Владата ќе го чисти токсичниот отпад во ОХИС со странска поддршка


Скопје, 12 декември, 2018 - 10:07 (META) 

Министрите на вчерашната владина седница ја прифатиле информацијата за потпишување на Меморандумот за соработка помеѓу Владата на Република Македонија, Канцеларијата за услуги на проекти на Обединетите нации (UNOPS) и Министерството за надворешни работи на Кралството Норвешка претставувано од Амбасадата на Кралство Норвешка за Србија, Македонија и Црна Гора, за заедничка реализација на проектот за чистење на дворните површини на ОХИС, во Скопје.

„Проектот има за цел создавањето на Фонд, како систематски механизам за расчистување на индустрискиот токсичен отпад во поранешната фабрика ОХИС во согласност со Европските стандарди, хармонизација во полето на заштита на животната средина и промоцијата на Град Скопје како безбеден, отпорен и одржлив град“, се вели во соопштението од Владата.

Министрите ја усвоиле и информацијата за формирање на Агенција за квалитетот во високото образование.

На предлог на Министерството за информатичко општество и администрација, на седницата била прифатена информацијата за единствен веб портал за отворени податоци. На него ќе бидат објавувани каталози на отворени податоци на сите министерства.

Владата ги усвои предлог – законите за изменување на законите за банки и за Управата за јавни приходи со кои се овозможува пристап на УЈП до приливите на граѓаните од страна на банките.

„Тоа на Управата ќе и овозможи да ги добива потребните податоци за изработка на претпополнетите пријави за данок на личен доход. Со предлог – законите за изменување на законите за банки и за УЈП, исто така, се гарантира и повисока безбедност на податоците со користење на најнова технологија, односно енкрипција на податоците“, велат од Владата.


Ангеловска-Бежоска на Конференцијата за европска економска интеграција во Виена


Виена, 26 ноември, 2018 - 11:00 (META) 

Гувернерката на Народната банка, Анита Ангеловска-Бежоска ќе учествува на Конференцијата за европска економска интеграција, која што по петнаесетти пат ја организира Австриската централна банка.

Оваа конференција важи за еден од најзначајните настани во централнобанкарската заедница на кои што традиционално се дискутира за прашања клучни за европската економија. Годинешново издание на Конференцијата, која денеска и утре се одржува во Виена, е со тема „Како да се финансира кохезијата во Европа“.

Гувернери и други високи претставници на повеќе централни банки, професори и истражувачи на реномирани универзитети и истражувачки центри, како и претставници на повеќе меѓународни финансиски институции и организации ќе дискутираат за тоа како може финансиските текови да ѝ помогнат на Европската унија во промовирањето економска, социјална и територијална кохезија и солидарност меѓу земјите членки.

„На панел-дискусијата на која говорник ќе биде гувернерката на НБРМ, акцентот ќе биде ставен на улогата на монетарната политика во ова приближување. Своите видувања на оваа тема, покрај гувернерката Ангеловска-Бежоска ќе ги изложат и гувернерите на централните банки на Романија и Бугарија. Во рамки на Конференцијата ќе се дискутира и за други прашања важни за европската економија, меѓу кои се и прашањата дали и како да се запре деиндустријализацијата во ЦИЈИЕ и во еврозоната. Гувернерката Ангеловска-Бежоска, која меѓу говорниците на Конференцијата е и единствениот висок претставник на институција на земја којашто не е членка на ЕУ, активно ќе се вклучи и во дискусијата за некои од овие прашања“, се вели во соопштението на Народна банка.


Банкарите бараат одложување на оданочување на каматите од депозитите до влез во ЕУ


Скопје, 9 ноември, 2018 - 11:13 (META) 

Македонската банкарска асоцијација бара одложување на оданочувањето на каматите на депозитите на граѓани најавено за од 2020 година, до влезот на земјата во ЕУ.

Ова е заклучокот од седницата на Собрането на оваа асоцијација на која биле разгледани предложените законски измени што се однесуваат на оданочување на доходот од камати на депозити на граѓаните.

-Ставот на Македонската банкарска асоцијација е дека нивната примена треба да се одложи до влез на нашата земја во Европската унија, со цел да се задржи позитивниот тренд на штедењето, да се обезбеди свеж капитал за стопанството, како и да се одржи стабилноста на банкарскиот сектор – велат од МБА.

Во однос на воведувањето прогресивно одданочување, ценат дека е потребна поширока расправа заради унапредување на предлогот со вклучување на позитивни искуства од земјите каде веќе е во примена.

