!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Конкурс за манифестацијата „Нов културен бран“


Скопје, 31 јули, 2017 - 9:59 (META) 

Министерството за култура денеска на својата веб-страница ќе ги објави условите и формуларите за пријавување на општини, здруженија на граѓани, асоцијации, неформални групи и автори од областа на културата и на уметноста за манифестацијата „Нов културен бран“.

Таа ќе се реализира од крајот на август до крајот на октомври годинава,  односно сè до исцрпување на средствата за реализација на манифестацијата.

„Цел на манифестацијата е да се обезбеди деметрополизација и децентрализација на културата, дисперзија во локалните средини и збогатување, омасовување и раздвижување на културната понуда во сите региони на Македонија. За разлика од претходниот пристап со манифестацијата „Топол културен бран“, на која право за аплицирање со проекти за културни настани имаа само општините, со овој повик, право на аплицирање со проекти и со идеи за манифестацијата ќе имаат здруженија на граѓани, асоцијации, неформални групи и автори од областа на културата и на уметноста, кои ќе треба да понудат квалитетна, естетски профилирана и вредносно издржана понуда, со која ќе внесат посвежи идеи и поиновативни пристапи во креирањето на културата, како и нови и современи форми во создавањето и во презентирањето на културниот и на уметничкиот продукт“, порачува Министерството за култура.


Македонската поетска реч презентирана во Софија


Софија, 11 мај, 2017 - 12:48 (META) 

Поезија од вкупно 16 македонски автори, беше презентирана во Галеријата на Столичната библиотека во Софија, а во исто време уште и во 12 други бугарски градови, во рамките на шестата „Европска ноќ на литературата“.

Љубителите на поетската реч можеа да ги слушаат стиховите на Славе Ѓорго Димоски, Ристо Јачев, Влада Урошевиќ, Михаил Ренџов, Анте Поповски, Радован Павловски, Лилјана Дирјан, Никола Маџиров и други.

Презентација ја организираше Културно-инфомативниот центар на Република Македонија во Софија, а меѓу гостите беше присутен и македонскиот амбасадор во Бугарија, Марјан Ѓорчев.

– Ме радува што оваа година имаме уште повеќе посетители и што овој настан привлекува и млада публика. За годинашното претставување избравме лирска поезија од македонски поети од различни генерации. Имаме и атрактивен простор – Столичната библиотека, која е на фреквентна локација. Задоволен сум од соработката со другите странски партнери во проектот, а особено добра соработка имаме со Чешкиот културен центар, кој е лидер на проектот „Европска ноќ на литературата“ во Софија – рече Васко Шутаров, директор на КИЦ на Република Македонија во Софија.


Денеска почнува Саемот на книга


Скопје, 4 април, 2017 - 10:58 (META) 

Саемот на книга почнува денеска и ќе трае до 10 април. Најавено е учество на 80 издавачи, а ќе се продаваат околу 80.000 книги, некои со попуст и до 70 проценти. Саемот се одржува во првата хала во Скопски саем, на површина од 4.000 квадратни метри.

Во Промотивниот центар во втората саемска хала ќе има 60 промоции на нови дела и автори.

Првпат годинава ќе биде претставена и литературата за деца и млади во адаптираното Детско катче каде децата ќе се едуцираат и забавуваат со богати промоции на детски изданија, ќе има креативни работилници и други забавни активности, како и дружење и гостувања на авторите на самите штандови на издавачите.

Саемот ќе биде отворен од 10 до 20 часот, цената на влезницата е 30 денари, односно 20 денари за организирани групни посети.


Тројца македонски поети претставени во Солун


Солун, 13 март, 2017 - 14:32 (META) 

Македонската современа поезија и литературни автори беа претставени на поетската вечер „Живите гласови на Медитеранот“ во Францускиот институт во Солун. Бројната грчка и странска публика ги слушна стиховите и поетските мисли на истакнатите македонски автори Владимир Мартиновски, Николина Андова-Шопова и Ѓоко Здравески.

Поетската вечер се одржа по повод Месецот на Франкофонијата, настан на кој Македонија со помош на Генералниот конзулат на државата во Солун веќе редовно настапува последните три години. Настанот, кој беше уникатна можност за грчката и меѓународната франкофонска публика да се запознае со македонската поезија, литература и уметност и со тоа да ги надмине политичките проблеми, беше организиран повторно со помош на Генералниот конзулат и на македонската конзулка во Солун, Маја Апостолова.

За време на поетската вечер, професорот Мартиновски, Андова-Шопова и Здравески читаа дел од својата поезија на македонски и на француски јазик. Авторските дела со кои се претставија беа дел од творештвото со кое тројцата автори учествуваа и на поетскиот фестивал во Сете, Франција. За грчката публика, стиховите на македонските автори ги препеа грчкиот издавач Јоргос Јанопулос.

