Хан: Ако се спроведат реформите, 2025 е реалистичен датум за прием на нови членки


Брисел, 6 ноември, 2018 - 11:50 (META) 

Еврокомесарот за проширување и соседска политика, Јоханес Хан, во интервју за „Ди Велт“, вели дека 2025 година е реалистичен датум за прием на нови членки од Балканот, но само доколку се исполнат критериумите.

– Датумот 2025 е индикативен, но ако се интензивира имплементацијата на реформите тој е доста реалистичен. Но, сите критериуми за членство мора да бидат исполнети претходно, нема скратен пат. Мотото е „квалитет пред брзина“ – вели Хан.

Тој во интервјуто уште еднаш го поздрави гласањето за уставните измени во македонското Собрание.

– Благодарен сум им на сите пратеници кои си ја исполнија одговорноста и ги ставија интересите на државата пред оние на партијата. Ова посебно важи за пратениците од опозицијата кои гласаа спротивно од партиската линија и ги сносеа последиците од тоа, односно исклучувањето од партијата – изјави Хан.

Тој е уверен дека Преспанскиот договор ќе биде изгласан во Грција и вели дека овој договор ќе испрати важен сигнал на помирување за целиот регион.

– Би можел да има динамичен ефект врз решавањето на спорот помеѓу Србија и Косово и да доведе до пробив во пристапниот процес на Западниот Балкан. За земјите членки на ЕУ пристапот во ЕУ има смисла само ако сите шест земји можат да се приклучат и решението во ПЈРМ го прави ова сценарио многу поверојатно – изјави Хан, додавајќи дека со напредокот на Македонија се создава атмосфера на „позитивен натпревар“.


Ципрас: Речиси тридеценискиот спор стигнува до крајот


Њујорк, 26 септември, 2018 - 12:25 (META) 

Во обраќањето на годишниот самит „Конкордија“ во Њујорк грчкиот премиер Алексис Ципрас меѓу другото говореше за иницијативите на Балканот, споменувајќи го и прашањето за името. Грчкиот премиер рече дека спорот по речиси три децении стигнува до крај, а неговата визија е Грција, како водечка сила, да го одведе целиот регион до стабилност, соработка и просперитет.

– Презедовме важни иницијативи Балканот да го направиме стабилен, безбеден и просперитетен дел од Европа. Видовме дека постои прозорец на можности за да се надмине едно прашање што беше трн за Грција и Европа речиси три децении. Прашањето со поранешната југословенска Република Македонија стигнува до крај. Со почитување на нашата историја, со почитување на нашите народи – рече Ципрас.

Грчкиот премиер се осврна и на економската криза со која се соочуваше Грција, велејќи дека земјата сега веќе сврти страница и застана на нозе.

Во однос на бегалскиот проблем, Ципрас рече дека е европски проблем за кој е потребна заедничка европска стратегија за справување.


Автоматско признавање на дипломите во Западен Балкан е се поблиску


Брисел, 26 јуни, 2018 - 17:19 (META) 

Министрите за образование од земјите на Западен Балкан, меѓу кои и од Македонија, ги поддржаа клучните принципи за автоматско признавање на академските квалификации во регионот, соопшти Регионалниот совет за соработка (РСС).

Овој напредок е направен на 7. министерски состанок на Платформата за образование и обука, за истражување и иновации, што беше организиран денеска во Брисел под покровителство на Европската комисија.

Станува збор за принципи кои се надградени врз основа на она што претходно го сработија Работната група на РСС и Иницијативата за реформи во образованието на Југоисточна Европа – ERI SEE, за признавање на квалификациите на Западен Балкан, што беше потенцирано и од генералниот секретар на РСС Горан Свилановиќ.

Принципите што беа поддржани од министрите, меѓу кои и од министерот за образование на Република Македонија Арбер Адеми, сочинуваат модел на автоматско признавање на академските квалификации, вклучувајќи транспарентни и фер процедури согласно со Лисабонската конвенција за признавање.


Заев: 2018 година може да биде година за паметење за Македонија


Белград, 3 јуни, 2018 - 19:29 (META) 

„Ако се насочиме сите кон изнаоѓањето решение, 2018 година може да биде година за паметење и за Република Македонија, но и за регионот, и за ЕУ и за НАТО. Затоа, неуморен оптимист сум и очекувам во јули покана на Македонија за влез во НАТО“, рече меѓу другото премиерот Зоран Заев во интервјуто за магазинот „CorD“, кој се печати во Белград.

