Лашкоска го искара Манчевски: Недолично е министер да дофрла на пратеници


Скопје, 10 мај, 2018 - 12:12 (META) 

Остра расправија избувна на денешното второ продолжение на 17 седница на собраниската Комисија за транспорт и врски и екологија кога во расправата за 3-от и 4-от амандман за предлог-законот за изменување и дополнување на Законот за аудио и аудиовизуелни медиумски услуги, пратеничката Лилјана Поповска од ДОМ реагираше зошто му се дозволува втора контрареплика на Благоја Деспотовски од ВМРО-ДПМНЕ.

– Не знам зошто се дозволува пак контрареплика кога секогаш сме работеле така. Првин збор, па реплика па контрареплика. Како може сега колегата да има контрареплика? – реагираше Поповска.

На тоа веднаш одговори Ане Лашкоска од ВМРО-ДПМНЕ, која ја води седницата како заменик-претседател на комисијата, велејќи дека и во оваа комисија и во други каде што таа е член никогаш немало ограничување на бројот на реплики и контрареплики.

Во тој момент министерот за информатичко општество и администрација Дамјан Манчевски се вклучи во расправијата помеѓу членовите на комисијата од ВМРО-ДПМНЕ и СДСМ, а новинарите, кои беа на другиот крај на салата не можеа јасно да слушнат што вели. Веднаш потоа Лашкоска рече дека ќе зборува процедурално и на министерот Манчевски му се обрати со остар тон, порачувајќи му да се воздржи од какви било коментари и дека не е долично за еден министер да им дофрла на пратеници во Собранието и дека нема да ги исплаши пратениците на ВМРО-ДПМНЕ. Дофрлањето на Манчевски беше тивко, а тој потоа во изјава за медиумите објасни што рекол.

– Министре, ќе Ве молам не дофрлајте. Ако мислите дека ќе не исплашите, нема. Не е во ред министер да им дофрла на пратеници на Собранието – рече Лашкоска.

Дебатата продолжи и понатаму, а откако беше прогласена пауза околу 12 часот, министерот за информатичко општество образложи дека не изрекол закана.

– Сега ќе цитирам точно што реков: Се сеќаваме сите како поминавте во времињата кога си реплициравте самите на себе, алудирајќи на петте месеци кога Собранието… државата, беше заробена со беспредметните меѓусебни реплики и контрареплики на пратениците од сегашната опозиција, кога не дозволуваа демократски трансфер на власта. Тоа е единствено нешто што кажав. А кој тоа го смета за закана, навистина не знам – одговори Манчевски на новинарско прашање.


Манчевски: Медиумите треба да ги мотивираат граѓаните да бидат коректив на власта


Скопје, 3 мај, 2018 - 10:45 (META) 

Слободни, безбедни, независни и одговорни медиуми се основа за развој на едно демократско општество. Тие се важна алка за градење на развиена држава, за социјален и економски напредок и одржлив развој. Нападот врз слободата на медиумите, е напад врз владеењето на правото и напад врз човековите права, порача министерот за информатичко општество и администрација, Дамјан Манчевски по повод 3 Мај, Светскиот ден на слободата на медиумите.

„Јавноста мора да биде постојана контрола на власта. Важноста на медиумите е огромна, особено во областите на правдата и владеењето на правото. Затоа важна е транспарентноста на политичките процеси, независноста на медиумите и медиумската писменост. А од најголема важност за тоа да се постигне е отчетноста на државните институции кон јавноста. Измените во законот за АВМУ, подготвени заедно со сите засегнати страни, гарантираат услови за професионализација на медиумските тела. Овозмужуваат слободно и независно работење на медиумите во државата. Најважно од се, даваат шанса за политичарите да ги тргнат рацете од медиумите. Медиумската заедница треба да ја превземе контролата врз медиумскиот сектор. Овој закон овозможува дополнителни механизми за саморегулација“, порача министерот.