Македонската банкарска асоцијација најавува дека ќе побара средба во Министерството за финансии за подетално да ги презентира своите ставови.

Според предложеното законско решение од Министерството за финансии, каматите од депозитите треба да се оданочуваат од 2020 година со стапка од 15 проценти, но на износот над 15.000 денари. Оданочувањето денес изнесува 10 проценти.


Даночните измени ќе удрат по штедачите, земјоделците, берзанските играчи, банките


Скопје, 5 ноември, 2018 - 10:52 (META) 

 

Министерството за финансии го објави предлог-законот за данок на личен доход со кој се воведува прогресивен наместо рамен данок кај повеќе категории обврзници односно се воведуваат големи промени во стапката на оданочувањето на различни видови доход кај граѓаните. Иако оттаму укажуваат дека станува збор за воведување праведен данок кој ќе ги опфати само лицата со високи примања, одредбите во самиот предлог-закон покажуваат дека непосредно или посредно даночните измени ќе ги почувствуваат штедачите, самостојните земјоделци, граѓаните кои остваруваат примања од вложување на берзата, граѓаните кои се осигуруваат, банките, осигурителните компании…

Даночните измени предвидуваат поделба на доходот на две групи – доход од труд и доход од капитал.  За доходот од труд (плати, пензии, договори за дело, доход од авторски права, доход од самостојна дејност), се воведува прогресивност, односно дополнителна стапка од 18 отсто за даночната основа која надминува 1.080.000 денари годишно, односно 90.000 денари месечно.

Конкретно, за даночна основа (т.е. бруто-доход, минус социјални придонеси, минус даночно намалување) до 90.000 денари месечно, даночната стапка останува 10 отсто.

„Тоа значи дека за најголем дел од населението номиналната даночна стапка останува иста. Стапката од 18 отсто ќе важи за износот над тоа. На пример, на месечна даночна основа од 100.000 денари, за 90.000 денари ќе се плаќа данок по стапка од 10 отсто, додека за 10.000 денари ќе се плаќа данок по стапка од 18 отсто“, информираат од Министерството.

Со законот се предвидува и оданочување на доходот од капитал (закуп и подзакуп, дивиденди, капитални добивки, добивки од игри на среќа) и другиот доход со единствена стапка од 15 отсто.

„Поради нередовноста на овој доход, во пракса е поедноставно тој да се оданочува со единствена стапка отколку со прогресивни стапки. Ваква е практиката и во земјите од регионот (Хрватска, Словенија, Албанија, Србија). Поради тоа што овој доход во најголема мера завршува кај најдоходовните сегменти од популацијата, со цел да се обезбеди поправедна дистрибуција на доходот, избрана е стапка која е повисока од основната стапка на данокот на доход од труд“, велат од Министерството.

Со новата регулатива се воведува и оданочување на капиталните добивки од хартии од вредност и на каматите од орочени депозити со стапка од 15 отсто, со одложена примена од почетокот на 2020 година. На доход од камати до 250 евра годишно, нема да се плаќа данок. Сепак, воведувањето ваков данок сериозно може да го дестимулира штедењето во банките, што на своевиден начин е голем удар за банкарскиот сектор чиј главен извор на финансии и давање кредити се токму штедните влогови на граѓаните.

Со новиот закон се предвидува и оданочување на доход од осигурување се подразбира односно премијата за осигурување на живот уплатена од правно лице или обврзник кој остварува доход од самостојна дејност, премијата за неживотно осигурување уплатена од правно лице или обврзник кој остварува доход од самостојна дејност, придонеси во доброволен пензиски фонд уплатени од правно лице или обврзник кој остварува доход од самостојна дејност, исплатената осигурана сума, освен надоместокот на штета, исплатениот пензиски надоместок од доброволно капитално финансирано осигурување и освен пензискиот надоместок исплатен преку програмирани повлекувања.

Од Министерството за финансии велат дека промените се воведуваат со цел да се адресира постоечката регресивност кај данокот на доход, како и да се обезбедат дополнителни буџетски средства за обезбедување квалитетни јавни услуги.

„Најдоходовните 1 отсто од луѓето во Македонија во 2017 година заработувале во просек 4.486 евра месечно, што е 14,4 пати повеќе од просечниот доход на граѓаните во државава. Ова ја става Македонија на прво место во Европа по социјалната нееднаквост. Со реформата очекуваме да обезбедиме дополнителни 25 милиони евра. Средствата ќе бидат искористени за борба против сиромаштијата. Оној кој има доход повисок од 90.000 денари, ќе плати нешто повеќе, за да му дадеме можност на својот сограѓанин да оди напред“, изјави министерот за финансии Драган Тевдовски при презентацијата на даночните измени.


