Сугарески: За автопатот Кичево – Охрид не се проектирале клучки


Кичево, 19 јуни, 2018 - 16:36 (META) 

За еден месец ќе се знае колку ќе чини автопатот Кичево – Охрид, вели директорот на Јавното претпријатие за државни патишта, Зоран Китанов.

Од 374 милиони евра од банката ЕКСИМ наменети за овој автопат, 220 милиони се неискористени, и главната цел на Министерството за транспорт и врски ќе биде во Собранието да се пренаменат овие пари.

„Овие пари би се користеле за други позиции кои можат да се градат, а не за предвидените кои се во застој“, информираше министерот за транспорт и врски Горан Сугарески.

Сугарески и Китанов информираа дека поради грешки во проектирање на тунелот од минатото раководство сега цената за негова изведба ќе биде двојно поголема.

„Се трудиме да одиме со цените од подизведувачите, а не со цените од „Синохидро“ кои што биле досега. Но, дополнителните работи се доста на број“, изјави Китанов.

Геотехничките испитувања на земјиштето се правеле на едно место, а трасата за тунелот е на друго место на кое категоријата на земјата е сосема различна. Поради овие проблеми на помош изминатиот период дошол експерт од Австрија, а совети ќе се бараат и од стручни лица од САД.

„Нигде го нема ова да се проектира автопат, а да не се проектираат клучки. Со сегашната состојба не е предвидено нигде исклучување, што значи дека од Кичево до Охрид на ниту едно место граѓаните нема да можат да се исклучат од автопатот или пак да возат по сервисни патишта. Осумте клучки кои се во фаза на проектирање ќе чинат околу 30 милиони евра, но до крајот на месецов ќе имаме конечна сума за сите дополнителни работи“, вели министерот Сугарески.

Рокот за изградба на автопатот е продолжен до 2021 година.

 


Претпоследниот дел од автопатот Приштина – Скопје денеска ќе се пушти во употреба


Приштина, 14 јуни, 2018 - 10:22 (META) 

Министерството за инфраструктура (МИ) на Косово денеска ќе го пушти во промет третиот и претпоследен сегмент на автопатот „Арбен Џафери“, кој ја поврзува Приштина со границата со Македонија на граничниот премин Генерал Јанковиќ, јавува дописникот на МИА од Приштина.

Свеченоста кај Качаник ќе се одржи под мотото „Не за брзината, да за безбедноста“, во рамките на кампањата за кревање на свеста кај возачите за зголемување на безбедноста во сообраќајот.

 


Сугарески: За изградба и реконструкција на Коридор 8, инвестираме 500 милиони евра


Тетово, 5 јуни, 2018 - 13:49 (META) 

Aвтопатот Скопје – Тетово во должина од 17 километри се рехабилитира и инвестицијата е во вредност од 1,1 милиони евра, средства обезбедени од буџетот на Јавното претпријатие за државни патишта (ЈПДП), информираат од Министерство за транспорт и врски.

Министерот за транспорт и врески, Горан Сугарески истакна дека во западниот дел на државата се инвестираат преку половина милијарда евра за изградба и реконструкција на патната мрежа на Коридор 8.

Покрај реконструкцијата на автопатот од Скопје до Тетово, во втората половина на годината преку ЈПДП ќе се распише тендер за проектирање за реконструкција на патот од Тетово до Гостивар на ниво на стандарден автопат.

„Во меѓувреме се работи на реконструкција на државниот пат од Гостивар до Кичево, со вкупна вредност на инвестицијата од преку 6 милиони евра. Во тек е и проектирање за изградба на нов автопат од Гостивар до Кичево и секако продолжуваме со изградба на автопатот од Кичево до Охрид“, изјави Сугарески.

Директорот на ЈПДП, Зоран Китанов истакна дека од вкупната должина до сега се асфалтирани 9 километри и се очекува до крајот на јуни реконструкцијата на делницата на потегот од Скопје кон Тетово да е комплетно завршена.

