Китанов: Капиталните инвестиции во патишта 3,5 милиони евра повеќе од лани


Скопје, 6 јули, 2018 - 13:26 (META) 

Директорот на Јавното претпријатие за државни патишта, Зоран Китанов денеска информираше дека во првата половина на 2018 година, реализирани се капитални инвестиции 3,5 милиони евра повеќе од лани.

– ЈП за државни патишта во вториот квартал од 2018 година има остварено инвестиции во вкупен износ од 2.217.070.250 денари или 36 милиони евра, што е зголемување од 37 проценти од лани. Споредбено за првото полугодие од 2018 година во однос на истиот период лани има реализација на инвестиции за 6,82 проценти повеќе, или 3,43 милиони евра – истакна Китанов.

Тој додаде дека овие средства се обезбедени од кредити од меѓународни финансиски институции, како и од сопствени средства на ЈП за државни патишта.

– Со околу 20 милиони евра, буџетски средства и со средства на ЈПДП, веќе се работи на рехабилитација на регионални патишта во должина од 230 километри. Со 86 милиони евра средства обезбедени од Европската банка за обнова и развој се планира рехабилитација на 26 патни правци во должина од 422 километри. Со 14 милиони евра од Светска банка се работи на рехабилитација на 13 патни правци во должина од околу 150 километри – додаде Китанов.

Инаку, за  оваа година се обезбедени вкупно 270 милиони евра за изградба на нови патишта, за реконструкција, рехабилитација и за обнова на повеќе од 60 патни правци ширум Македонија во должина од околу 800 километри. Дел од овие средства се од државниот и од буџетот на ЈПДП, а дел се обезбедени преку заем од Светска банка, ЕБОР и ИПА2.

Тој информираше и за приходот на патарините, кој во првата половина на годинава е зголемен за 54 милиони денари повеќе од лани, како резултат на како што рече, зголемениот обем на сообраќај и на подобрата организираност.

– Целта на ЈПДП и на Владата е да се реализираат програмските одредници „Македонија без црни точки” и инфраструктурно поврзување кое ќе овозможи пристигнување од еден до друг град за помалку од 90 минути – објасни Китанов.


На рочиштето за „Траекторија“ се слушаа 30 „бомби“, судењето продолжува на 4 јули


Скопје, 26 јуни, 2018 - 16:11 (META) 

о Кривичниот суд денеска на рочиштетот за предметот „Траекторија“ на СЈО беа пуштени 30 „бомби“ односно прислушувани разговори кои СЈО ги доставило како докази, а се однесуваат за периодот во јануари 2013 година.

Во дел од разговорите во кои скоро сите ги води поранешниот министер за транспорт и врски Миле Јанакиески се слушаа информации околу постапката за тендерската документација за изградба на автопатот Миладиновци-Штип и Кичево-Охрид за која македонскиот амбасадор во Кина, Оливер Шамбевски му ја појаснува на Јанакиески.

Во еден од разговорите Јанакиески му се жали на шефот на кабинетот на Груевски, Мартин Протуѓер дека премиерот го искарал зошто доцнела процедурата за обезбедување пари за веќе најавените автопати. Со слушање на останатиот дел од вкупно 315 аудио разговори кои како докази се предложени во случајот, судењето ќе продолжи на 4 јули.

Во „Траекторија“ осомничени се поранешниот премиер Никола Груевски, поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор за државни патишта Љупчо Георгиевски, дека во 2012/2013 година ги пречекориле своите овластувања во постапката за избор на компанија за изградба на автопатските делници до Штип и Охрид и нанеле штета на буџетот на државата од најмалку 155 илјади евра.


Судењето за „Траекторија“ одложено за 29 мај


Скопје, 23 мај, 2018 - 13:08 (META) 

Адвокатот Димитар Дангов на денешното рочиште за предметот „Траекторија“ побара судењето да се одложи за 29 мај, бидејќи, како што рече, еден од обвинетите, Никола Груевски напладне ќе присуствува на соопштување на пресудата за предметот „Тенк“.

Во случајот „Траекторија“ обвинети се Никола Груевски, Владимир Пешевски, Миле Јанакиески и Љупчо Георгиевски поради тоа што во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатните делници Миладиновци – Штип и Кичево – Охрид ги искористиле и пречекориле своите овластувања.

