Полицијата спречила тепачка на Грци со Македонци на протест во Мелбурн


Мелбурн, 21 јануари, 2018 - 12:28 (META) 

За време на протестите на грчката заедница во Мелбурн дошло до вербална и физичка пресметка меѓу група демонстранти и Македонци кои од страна ги набљудувале протестите. Главна порака на демонстрациите на Грците во Мелбурн била „Македонија е грчка”.

На протестот со транспаренти и грчки знамиња, се извикувало „Македонија е грчка“, „Скопјани“, а учествувале над 2.000 луѓе.

Протестите се одржале во центарот на Малбурн, каде дошло првин до вербална пресметка на учесници на демонстрациите и група Македонци кои, облечени во маици со македонски национални обележја, седеле на кафе во близина на грчкиот конзулат.

Потоа дошло и до физичка пресметка, по што интервенирала полицијата која употребила и солзавец.


Шестмина загинати во пад на луксузен хидроавион во Австралија


Сиднеј, 31 декември, 2017 - 13:27 (META) 

Шест лица загинале во пад на луксузен хидроавион во Австралија, во близина на Сиднеј, соопштила полицијата, јавуваат светските агенции.

Хидроавионот на фирмата „Сиднеј сиплејнс“ се срушил во реката Хаксбури, околу 50 километри северно од Сиднеј. Во несреќата настрадале сите пет патници и пилотот, соопштила полицијата на државата Нов Јужен Велс.

Нуркачките екипи ги извлекле телата на сите шестмина загинати, а причините за несреќата сè уште се непознати. Остатоците на едномоторниот авион се на длабочина од 13 метри.

Австралиските медиуми наведуваат дека петмина од жртвите се Британци, меѓу кои и едно дете на возраст од 11 години.

Тие со хидроавионот биле на панорамско разгледување, во очи прославата на Нова година во пристаништето во Сиднеј.


Новата година пристигна во Самоа, Тонга и Кирибати


Апиа, 31 декември, 2017 - 13:07 (META) 

Жителите на јужнопацифичките острови Самоа, Тонга и Кирибати во 11 часот според средноевропско време зачекорија во 2018 година, а наскоро по нив Новата година ќе пристигне и во Нов Зеланд, каде ќе биде дочекана со огномет над Оукленд од облакодерот „Скај“ висок 200 метри.

Во 13 часот, според средноевропско време, во 2018 година ќе влезат и некои подрачја на Русија, а потоа во 14 часот и Австралија, каде многумина ќе уживаат во спектакуларниот огномет во пристаништето над зградата на операта и мостот во Сиднеј.

Повеќе од 1,6 милиони посетители ќе уживаат во 15-минутниот спектакл во Сиднеј, кој вообичаено е првата слика од дочекот на Новата година што го обиколува светот.

Во Сиднеј, како што пренесуваат светските медиуми, со препреки е оневозможен пристапот до пристаништето за да се спречи евентуални напаѓачи со возила да влетаат во масата луѓе, а на местото се распоредени специјални полициски сили.

Инаку, Новата година ширум светот се дочекува со засилени мерки за безбедност.

Ширум Европа воведени се посебни мерки за безбедност, а оние што ќе ја испратат старата и ќе ја дочекаат новата 2018 година на улиците на европските престолнини можат да очекуваат прегледи на торбите и други проверки за да се избегнат можни терористички напади.


Возило влета во толпа во Мелбурн – 19 лица се повредени


Мелбурн, 21 декември, 2017 - 10:51 (META) 

Најмалку 19 лица се повредени откако џип влета помеѓу пешаци, соопшти австралиската полиција, додавајќи дека возачот е уапсен. Засега нема информации дали станува збор за терориристички напад.

„Би-Би-Си“ јави дека полицијата во Мелбурн соопшти дека станува збор за „намерен чин“, но дека се уште е рано да се зборува за мотивите за нападот.

– Врз основа на тоа што го видовме, веруваме дека станува збор за намерен чин. Мотивите не се познати – рече Расел Барет, началник на полицијата на австралиската сојузна држава Викторија.

Очевидецот Кри Гет вели дека стоел на аголот на улиците Флиндерс и Елизабет со кафе во рака кога слушнал врескање.

– Кога се свртев, видов многу тела на земја. Видов автомобил кој гази луѓе. Летаа тела на сите страни – рече Гет.