„Во текот на овој месец ќе започнат и градежните работи за реконструкција на делницата на потегот од Групчин кон Сарај“, изјави Китанов.


Тевдовски: ЕБОР со грантови ќе ја помогне изградбата на автопатите кон Кичево и Блаце


Аман, 9 мај, 2018 - 11:08 (META) 

Автопатите Гостивар – Кичево и Скопје – Блаце и патот Крива Паланка до границата со Бугарија, се идните проекти кои ќе бидат во фокусот на соработката со Европската банка за обнова и развој (ЕБОР), истакна министерот за финансии Драган Тевдовски, кој учествува на годишните средби на ЕБОР, кои се одржуваат во Јордан.

Грантот за автопатот Гостивар – Кичево би се однесувал за дел од изградбата на делницата Букојчани – Кичево во должина од 12 километри. Се очекуваат и грант средства и за реконструкција на патот Крива Паланка – Деве Баир.

– За автопатот Скопје – Блаце веќе добивме грант од ЕБОР за комплетирање на проектната задача, која треба да биде готова за помалку од три месеци – истакна Тевдовски.

Како што посочи тој, најголем дел од соработката на Македонија со ЕБОР е во транспортниот сектор. Во делот од железничката инфраструктура на средбите се зборуваше за реконструкција на пругата Скопје – Кичево.

– Од железничката инфраструктура, важен е Kоридорот 8. Битен е и проектот за електронски системи долж Kоридорот 10 и проектот за изградба гранична станица на железничкиот Kоридор 10, помеѓу Македонија и Србија – рече Тевдовски.

Тевдовски истакна и дека Годишните средби на Европската банка за обнова и развој се одлична можност да се зборува за крупни капитални проекти, бидејќи на нив присуствуваат клучни луѓе на финансискиот сектор.

– ЕБОР е сериозен партнер на Македонија. Нивното тековно портфолио на проекти изнесува 707 милиони евра. Најголем дел од проектите се од транспортниот сектор, во патната инфраструктура, каде ЕБОР учествуваше во финансиската конструкција на патот Демир Капија-Смоквица, на експресниот пат Штип – Радовиш, ремонтот на пругата на Коридорот 10 и рехабилитација на железничката пруга на Коридор 8 – рече Тевдовски.


Автопатот Демир Капија – Смоквица треба да обезбеди економски развој и безбедно патување


Гевгелија, 23 април, 2018 - 15:02 (META) 

Со отворањето на 28,2 километри од автопатот Демир Капија – Смоквица го додадовме делот од Коридор 10 кој недостасуваше во земјата, рече генералниот директор за соседски политики и преговори за проширување во Европската комисија, Кристијан Даниелсон.

Тој додаде дека овој автопат ќе го олесни движењето, ќе го поттикне економскиот развој и ќе обезбеди одржливо и побезбедно патување.

Новата автопатска делница Демир Капија – Смоквица, која е во рамки на Коридорот 10, е дел од вкупните вложувања на Европската Унија во транспортната инфраструктура на земјата, кои во изминатите неколку години достигнаа речиси 325 милиони евра. Со нив се изградени и обновени над 100 километри автопатска мрежа, 64 километри патишта во повеќе од 40 општини и 60 населени места, 16 километри железничка пруга и 11 железнички станици.

Премиерот Зоран Заев рече дека овој автопат поврзува и води кон ЕУ.

– Оваа делница од автопатот „Пријателство“ во себе ја има вградено и искрената приказна за поддршка и соработката. Нашата темелна вредност и определба, да ги издигнеме капацитетите на нашата земја на ниво достојно за да биде членка на ЕУ, е силна мотивација за усогласување на нашата, национална патна инфраструктурна стратегија, со онаа на Европската Унија – рече Заев.

Министерот за транспорт и врски Горан Сугарески рече дека оваа автопатска делница е прва од овој тип на Балканот.

