита на парк-шумата и дека ќе бидат и формално поднесени до градските власти преку архивата на градот.

„Се надеваме дека претпразничниот гест на предавање на барањата во Град Скопје, кои имаат за цел заштита и зачувување на Парк Шума Водно, ќе претставува вистински предизвик за градоначалникот во новата 2019-та“, велат од „Го сакам Водно“.


Последен ден за поднесување барања за амнестија за „27 април“


Скопје, 25 декември, 2018 - 9:55 (META) 

Денеска истекува рокот за поднесување барања за амнестија за настаните во Собранието од 27 април 2017 година според законот кој го подготви Координативното тело за помирување, а го изгласа Собранието со 95 гласа „за“.

Заклучно со вчерашниот ден до Кривичниот суд во Скопје пристигнале вкупно 38 барања за амнестија од обвинетите во неколкуте случаи кои се однесуваат за настаните од „27 април.

Меѓу оние кои досега поднеле барање за амнестија се пратениците Крсто Мукоски, Љупчо Димовски како и Александар Василевски Нинџа, Никола Митревски Кољо, Горан Ангелов – Ќосето, Иван Цветановски, Горан Ѓошевски Леви и Митко Пешов, браќата Михаил и Стефан Младеновски, Абдулфета Алими и Захарие Симовски.

По истекот на рокот за поднесување на барањата, Судот и Обвинителството ќе имаат рок од пет дена да одговорат кој ќе биде помилуван, а кој не.


До Кривичниот суд поднесени 12 барања за амнестија


Скопје, 24 декември, 2018 - 10:10 (META) 

До утрово до Кривичниот суд во Скопје се пристигнати 12 барања за амнестија од обвинетите за настаните во Собранието на Република Македонија од 27 април 2017 година

Секој од обвинетите за „27 април” има право да поднесе барање за амнестија, ако смета дека ги исполнува условите пропишани со Законот.

Петдневниот рок за доставување на барањата за амнестија истекува утре. Барањата обвинетите можат да ги доставуваат до Судот лично и по пошта. По истекот на рокот за поднесување на барањата, Судот и Обвинителството ќе имаат рок од пет дена да одговорат кој ќе биде помилуван, а кој не.

Законот за амнестија во четвртокот минатата недела беше објавен во Службен весник на Република Македонија, откако претходно беше потпишан од претседателот на државата, Ѓорѓе Иванов.

Македонското Собрание на 18-ти овој месец по скратена постапка со 95 гласа „за”, без против и воздржани го донесе Законот за амнестија за настаните во Собранието од 27 април минатата година.

Согласно Законот, амнестијата нема да ги опфати организаторите, лицата кои извршиле физичко насилство, кои носеле оружје, како и службените лица кои ги пречекорите службените овластувања.


Протест на студентите Албанци денеска во Тетово


Тетово, 18 декември, 2018 - 11:32 (META) 

Денеска во 12.30 часот во центарот „Илирија“ во Тетово ќе се одржи протест на албанските студенти под мотото #MeStudentët (#СоСтудентите).

Тие со ова им се придружуваат на студентските протести во Албанија и ќе истакнат 13 барања, пишува „Порталб.мк“.

Меѓу нив најглавни се барањата за укинување или субвенционирање на цената од 50 евра за двомесечната пракса, укинување на сумата од 100 евра за отпишување, како и објавување на Статутот на Универзитетот во Тетово и извештајот за евалуација на учениците која ја прават професорите на веб-страницата на универзитетот.


Вработените во МЖ „Транспорт“ бараат плата до четврток


Скопје, 20 ноември, 2018 - 11:53 (META) 

Независниот синдикат на машиновозачите и железничарите на Македонија, Синдикалната организација на вработените на подружница влеча на возови, Синдикалната организација СММ и Синдикалната организација на МЖ „Транспорт“ АД Скопје се приклучуваат кон најавата за прекин на работните обврски, доколку не се исполнат барањата за исплата на плата и материјални трошоци и здравствено осигурување.

Ваквата одлука, како што соопштуваат денеска, е донесена на состанок одржан вчера. Во соопштението наведуваат дека во овие синдикални организации членуваат 90 отсто од вработените во МЖ „Транспорт“.

Вчера, исто така, прекин на работните обврски најавија и членовите на Независниот машински и извршен персонал.

Тие побараа до четврток да биде исплатена платата и материјалните трошоци за октомври, доколку не се исполни барањето од петок наутро нема да ги извршуваат работните обврски.


МЕР: Изградбата на гасоводот е според сите стандарди на квалитет и безбедност


Скопје, 29 октомври, 2018 - 16:20 (META) 

Претпријатието „Македонски енергетски ресурси“ реагира на соопштението на граѓанската иницијатива „Го сакам Водно” и информира дека изградбата на гасоводот е според сите стандарди на квалитет и на безбедност.

Од таму додаваат дека, изградбата на гасоводот продолжува според основниот проект кој што има правосилно одобрение за градба и сите други потребни дозволи дефинирани со позитивните законски прописи.

„Ако има сомнеж или индикации за каква било повреда на некои законски постапки и прописи, ги повикуваме сите што евентуално поседуваат такви информации да се обратат до надлежните институции во рамки на правниот систем на државата“, се вели во соопштението.

Од МЕР потсетуваат дека Владата, тие како претпријатие и Град Скопје прифатиле најголем дел од барањата и сугестиите на активистите како што се намалување и стеснување на работниот појас, измена на трасата од 20 километри до 24 километри со цел избегнување на сечење на дел од шумата.

„Направен е проект за дополнителни мерки за ерозија, програма за рекултивација на која што веќе работи работната група, носење на закони за Водно, Матка и Гази Баба, за кои веќе се работи во надлежните институции, финансирање на неколку еколошки проекти, за кои има одлука на влада – и ред други технички барања и сугестии. Но, мора да се напомене дека барањето за изнаоѓање алтернативна траса во оваа фаза на реализација на проектот не е возможна, од причини што неколку пати беа образложени“, додаваат од МЕР.