!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Крадци оперираат во завеани возила на патот Битола – Прилеп


Битола, 9 јануари, 2017 - 13:02 (META) 

Крадци удрија по завеани и оставени возила на патиштата во Битолско. Неколку автомобили кои поради мали сообраќајни несреќи, лизгање или завеани од снегот биле оставени на патот Битола – Прилеп, во текот на ноќта биле мета на крадци кои ги оставиле без делови и опрема. Крадците ваделе гуми, бандажи, радија и дополнителна опрема.

Возачи кои утрово патуваа за Прилеп сведочат дека неколку возила кои биле покрај автопатот биле без гуми, со скршени стакла и ветробрани.

Портпаролот на битолската полиција, Сања Стаматова, вели дека досега немаат пријави од сопствениците за кражби во вакви случаи, но дека полицијата фатила крадец на автопатот Битола – Прилеп кој сакал да ограби еден автомобилот.

– Полицијата фати крадец додека од возило кое било оставено на автопатот по сообраќајна незгода, сакал да ги украде гумите и бандажите – вели Стаматова.


СВР Охрид предупредува: Внимателно на патот Охрид – Кичево, пет возила излетани од патот


Охрид, 27 декември, 2016 - 12:15 (META) 

Пет патнички автомобили и едно товарно возило излетале од коловозот на магистралниот пат Охрид – Кичево, на потегот од Ново Село до планинскиот превој Пресека.

Причина за излетувањето на возилата е голомразица на коловозот, замрзнат дожд, но и неприлагодена брзина на движење кон условите и состојбата на патот.

Нема повредени лица, но е предизвикана поголема материјална штета.

– СВР Охрид веќе го засилува полициското присуство на патниот потег Охрид – Кичево, направена е координација и со полициската станица од Кичево за интензивирање на полициски патроли на магистралниот пат на потегот од Извор до Пресека. За настанатата состојба ги известивме „Македонија пат“, Општинскиот совет за безбедност во сообраќајот на патиштата, Општинскиот кризен штаб, како и другите надлежни институции – вели портпаролот на СВР Охрид, Стефан Димоски.

Полициската станица за безбедност во сообраќајот на патиштата од Охрид препорачува внимателно возење, прилагодена брзина на движење, почитување на препораките на полициските службеници и на поставената хоризонтална и вертикална сигнализација.


Центарот на Тетово блокиран од паркирани возила


Тетово, 4 октомври, 2016 - 15:46 (META) 

Жители од центарот на Тетово реагираа поради хаосот со паркирањето во нивните населби. Според нив, поради недостиг од слободни места за паркирање во рамки на зоната А, голем број возила се паркираат покрај нивните домови.

– Автомобилите нема каде да се паркираат и на крај луѓето ги оставаат пред нашите домови, на тротоари и на улици. Поради ваквиот начин на паркирање тука се создава голем хаос, целосно се блокира сообраќајот, не можеме да излеземе со нашите возила ниту, пак, до тука може да пристигнат возила на итната помош – вели жител на улицата ЈНА во Тетово.

За проблемот со паркирањето во градот, денеска преку прес-конфереција реагираа од општинскиот комитет на ВМРО-ДПМНЕ Тетово.

– Градоначалничке Теута Арифи, Вашата одлука да се воведе зонско паркирање требаше да го реши сообраќајниот хаос, но, напротив. Дали знаете што сторивте со оваа одлука? Сегашната состојба е далеку полоша од претходно. Бараме итно да седнете на маса со своите соработници и сериозно да почнете со решавање на овој проблем – изјави Милена Илиевска од општинскиот комитет на ВМРО-ДПМНЕ Тетово.

Од Јавното претпријатие „Градски паркинг“ при Општина Тетово велат дека се очекува да се воведе зонско паркирање и на делови од неколку улици и булевари во Тетово. На тој начин, ќе се зголеми бројот на места за паркирање и ќе се ублажи проблемот со недостиг од паркиралишта.

