!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Им ги испразниле сефовите на пет граѓани во „Шпаркасе банка“


Скопје, 5 декември, 2017 - 14:06 (META) 

Пет граѓани пријавиле во СВР Скопје дека од сефови што ги изнајмиле во „Шпаркасе банка“ им биле одземени пари и предмети.

Како што извести полицијата, за настанот бил известен и јавен обвинител и се спроведува истрага.


Фатен еден од разбојниците што ја ограбија „Халк банка“


Скопје, 18 ноември, 2017 - 14:03 (META) 

Осомничениот Е.М. (29) од Скопје е приведен и доби кривична пријава поради грабежот во експозитура на „Халк банка“ на 3 ноември годинава.

Пријавениот заедно со уште две, засега непознати лица, на улицата Александар Урдаревски во експозитура на „Халк банка“ извршил грабеж, при што одзел околу 1.200.000 денари.

„Е.М. и едно од двете лица извадиле пиштоли, заканувајќи им се на вработените и барајќи да им ги дадат парите. За време на извршувањето на кривичното дело, одзеле 1.150.000 денари пари од банката и уште 50.000 денари на клиент кој во тоа време се затекнал во банката, по што избегале во непознат правец“, информираат од МВР.


Девет години и два месеци казна затвор за Бобан Смилевски за грабежот во НЛБ


Скопје, 3 ноември, 2017 - 12:29 (META) 

Бобан Смилевски доби девет години и два месеци затвор за милионскиот грабеж што го изврши во НЛБ. Неговиот брат Горан Смилевски, второобвинет во случајот, е осуден на шест години и шест месеци затвор.

Третообвинетиот Борис Минчевски доби пет години и два месеца, а Мирослав Каевски беше условно осуден на две години и судот му изрече забрана за отуѓување и за давање под закуп на недвижен имот. Со одлуката, судот го одзеде и возилото „голф“ кое се споменува во обвинението.

Според обвинителниот акт, тие се товарат дека од НЛБ украле првин 400.000 швајцарски франци и 375.000 евра, а потоа уште 2 милиони швајцарски франци и 270.000 евра.

Четворицата обвинети за грабежот ја признаа вина, но не открија што сториле и каде се украдените пари.

Судијата Дарко Тодоровски висината на казните ја образложи со фактот дека обвинетите не откриле каде се украдените пари.

Со пресудата тројцата првообвинети се задолжени и во рок од една година по правосилноста на пресудата, солидарно да ја надоместат штетата на банката.

Смилевски во завршните зборови ја призна вината и рече дека парите ги украл бидејќи имал долгови, а тој и семејство живееле под закани.

– Делото не е од лукративна причина и не е за да се оствари имот за себе или за кој било друг. Бев во долгови и во последните два месеци бев под закани, јас и семејството. Губењето самоконтрола ме доведе до ова. За себе можам да кажам дека сум бил пример во приватниот живот, општеството, а до кражбата за себе можам да кажам дека не сум бил криминалец, ниту имам криминален ум – рекол Смилевски во својот завршен збор.


Граѓанин открил нелегално поставена опрема на банкомат во Аеродром


Скопје, 22 октомври, 2017 - 14:31 (META) 

Вчера попладне во Единицата за информации и команда Скопје, граѓанин пријавил дека при вадење на картичката од банкомат на банка на булеварот Видое Смилевски – Бато во населбата Аердром, забележал дека на банкоматот се вградени двојна тастатура и двоен скен-детектор.

Од МВР информираат дека претставник на банката потврдил дека станува збор за додатоци кои биле нелегално поставени.

Се преземаат мерки за расчистување на случајот, велат од полицијата.


Заложничка драма во банка во Германија


Берлин, 21 април, 2017 - 14:59 (META) 

Вооружен крадец влегол во банка во јужниот германски град Валдшут и како заложници држи двајца вработени, соопшти германската полиција.

„Вооружениот крадец влегол во банката денеска попладне, додека во објектот имало двајца вработени“, стои во полициското соопштение.

Полицијата имала престрелка со ограбувачот, за кој се верува дека е повреден.

Полициските единици поставија кордон во близина на банката, а властите ги повикаа граѓаните да не се движат во тој дел од градот поради тековната полициска акција.


Експлозија на бомба во центарот на Атина


Атина, 20 април, 2017 - 10:19 (META) 

Силна експлозија го потресе центарот на Атина доцна ноќеска. Бомбата поставена во торба експлодираше нешто пред 23 часот синоќа, пред канцелариите на „Јуробанк“ во строгиот центар на градот. Во експлозијата се причинети големи материјални штети на банката и на околните згради, но нема повредени.

Според информациите од полицијата, половина час пред експлозијата имало предупредувачки повик во еден грчки медиум дека ќе експлодира бомба пред „Јуробанк“ во центарот на градот, благодарение на што полицијата успеала да го евакуира реонот навремено и да избегне жртви.

Стражарот на банката и камерите покажале дека две лица пристигнале пред банката на мотор, ја оставиле торбата со бомбата и потоа избегале.

Полицијата трага по напаѓачите, а поради истрагата на местото на настанот дел од центарот на градот беше блокиран до рано утринава.

