Кина ја повика Северна Кореја да не лансира уште една ракета


Пекинг, 4 септември, 2017 - 20:53 (META) 

Кина ја предупреди Северна Кореја да не продолжува со наводните планови за лансирање нова балистичка ракета и го повика Пјонгјанг да не ја зголемува напнатоста.

Портпаролот на кинеското министерство за надворешни работи, Генг Шуанг, рече дека на Северна Кореја мора да ѝ биде јасно дека резолуцијата на Советот за безбедност на ОН забранува такви активности.

Генг во Пекинг изрази надеж дека сите страни, а особено Северна Кореја, ќе „вежбаат воздржаност од додатни ескалации на тензиите“.

Министерството за одбрана на Јужна Кореја претходно соопшти дека верува дека Северна Кореја се подготвува да лансира нова балистичка ракета.


Кина го прекинува увозот од Северна Кореја


Пекинг, 14 август, 2017 - 16:59 (META) 

За три недели Кина ќе престане да увезува севернокорејски јаглен, риба и друга стока предвидена со санкциите кои Обединетите нации ги воведено кон Северна Кореја поради нејзината нуклеарна програма.

Царинската служба на Кина најави дека од 5 септември на полноќ ќе престанат процедурите што се однесуваат на увоз на стока од Северна Кореја.

„После тоа, увозот на стока ќе биде забранет“, стои во соопштението.

Одлуката на Кина доаѓа во екот на тензиите меѓу Вашингтон и Пјонгјанг, чии лидери изминатите денови разменија закани.

Северна Кореја предупреди дека би можела да испука ракети во насока на американскиот остров Гуам, додека претседателот на САД вети дека Пјонгјанг ќе се соочи со „оган и бес“.

Советот за безбедност на ОН на 5 август усвои резолуција која предвидува воведување нови поостри санкции кон Северна Кореја, откако оваа земја во јули ја лансираше втората интерконтинентална балистичка ракета.

Текстот на документот, кој го предложија САД е усвоен едногласно, а резолуцијата ја поддржа и Кина.

Сепак, кинеските лидери се противат на целосното запирање на трговијата со Северна Кореја, наведувајќи дека тоа би можело да распространување на гладот.


Ќе ги зајакнеме нашите клучни сојузници на Пацификот, порача Белата куќа


Вашингтон, 12 февруари, 2017 - 18:32 (META) 

Ќе ги зајакнеме нашите клучни сојузници на Пацификот, одговори Белата куќа на лансирањето на балистичката ракета од страна на Северна Кореја.

„Нашата порака е дека ќе ги зајакнеме нашите клучни сојузници во пацифичкиот регион, што е дел од нашата стратегија за спречување на растечкото непријателство кое го видовме изминатите години од режимот на Северна Кореја“, изјави советникот во Белата куќа, Стивен Милер за „Фокс њуз“.

Северна Кореја истрела балистичка ракета од базата Бангјон кон Јапонското море. Проектилот поминал 500 километри пред да падне во морето.


Северна Кореја истрела балистичка ракета кон Јапонското море


Пјонгјанг, 12 февруари, 2017 - 10:05 (META) 

Северна Кореја истрела балистичка ракета, соопшти министерството за одбрана на Јужна Кореја, оценувајќи дека станува збор за провокација кон новата администрација на американскиот претседател, Доналд Трамп.

Ракетата, како што пренесуваат светските медиуми, била лансирана во 7.55 часот според локално време од базата Бангјон во западниот дел на Северна Кореја и летала на исток, кон Јапонското море, каде паднала.

Проектилот поминал 500 километри пред да падне во морето, но од министерството за одбрана во Сеул навеле дека сè уште не се знае за каков тип на ракета станува збор.

Претседателот на САД, Доналд Трамп кој во тој момент се наоѓал на Флорида заедно со јапонскиот премиер Шинзо Абе, кој се наоѓа во посета на САД, кратко изјавил дека Јапонија има 100 отсто поддршка од САД и дека тестирањето на ракетата од страна на Пјонгјанг е „апсолутно недозволиво“.

Северна Кореја од 2006 година изведе пет нуклеарни проби и серија тестирања на балистички ракети поради што на земјата и беа воведени строги меѓународни санкции кои во март 2016 година беа дополнително заострени.


Пјонгјанг нема да има нуклеарно оружје со дострел до САД, порачува Трамп


Вашингтон, 3 јануари, 2017 - 12:18 (META) 

Новоизбраниот претседател на САД, Доналд Трамп, вели дека Северна Кореја нема да успее да направи нуклеарно оружје што би имало дострел до Соединетите Американски Држави.

„Северна Кореја соопшти дека е во финална фаза од развој на нуклеарно оружје способно да достигне до делови од САД. Тоа нема да се случи!“, напиша Трамп на својот официјален профил на „Твитер“.

Севернокорејскиот лидер Ким Јонг-ун пред два дена изјави дека Пјонгјанг е блиску до тестирање интерконтинентална балистичка ракета.

Од друга страна, експертите веруваат дека Северна Кореја е сè уште далеку од ракетна технологија што ќе може да пренесе нуклеарна боева глава до територијата на САД.

Трамп, како што јавуваат светските агенции, упатил критики до Кина, изјавувајќи дека оваа земја профитирала од економските врски со САД, но дека не сака да помогне околу контролата на Северна Кореја.

„Кина преку едностраната трговија зеде голем дел од богаството од САД, но не сака да помогне околу Северна Кореја“, напиша Трамп на „Твитер“.


Северна Кореја истрела балистичка ракета од подморница


Пјонгјанг, 24 август, 2016 - 10:44 (META) 

Северна Кореја истрелала балистички проектил од подморница, јавува севернокорејската новинска агенција „Јонхап“.

Проектилот од типот КН-11 бил истрелан од подморница на источниот брег на Северна Кореја и прелетал 500 километри пред да падне во Јапонското Море, соопштил претставник на властите на САД.

Јапонскиот премиер Шинзо Абе потегот на Пјонгјанг го нарекол „пакосен чин“.

Инаку, Обединетите нации ѝ забранија на Северна Кореја, за која се претпоставува дека развива нуклеарно оружје, да користи какви било балистички ракети.

Последното истрелување на балистички прокетил се случува откако Северна Кореја најави дека ќе се одмазди поради воените вежби на САД и на Јужна Кореја, кои режимот во Пјонгјанг ги толкува како обид за инвазија на земјата.