Правата за реемитување програма судрија дел од кабелските оператори и телевизите


Скопје, 11 април, 2018 - 9:32 (META) 

Правата за емитување и реемитување програма во земјата се уште се толкуваат на различни начини од различни центри, во зависност од тоа на која интересна група им припаѓаат. Најголеми се разликите меѓу националните телевизии на една и операторот „Телекабел“ на друга страна. Едните бараат затемнети телевизиски екрани и казни во случај кога операторот нема регулирано права за реемитување, другите ја префрлаат топката кај странските канали.

Пишува: Кристина Озимец – ПИНА

Авторските права за реемитување на програма скараа дел од кабелските оператори и националните телевизии. Проблемот го актуелизираа измените на Законот за аудио и аудиовизуелни медиумски услуги, а дебатата започна да се води со јавни препукување преку медиумите. Познавачите велат дека прашањата за целиот корпус на авторско право и сродни права и емитувањето односно реемитувањето преку кабел или сателит е веќе регулирано во Законот за авторското право и сродните права. Овој закон е усогласен со две европски директиви во таа област, па затоа дел од експертите кои ги консултиравме сметаат дека предложените измени претставуваат непотребно дуплирање на законодавството и е одвишен.

Токму во пресрет на измените, Македонската Медиумска Асоцијација во која членуваат националните телевизии „Телма“, „Канал 5“, „Сител“, „Алсат-М“ и „Алфа“  неодамна го обвини кабелскиот оператор „Телекабел“ и телевизијата „24“ за недозволена медиумска концентрација, како и за ставање на страна на интересите на кабелските оператори, а не на страната на медиумите. Според нив, во актуелниот закон кабелските оператори немаат речиси никаква одговорност за содржината која ја реемитуваат. Велат дека за сите повреди на авторските права, операторите се прогласуваат за ненадлежни и бараат одговорноста да се бара кај каналот, наместо кај нив.

Тие сметаат дека кабелските оператори треба да бараат потврда од сите канали кои ги реемитуваат за тоа дека ги регулирале правата за Македонија, да ги уредат односите со странските канали и секој вид на содржина за која немаат авторско право во Македонија да биде затемнета или да не се емитува. Ваквите промени директно би ги почуствувале и гледачите кои ги користат услугите на кабелската телевизија.

Директорот на телевизија „Телма“, Атанас Кировски, за ПИНА вели дека телевизиите одговараат за програмата што ја емитуваат, а нивните управители сносат кривична одговорност, за било каква повреда на авторско право.

Кабелските се загрижени дека ако се регулираат авторските права, дел од каналите кои ги реемитуваат ќе треба или да ги укинат, или одредени содржини да ги емитуваат со затемнета слика. Нема смисла да се бара домашните телевизии да ги почитуваат авторските права и за евентуално прекршување на сносат кривична одговорност, а странските канали и оние што ги реемитуваат, да немаат никаква одговорност. Македонските телевизии бараат да не бидат дискриминирани во сопствената држава и правилата на игра што важат за нив да важат и за другите – вели Кировски.

Според него, кабелските оператори постојано реемитуваат серии, филмови и спортски настани за кои националните телевизии ги имаат откупено правата и заради недореченоста во законската регулатива, операторите досега немаат изгубено ниту еден судски спор.

atanasПоследен пример се скапо платените авторски права за ракометното првенство во Хрватска, за што Телма ги откупи ексклузивните права за територијата на Македонија. Операторите и за време на првенството ги пренесуваа РТРС, РТЛ и други канали без авторски права за тоа. Македонските телевизии не реемитуваат пиратски контент во Хрватска или Србија, природно е и ние истото да го бараме од нивните канали и од оние што го реемитуваат контентот – вели Кировски.

Принципот на затемнување функционира и сега, и тоа не само во Македонија, вели Дејан Георгиевски од Центарот за развој на медиумите. Доволно е носителот на правата за соодветната територија да побара такво затемнување во случаите кога за ист, на пример спортски  настан, правата за пренесување во различни држави ги имаат различни радиодифузери.

