!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Твитот на Обама против насилствата влезе во историјата


Вашингтон, 16 август, 2017 - 10:05 (META) 

Твитот на поранешниот американски претседател Барак Обама по повод насилствата во Шарлотвил стана најпопуларниот во историјата на „Твитер“.

Твитот на Обама, во кој го цитира Нелсон Мандела, лајкуван е три милиони пати откако е објавен на 12 август, после насилствата во Шарлотвил во Вирџинија.

– Никој не се раѓа со омраза кон другите поради бојата на нивната кожа, потеклото или вера… Луѓето мора да научат да мразат, а ако можат да научат да мразат, може да научат и да сакаат… Љубовта повеќе му прилега на човековото срце за разлика од нејзината спротивност“ напиша Обама, цитирајќи го Мандела.

Твитот е проследен со фотографија на која се гледа Обама како се смее со четири деца од различна раса, пренесува „Би-би-си“.

Фотографијата е направена во 2011 година, кога Обама го посети дневниот престој во Мериленд.


ФБИ и НСА го негираат тврдењето на Трамп за прислушување


Вашингтон, 20 март, 2017 - 18:47 (META) 

Директорите на американските водечки безбедносни и разузнавачки агенции изјавија дека немаат информации што би ги потврдиле тврдењата на претседателот на САД, Доналд Трамп, дека неговиот претходник Барак Обама прислушувал пред изборите.

– Со почитување на претседателските твитови за тоа дека претходната администрација го прислушувала, јас немам информации што би ги поддржале тие твитови – изјави директорот на ФБИ, Џејмс Коми, за време на неговото сведочење во Конгресот на САД.

Според неговите зборови, ист став има и министерството за правда, кое ја надгледува работата на ФБИ и на другите агенции.

Коми додаде дека ниту еден поединец не може да нареди прислушување на некој граѓанин на Америка, туку дека дозвола за тоа даваат судовите по ригорозен процес на одлучување.

Пред Конгресот сведочеше и директорот на НСА, Мајк Роџерс, кој ги отфрли сугестиите на Трамповата администрација дека Националната безбедносна агенција барала од британските разузнавачки служби да го шпионираат претседателот на САД.


Комитетот за разузнавање на Сенатот ги отфрли тврдењата на Трамп дека бил прислушуван


Вашингтон, 16 март, 2017 - 21:49 (META) 

Не постојат никакви индиции дека кулата „Трамп“ била надгледувана и дека комуникациите биле следени од владата на САД, пред или по претседателските избори минатата година, соопштил денеска Комитетот за разузнавање на американскиот Сенат, јавува „Би-би-си“.

Во заедничка изјава, претседателот на комитетот, републиканскиот сенатор Ричард Бур, и неговиот заменик, сенаторот Марк Ворнер, ги отфрлиле тврдењата на американскиот претседател Доналд Трамп дека тој бил прислушуван.

„Врз основа на информациите кои ни се достапни, нема никакви индиции дека кулата „Трамп“ била предмет на надзор од кој било елемент на владата на САД, пред или по изборите“, било наведено во заедничката изјава на сенаторите Бур и Ворнер.

Портпаролот на Белата куќа, Шон Спајсер, како што пренесува „Би-би-си“, денеска изјавил дека Трамп останува на своите тврдења дека му биле прислушуваните телефоните во кулата „Трамп“ по наредба на неговиот претходник Барак Обама.

Спајсер, исто така, одбил да го прифати извештајот на Комитетот за разузнавање на Сенатот и изјавил дека „во него нема никакви наоди“.


Центарот на Штип излепен со „потерници“ за пратеникот на СДСМ, Бочварски


Штип, 16 март, 2017 - 18:36 (META) 

На повеќе локации во центарот на Штип денеска беа излепени лажни потерници за пратеникот во Собранието на Република Македонија од СДСМ, Благој Бочварски.

На „потерниците“, Бочварски се бара за предавство, односно, како што стои на нив, заради „прифаќање на редефинирање на државатa и албанскиот јазик… промена на химната и знамето и воведување казни од 5.000 евра за непознавање на албанскиот јазик“.