Тие според СЈО, нанеле штета на државниот буџет од најмалку 155.117.172 евра и за истиот износ на компанијата изведувач и овозможиле да се стекне со имотна корист.


Во Кривичeн суд Скопје денеска судења за „Монструм“ и „Траекторија“.


Скопје, 23 мај, 2018 - 10:04 (META) 

Во Кривичниот суд во Скопје ќе се одржат рочишта за случаите на Специјалното јавно обвинителство (СЈО), „Монструм“ и „Траекторија“.

На рочиштето за „Монструм“ исказ  треба да дадатт двајца обвинети за петкратното убиство кај Смилковското езеро на 12 април 2012 година. На претходното рочиште повеќе од пет часа исказ даваа обвинетите Агим Исмаиловиќ и Фејзи Азири, кои се изјаснија дека не се виновни за монструозното убиство.

Овој случај е на повторно судење, кое почна на 16 мај, откако првичните пресуди против обвинетите беа укинати во декември минатата година од Врховниот суд, а сега обвинението го застапува СЈО.

Масакрот кај Смилковското Езеро се случи на 12 април 2012 година, на Велики четврток, пред големиот христијански празник Велигден, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски.

Во Судот денеска ќе се одржи рочиште и за случајот „Траекторија“, кој се обвинети се поранешниот премиер Никола Груевски, поранешниот вицепремиер Владимир Пешевски, екс-министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски. Тие се осомничени дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатските делници Миладиновци – Штип и Кичево – Охрид ги искористиле и пречекориле своите овластувања. Тие според СЈО, нанеле штета на државниот буџет од најмалку 155.117.172 евра и за истиот износ на компанијата изведувач и овозможиле да се стекне со имотна корист.

Груевски денеска во истиот суд треба да ја чуе пресудата во случајот „Тенк“, за набавката на луксузниот блиндиран „мерцедес“ вреден речиси 600.000 евра.


Груевски за „Траекторија“ ги спори СМС-пораките, СДСМ и СЈО можеле да ги менуваат


Скопје, 14 февруари, 2018 - 13:50 (META) 

Поранешниот премиер Никола Груевски во продолжението на рочиштето за случајот „Траекторија“ побара од судот да ги отфрли СМС-пораките како недозволен доказ, бидејќи, како што рече, не може да се утврди нивната автентичност и оти многу лесно може да се манипулира нивната содржина. Тој рече дека е можно тоа да се правело и во СДСМ и во Специјалното јавно обвинителство (СЈО)

– За ова не треба никакво посебно знаење, доволен е компјутер со програма со која може да се отвори пораката, да се менува текстот без да оставите трага – рече Груевски обраќајќи се пред судот.

Тој рече дека пред Специјалното јавно обвинителство да ги добие СМС-пораките тие биле кај СДСМ, кој, како што рече, е нивни жесток политички противник и „партија која сака да ни нанесе политичка штета и правни последици”.

Тој додаде дека е теоретски можно и во СЈО да била менувана содржината на СМС-пораките за да се поткрепи обвинението.

Груевски побара пред да биде продолжена постапката, судот да донесе формално решение во врска со одбиеното барање 13 од вкупно 315 прислушувани разговори да не бидат доказ во процесот, затоа што веќе се јавно објавени и се наоѓаат на интернет.

– Бараме да имаме еднаков третман како оној што од овој суд му се дава на Заев – рече поранешниот претседател на ВМРО-ДПМНЕ и поранешен премиер.

Груевски рече оти разбира дека судот работи под политички притисок и побара да работи по закон и како што пишува во законот. Тој ова го наведе во контекст на приговорот на адвокатите дека навреме, односно во рок од еден до три дена, не им се доставуваат цд-та со записникот од рочиштата. Зборуваше и за барањето да бидат отфрлени вештачењата во овој предмет, бидејќи, како што рече се направени од вештаци без лиценци и од фирма која е странска експозитура, а што според македонската легислатива било незаконски.

На предлозите на Груевски, обвинителката од СЈО, Лиле Стефанова, рече дека тој само од мобилен телефон го читал предлогот што до судот го достави неговиот адвокат Димитар Дангов, а којшто судот веќе го одбил.