Прашањето е кој ќе ја има одговорноста да следи кој ги има обезбедено правата за емитување за различни територии? За заштитата на авторското право и сродните права начелно треба да се грижи носителот на соодветното право, или оној што ги обезбедил – откупил или изнајмил правата за одредена територија. Најдобар извор на таквите информации се носителите на правата, кои сигурно знаат кому се ги продале и за која територија. Од друга страна, не може да се бара затемнување на оние програми за кои не се откупени правата за емитување во Македонија. И двете директиви на ЕУ, всушност, како една од основните цели го имаат збогатувањето на понудата на програмски содржини на територијата на целата ЕУ (а во случајот на државите кандидати како што е Македонија, и кај нас) токму преку такво реемитување на програмски сервиси од странство преку кабелски/ИПТВ платформи или преку сателит. Инаку, ако, на пример Телма ТВ, ги обезбедила правата за Македонија за некаков голем настан како што е Европското првенство во ракомет, таа може да побара од надлежното регулаторно тело да им наложи на оператерите на кабелски или ИПТВ мрежи да ги затемнат оние странски канали во нивните каталози што ги имаат обезбедено правата за соодветните земји, во времето додека трае, во нашиот случај, ракометниот натпревар – вели Георгиевски.

„Телекабел“: Не можеме да одговараме за странски канали Од друга страна, од операторот„Телекабел“ имаат сосема спротивен став. Оттаму сметаат дека не постои никаков спор, туку се работи за наметната состојба од страна на петте национални телевизии. Нивниот став е дека тие како кабелски оператори не може да гарантираат за регулирани авторски права, за странски телевизии.

Во истиот став од законот стои дека доколку операторот реемитува странски канал, операторот под морална, материјална и кривична одговорност ќе гарантира дека странскиот канал ги има регулирано авторските права?! Како може ние да гарантираме за тоа дали Eurosport, CNN или Discovery регулирани авторски права? И кој фактор сме ние да бараме од нив такво нешто? Пративме иницијатива и забелешка за овој член, одржавме и една работна средба кај Министерот, и се надеваме дека правните служби ќе увидат дека се работи за неприменлив став“, вели Зоран Ристов од „Телекабел“.

Според него, за кабелски оператор да пушти еден канал било странски било домашен, мора да има договор за регулирани авторски права.

Тој договор потоа се доставува до АВМУ од каде ако се е во ред ни даваат Одобрение за реемитување. Па дури тогаш каналот можеме да го пуштиме. Затоа ни беше чудно што сака предлагачот на измените да постигне и која е целта на барање измени во член 143 од Законот за АВМУ. Телекабел во досегашното работење нема ни една пријава за нерегулирани авторски права, а такво нешто немаат ни поголемиот број од нашите колеги – додава Ристов.

Острината на изјавите и од двете страни говори дека сепак постои спор и несогласувања. Според адвокатот Валентин Пепељугоски, не се толку проблем предложените измени на законот, туку проблем е неговата примена бидејќи надлежните органи не вршат контрола туку се задоволуваат само со добивање на потврда од операторите дека ги регулирале авторските права.

Тие можеби склучиле договор со некој ТВ канал да го реемитираат, но тоа не значи дека ТВ каналот кој се реемитира ги поседува сите авторски права за сите настани. Ова особено го мислам за спортските и музичките настани, па дури и за некои филмови кои се блок бастери. Оваа појава масовно се случува а не е санкционирана. Исто така, телевизии со национална концесија си дозволуваат да емитираат програма за која немаат платено авторски права. И тука доаѓаме до проблемот што тие секогаш ќе ви покажат договор со некоја трета фирма од која наводно ја купиле програмата, но не од вистинскиот носител на авторските права. Заради тоа, мислам дека санкциите мора да бидат поостри – вели Пепељугоски.

