За возење без еколошка налепница казна од 500 евра


Скопје, 9 ноември, 2018 - 16:40 (META) 

Новиот предлог-закон за возила, со кој ќе се воведе еколошка категоризација на возилата, односно нивно означување со налепници со зелена, жолта и црвена боја во зависност од тоа колку загадуваат, предвидува и казна од 500 евра ако приватното возило нема налепница. Ако пак станува збор за фирма, казната ќе биде 2.000 евра.

Тоа е утврдено со членот 9 од предлог законот, со кој се менува членот 26 на постоечкиот закон, со кој се исфрла регистрациска налепница и таа се заменува со новата еколошка налепница. Според одредбите од член 26 казната за возење нерегистрирано возило и неносење регистрациска налепница за приватно возило е 500 евра, а бидејќи со новиот закон таа ќе биде заменета со еколошката налепница, казната во тој износ останува. Но, ако од истекот на регистрацијата поминале помалку од 30 денови, казната е 100 евра. За возила на фирми, казните за возење без еколошка налепница ќе бидат 2.000 евра.

Дополнително, предлагачот на новиот закон, Министерството за економија, пресметало дека субвенциите од 5.000 евра за ново електрично возило, односно 3.000 евра за ново хибридно возило, ќе одлеат од државниот буџет 170 милиони денари во 2019 година, 245 милиони денари во 2020 година и 320 милиони денари во 2021 година.

Предлог-законот вклучува и проширување на обемот на податоци за возилата што ќе се внесуваат во Регистарот на возила.

По стапувањето на законот на сила, со зелена налепница, за 1 еколошка категорија, ќе се означуваат возилата со стандарди Евро 5 и Евро 6, како и возилата со Евро 4 на кои е вграден уред за течен нафтен гас или компримиран земјен гас, како и електричните и хибридните возила. При енормно зголемување на загадувањето на воздухот во градовите, тие возила ќе може слободно да се движат во заштитените еколошки зони, според одлуките на општините и Град Скопје.

Втората еколошка категорија,со жолта налепница, ќе ја сочинуваат возилата со стандарди Евро 3 и Евро 4, како и возилата со Евро 2 на кои е вграден уред за течен нафтен гас или компримиран земјен гас. За тие возила при зголемено загадување ќе има ограничување на движењето, според одлуките на општините и градот Скопје.

Во третата, најниската категорија, која ќе се означува со црвена налепница, ќе бидат возилата со Евро 2 или Евро 1 стандард, или без таков стандард. За нив ќе биде забрането сообраќањето во периоди на загадување на воздухот.

Целта на измените е да се намали загадувањето на воздухот од страна на возилата.

Предлог-законот предвидува и субвенции од 5.000 евра за секое купено електрично возило, а 3.000 евра за купено хибридно возило. Во првата година по стапувањето на законот ќе се доделат вкупно 200 такви субвенции.

Исто така, ќе се субвенционира вградувањето на уреди на течен нафтен гас или на компримиран земјен гас, односно метан, и тоа најмногу 50 отсто од трошоците за набавка и вградување на уредот, но најмногу до 300 евра по возило. Во првата година се планираат 1.200 такви субвенции.


Со црвено, жолто и зелено ќе се ограничува возењето при зголемено загадување на воздухот


Скопје, 8 ноември, 2018 - 18:51 (META) 

Министрите за економија и за внатрешни работи, Крешник Бектеши и Оливер Спасовски, денеска во Скопје ги промовираа новите законски одредби за намалување на загадувањето на воздухот од возилата, предвидени со Законот за изменување и дополнување на законот за возила, со кои се воведува категоризација на возилата со налепници.

По стапувањето на законот на сила, со зелена налепница, за 1 еколошка категорија, ќе се означуваат возилата со стандарди Евро 5 и Евро 6, како и возилата со Евро 4 на кои е вграден уред за течен нафтен гас или компримиран земјен гас, како и електричните и хибридните возила. При енормно зголемување на загадувањето на воздухот во градовите, тие возила ќе може слободно да се движат во заштитените еколошки зони, според одлуките на општините и Град Скопје.

Втората еколошка категорија,со жолта налепница, ќе ја сочинуваат возилата со стандарди Евро 3 и Евро 4, како и возилата со Евро 2 на кои е вграден уред за течен нафтен гас или компримиран земјен гас. За тие возила при зголемено загадување ќе има ограничување на движењето, според одлуките на општините и градот Скопје.

Во третата, најниската категорија, која ќе се означува со црвена налепница, ќе бидат возилата со Евро 2 или Евро 1 стандард, или без таков стандард. За нив ќе биде забрането сообраќањето во периоди на загадување на воздухот.