Ангеловска – Бежоска: Граѓаните негуваат култура на штедење во банкарскиот сектор


Скопје, 30 октомври, 2018 - 16:43 (META) 

Имајќи ги предвид сите придобивки на штедењето, задоволство ми е што можам да констатирам дека македонските граѓани негуваат култура на штедење во банкарскиот сектор, рече денеска гувернерката на Народна банка, Анита Ангеловска-Бежоска на свеченоста по повод Светскиот ден на штедењето (31 октомври), организирана од Македонската банкарска асоцијација.

– Во последните 10 години, вкупните депозити  растат со стапка од околу осум проценти, во просек, на годишно ниво, што придонесе за зголемување на штедењето за околу 10 процентни поени на нивото од 55 проценти од домашниот бруто-производ (БДП) во 2017 година. Фактот што депозитниот раст беше остварен во услови на глобалната криза и повеќе економски и политички шокови е потврда за високата доверба на граѓаните во банкарскиот сектор, кој што во целиот период остана здрав, стабилен, високо капитализиран и ликвиден, покажувајќи висока способност за успешно справување со шокови – рече Ангеловска-Бежоска.

Таа додаде дека особено позитивен е посилниот раст на депозитите во домашна валута и забрзувањето на растот на штедењето на долг рок, што го јакне капацитетот на банките за долгорочни пласмани и поддршка на инвестициски проекти.

Гувернерката потенцираше дека и покрај позитивните трендови, видлива е потребата за натамошно зголемување на вкупното домашното штедење, што е впрочем заедничка карактеристика на земјите од Централна, Источна и Југоисточна Европа (ЦИЈЕ).

На свеченоста се обратија и министерот за финансии Драган Тевдовски и претседателот на Македонската банкарска асоцијација, Коста Митровски.


Дирекцијата за заштита на личните податоци е против увидот на УЈП во сметките на граѓаните


Скопје, 14 август, 2018 - 11:11 (META) 

Дирекцијата за заштита на личните податоци е против увидот на Управата за јавни приходи (УЈП) во сметките на граѓаните, информираат тие преку соопштение.

Во него велат дека уште на крајот на мај годинава тие дале негативно мислење, дека предложените измени на Законот за банки не се усогласени со Законот за заштита на личните податоци.

„Предложените законски решенија не се во согласност со начелата за заштита на личните податоци (особено начелото на пропорционалност и неопходност), утврдени во член 5 став 1 од Законот за заштита на личните податоци. Предложените нови законски решенија, кои се однесуваат на УЈП, создаваат таканаречен „bulk pull” систем со кој не се обезбедува пропорционално и неопходно собирање и обработување на личните податоци. Односно, се овозможува преобемно и неограничено обработување на лични податоци, а кои лични податоци по својот обем не се неопходни во однос на исполнување на целите заради кои се обработуваат според начелата за заштита на личните податоци утврдени во член 5 став 1 алинеи 1, 2 и 3 од Законот за заштита на личните податоци“, се додава меѓудругото во соопштението.

Од таму велат дека во февруари годинава одржале состанок со Македонската банкарска асоцијација и со УЈП, и уште тогаш кажале дека претходно ќе бидат неопходни измени и на Законот за УЈП, со кои ќе се утврдат заштитни мерки за правата и слободите на физичките лица.


НБРМ: Финансискиот систем е стабилен, банките добро работат


Скопје, 9 август, 2018 - 13:04 (META) 

Советот на Народната банка денеска одржал редовната седница на која била разгледан и усвоен Извештајот за финансиската стабилност во 2017 година, информираат од таму.

Притоа било констатирано дека македонскиот финансиски систем, лани работл во поповолно опкружување споредено со 2016 година.

„Банките остануваат најзначајниот фактор за одржување на стабилноста на целокупниот финансиски систем и на одделните финансиски институции. Лани немаше позначителни промени во однос на изложеноста на банкарскиот систем на ризиците во работењето. Ризиците од нефункционалните кредити не се големи“, се вели во извештајот на Народна банка.

Меѓу другото, во Извештајот е истекнато дека лани се подобрила солвентноста на банкарскиот систем.