– Автопатот ги содржи сите потребни каректеристики за сообраќајна безбедност што ни дава сигурност дека сообраќајот по оваа делница ќе се одвива побезбедно за сите учесници. Истиот е проектиран и изграден согласно нормите и стандардите на Европската унија за заштита на животната средина, што дополнително влијае на намалување на емисијата штетни гасови – рече Сугарески.

Продолжување на поддршката и инвестициите кои треба да обезбедат поефикасно инфраструктурно и енергетско поврзување на целиот регион е една од шестте приоритетни иницијативи во новата Стратегија на Европската Унија за поддршка на трансформацијата на Западен Балкан. Со неа се предвидуваат дополнителни инвестиции на ЕУ од над една милијарда евра во натамошниот развој и инфраструктурата на земјите од Западен Балкан.

На настанот беше означен стартот на „ЕУ за тебе“ кампањата за инвестициите на Европската Унија во транспортната инфраструктура“, велат од Делегацијата на ЕУ во Македонија.

На отворањето на автопатот, присуствуваше и министерот за транспорт и врски на Грција, Христос Спирцис.


Автопатот Демир Капија – Смоквица денеска ќе биде пуштен во употреба


Скопје, 23 април, 2018 - 9:58 (META) 

По неколку одложувања, автопатот Демир Капија – Смоквица, денеска и официјално ќе биде отворен во 12 часот од страна на премиерот Зоран Заев, евроамбасадорот Самуел Жбогар, како и министерот за транспорт и врски Горан Сугарески.

На автопатот, наместо три, како што беше предвидено, ќе има две патарини – eдната кај Гевгелија, другата кај Демир Капија.

Како што претходно информираше директорот на Агенцијата за патишта, Зоран Китанов, новите две наплатни рампи ќе бидат изградени за осум до десет месеци.

„Од моментот на давање на дозволата за градба, рокот за изградба е осум до десет месеци. Две патарини ќе има, една кај Гевгелија, една кај Демир Капија. Со најсовремен систем со сите светски мерила, да немате веќе застој“, изјави Китанов.

Новите 28,2 километри автопат од Демир Капија до Смоквица ја чинат државата 270 милиони евра. Од нив, 107 милиони евра се обезбедени  со кредит од Европската банка за обнова и развој (ЕБОР), 130 милиони евра од Европската инвестициска банка, 45 милиони евра се грант од ЕУ, а шест милиони евра преку буџетот.

На настанот ќе биде промовирана и Кампања за инвестиции на ЕУ во транспортната инфраструктура на земјата.

Автопатската делница ја градеше грчката компанија „Актор“, а за неа, СЈО почна истраги  за тендерот како и за извлекувањето големи суми пари од вработени во компанијата.

Првоосомничен во овој случај е тогашниот премиер Никола Груевски, а второосомничен тогашниот министер за транспорт и врски Миле Јанакиески, како и тројца членови на комисија во Министерството и одговорни лица во грчки „Актор“, неговото македонско претставништво и уште две компании за перење пари.


Од денеска до четврток ќе има посебен сообраќаен режим поради Дигиталниот самит


Скопје, 17 април, 2018 - 11:55 (META) 

СВР Скопје ќе воспостави посебен сообраќаен режим за сообраќајниците околу хотелот „Александар палас“ и спортскиот центар „Борис Трајковски“, поради Дигиталниот самит кој ќе почне утре. Посебниот сообраќаен режим ќе почне од денеска во 15 часот и ќе важи до четврток.

„Со посебниот режим ќе бидат затворени и пренасочени за сообраќај улиците Јадранска магистрала, Скупи, делови од булеварите 8 Септември, Илинден како и другите сервисни улици кои што гравитираат кон двата објекта. Исто така, посебен сообраќаен режим е предвиден и за обиколницата на автопатот до скопскиот аеродром“, информираат од МВР.


Пратениците во Тирана фрлаа јајца и брашно по Еди Рама


Тирана, 12 април, 2018 - 14:33 (META) 

Албанскиот премиер Еди Рама за време на денешната седница на парламентот беше гаѓан со брашно и јајца поради апсењата на лицата кои протестираа против воведувањето патарини на автопатот меѓу Косово и Албанија.