Целта на измените е да се намали загадувањето на воздухот од страна на возилата.

Предлог-законот предвидува и субвенции од 5.000 евра за секое купено електрично возило, а 3.000 евра за купено хибридно возило. Во првата година по стапувањето на законот ќе се доделат вкупно 200 такви субвенции.

Исто така, ќе се субвенционира вградувањето на уреди на течен нафтен гас или на компримиран земјен гас, односно метан, и тоа најмногу 50 отсто од трошоците за набавка и вградување на уредот, но најмногу до 300 евра по возило. Во првата година се планираат 1.200 такви субвенции.

Предлог-законот предвидува и субвенционирање на купување на ново возило ако претходно користеното возило се одјави, односно повеќе не се користи.

Со законските новини се укинува и налепницата за регистрација на ветробранското стакло на возилата, која што чинеше 60 денари. Според Спасовски, таа налепница не играла никаква улога, оти задолжително при контрола морала да се покаже сообраќајната дозвола.

Исто така, во новите мерки е и унифицирана светлечка табла за такси возилата, која денеска во центарот на Скопје ја промовираа министрите Бектеши и Спасовски.


Викендов Прилеп ќе биде домаќин на авто слалом „Прилеп-11 Октомври“


Прилеп, 12 октомври, 2018 - 13:17 (META) 

Во недела во Прилеп со почеток во 12 часот ќе се одржи авто слалом „Прилеп – 11 Октомври“, во организација на Авто картинг клуб „Скопје“, а со поддршка на Општина Прилеп.

Најдобрите учесници на ова државното првенство ќе се бодираат за шампионатот во 2018 година. Досега се пријавени 50-ина учесници од повеќе градови во Македонија. Според информациите од организаторот, доколку ги исполнуваат критериумите, возачите може да се пријават и утре сабота, 13.10.2018 година. Трката ќе се одржи во должина од 1.200 метри во центарот на градот по булеварот „Гоце Делчев“, од раскрсницата со улицата „Кузман Јосифоски-Питу“ до раскрсницата со улица „Димо Наредникот“.

„Секој возач што ги исполнува условите може да учествува во авто слаломот, што ќе се одржи во пет класи. Класа 1 е за возила до 1.600 сантиметри, класа 2 за возила над 1.600 сантиметри, класа 3 за спортски возила до 1.600 сантиметри, класа 4 за спортски возила над 1.600 сантиметри и класа возила со турбо. Со овој авто слалом Прилеп го враќа спортскиот дух на автомобилизмот во Македонија. А, ќе даде и значаен придонес во развојот на овој спорт и зголемување на вештините на возачите за авто слалом“, вели Менде Младеноски, директор на трката.

Според пропозициите за учество, возачите треба да поседуваат важечка возачка дозвола, сообраќајна книшка за возилото, животно осигурување за авто натпревар, лиценца за слалом или натпреварувачка лиценца издадена од Авто мото сојузот на Македонија (АМСМ).

„Овој авто слалом се одржува по 7 годинешна апстиненција од авто трки во Македонија, на иницијатива на неколку спортски авто клубови и Автомобилска Федерација на Македонија. Така што сега се создаде можност за враќање на календарот на трките. Досега се одржани 3-4 трки во Македонија, на Водно, Крушево, Струмица…“, истакнува Младеноски.

Авто слаломот ќе го отвори градоначалникот Илија Јованоски.


Поставувањето на цевки за гасоводот во Вардар го отежнува движењето на карпошани


Скопје, 28 септември, 2018 - 15:10 (META) 

Жители на Општина Карпош на социјалните медиуми се жалат на буката која што ја предизвикува механизацијата за работа во реката Вардар, помеѓу населбите Карпош 4 и Влае, каде што се поставуваат цевки за изградбата на гасоводот. Но, уште повеќе им пречи што делот каде што се врши ископувањето, не е соодветно обезбеден, односно е небезбеден за движење на пешаците и рекреативците.

Раководителот на Инспекторатот за животна средина на Град Скопје, Мирослав Богдановски потврди дека ископот на Вардар се врши за поставување на гасоводна инфраструктура од страна на претпријатието „ГА-МА“.

– Од она што е наша надлежност како Град Скопје утврдивме дека „ГА-МА“ ги поседува сите одобренија за градба, како и водостопанска согласност – изјави Богдановски за „Мета“.

Во однос на реакцијата на граѓаните дека местото е несоодветно обезбедено и заградено, Богдановски додаде дека на терен треба да излезе градежна инспекција на Општина Карпош и да утврди.