Засега ниту една организација нема преземено одговорност за нападот. Во последната година, зачестија нападите со бомби со помал капаците пред амбасади, официјални згради, згради на официјални лица и на судии, а грчките анархисти испраќаа експлозивни материјали преку писма и до официјални лица од Европската Унија. За мнозинството од нив одговорност презема терористичката организација Огнени јадра.


Парите од НЛБ отишле во Србија, тројца му помагале на Бобан С. во грабежот


Скопје, 19 април, 2017 - 15:24 (META) 

Единицата за економски и за компјутерски криминал на МВР до надлежното Основно јавно обвинителство поднела кривична пријава против уште три лица осомничени дека биле вмешани и му помагале на Бобан С. во грабежот на 3 милиони евра од трезорот на НЛБ, соопшти денеска МВР.

Како што информираат оттаму, станува збор за братот на Бобан С., 44-годишниот Г.С., потоа 24-годишната Е.П., вработена како банкарски комерцијалист во НЛБ, и за 38-годишниот Б.М., пријател на првоосомничениот.

Според полицијата, за нив постојат основани сомнежи дека директно му помогнале на Бобан С. во грабежот на банката.

Осомничената Е.П., како што информираат од полицијата, помогнала во прикривањето на кусокот од 100.000 швајцарски франци, односно првиот затаен износ од авионската пратка од вкупно 1.000.000 швајцарски франци што го украл Бобан С. Потоа, по негово упатство, додека двајцата биле на смена, тој во трезорот, таа на шалтер во банката, примила пари од трезорот во апоени од 500 и од 100 евра, вкупно 375.000 евра, и без да подготви документ за исплаќање на парите од трезорот, му ги дала на рака на Бобан С., кој ги изнел од банката.

На 10 април, кога осомничениот трезорист ја изнел најголмата сума од 2.000.000 швајцарски франци и 270.000 евра од девизниот трезор, сокриени во украсна ќеса, според полицијата, тој парите му ги предал на својот брат, кој, пак, му ги дал на Б.М., кој наредниот ден по 14 часот, преку граничниот премин Табановце со возило „фолксваген голф“ ја напуштил земјава.

Од МВР наведуваат дека вчера тој бил уапсен и бил изведен пред судија на претходна постапка, но не посочуваат каде е извршено апсењето.

„Од страна на СВР Скопје – Единица за економски и за компјутерски криминал, во координација со Основното јавно обвинителство во Скопје, и понатаму се преземаат мерки за целосно расветлување на кривично-правниот настан, за утврдување на кој начин Б.С. изнел од банката дополнително и уште 300.000 швајцарски франци“, стои во соопштението на МВР.

Сепак, и понатаму останува мистеријата што се случило со украдените пари, кои сè уште не се пронајдени.


Приведено едно лице за кражбата на речиси 3 милиони евра од НЛБ


Скопје, 11 април, 2017 - 13:26 (META) 

Едно лице е приведено во врска со грабежот во НЛБ вчера, на крај на работното време, при што беа украдени речиси три милиони евра од трезорот на банката, соопшти СВР Скопје.

Случајот го пријавил директорот на трезорот на банката, вчера во 16.58 часот. Тој кажал дека нивниот вработен Б.С.(40) од Скопје извршил тешка кражба од трезорот на банката. Тој, според пријавата, украл швајцарски франци и евра, сè во вкупна вредност од околу три милиони евра, по што заминал.

Како што соопшти МВР, вчеравечер во 19 часот во полициската станица во Кисела Вода е приведено едно лице во врска со грабежот и се работи на целосно документирање и расчистување на случајот.


Заложничка драма во банка во Германија


Дуизбург, 16 март, 2017 - 12:46 (META) 

Вооружен напаѓач утринава во филијала на банката „Шпаркасе“ во Дуизбург зел двајца службеници како заложници. Во тек е голема полициска акција.

Германската полиција соопшти дека напаѓачот е азилант, а дека маж и жена, кои се вработени во банката, се држат како заложници.

– Во моментов целата околина е опколена – соопшти портпаролот на полицијата, додавајќи дека во акцијата се вклучени и снајперисти.

Полицијата сè уште нема воспоставено контакт со лицата кои се наоѓаат во банката.

Вработена во банката, која успеала да побегне, ја информирала полицијата за нападот, кој почнал некаде пред 9 часот.


ВМРО-ДПМНЕ ја дала партиската зграда под хипотека


Скопје, 16 февруари, 2017 - 10:20 (META) 

ВМРО-ДПМНЕ неколку дена пред изборите зела кредит од три милиони евра од Комерцијална банка и за таа цел го заложила под хипотека новото седиште, палатата „Христо Татарчев“, објави „Призма“.

Како што пишува во Службен весник, партијата зела „рамковен риволвинг кредит“, што значи дека не морала да ги подигнe сите три милиони евра одеднаш.

Освен својот дел од објектот, ВМРО-ДПМНЕ во банката заложила и подвижен имот и опрема.

„Призма“ се обратила и до партијата и прашале за што им требаат парите, колку години ќе го враќаат кредитот и дали под хипотека го ставиле целото седиште, a од таму рекле дека ќе одговорат во наредните неколку дена.

Зградата во период од 2013 до 2015 година ја изгради скопски „Бетон“ на Минчо Јорданов, врз земјиштето во центарот на Скопје што е сопственост на партијата и каде што се наоѓаше нивното седиште, т.н. „жолта куќа“.