Според познавачите, кабелските оператори, освен ако немаат свои „on demand“ услуги, не се јавуваат како страни во бизнисот со правата на емитување и реемитување на авторски дела. Институциите велат: Не сме судии Од Министерството за информатичко општество и администрација за несогласувањата меѓу дел од телевизиите и Телекабел велат дека нивната позиција не е да биде судија, или да бидат ставени на средина . „Тоа е несогласување помеѓу двете страни кои тие треба да го надминат. За ова прашање постои надлежен регулатор кој постапува согласно позитивната законска регулатива“, велат од министерството. Тие сметаат дека со измените и дополнувањата на Законот за аудио и аудиовизуелни медиумски услуги ќе бидат целосно и доследно испочитувани  принципите за заштита на авторските права. Агенцијата за медиумите пак вели дека тие го уредуваат само прашањето во врска со регистрацијата на програмските пакети на операторите. Тие упатуваат на регулирање на правата согласно Законот за авторското право и сродните права, каде е уредена постапката и начинот на којшто се регулираат правата за реемитување. „Станува збор за комерцијален однос, уреден со договор помеѓу операторите и комерцијалните телевизии, а во кој однос Агенцијата нема никаква законска основа да се меша, туку тоа е слободна волја на субјектите кои склучуваат договор. Агенцијата само треба да констатира дека се уредени правата помеѓу двата субјекти, за што законодавецот утврдил дека ќе се спроведува преку доставување изјава заверена на нотар од страна на одговорното лице кај операторот, а со која се потврдува дека правата за реемитување се уредени.“, велат од АВМУ. Според Георгиевски од ЦРМ, Агенцијата има право дека се работи за комерцијален однос, во кој кабелските оператори ја имаат позицијата на моќ и можат да ги диктираат условите. Тоа се должи највеќе на високата (една од највисоките во светот) пенетрација на кабелската телевизија која, според податоците, изнесува можеби и цели 80 отсто (односно 80 отсто од околу 560 илјади домаќинства се поврзани и претпатени на услугите на некој од кабелските оператери.

Во таква ситуација, националните терестријални телевизии – телевизиите што емитуваат во етер, преку дигиталните терестријални мултиплекси – тешко можат да ја искористат инаку привилегираната позиција да имаат пристап до сите 100 отсто (или блиску до таа бројка) домаќинства, што би можеле да го валоризираат преку продажба на рекламен простор. Изгледа дека во моментов постои нерамнотежа на моќ во полза на кабелските оператори, и тие ги диктираат условите за реемитување на телевизиските канали на своите мрежи, понекогаш барајќи навистина високи суми за македонски услови за таквата услуга, често блиски до годишните надоместоци што емитерите веќе ги плаќаат за добивање на дозволите за емитување – вели Георгиевски.

Постапка за утврдување недозволена медиумска концентрација кај ТВ „24“

Покрај препукувањата за правата за програма, националните телевизии неодамна го обвинија „Телекабел“ и за недозволена медиумска концентрација. АВМУ неодамна покрена постапка за утврдување недозволена медиумска концентрација кај ТВ 24 Вести откако до Агенцијата биле доставени снимка од интервју на Роберт Димитров, сопственик на „Телекабел“, објавено на интернет порталот „Мактел“.

„Одредени негови изјави дадени во интервјуто укажуваат на можно постоење недозволена конентрација помеѓу оваа телевизија и Телекабел. Во тек е испитување на веќе обезбедените податоци и пробирање на дополнителни, за да се утврди дали постојат материјални докази за постоење недозволена медиумска концентрација“, велат од АВМУ. Се очекува институцијата деновиве да ги објави резултатите од постапката.

Во разговорот за овој портал, Димитров вели дека имал австриски партнер, познаник, кој ја има телевизијата на негово име, но признава дека Телевизијата за сите овие години е финансиски помагана од Телекабел.

„24 вести“, не е тајна, „Телекабел“ ја поддржува сите овие шест години иако работеше со минус, многу сум среќен што направивме бренд, пред се на кој граѓаните му веруваат и докажано е дека е под број 1 по доверба. Претходната власт можеби и правеше некои притисоци, не е тајна дека инспекцијата нон стоп доаѓаше и прашањата беа зошто се даваат позајмици. „Телекабел“ ја помагаше таа телевизија, со цел дека еден ден ќе работи позитивно и тие пари ќе ни се вратат – вели Димитров.

Од оваа компанија за ПИНА велат дека изјавите на Роберт Димитров биле извадени од контекст.