Седницата во неколку наврати беше прекината. По инцидентот беше принудено да реагира и обезбедувањето, кое отстрани од салата неколку пратеници од редовите на опозицијата, јавија албанските медиуми.


Автопатот Кичево – Охрид ќе чини поскапо, рокот за изградба пролонгиран


Скопје, 21 март, 2018 - 13:43 (META) 

Крајниот рок за изградба на автопатот Кичево – Охрид ќе биде 30 јуни 2021 година, информираше министерот за транспорт и врски, Горан Сугарески.

Тој додаде дека, потребата од продолжување на рокот за доизградба на овој капитален проект се јавува поради неусогласеност на проектната документација со реалните услови на теренот, како и променливата геологија на теренот која не одговара со онаа предвидена во проектот.

„Поради тоа, потребно е повторно проектирање на тунелското решение, на сите усеци, на повеќе вијадукти, мостови, потпорни ѕидови, натпатници, потпатници, плочести и цевасти пропусти. Треба да се изработи и комплетна проектна документација за девет клучки, проектна документација за позиции кои не биле предвидени во основниот проект, а морале да се предвидат заради неоходно и правилно функционирање на автопатот“, изјави Сугарески.

Тој додаде дека сето ова предизвикало зголемен обем на работа која суштински влијае врз продолжување на рокот, но има и значителни финансиски импликации по однос на конечната вредност на автопатот.

„Тука сакам да нагласам дека анексот кој го прифати Владата се однесува само за продолжување на рокот. Не се однесува за дополнителните средства, бидејќи се уште се прават сеопфатни анализи колку би чинел дополнително. Најпрво е потребно да заврши проектирање на сите работи што претходно ги спомнав, и потоа стручен тим во соработка со надзорниот орган, ќе даде конкретна дополнителна цена на чинење на автопатот“, додаде Сугарески.


Формиран Советот за правосудство, „она на М“ засега не се продава, од догодина нема Кембриџ


Скопје, 6 март, 2018 - 21:16 (META) 

Владата го формираше Советот за следење на имплементација на стратегијата во правосудството 2017-2022, со кој ќе претседава премиерот Зоран Заев. На денешната седница е утврден и составот на Советот. Во него ќе членуваат министерот за правда Биљен Саљији, неговиот заменик Оливер Ристовски, Јавниот обинител Љубомир Јовевски, претставник од Врховен суд, Специјалната јавна обвинителка Катица Јанева, по еден претставник од апелационите судови во Гостивар, Битола, Штип и Скопје, како и по еден претставник од основните судови Скопје 1 и 2. Членови на овој совет, ќе бидат и Народен правобранител Иџет Мемети, како и Џемали Саити, претседателот на Здружението на судии, а свои претставници ќе имаат и Адвокатската комора, како и Блу Принт групата на граѓански организации за правосудство.

На седницата е разгледана информацијата за напредокот на изградбата на автопат Демир Капија – Смоквица, кој, според соопштението, ќе биде пуштен во употреба „кон средината на следниот месец“.

Одложена е примената на наставните планови и програми за прва година на гимназиското образование, средното стручно четиригодишно образование и за средното стручно тригодишно образование од учебната 2019-2020 година, односно на програмата Кембриџ, а воведена е можноста италијанскиот јазик да се избира за втор странски јазик во основното и средното образование.

Владата донела одлука за основање на Национална установа „Ансамбл на албански народни ора и песни во Република Македонија“, како непрофитна установа од областа на културата, „заради негување на играорната, вокалната и вокално-инструменталната фолклорна уметност на албанската заедница“.

Владата го стави „во мирување“ процесот на продавање на “мерцедесот” до завршувањето на судскиот спор „во кој може да се појави потреба да биде доказен материјал“ и „со цел да се оневозможи избегнување одговорност на обвинетите во судскиот процес“.