„Ние подготвивме урбанистичко решение за проширување на зонското паркирање на делови од булеварите Благоја Тоска и Илинденска и на делови од улиците Страшо Пинџур и Тодор Циповски-Мерџан. Но, за да го спроведеме ова решение во практика, ни треба одобрение од Секторот за внатрешни работи Тетово, до каде сме поднеле барање“, велат од Јавното претпријатие „Градски паркинг“ Тетово.

Од СВР Тетово соопштија дека најверојатно за десетина дена ќе одговорат позитивно на барањето на Јавното претпријатие „Градски паркинг“ Тетово.


Груевски промовираше мерки за намалување на загаденоста на воздухот


Скопје, 26 септември, 2016 - 15:38 (META) 

Лидерот на ВМРО-ДПМНЕ, Никола Груевски, промовираше мерки за намалување на загаденоста на воздухот во Музеј на македонската борба за државност и самостојност.

Како што истакна, најголемите загадувачи на воздухот се затоплувањето на домовите со дрва, автомобилите и индустријата и рече дека тие, како владејачка партија, во таа насока ќе донесат мерки за намалување на загаденоста.

Тој најави гасификација на државата и носење на гасот до домаќинствата, односно градење разгранета мрежа на цевковод за гас низ секој град.

– Придобивка од гасификацијата, освен намалување на загадување на воздухот, е заштеда на буџетот на оние кои го користат и тоа за 7 проценти поевтинување за оние кои се греат на дрво, поевтинување за 35 проценти за оние кои сега се греат на струја и поевтинување за повеќе од 50 проценти за оние кои користат друг вид на течни и тврди нафтени горива – изјави Груевски.

Тој додаде дека ќе се доделуваат субвенции до 70 проценти од трошоците на домаќинствата за замена на печките на дрва со печки, котли и цела опрема за системи на пелети, за највеќе до 30.000 денари по домаќинство.

Груевски истакна дека и автомобилите се едни од најголемите загадувачи на воздухот и најави мерки кои ќе го поттикнат купувањето на електрични автомобили.

Увозот на нови електричните возила ќе биде со нула проценти царина и без дополнителна акциза. При купување на нови електрични автомобили ќе се применува повластената даночна стапка од 5 проценти, наместо сегашните 18 проценти на данок.


Големо велосипедско дефиле на скопските улици


Скопје, 22 септември, 2016 - 15:11 (META) 

Неколку илјади граѓани, велосипедисти, рекреативци и средношколци, денеска учествуваа во големото велосипедско дефиле што на скопските улици се возеше по повод 22 септември, Меѓународниот ден без автомобили и последниот ден од Европската недела на мобилност 2016.

Велосипедистите стартуваа кај Порта „Македонија“ и пристигнаа во Градскиот парк, на Школка, каде што се одржа забава со настап на улични музичари.

Меѓу учесниците беа и министерот за животна средина и просторно планирање, Башким Амети, и амбасадорот на Европската унија, Самуел Жбогар.

На најсреќните учесници во велосипедското дефиле, во наградна игра, им беа доделени вкупно 19 велосипеди.


Финансиска помош за лицата со инвалидност за набавка на автомобил


Скопје, 4 јули, 2016 - 13:18 (META) 

Од денеска до 30 септември лицата со инвалидност во центрите за социјални работи ќе може да аплицираат за новиот владин проект, преку  кој ќе добијат поддршка за набавка на автомобил.

На лицата со најмалку 80 отсто инвалидност на долните екстремитети, целосно слепите лица и глувите лица и лицата со умерена, тешка и длабока интелектуална попреченост, ќе им бидат рефундираат средства до 180.000 денари платени за царински давачки, данок на додадена вредност и за акциза за набавка на патнички автомобил.

Министерот за труд и социјална политика, Диме Спасов, истакна дека овој проект ќе овозможи полесна мобилност на лицата со инвалидност и вклученост во заедницата.

– Почнувајќи од денеска, секое лице што припаѓа на некои од наведените категории или, пак, е родител или старател на такво лице, може да поднесе барање до надлежниот центар за социјална работа кое ќе биде разгледано од комисијата за рефундирање средства за набавка на патнички автомобил – рече Спасов.