Изминатите два дена, лажни потерници со ликовите на пратениците на СДСМ, Стево Пендаровски, Павле Богоевски и Ивана Туфегџиќ, со идентична содржина, беа излепени во неколку скопски населби.

„Потерниците“ се копија (и по дизајн и по текст) на тие што можат да се видат на интернет, како, на пример, за некогашниот американски претседател Џон Кенеди и доскорешниот станар на Белата куќа, Барак Обама.


„Потерниците“ за пратениците на СДСМ по урнек на „потерниците“ за Обама и за Кенеди


Скопје, 15 март, 2017 - 15:32 (META) 

Лажни потерници со ликовите на пратениците на СДСМ, Стево Пендаровски, Павле Богоевски и Ивана Туфегџиќ, утрово беа излепени во неколку скопски населби.

Во нив овие пратеници на СДСМ се обвинуваат дека се предавници и дека прифатиле официјализирање на албанскиот јазик како втор службен јазик, двојазични банкноти и униформи, како и дека прифатиле редефинирање на државата како вовед во кантонизација и во федерализација.

„Потерниците“ се копија (и по дизајн и по текст) на тие што можат да се видат на интернет, како, на пример, за некогашниот американски претседател Џон Кенеди и доскорешниот станар на Белата куќа, Барак Обама.

Во онаа за Кенеди се вели „Ова лице се бара заради предавнички активности против Соединетите Држави“. На летокот се вели дека тој го предал уставот и суверенитетот на државата. Овие „потерници“ биле поставени низ Далас неколку дена пред убиството на Кенеди на 22 ноември 1963 година.

Слично како во „потерницата“ за Кенеди, и во таа за Обама се наведува дека тој го предал уставот и суверенитетот на државата, како и дека ја предал довербата на американските граѓани.


ФБИ: Да се отфрлат обвинувањата на Трамп за прислушување


Вашингтон, 6 март, 2017 - 10:05 (META) 

Американското Федерално биро за истраги (ФБИ) побара од Министерството за правда да ги оспори наводите на претседателот Доналд Трамп дека неговиот претходник, Барак Обама, го прислушувал пред претседателските избори.

Трамп на „Твитер“ го обвини поранешниот претседател Обама дека го прислушувал пред претседателските избори, одржани на 8 ноември минатата година, и побара од Конгресот да истражи дали администрацијата на неговиот претходник ги „злоупотребила своите овластувања“ за време на кампањата во 2016 година, соопштено е синоќа од Белата куќа.

Директорот ФБИ, Џејмс Коми, рече дека обвинувањата се лажни и мора да се исправат, објави вчера весникот „Њујорк тајмс“.

Во изјава дадена вчера, портпаролот на Белата куќа, Шон Спајсер ги оцени како многу загрижувачки непрецизните наводи за потенцијални, политички мотивирани истраги во пресрет на изборите во 2016 година.

Спајсер рече дека „истрагата за мешањето на Русија во изборите, исто така треба да ја опфати и можната злоупотреба на позицијата на поранешниот претседател Обама“. Тој додаде дека ниту Белата куќа, ниту претседателот Трамп нема да даваат понатаму изјави на оваа тема.


Обама никогаш не наредил прислушување на Трамп, вели портпаролот на експретседателот


Вашингтон, 4 март, 2017 - 20:03 (META) 

Портпаролот на поранешниот американски претседател, Барак Обама, денеска ги негираше и ги отфрли тврдењата на претседателот Доналд Трамп дека Обама, наводно, наредил прислушување на неговите телефоните во октомври минатата година, пред претседателските избори, јавуваат светските агенции.

„Главно правило на администрацијата на Обама беше дека ниту еден службеник на Белата куќа нема да се меша во каква било истрага што ја спроведува министерството за правда“, рекол портпаролот на Обама, Кевин Луис.

Како дел од таа практика, додал Луси, ниту претседателот Обама, ниту кој било друг службеник на Белата куќа никогаш не наредил надгледување на кој било американски граѓанин.