Заев на прашањето дали промените на Западен Балкан го прават фактор на стабилност во регионот или е се уште регион што продуцира кризи, нагласува дека Западен Балкан покажа дека може да има искрени, енергични и посветени политички раководства, кои сакаат, можат и знаат да проценат што е потребно за своите граѓани, но и пошироко, и се подготвени, без калкулации, да ги постават државите на вистинскиот пат.

„Ако некогаш Западен Балкан бил цврст во своите погледи кон заедничката индина, тоа е сега. И ова е многу важен момент. Ги препознавме потребите за меѓусебна поврзаност и соработка и и покажавме на Европа дека е цела, безбедна и стабилна само со целосна интеграција на сите држави што географски, историски, културно и припаѓаат. Сме фактор на стабилност на Европа, не на нестабилност, нема повеќе дилеми. За поздравување е што и Европа го препозна тоа и подаде раце кон Западен Балкан“, вели премиерот Заев во интервјуто.


Москва предупреди на негативните последици од влезот на Македонија во НАТО


Москва, 20 март, 2018 - 15:11 (META) 

Рускиот заменик-министер за надворешни работи Александар Грушко на денешната средба со македонскиот амбасадор во Москва, Гоце Карајанов, рекол дека „плановите за влез на Македонија во НАТО може да имаат негативни последици за регионалната безбедност и билатералните односи“.

Според соопштението на руското Министерство за надворешни работи, двајцата дипломати „дискутирале за актуелните билатерални прашања, при што и двете страни изразиле подготвеност за соработка на полињата на заеднички интерес. Исто така било нагласена важноста на продолжување на работата на руско-македонската меѓувладина комисија за трговска, економска, научна и технолошка соработка.

На средбата, рускиот заменик-министер Грушко и амбасадорот Карајанов разговарале и за ситуацијата на Балканот.


Регионална балканска средба во Берлин за дискриминацијата на Ромите


Берлин, 14 февруари, 2018 - 10:05 (META) 

Повеќе од 80 претставници на министерства на земјите од Западен Балкан и Турција, се собраа во Берлин на средба посветена на дискриминацијата на Ромите, со цел да се осигура препознавање на оваа дискриминација во регионот.

Дводневната средба е под покровителство на Регионалниот совет за соработка (РСС) и во организација на германските власти, а во рамките на проектот „Интеграција на Ромите 2020“.

– За нас е многу важно да се формулираат соодветни политики што водат во интеграција, а не натамошно исклучување на Ромите. Тука не станува збор за пронаоѓање на виновникот, туку за унапредување на нашите капацитети и резултати од работата – изјави заменикот генерален секретар на РСС, Газменд Турдиу.

Кристина Лудерс, директорка на германската Сојузна агенција за борба против дискриминацијата, потсети дека Ромите и Синтите се најгoлемите малцинства во Европа и дека омразата и расизмот против нив е проблем на цела Европа.

– Најважна работа што можеме да сториме, е да покажеме солидарност и да не носиме одлуки во име на малцинствата, туку наместо тоа да се погрижиме да ги засилиме и да ги слушнеме гласовите на Синтите и на Ромите – изјави Лудерс.

На собирот се одржуваат низа панели на кои се прави преглед на практиката на европските политики за борба против дискриминацијата на Ромите, соопшти РСС.

Интеграцијата на Ромите и прекинување со дискриминаторските политики и практики, од средината на 2016-тата година е составен дел од условите за прилкучување на земјите кандидати за членство во ЕУ.


Билт: „Тешкашите“ од ЕУ треба да се вклучат во решавањето на спорот за името


Лондон, 5 февруари, 2018 - 12:12 (META) 

Во решавањето на спорот за името меѓу Македонија и Грција треба да се вклучат силните членки на Европската Унија, за да се избегне колапс на стратегијата на ЕУ за Балканот, смета ко-претседавачот на Европскиот совет за надворешни работи и поранешен шеф на шведската дипломатија, Карл Билт.