„Помеѓу „ТВ 24“ и „Телекабел“ не постои медиумска концентрација. Имаше една претставка од „Канал 77“ дека имало медиумска концентрација и по истата АВМУ од како изврши испитување, утврди дека нема медиумска концентрација. По одговорот, пак „Канал 77“ доставил претставка дека имало позајмици од „Телекабел“ кон „ТВ 24“ па АВМУ повторно отвори постапка за испитување на медиумска концентрација која е во тек. Очекуваме и овој пат АВМУ да утврди дека нема медиумска концентрација, имајќи ги во предвид нашите податоци кои се секогаш во рамките на законот“, велат оттаму.

Пред неколку дена „Телекабел“ имаше јавно препукување и со телевизијата „Канал 5“, откако ја известија јавноста дека ја исклучиле телевизијата од нивните пакети, бидејќи Договорот за реемитување кој го имале со „Канал 5“ бил истечен. Од „Канал 5“ пак тврдеа дека не е точно дека тие не го потпишувале договорот, туку дека операторот одбивал да го потпише договорот.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Со серија забелешки, законот за АВМУ следната недела оди на пленарка во Собранието


Скопје, 27 март, 2018 - 14:59 (META) 

Потребни се повеќе пари за Македонската радио телевизија (МРТ) како јавен радиодифузен сервис, но и давање поголеми ингеренции за регулација и улога на предлагач на решенија на Советот на Агенцијата за аудио и аудиовизуелни медиумски услуги (ААВМУ) за да се овозможат суштински медиумски реформи. За да не се предизвика големо нарушување на рекламниот пазар, пак, неопходно е да се оневозможи МРТ да емитува реклами и така да земе голем дел од рекламниот колач.

Тоа беа главните и најчестите забелешки на денешната јавна расправа за Предлог- законот за изменување и дополнување на Законот за аудио и аудиовизуелни медиумски услуги, којшто Владата го испрати до Собранието минатиот месец. Денешната расправа во организација на Комисијата за европски прашања е четврта по ред.

Како што рече министерот за информатичко општество и администрација, Дамјан Манчевски, процесот уште не е завршен, односно, постои можност текстот да се доработува, иако, како што рече, се очекува предлог-законот следната седмица да се најде на собраниска седница.

Можноста за подобрување на сегашниот текст Мачевски ја насочи кон амандманската расправа во Собранието. Според него изборот на членовите на Советот на ААВМУ и на Програмскиот совет на МРТ, кој ќе се врши со двотретинско мнозинство во Собранието, ќе овозможи во нив да влезат професионалци со што ќе се минимизира можноста политичките структури да влијаат врз медиумите и да ја загрозуваат нивната слобода.

Според Климе Бабунски од ПРО МЕДИА и Дејан Георгиевски од Центарот за развој на медиумите голем проблем е финансирањето на МРТ, односно предвидените средства од 0,7 отсто од државниот буџет за годинава, кои треба да пораснат до 1 отсто од буџетот за 2020 година се недоволни за вистинско вршење на сите функции на јавниот радиодифузен сервис. Дел од учесниците во расправата предложија да се предвиди и развој на дописничката мрежа за вистинско објективно информирање на сите нивоа.

Насер Селмани и Драган Секуловски од Здружението на новинарите излегоа со истите забелешки, но се осврнаа и на одредбите од функционирањето на Агенцијата за АВМУ. Побараа и интервенции во текстот за да се спречи каква било можност во иднина Владата да го наруши пазарот со свои реклами.

Според Иван Мирчевски, директор на телевизијата „Канал 5“, предвидени се многу строги казни за телевизиите и директорите и предложи нивно укинување или ублажување, исто како и Благој Христов од Стопанска комора како претставник на кабелските оператори, кој побара измени од сферата на пренесувањето на програмите.

И Мирчевски и претставниците на другите телевизии – Мишко Иванов од „24 вести“, Славица Арсова од „Сител“ – побараа да се избрише членот од предлог-законот кој ќе овозможи комерцијални реклами на МРТ.

Пратеничката Маја Морачанин побара во казнените одредби за дискриминација во медиумските содржини задолжително да бидат вклучени и казни за дискриминација поради сексуалната ориентација и родовиот идентитет.