„Кое било друго тврдење е едноставно лажно“, нагласил Луис.

Претседателот на САД, Доналд Трамп, денеска го обвини својот претходник, Барак Обама, дека го прислушувал пред претседателските избори, кои се одржаа на 8 ноември минатата година.

Трамп своите обвинувања ги изнесе во неколку пораки на својот твитер-профил, без да наведе детали или докази.


Трамп го обвини Обама дека го прислушувал пред изборите


Вашингтон, 4 март, 2017 - 15:49 (META) 

Претседателот на САД, Доналд Трамп, денеска го обвини својот претходник, Барак Обама, дека го прислушувал пред претседателските избори, кои се одржаа на 8 ноември минатата година.

Трамп обвинувањата за прислушување ги изнесе во неколку пораки на својот твитер-профил, не наведувајќи детали или докази.

„Страшно. Штотуку дознав дека Обама ме прислушувал во Кулата Трамп непосредно пред мојата победа“, напиша Трамп на „Твитер“.

Тој додава дека се работи за „макартизам“, алудирајќи на потрагата по симпатизери на комунизмот во САД во 50-тите години од минатиот век.

Трамп, во друга порака го обвинува Обама дека „отишол многу ниско“ со прислушувањето за време на изборната кампања и наведува дека „ова е нов Вотергејт“.


Трамп ги обвини медиумите дека лажат за бројката на присутни луѓе на инаугурацијата


Вашингтон, 22 јануари, 2017 - 13:18 (META) 

Претседателот на САД, Доналд Трамп, ги обвини медиумите дека се „нечесни“ околу проценките за бројот на луѓе што присуствувале на неговата инаугурација пред Капитол хил, јавува „Би-би-си“.

Новиот претседател на САД реагирал на фотографиите објавени во медиумите, со кои се споредува бројот на граѓани што биле присутни на неговата и на инаугурацијата на претходниот претседател на САД, Барак Обама, во 2009 година.

Трамп тврди дека во петокот, додека го држел инаугуративниот говор пред Капитол, „изгледало како да има“ околу 1,5 милиони луѓе, остро негирајќи ги извештатите на медиумите, според кои, на церемонијата присуствувале најмногу 250.000 луѓе.

Подоцна, како што пренесува британскиот национален сервис, прес-секретарот на Белата куќа, Шон Спајсер, изјавил дека во петокот „имало најмногу публика која досега била видена на една инаугурација, и точка“. Сепак, ниту Трамп, ниту Спајсер не понудиле докази за своите тврдења.

Фотографиите, на кои реагирал Трамп, како што може да се види, покажуваат многу поголем број на граѓани на инаугурацијата на Обама во 2009 година.

За бројот на присутните нема официјален податок, но, според проценките, на инаугурацијата на Обама во 2009 присуствувале околу 1,8 милиони луѓе, а во 2013 околу еден милион.


Обама последен пат како претседател телефонски разговарал со Меркел


Вашингтон, 20 јануари, 2017 - 10:36 (META) 

Последниот телефонски разговор како претседател, Барак Обама го имаше со германската канцеларка, Ангела Меркел.

Својот последен работен ден во Белата куќа, претседателот во заминување, Барак Обама, го мина, меѓу другото, поздравувајќи се со своите соработници, но и со странските колеги, а последниот претседател со кој во телефонски разговор се поздравил била германската канцеларка Ангела Меркел.

„Тој ѝ се заблагодари за осумгодишното пријателство и партнерство“, соопшти Белата куќа.

Обама во таа пригода истакнал дека е сосема разбирливо неговиот последен повик да биде упатен до канцеларката Меркел.

Обама, како што се наведува, ѝ за заблагодарил на канцеларката за нејзиното „силно, храбро и стабилно лидерство“.
Тесната соработка на Вашингтон и на Берлин, како и меѓу САД и Европа е пресудна за трансатлантските односи, оцениле Меркел и Обама во својот последен официјален разговор.