Стефанова нагласи и оти таа повеќе нема да се произнесува по предлози и приговори коишто се повторуваат и побара од судот, доколку тоа повторно се случи, на адвокатите да им биде одземен зборот.

На продолжението на денешното рочиште, на кое Груевски честопати приговараше, судијата Бошевски рече дека ќе им овозможи услови на адвокатите да ги слушаат снимките на бомбите и да направат препис во судот, а Груевски остана на барањето да им биде доставена и копија од таканаречените бомби.

Следното рочиште Бошевски го закажа за 1 март, а на терминот остана и покрај инсистирањето на адвокатот Дангов, кој бараше нов датум, бидејќи од 28 февруари до 5 март ќе бил во странство.


Груевски, Јанакиески, Пешевски и Георгиевски денеска во Кривичен суд за „Траекторија“


Скопје, 14 февруари, 2018 - 9:56 (META) 

Во скопскиот Кривичен суд, денеска треба да се одржи рочиште за предметот „Траекторија“, во кој се обвинети поранешниот премиер Никола Груевски, поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски.

Тие се осомничени дека во втората половина на 2012 година и во текот на 2013 година во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања.

Со тоа, според обвинителниот акт од СЈО, му нанеле штета на државниот буџет од најмалку 155 милиони евра, односно овозможиле толкава корист за компанијата-изведувач.


ЕУИСС: Кинеските инвестиции во Западен Балкан ја поттикнуваат корупцијата


Брисел, 24 јули, 2017 - 16:42 (META) 

Кинеските инвестиции во инфраструктурата во земјите од Западен Балкан ја поттикнуваат корупцијата во регионот, пишува во анализата на Институтот за безбедносни истражувања на ЕУ (EUISS).

Во извештајот пишува дека инвестиции во патишта и во железници во вредност од 5,5 милијарди евра има во Македонија, Србија, Црна Гора и во БИХ, а Кинезите работата ја добивале директно преку владини претставници, а не преку тендери.

Во оваа анализа е спомнат и случајот со изградбата на автопатот Кичево – Охрид, со што буџетот на Македонина е оштетен за 155 милиони евра, а се спомнува дека во случајот се вмешани политичари и еден поранешен премиер за кој Специјалното јавно обвинителство отвори случај.

Во анализата се наведува дека кинеската компанија „Синохидро“, која ги гради македонските автопатишта, во 2016 година беше на црниот список на Светска банка за корупција и за измама.


Заев ја информирал амбасадорката Лисјен за проблемите со изградбата на автопатиштата


Скопје, 19 јуни, 2017 - 14:10 (META) 

Премиерот Зоран Заев денеска се сретнал со кинеската амбасадорка во земјава, Лин Лисјен, и ја информирал за проблемите во изградбата на двата автопатишта Миладиновци – Штип и Кичево – Охрид, во чијашто изградба учествува Кина.

Тој изјавил дека повеќемесечниот застој на изградбата на автопатиштата е предизвикан од грешки во проектирањето, ненавремено решавање на имотно-правни односи на автопатот кон Штип и од изместување на трасата кон Охрид.

За таа цел, Заев најавил средба во најскоро време со кинескиот изведувач и со другите вклучени страни во проектите, заради наоѓање брзо решение.

Кинеската амбасадорка Лисјен му врачила писмо на Заев од премиерот на НР Кина, Ли Кечијанг, во кое се порачува дека Кина во новата Влада гледа добар партнер и голем потенцијал за продлабочување на соработката помеѓу двете држави.


ВМРО-ДПМНЕ: Граѓаните очекуваат да почнат да се градат 500 километри автопат


Скопје, 5 јуни, 2017 - 9:48 (META) 

„СДСМ даде ветувања кои не може да се остварат само со интриги, манипулации и со лажни обвинувања кон ВМРО-ДПМНЕ. Граѓаните очекуваат СДСМ да почне и да изгради нови 500 километри автопат. Докторите очекуваат плата од 100.000 денари, пензионерите повисоки пензии, а вработените – просечна плата од 30.000 денари“, порача ВМРО-ДПМНЕ во соопштение.

Партијата нагласува дека во текот на нејзиното владеење од 2006 година успеала стапката на невработеност од 38 отсто да ја намали „на најниски во историјата на независна Македонија 23,1 отато“ и дека донела многу странски инвестиции.