Тој наведува дека помеѓу 60 и 100 лица ја минувале раскрсницата кога во толпата влетал автомобил, кој се движел со брзина од околу 70 километри на час.

Локалните медиуми јавуваат дека полицијата ги повикала граѓаните да го избегнуваат ова подрачје.


Бурна биографија на „боемот“ Борис Трајков, обвинет за проневера во Мелбурн


Мелбурн, 18 октомври, 2017 - 15:08 (META) 

Медиум на македонски јазик во Австралија, Борис Трајков го нарекува „боем“ и „плејбој“. Австралиската државна телевизија „Еј-би-си“, пак, со него се занимава како осомничен за проневери вредни милиони австралиски долари, како човек уапсен во јануари годинава поради одгледување значителни количества марихуана, како човек што крадел струја додека бил пуштен на слобода со кауција… Австралискиот новинар со македонско потекло, Саша Узунов, пак, на својот блог подолго време наназад вади по некој интересен детаљ и Трајков го нарекува „соработник на пројугословенските структури во тогашна Социјалистичка Република Македонија и тогашна СФРЈ“.

Поранешниот новинар Борис Трајков (76) вчера го привлече вниманието на јавноста во Република Македонија и на Македонците низ светот поради судскиот процес за проневера на пари од Викториската мултиетничка славјанска добротворна асоцијација (Victorian Multiethnic Slavic Welfare Association), која им помагала на остарените мигранти од просторите на поранешна Југославија, а раководела и со детска градинка во мелбурнското предградие Лелор. Таа завршува во стечај во 2016 година и оттогаш почнува да се расплеткува клопчето кое стасува до 3,5 милиони австралиски долари на кои им се губи трагата.

Според тоа што го пренесува веб-страницата на австралиската „Еј-би-си“, во текстот за обвинението против Борис Трајков во февруари годинава, тој и неговата сопруга се доселиле во Австралија во 1967 година и тој набргу станува интересен за АСИО – австралиската тајна служба за контраразузнавање. Во неговото досие, отворено од контраразузнавачите во 1971 година, потоа се додадени и различни полициски документи од претходниот период, кои зборуваат за негово активирање на полето на криминалот.

Така, една полициска белешка од 1968 година содржи наводи дека во неговото кафуле се одвива нелегално коцкање. Друга белешка од полицијата на сојузната држава Викторија од 1969 година вели дека во неговото кафуле „чести гости се крадци и бандити“, а за Трајков се вели дека е без работа и во неговиот локал прибира личности со сомнителен морал.

Неговиот интерес за угостителството не запира, па го отвора ресторанот „Голден грил“, а во поново време тој е сопственик во сенка на ресторанот „Њу Јуроп“ во мелбурншкото северно предградие Престон, каде што многу често има настапи на музичари и на групи од Македонија. Во октомври 2015 година, двајца членови на мотоциклистичката банда Команчерос испукале два куршума во плафонот на ресторанот, кој пак минатата година беше опожарен.

Според „Еј-би-си“, на Борис Трајков му се закануваат и други обвиненија, вклучувајќи стекнување имот со измама, користење лажни документи при аплицирање за кредитни картички во август минатата година, а исто така на суд било посведочено дека двапати на полицајците им се претставувал со лажен идентитет кога бил испрашуван поради неговото возење.

Тој, инаку, бил цел на АСИО во седумдесетите и во осумдесетите години на минатиот век поради неговите блиски врски со југословенските дипломати. Од 1975 година до 2000 година бил спикер и новинар на австралиското државно мултиетничко радио „Си-би-ес“.

 


Тројца падобранци загинаа откако се судриле во воздух


Квинс, 13 октомври, 2017 - 13:34 (META) 

Тројца падобранци загинаа во Квинсленд откако се судрија во воздух, соопшти австралиската полиција.

Итната полош и полиција веднаш биле повикани во местото Бич, јужно од Квинс, каде се случила несреќата.

Како што пренесува „Би-би-си“, загинале двајца мажи на возраст од околу 30 години, како и една 50-годишна жена. Падобранците починале веднаш, соопшти полицијата во Квинсленд.

Според прелиминарнарната истрага, несреќата се случила кога еден падобранец се удрил во другите два, тандем падобранци, поради што падобраните не им се отвориле правилно.