Во расправата учествуваше и министерот за комуникации, транспарентност и отчетност, Роберт Поповски, а во салата покрај нивните колеги од владејачката коалиција, беа и пратениците Зоран Илиоски, Лилјана Кузмановска и Лилјана Затуроска од ВМРО-ДПМНЕ.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на Фондацијата Отворено општество – Македонија.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на Фондацијата Отворено општество – Македонија.


Јавна расправа утре за Законот за аудио и аудиовизуелни медиумски услуги


Скопје, 26 март, 2018 - 13:47 (META) 

Комисијата за европски прашања на Собранието на Република Македонија утре ќе одржи јавна расправа за предлог-законот за изменување и дополнување на Законот за аудио и аудиовизуелни медиумски услуги.

На дебатата ќе учествуваат членови на Владата на Република Македонија, медиуми, портали, новинарски здруженија, како и претставници на разни институции и невладини организации.

Во јавната расправа, ќе учествуваат и пратениците, кои се  членови на Комисијата за надворешна политика, Комисијата за транспорт, врски и екологија, Мешовитиот парламентарен комитет-Република Македонија и Европска унија и Националниот совет за евроинтеграции.

Постапката за донесување на новите законски измени почна на 14 јули минатата година, со првата јавна дебата, а оттогаш се одржа уште една дебата и низа консултации. Владата на 20 февруари годинава ја усвои конечната верзија, која потоа ја испрати до Собранието.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Како образовниот систем да се справи со предизвикот на медиумската писменост


Скопје, 22 февруари, 2018 - 16:33 (META) 

На полето на медиумска писменост во образованието се работи, но недоволно и несистематски, беше заклучокот од конференцијата со наслов „Медиумската писменост во Македонија: во или вон образованието“, која се одржа денес во Скопје во организација на Високата школа за новинарство и односи со јавноста.

Едукацијата за медиумската писменост е неопходна во основното и средното образование во земјава, но прашањето е како таа да се постави во рамките на образовниот систем, при што се појавуваат многу пречки кои бараат заедничка акција за нивно надминување.

Проблеми има со едукација на самите наставници, потоа како предизвик се појавува и фактот што во многу училишта се работи во две смени, така што тие се среќаваат со недостиг на простор во кој на оваа тема би се работело после часовите, евентуално како дел од факултативната настава.

На конференцијата се дискутираше и за тоа, дали таа да биде посебен предмет или не, и беше посочено дека во часовите по македонски јазик веќе се зачнуваат и теми од медиумската писменост, со цел на учениците да им се помогне во справувањето со лажните вести и политичките манипулации кои секојдневно се појавуваат во медиумите.

Сепак, се смета дека технологијата, која денес е достапна и на располагање како никогаш досега, ќе биде од голема помош во медиумското описменување и во рамките и надвор од образовниот процес, а беше презентирана и Стратегијата за образование 2018-2025, која треба да даде насоки како ќе се одвива медиумската писменост во образовниот процес.

Сите овие прашања ги расправаа професори и наставници, како и претставници од Министерството за образование и наука, Бирото за развој на образованието, Канцеларијата на Европската унија во Скопје, како и претставници од невладиниот сектор и од медиумите.

На конференцијата беа промовирани и иницијативите на ова поле како што се Коалицијата за медиумска писменост и Мрежата за медиумска писменост, во која членуваат редица невладини организации и која работи со поддршка на Агенцијата за аудио и аудио и медиумски услуги (АВМУ).

За тоа како граѓанскиот сектор во Велика Британија работи на полето на медиумската писменост говореше Лидиа Ел Кури од Институтот за различности во медиумите до Лондон, а беа претставени локални и медиумски иницијативи на овој план.


ААВМУ мора да се трансформира во вистински независен регулатор


Скопје, 22 февруари, 2018 - 15:20 (META) 

Агенцијата за аудио и аудиовизуелни медиумски услуги (ААВМУ) мора да стане вистинско независно регулаторно тело за медиумите, со право да носи политики, и без какво било мешање на Собранието на Република Македонија и Владата, порача Дејан Георгиевски, извршен директор на Центарот за развој на медиуми на денешната презентација на петтиот мониторинг извештај за работата на ААВМУ и Агенцијата за електронски комуникации (АЕК).