„Мислам дека ќе треба силна посветеност на силните земји-членки и на институциите на Европската Унија за да се постигне компромис за името на Македонија. Без тоа, стратегијата на ЕУ за Балканот ризикува да доживее колапс“, напиша Билт на својот твитер-профил, споделувајќи текст на грчкиот весник „Катимерини“ за вчерашните протести во Атина.


„Фајненшл тајмс“: ЕУ ќе прими шест држави од Балканот, меѓу нив и Македонија


Лондон, 2 февруари, 2018 - 18:19 (META) 

Планот на ЕУ е во своето членство да прими шест држави: Албанија, Србија, Црна Гора, Босна и Херцеговина и Македонија, но и Косово, пишува „Фајненшл тајмс“.

Според весникот, главната причина за таквиот потег на Брисел е што Балканот служи како главен „терен“ преку кој илјадници емигранти стигнуваат до тлото на Европската Унија. Меѓутоа, „Фајненшл тајмс“ тврди и дека стратезите на ЕУ стравуваат дека Русија опасно ја шири својата зона на влијание, токму во регионот каде што традиционално веќе има сојузници.

Новиот план на Брисел ќе ѝ биде претставен на Европската комисија на 6 февруари, кога ЕУ треба да го претстави својот план за Западниот Балкан. Се очекува новиот план да биде усвоен, пишува ФТ.

Рокот за „големото проширување на ЕУ“ е датумот кој веќе беше спомнуван во српската јавност како рамка до која Србија треба да биде примена во ЕУ, а тоа е 2025 година.

„Фајненшл тајмс“ истакнува дека шесте држави сепак ќе мораат, пред конечниот прием во ЕУ, дефинитивно да ги решат отворените прашања, како и проблемот со корупцијата. Во таа смисла најблиску до достигнувањето на целта се Србија и Црна Гора.

Се истакнува и дека Бугарија, која во моментов претседава со Унијата, но и Австрија, која е следна, како свои приоритети го одредија токму проширувањето на ЕУ на Западниот Балкан.


Туск: Историјата на Балканот е подраматична од „Игра на тронови“ иако нема змејови


Софија, 12 јануари, 2018 - 10:10 (META) 

Претседателот на Европскиот совет Доналд Туск смета дека историјата на Балканот е подраматична и поинтересна од дејството во популарната телевизиска серија „Игра на тронови“ (Game of Thrones).

Тој, на инаугурацијата на бугарското претседателство со ЕУ, во Софија, предупреди дека на Западен Балкан, каде Брисел се обидува да воспостави тесни врски со земјите кои сакаат да се приклучат на ЕУ, не треба да се дозволи да се случи сценарио од популарната серија.

-Историјата на Балканот е подраматична и поинтересна од сценариото на „Игра на тронови“, иако во неа нема змејови. Сите посакуваме сегашноста и иднината на Балканот да биде како помалку драматично сценарио. Стабилност, безбедност, напредок е она што го заслужуваат луѓето од целиот регион. А целта на ЕУ е да го направи ова сценарио реалност – рече Туск.


Фицо: Балканот повторно гори, потребна му е европска перспектива


Њујорк, 19 декември, 2017 - 16:25 (META) 

Важно е на некои држави од Балканот да им се понуди европска перспектива, изјави во Њујорк словачкиот премиер, Роберт Фицо по разговорите со генералниот секретар на ОН, Антонио Гутереш.

– Балканот повторно гори, неопходна е европска перспектива. Во спротивно нервозата во регионот ќе продолжи да расте – рече Фицо.

Тој со Гутереш разговарал и за словачкиот проект чија цел е да го ограничи приливот на мигранти, а е изработен во соработка со други земји.

– Мораме да продолжиме со проекти и вон ЕУ и да ги поместиме прашањата за миграција во овие трети земји. Словачка е подготвена да поддржи и одговорни проекти внатре во ОН – рече Фицо

Тој истакна дека е важно ОН да бидат силни, особено затоа што ЕУ не е доволно силна повеќе да се ангажира по некои прашања.

– ЕУ во суштина не е присутна во Украина, a немаме ниту влијание и во Сирија – рече Фицо, истакнувајќи ја важноста на силни меѓународни организации во слични конфликти, како што е ОН.