Освен тоа, на карпошани им пречи тоа што градилиштето зафаќа јавна сообраќајна површина па имаат потешкотии за пешачење и за управување со своите автомобили.

– На терен градилиштето не е соодветно заградено па преставува опасност за минувачите, а и нема информативна табла за што станува збор. Дека станува збор за гасовод се информиравме од групите на социјалните мрежи – вели Даниела Јакимовска од населба Влае.

Во член 83 став 3 од Закон за градење пропишано е дека „градилиштето мора да биде означено со информативна табла која задолжително треба да содржи име, односно назив на учесниците во изградбата, назив и вид на градбата која се гради, надлежниот орган од членот 58 на овој закон, број и датум на издаденото одобрение за градење, како и назнаката дека се работи за заштитено недвижно културно наследство согласно со закон,ако таа градба е запишана во Националниот регистар на културно наследство.“

Понатаму во член 156-а став 1 точка 2 од Законот за градење пропишано е дека „глоба во износ од 5.000 до 7.000 евра во денарска противвредност ќе му се изрече за прекршок на правно лице изведувач, ако при изведување на градби од прва категорија не го означи со информативна табла градилиштето (член 83 став 3).

Во член 83 став 1 од Законот за градење стои дека „изведувачот е должен градилиштето да го загради заради спречување на неконтролиран пристап во градилиштето со соодветна ограда на начин што работата во градилиштето нема да ги загрози минувачите.” Во спротивно предвидено е изрекување на глоба во износ од 5.000 до 7.000 евра која ќе му се изрече за прекршок на инвеститорот и глоба во износ од 7.000 до 9.000 евра која ќе му се изрече за прекршок на изведувачот, ако не го загради, односно не го заштити градилиштето согласно член 83.


Привремен сообраќаен режим претстојниот викенд на Водно


Скопје, 8 јуни, 2018 - 10:49 (META) 

Градот Скопје информира дека на дел од улицата „Тодор Александров“ и патот кој води до Средно Водно, овој викенд ќе се одржи брзинско – ридски натпревар во автомобилизам „Награда на Скопје Водно 2018“.

„За таа цел, дел од улицата „Тодор Александров“, на потегот од Институтот за земјотресно инженерство и инженерска сеизмологија (ул. Тодор Александров бр. 165) и патот до Средно Водно во сабота ќе бидат затворени за сообраќај од 08 до 16 часот, а во недела од 08 до 15.30 часот. Исто така, возилата на автобуските линии кои го поврзуваат градот Скопје и Средно Водно, 25, 25А и 25Б нема да сообраќаат, освен автобуската линија 25 со редовен возен ред по 16 часот во сабота, односно 15:30 часот во недела“, се вели во соопштението.


ЕП ја почна битката против враќање на километражите на автомобилите


Брисел, 1 јуни, 2018 - 11:08 (META) 

Европскиот Парламент (ЕП) вчера изгласа резолуција со која бара од Европската Комисија (ЕК) во рок од една година да изготви законска рамка со која ќе се забрани враќањето на километражите на автомобилите и километражата ќе се контролира при секој технички преглед.

Проблемот е толку голем, што во земји како Бугарија, Словачка и Полска, бројката на продадени користени автомобили со вратена километража достигнува до 80 отсто.

– Од пет до 12 отсто од користените возила што се продаваат во ЕУ и 30 до 50 отсто од оние што се продаваат надвор од границите на ЕУ се со вратена километража. Има потреба да се формираат национални бази на податоци за километражата на секое возила и да се воспостави прекугранична размена на тие податоци. Доколку ЕК подготви закони, тоа би значело придобивка од шест до девет милијарди евра годишно и би ја вратило довербата на купувачите во користените возила, а исто така ќе придонесе и за безбедноста на патиштата – рече во ЕП известувачот, европарламентарецот од Германија, Исмаил Ертуг.

Покрај тоа, се бара од производителите да воведат технологии што ќе го оневозможат враќањето на бројчаниците.

Според резолуцијата што беше изгласана во ЕП вчера, проверката на километражата треба се прави при секое сервисирање, при секој технички преглед, почнувајќи од првото регистрирање на возилото.

Враќањето на километражата предизвикува директни штети не само на купувачите, туку и на животната средина и на безбедноста во сообраќајот, се вели во резолуцијата.

Редовна проверка на километражата засега функционира во Белгија и Холандија, а само шест членки на ЕУ имаат закони со кои враќањето на бројчаниците се смета за кривично дело. Во другите земји тоа се смета само за прекршок.