Австралискиот премиер Турнбул поддржува истополови бракови


Сиднеј, 10 септември, 2017 - 16:53 (META) 

Австралискиот премиер Малколм Турнбул ја поддржа кампањата за признавање на истополовите бракови, иако досега беше молчалив по тоа прашање. Сепак, тој денеска се изјасни за промена на законот за брак и за прифаќање на истополовите бракови, предизвикувајќи големо изненадување во јавноста.

Во Сиднеј денеска се одржа голем митинг за поддршка на истополовите бракови, на кој учествуваа повеќе од 20.000 луѓе. На собирот неочекувано се појави и премиерот Турнбул, кој притоа се изјасни за промена на постојниот закон за брак.

Малколм Турнбул претходно изјавуваше дека лично тој е за прифаќање на хомосексуалните бракови, но дека јавното изјаснување во прилог на почнатата кампања „не одговара на неговата политичка позиција“.

Во светот досега само 23 држави ги имаат изменето своите закони за брак и го прифаќаат истополовиот брак.


Македонски Австралиец убиен во ресторан во Мелбурн, напаѓачите избегале


Мелбурн, 9 септември, 2017 - 20:16 (META) 

Дени Димовски (31) е избоден до смрт во тепачка на забава во еден ресторан во западниот дел на Мелбурн, Австралија, јавуваат австралиските медиуми.

Несреќниот настан се случил во ресторанот „Корзо грил“ во Каролин Спрингс, во раните утрински часови во саботата. Полицијата соопшти дека групата избегала од местото на настанот. Групата заминала пеш од македонскиот ресторан откако жртвата била прободена неколкупати, но се верувало дека имало неколку автомобили во близина.

Димовски починал веднаш откако бил пренесен во болница.

Сопствениците на ресторанот, Џим и Јасмина Рибаровски, изјавиле дека Димовски бил редовен гостин во нивниот ресторан.


Трамп смета дека не е време за разговори со Северна Кореја


Вашингтон, 6 септември, 2017 - 19:47 (META) 

Американскиот претседател Доналд Трамп смета дека не е време за разговори со Северна Кореја и дека сите опции се отворени за одбрана на САД и на нејзините сојузници.

Трамп вчера телефонски разговарал со премиерите на Австралија и на Велика Британија, Малком Трнбул и Тереза Меј, за последната нуклеарна проба на Северна Кореја, соопшти денеска Белата куќа, јавуваат светските агенции.

Претседателот на САД во разговорот со британската премиерка рекол дека сега „не е време за разговори со Северна Кореја“ и јасно ставил до знаење дека сите опции се отворени за одбрана на САД и на нејзините сојузници од агресијата на Северна Кореја.

Меј и Трамп изразиле одлучност за блиска соработка во зајакнувањето на дипломатскиот и на економскиот притисок врз Пјонгјанг.

Во разговорот со премиерот на Австралија, Малком Трнбул, Трамп ја потврдил посветеноста на Вашингтон во одбраната на земјата и на сојузниците, „користејќи ги сите достапни дипломатски и воени капацитети“, се наведува во соопштението на Белата куќа.

Трамп вчера најави дека неговата администрација ќе им дозволи на Јапонија и на Јужна Кореја да набават поголемо количество софистицирано оружје.

Вашингтон и Сеул размислуваат и за разместување на носачи на авиони и на стратешки бомбардери во регионот.

САД на седницата на Советот за безбедност на Обединетите нации побараа заострување на санкциите кон Пјонгјанг, на што се противат Русија и Кина.


Во Сиднеј уапсени четири лица кои подготвувале терористички напад на авион


Сиднеј, 29 јули, 2017 - 17:00 (META) 

Четири лица се уапсени во масовната антитерористичката акција во неколку предградија на Сиднеј, спроведена по добиени сознанија за подготовка на терористички напад во авион, јавуваат светските новински агенции.

„Претресите и истрагата продолжуваат. Други информации ќе бидат соопштени дополнително во соодветно време“, соопшти полицијата.
Австралискиот весник „Сидни морниг хералд“, повикувајќи се на полициски извори, наведува дека операцијата во сиднејските предградија Лакемба, Сари Хилс, Вајли Парк и Пинчбул не била претходно планирана, туку полицијата веднаш реагирала по добиените сознанија.

Австралискиот премиер Малколм Тарнбул изјави дека во тек се активностите на полицијата и дека целта е да се спречат терористичките напади.