!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Пожари на потегот од Бар до Никшиќ, НАТО и ЕУ ќе испратат помош


Подгорица, 18 јули, 2017 - 10:33 (META) 

Голем број шумски пожари ја зафатија Црна Гора, слично како во соседна Хрватска, а најголем проблем во моментот е пожарот на полуостровот Луштица кај Тиват, каде ако ветерот продолжи да дува, ќе го донесе огнот до куќите. НАТО вети помош за справувањето со пожарите и се очекува таа да стигне денеска. Црна Гора побара меѓународна помош вчера.

Министерот за внатрешни работи, Мевлудин Нухоџиќ, ги посети погодените подрачја на приморјето и процени дека ситуацијата е сериозна, но нема причини за страв и за паника.

– Побаравме помош од Механизмот за цивилна заштита на Европската комисија, во која се вклучени 34 земји. Барањето се разгледува во Брисел и постои можност да добиеме помош во авиони – вели Нухоџиќ.

НАТО вети противпожарни авиони „канадер“, кои Црна Гора ги побара вчера.

Вчерашниот ден беше многу тежок за пожарникарите и за жителите на црногорското приморје. Од населбата Понте Весло на полуостровот Луштица, беа евакуирани 40 луѓе. Неколкумина поради пожарот скокнале в море и чекале помош еден час. Засега нема повредени, а загрозените со чамци се префрлани во Здравствениот дом во Херцег Нови.

Инаку, активен е и пожарот кај Сутоморе, на Голо Брдо, но тој е локализиран и не се загрозени куќите. Пријавен е и пожар кај Паштровичи. Кај Будва гори Паштровска Гора, но тој пожар е под контрола. Во Котор нема пожари, но пожарникарите се на готовс.

Кај Тиват, освен пожарот на Луштица, од ноќеска гори и на Забрѓе. Иако не се загрозени станбени објекти, ситуацијата се менува од час во час.

Кај Херцег Нови има пожари кај Росе, на ’ртот Весло, кај Обосник, но и таму не се загрозени станбени објекти.

Гори и на периферијата на Подгорица, во непристапни места на ридовите. Пожар има и околу Цетиње, но не се загрозени куќи или згради. Кај Даниловград има два шумски пожари, а кај Никшиќ три, но таму нема опасност за станбени објекти.


Десет лица повредени во експлозија во бар во Милано


Милано, 2 октомври, 2016 - 16:02 (META) 

Силна експлозија одекнала во бар во централниот дела на северната италијанска метропола Милано утрово во два часот, при што се повредени десет лица, соопштија италијанската полиција.

Сите повредени се хоспитализирани во неколку милански болници, но нивните животи не се загрозени.

Според прелиминарната истрага, во моментот на експлозијата локалот веќе бил затворен. Сите настрадани се станари од првиот кат од зданието во кое се наоѓал барот.

Експлозијата предизвикала пожар, поради кој станарите од околните згради биле евакуирани. Некои од повредените се задушиле од чадот, а пожарот бргу бил изгаснат и станарите се вратиле во своите домови.

Полицијата не ја исклучува можноста експлозијата да била подметната и соопшти дека уште се води истрага за инцидентот, иако првичните сомневања се дека станува збор за истекување на гас за домаќинство.


Македонската компанија „Градежен институт“ ќе го проширува пристаништето во Бар


Бар, 5 ноември, 2015 - 10:26 (META) 

Македонската компанија „Градежен институт“ потпиша договор за соработка со АД „Лука Бар“ за проширување на пристаништето во Бар за 400 метри.

Проширувањето на терминалот на брегот е во согласност со плановите за развој, со што ќе се овозможи доаѓање на средни и на големи патнички бродови во ова пристаниште во Црна Гора.

Изградбата е во рамки на меѓународниот стратешки проект „Европско-јадрански поморски пат“ (Europa Adriatic Sea-Way), кој ќе трае 28 месеци и е вреден 6,6 милиони евра.

Истиот произлезе од потребата за развој на интегрирани и одржливи услуги на превоз, во подрачјата што излегуваат на Јадранско Море.


Приведени четири албански државјанки во бар во Велешта


Струга, 11 јануари, 2015 - 13:49 (META) 

Полициски службеници ноќеска, по полноќ, при контрола во угостителскиот објект „Дипломат“ во струшкото село Велешта, затекнале четири албански државјанки кои престојуваат во Република Македонија спротивно од целта на престојот.

Албанките се приведени и против нив ќе биде поднесена соодветна пријава.

МВР информира дека за време на контролата во угостителскиот објект едно лице од село Велешта ги попречувало полициските службеници во вршењето на службените работи, а по целосно документирање на случајот, против него ќе биде поднесен соодветен поднесок.


Тројца повредени при тепачка во Крушево


Крушево, 7 декември, 2014 - 13:25 (META) 

Три лица се повредени во физичка пресметка која рано изутринава избила во крушевскиот бар „Бел-ами“.

Како што соопшти полицијата, тепачка настанала меѓу С.Д. (35) од Прилеп, А.П. (18) од Битола и П.А. (30) од Прилеп, од едната страна и Б.Ј. (24) и З.Љ. (23) двајцата од село Житоше, од другата страна.

При тепачката со телесни повреди се здобиле Б.Ј., З.Љ. и П.А., по што укажана им е лекарска помош во Здравствениот дом – Крушево. Се преземаат мерки за целосно расчистување и за документирање на настанот.