Сообраќајот се одвива отежнато, одрон на патниот правец Катланово – Велес


Скопје, 23 март, 2018 - 9:36 (META) 

На патниот правец Катланово – Велес кај манастирите, поради одрон сообраќајот се одвива по една коловозна лента во должина од пет метри, инфомираат од Авто-мото сојузот.

Екипите на „Македонија пат“ работат на расчистување на одронот и нормализирање на сообраќајот. Забрани за тешки товарни возила има патниот правец Маврово – Дебар, како и на планинските премини Стража и Пресека.

Сообраќајот на државните патишта се одвива по влажни коловози наместа со остатоци од кашест снег. Врнежи од снег со среден интензитет се бележат во Гостивар, Маврово, Дебар, Попова Шапка и на планинскиот превој Стража. Врнежи од снег со слаб интензитет се бележат на планинскиот превој Пресека и Струга. На планинскиот превој Буково врнежите се од дожд и снег.


Заинтересираните за купување на „мерцедесот“ од „бомбите“, може да го разгледаат на 7 март


Скопје, 28 февруари, 2018 - 14:37 (META) 

Сите кои се заинтересирани да го купат „мерцедесот“ С600 кој е во сопственост на државата, можат да го разгледаат на 7 март (среда) од 10 до 15 часот во гаражата на Македонска радио-телевизија, информираа денеска од Службата за општи и заеднички работи на Владата.

Почетната проценета вредност на овој автомобил, попознат како „она на М“ од прислушуваните разговори, согласно проценката на  Бирото за судски вештачења, изнесува 230.000 евра. Јавното наддавање ќе се изврши електронски на интернет страницата www.e-aukcii.finance.gov.mk“, а заинтересираните треба да се регистрираат најдоцна до 12 март.

– Банкарската гаранција за сериозност на понудата треба да биде во висина од два проценти од вкупната проценета вредност со времетраење од 30 дена од денот кога е крајниот рок за поднесување на пријави, 12 март. Право на учество на електронското наддавање имаат сите домашни, странски физички и правни лица. Потребно е во последните пет години да не им е изречена правосилна пресуда за учество во злосторничка организација, корупција, измама или перење пари. Физичките и правни лица да немаат неплатени даноци, придонеси или други јавни давачки, на правните лица да не им е изречена прекршочна санкција – појасни Пеце Мирчевски од Службата за општи и заеднички работи на Владата.

На новинарско прашање, со што ќе се возат странските делегации кои ќе бидат во посета на Македонија, од владата одговорија дека има уште два блиндирани автомобили, но и дека МВР ќе се грижи за нивната безбеднсот како и до сега.

Јавноста за луксузниот „мерцедес“ разбра од „бомбите“, а Специјалното јавно обвинителство води постапката под кодно име „Тенк“ против поранешниот премиер Никола Груевски, поранешната министерка за внатрешни, Гордана Јанкулоска и нејзиниот помошник за јавни набавки, Ѓоко Поповски, дека луксузното возило било нарачано во време на ослабена економска моќ на министерството за внатрешни работи.


Огромна дупка во Рим проголта седум автомобили


Рим, 15 февруари, 2018 - 14:34 (META) 

Над 20 семејства се евакуирани вчеравечер во населбата Балдуина на северозападот на Рим, откако нешто пред 18 часот се отворила голема дупка во која пропаднале седум автомобили. За среќа нема повредени.

Земјиштето пропаднало создавајќи дупка длабока околу 10 метри, а некои жители велат дека претходно чувстувале тресење на подовите кога во близина се вршеле градежни работи.  Во текот на вечерта и ноќта се вршела евакуација на жителите, а пожарникарите и безбедносните служби се обидуваат да ги утврдат причините за пропаѓањето. Локацијата е близу до градилиште, каде работите се почнати во октомври минатата година со уривање објекти, а се планира да се градат станбени згради и подземни паркинзи.

На местото каде се создаде понорот, меѓу 25 и 28 јануари поради големи загуби на вода се вршени повеќе зафати, но вода и понатаму истекувала. Јавниот обвинител на Рим почна истрага.


Изгореа најмалку 1.400 автомобили во катна гаража во Ливерпул


Ливерпул, 1 јануари, 2018 - 11:35 (META) 

Најмалку 1.400 автомобили се уништени во пожар што изби во Ливерпул во катна гаража.

Според Би-би-си, евакуирани се луѓе од неколку згради во околината на гаражата. За среќа, нема повредени

Пожарот најверојатно почнал откако се запалил еден автомобил. Во гаснењето учествуваале 21 противпожарно возило. Според локалните медиуми, возила експлодирале на неколку секунди.

Поради пожарот, откажана е ревија на коњи што требало да се одржи во арената „Екоу“ во близина на гаражата.