Спасов посочи дека ќе бидат рефундирани средства за 50 автомобили, а приоритет ќе имаат лицата со инвалидност кои имаат пониски приходи, оние кои активно бараат работа или, пак, во семејството имаат повеќе лица со инвалидност.

 


Едно лице загина во сообраќајка на патот Радовиш – Струмица


Струмица, 3 јули, 2016 - 13:27 (META) 

Сообраќајна несреќа се случи на магистралниот пат Радовиш – Струмица меѓу автомобил „форд“, управуван од А.Д. (33) од Радовиш, и возило „фолксваген“, управувано од У.Д. (25) од Радовиш.

Во несреќата на самото место починал А.Д., а сопатникот Р.Д. (29) од Струмица добил тешки телесни повреди и по укажаната лекарска помош во Медицински центар – Струмица, бил пренесен во Клинички центар – Скопје.

Увид на местото на настанот извршиле јавен обвинител и увидна екипа од СВР-Струмица и се работи на целосно расчистување на случајот.


Граѓаните ќе може да увезуваат половни возила само со стандард „еуро 4“


Скопје, 21 јуни, 2016 - 10:41 (META) 

Рокот за увезување половни возила што се постари од 2005 година истекува на 1 јули и по овој датум граѓаните ќе можат да увезат половни возила само со стандард „eуро 4“ или повисок.

Граѓаните кои купиле половно возило со стандард „еуро 3“ имаат рок до 30 јуни да ја платат царината и да ги завршат сите увозни процедури. Рокот за хомологација засега е неограничен.

Одлуката за ограничување на увозот беше донесена уште во 2013 година и имаше одложено дејство.

Увозниците на нови возила тврдеа дека возилата со ниски еуро-стандарди се едни од главните предизвикувачи на загаденост на воздухот зиме.


Зголемената продажба на автомобили во САД сигнал за подобри состојби во економијата


Вашингтон, 13 мај, 2016 - 18:01 (META) 

Малопродажбата на автомобили и на други производи во САД, во април забележа најголем пораст од 1,3 отсто во последната година, што укажува на зголемување на економскиот пораст по стагнацијата во првото тримесечје годинава.

Продажбата на автомобили истиот месец се зголемила за 3,2 отсто, а прометот во продавниците забележал пораст од еден отсто, што е највисок од мај 2015 година.

Интернет-продажбата се зголемила за 2,1 отсто, што е највисока стапка од јуни 2014 година.


Инспектори на царината заплениле 8,5 килограми злато, шверцувано од Турција


Гостивар, 16 март, 2016 - 13:51 (META) 

Инспектори од Одделението за истраги на Царинската управа вчера при претрес на автомобил, марка „голф 5“, на патот Гостивар – Дебреше, откриле 8,5 килограми злато, наменето за македонскиот пазар, соопшти Царинската управа.

Според Царината, златото, чија вредност се проценува на околу 200.000 евра, било набавено во Турција и потоа прошверцувано во Македонија.

„Околу 10.30 часот, за детална царинска контрола сопрен е автомобил, управуван од македонски државјанин, при што под предните седишта пронајдени се три најлонски кеси со 2.127 парчиња златен накит, со вкупна тежина од 8.610 грама. Од преземените предистражни мерки и активности, утврдено е дека златниот накит е купен во Турција и на недозволен начин е прокриумчарен во Република Македонија“, стои во соопштението на Царината.

Според Царината, осомничениот заедно со лица од Турција и во соработка со турска компанија за автобуски превоз, која ја одржува редовната линија Истанбул – Гостивар, го организирале шверцот на златниот накит.

„Откако автобусот пристигнал во Македонија од Турција и се паркирал на автобуската станица во Гостивар, пријавениот влегол внатре, го извадил накитот кој претходно бил сокриен во автобусот и за кратко време го сместил во својот автомобил. По завршување на истрагата и целосно документирање и расчистување на случајот, Царинската управа против сторителот ќе поднесе кривична пријава поради основано сомневање за сторено кривично дело криумчарење“, се додава во соопштението на Царинската управа.