„Донесовме огромен број странски инвестиции, а Македонија е рангирана на високото десетто место во светот, а петтото во Европа за водење бизнис, според извештајот на Светска Банка, „Дуинг бизнис“, извештај на кој во времето на СДС бевме на срамното 96. место. ВМРО-ДПМНЕ повторно ја врати довербата на граѓаните во државата, кои 11 години по ред на сите изборни циклуси гласаат за програмата на партијата“, се вели во соопштението.


ВМРО-ДПМНЕ: СЈО му помага на Заев да реализира нарачани платформи


Скопје, 22 мај, 2017 - 17:46 (META) 

На прес-конференција денеска дури тројца високи функционери на ВМРО-ДПМНЕ одговараа на наводите што денеска ги изнесе СЈО отворајќи три нови случаи, од кои два „Талир“ и „Траекторија“ се за претседателот на ВМРО-ДПМНЕ и за високи партиски или државни функционери во владите на ВМРО-ДПМНЕ.

Антонијо Милошоски од партиската говорница обвини дека СЈО само „штанца обвиненија против ВМРО-ДПМНЕ“ за да му помогне на претседателот на СДСМ и мандатар за нова влада, Зоран Заев во „спроведување нарачани платформи“.

– Од пресот на СЈО се забележуваат две цели. Првата цел е најава за притисок врз судството отворена политичка најава за силен притисок врз судството што ќе следува во наредниот период. И втората цел преку таквиот притисок врз судствоот да се издејствуваат судски пресуди кои што се веќе дел од некој политички или коалиционен договор.  Таквата најава денес СЈО ја соопшти преку соопштувањето на случајот Сопот – рече Милошоски, наведувајќи дека потоа би уследиле идентични постапки и за случаите „Монструм“ и „Диво насеље“.

За случајот „Траекторија“ зборуваше Никола Попоски, кој рече дека не е точно дека била нанесена материјална штета од 155 милиони евра, оти станувало збор за капитален проект од кој корист имаат сите граѓани на Македонија. Тој рече и дека за двата автопати, односно Миладиновци – Штип и Кичево – Охрид не се применувал Законот за јавни набавки затоа што во Собранието во 2013 година, и со гласови на пратеници од СДСМ и од ДУИ, бил изгласан Законот за реализацијата на двата инфраструктурни проекти, кој пак се засновал на Законот за рафирикација на договорот за економска и техничка соработка во инфраструктурата меѓу владите на Македонија и на Кина. Тој негираше и дека во игра била само една понуда.

– Третата инсинуација во денешниот настап на СЈО е дека се преговарало со само една компанија и не била избрана најниската понуда. Вистината е следна, склучени се меморандуми со две компании и тоа: China International Water and Electric Corpоration (CWE) и Sinohydro Corporation Limited. Двете компании доставиле свои понуди и во 2013-та година е одбрана најниската понуда – рече Никола Попоски.

За случајот „Талир“, за незаконско финансирање на ВМРО-ДПМНЕ одговараше Емил Димитриев, генерален секретар на партијата и технички премиер. И тој обвини дека отворањето на случаите од СЈО е уште еден напад врз ВМРО-ДПМНЕ, порачувајќи дека партијата не работела незаконски, што било „потврдено од страна на сите институции надлежни за проверка на финансиското работење на политичките партии“.

– Јасно и гласно со чест и со достоинство порачуваме дека ова нема да помине. Финансирањето на ВМРО-ДПМНЕ е реализирано согласно закон, целокупниот имот на ВМРО-ДПМНЕ е законски стекнат. Имотот на ВМРО-ДПМНЕ се користи за извршување на партиските функции.ВМРО-ДПМНЕ има право да има простор за свое функционирање. СДС не може и не смее да биде во привилегирана позиција и да има простор за функционирање кој му оставен од поранешната комунистичка партија. А, ВМРО-ДПМНЕ да нема простор. Сиот имот на партијата е законски стекнат и без разлика дали е во целост оспособен за партиско функционирање како што е отприлика 95% од просторот или пак е во тек постапка за оспособување на просторот како што имаме 4-5 ситуации – рече Димитриев.