Благодарение на интензивираната културна соработка меѓу македонските автори и грчки издавачи, се очекува дел од македонската современа поезија да биде објавена во грчко литературно издание.

Грчката публика имаше можност на изминатите изданија на поетските читања на Месецот на франкофонија во Солун да слушне и дел од поетското творештво и дела на познатиот македонски автор Влада Урошевиќ.

Македонската современа култура сè почесто се претставува во Северна Грција и особено во Солун, преку активностите на конзулатот. Пред само две недели во втората грчка престолнина беше претставена старата македонска чалгиска музика преку концерт на „Чалгија саунд систем“.


Поезија од македонски автори објавена во романско книжевно списание


Охрид, 5 мај, 2016 - 12:12 (META) 

Одбрани песни од поетите Мишо Китаноски, Петко Шипинкаровски и Димо Димчев објавени се, во печатена и во електронска верзија, во најновиот број, за март и за април, на книжевното списание „Хелис“ во Романија.

Преводот на стиховите на романски го направи македонскиот поет Димо Н. Димчев, а списанието го уредува угледниот романски поет Ѓеорѓи Добре.

Објавувањето на творештвото на македонските поети книжевното списание „Хелис“ го прави во континуитет.


„Бибер“ објави збирка раскази на тема помирување


Сараево, 5 април, 2016 - 14:45 (META) 

Книжевно-активистичкиот тим „Бибер“ денеска соопшти дека е објавена збирка кратки раскази на тема помирување, избрани на конкурсот што беше објавен минатата година.

Во збирката има 25 избрани ракази, меѓу кои и на авторите Владимир Табашевиќ, Надиа Герас и Слаѓана Љубичиќ, кои се наградени на конкурсот.

Обајвените и наградените раскази ги избра жирито во состав Дорунтина Баша, Фарук Шехиќ и Бојан Кривокапиќ.

Во збираката сите раскази се објавени на босански, хрватски, црногорски, српски, македонски и на албански јазик.

„Промоциите на збирката ќе бидат одржани во текот на мај во Сараево, Скопје и во Белград, а се надеваме, подоцна, и во други градови во регионот“, велат од тимот на „Бибер“.

„Бибер“ е книжевно-активистички тим формиран околу идејата дека уметноста може да инспирира општествена промена.


БИРН: За „Скопје 2014“ потрошени се повеќе од 567 милиони евра


Скопје, 26 јули, 2015 - 12:34 (META) 

Најмногу пари за проектот „Скопје 2014“ потрошиле Министерството за култура и Службата за општи и заеднички работи на Владата, бидејќи тие се јавуваат како инвеститори на најкрупните објекти како што се: Музејот на ВМРО, Стариот театар, Уставниот суд, Македонската филхармонија и новиот изглед на владината зграда, објави БИРН во истражувањето „Скопје 2014 под лупа“.

Според документите, најскап објект од проектот „Скопје 2014“ е зградата во која се сместени Уставниот суд, Државниот архив и Археолошкиот музеј. За неа се потрошени повеќе од 42 милиони евра.

Три милиони евра помалку чини Македонската филхармонија со потрошени повеќе од 39 милиони евра и Стариот театар кој, според документите, од буџетот „зел“ преку 37 милиони евра, за што се склучени 85 договори.

Најголем белег врз „Скопје 2014“ има оставено скулпторката Валентина Стевановска, автор на Портата „Македонија“, „Воин на коњ“, спомениците на плоштадот Филип Втори, „Воинот“, седумте скулптури на мостот Око, Летниковецот, споменикот на Христо Татарчев, „Воинот“ во Гази Баба. Според расположливата документација, Стевановска за изработките на овие дела зела речиси 3 милиони евра, сума во која се вклучени и трошоците за изработката.

Фирмата „Неимар инженеринг“ е втора на листата, по Стевановска, која добила најмногу решенија за архитектонски услуги за клучни објекти. Оваа фирма, според податоците од Централниот регистар е во сопственост на Ана Кедева-Петрова, сестра на познатиот кардиолог Сашко Кедев, кандидат за претседател на претседателските избори во 2004 година и поранешен пратеник во Собранието од ВМРО-ДПМНЕ.

Најскапата фасада, според документацијата на БИРН, е фасадата на Владата, која, според пресметките, чини повеќе од 15 милиони евра, што е трипати повеќе од сите фасади во централното градско подрачје.

„Скопје 2014“ вклучува:

– 132 објекти
– 30 инвеститори
– 117 фирми
– 9 леарници
– 130 автори на идејни решенија

За целиот проект потрошени се повеќе од 567 милиони евра.