„Домашниот корпоративен сектор бележи подобрување на показателите од работењето. Висината на долгот на корпоративниот сектор расте побавно, при што за првпат во последните седум години дојде до намалување на неговата нето-задолженост кон надворешните доверители, поради растот на дадените кредити од домашни корпоративни клиенти кон нерезиденти“, се додава во соопштението.

Од НБРМ велат дека поголем интерес за кредитирање има кај домаќинствата, каде што има зголемена побарувачка за станбени кредити.

„Стимул за поголемо кредитирање на домаќинствата претставува и солидната наплата и следствено добриот квалитет на кредитното портфолио на банките кон домаќинствата, што се согледува преку ниската и стабилна стапка на нефункционалните кредити од 2,4 проценти“, се додава во соопштението.


Фирмите ќе можат да користат 100 милиони евра од ЕИБ на есен


Скопје, 31 јули, 2018 - 9:36 (META) 

100 милиони евра евтини кредити од Европската инвестициска банка ќе им станат достапни на малите и средни претпријатија, на есен информираат од Министерство за финансии. Од таму додаваат дека министерството изготвило Закон за гаранција, кој ќе се најде денес на владина седница, по што ќе биде доставен до Собранието.

„Откако Собранието ќе го усвои законот, ќе се потпише договор помеѓу Европската инвестициска банка и Македонската банка за поддршка на развојот, како и Министерството за финансии во својство на гарант на заемот. Со потпишување на договорот 100 милиони евра ќе станат достапни за малите и средни претпријатија. Македонската банка за поддршка на развојот ќе ја пласира оваа кредитна линија преку деловните банки, како посредници до крајните корисници. Со ова ќе се обезбеди свеж капитал за малите и средни претпријатија, ќе се поддржат нови проекти, нови вработувања, ќе се зголеми ликвидноста во стопанството и ќе се зголеми извозот“, се вели во соопштението на Министерство за финансии.


Доверителите на „Агрокор“ го прифатија договорот со руските банки и спречија банкрот


Загреб, 5 јули, 2018 - 11:14 (META) 

Доверителите на хрватскиот холдинг „Агрокор“ го одoбрија договорот за надмирување на долговите, во што ќе се вклучат руските банки  „Сбербанк“ и “„ВТБ“, кои ќе преземат 46 отсто од акциите.

На овој начин, ќе се избегне банкрот на најголемата компанија на Западен Балкан во која има вработени 60.000 лица и учествува со 15 проценти во домашниот бруто-производ (БДП) на Хрватска.

Холдингот „Агрокор“ натрупа долг од осум милијарди евра, вклучувајќи ја и спорната сума што им ја должи на две руски државни банки.

Според договорот, добавувачите можат да очекуваат да добијат 60 отсто од нивните побарувања, банките ќе добијат до 20 проценти, а сопствениците на обврзници може да очекуваат враќање од 40 до 80 проценти од нивната инвестиција.

Спроведувањето на договорот се очекува да трае меѓу три и четири месеци откако Трговскиот суд и официјално ќе го одобри. 


НБРМ: Успешно заврши конференцијата за плаќања и пазарна инфраструктура


Охрид, 8 јуни, 2018 - 13:46 (META) 

Денеска, успешно заврши 11. конференција за плаќања и пазарна инфраструктура, насловена како „Време е за дигитализација“, организирана од Народната банка во соработка со Централната банка на Холандија, информираат од таму.

„Изминативе три дена, во Охрид, претставници од 21 централна банка од регионот на Западна, Централна и Источна Европа, Заедницата на независни држави, Блискиот Исток и Северна Африка, како и претставници од домашниот финансиски сектор, дискутираа, полемизираа и разменуваа искуства за предизвиците на дигитализацијата на плаќањата. Особен придонес во овие дискусии имаа високи претставници од Европската комисија, Европската централна банка, централните банки коишто му припаѓаат на Европскиот систем на централни банки, Банката за меѓународни порамнувања и Светската банка“, се вели во соопштението на НБРМ.

НБРМ и Министерството за финансии подготвуваат нацрт-закон за платежни услуги и платни системи прилагоден на ЕУ-регулативи во оваа област.

„Со усвојувањето на овој нацрт-закон, чие подготвување е во завршна фаза, се очекува зголемување на конкуренцијата во сферата на плаќањата преку влез на нови небанкарски даватели на платежни услуги, појава на иновативни решенија за извршување на плаќањата, намалување на цените на платежните услуги, обезбедување подобра заштита на потрошувачите и унапредување на сигурноста на дигиталните плаќања“, се додава во соопштението.