Извештајот е заеднички проект на Евротинк – Центар за европски стратегии, НВО Инфоцентар, Транспарентност Македонија и Хелсиншкиот комитет за човекови права.

– Владата го усвои предлог-законот за медиуми и започната е трансформацијата на регулаторното тело од претставничко до мало професионално експертско тело, но таа трансформација е далеку од завршена. Потреба е да се добие вистинско независно регулаторно тело. Агенцијата, со своите ограничени надлежности, не е тоа во моментот. Таа не е носител на политики во моментот. Треба да се отстрани можноста за парламентот и владата директно да влијаат на прашања како распределба на дозволи и фрекфенции – рече Георгиевски.

Според Билана Бејкова од НВО Инфоцентар, која ги претстави резултатите од кварталниот мониторинг на ААВМУ за периодот октомври-декември, не е реализирана подготовката на петгодишната стратегија и наместо тоа била ставена како приоритет за првата половина на 2018. Генерално, рече Бејкова, ААВМУ го продолжила трендот на проактивен однос кон темите од јавен интерес и обезбедила солидно ниво на транспарентност и отчетност.

Зоран Трајчевски, директорот на ААВМУ, во дебатата по презентацијата ја стави под знак прашање експертизата на составувачите на извештајот. Наспроти критиките што беа кажани тој го прочита и заклучокот на ОБСЕ/ОДИХР дека во врска со изборите ААВМУ професионално ги извршила своите преземени обврски.

За Горан Лазаров, од Евротинк, кој е координатор на мониторингот за АЕК останува отворено прашањето за „донацијата“ на АЕК на ЈСП за Панорамското тркало. Евротинк трипати барале отчет од ЈСП Скопје, но не добиле конкретен одговор освен дека ЈСП ги чува финансиските средства на посебна банкарска сметка и дека истите не се целосно потрошени, како и дека ќе се искористат исклучиво за таа намена.

Најголема ставка во буџетот е за изградба на радиодифузната кула на Водно, а втора најголема се плати за вработените кај која не забележано значителна промена.

Петиот извештај е изработен од четирите организации во рамките на проектот „Мониторинг на ефикасноста, ефективноста, транспарентноста и одговорноста на регулаторните тела за медиумите – PROformance Watch“.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Владата го усвои Предлог-законот за аудио и аудиовизуелни медиумски услуги


Скопје, 20 февруари, 2018 - 14:48 (META) 

Владата на Република Македонија на својата 55-та седница попладнево го усвоила Предлог-законот за изменување и дополнување на Законот за аудио и аудиовизуелни медиумски услуги (АВМУ), извести на Твитер-профилот портпаролот на Владата, Миле Бошњаковски.

Сега Предлог-законот ќе биде испратен во Собранието, каде следува расправа, а потоа и негово изгласување.

Во прашање е четвртата верзија на предлог-законот, која Министерството за информатичко општество и администрација ја објави во четвртокот.

Постапката за донесување на новите законски измени почна на 14 јули минатата година, со првата јавна дебата, а оттогаш се одржа уште една дебата и низа консултации. Како што вели Министерството, во текстот се внесени и коментарите добиени на Единствениот национален електронски регистер (ЕНЕР) за претходната работна верзија, објавена на 4 ноември минатата година.

„Исто така, во објавената верзија на Законот, имплементирани се коментарите добиени од Европската Комисија и Канцеларијата на ОБСЕ“, вели МИОА.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


АВМУ бара на новинарите да им се овозможи непречено вршење на работата


Скопје, 2 февруари, 2018 - 20:43 (META) 

Агенцијата за аудио и аудиовизуелни медиумски услуги укажува на неопходноста новинарите да можат непречено да си ја вршат својата работа, особено кога станува збор за прашања од посебен јавен интерес како реакција на вчерашната ситуација кога новинар на „ТВ 21“ бил попречен да постави прашање на прес-конференција во Министерството за надворешни работи.

„Улогата на медиумите и отвореноста на институциите кон нив е од клучно значење во современите демократски општества бидејќи само на тој начин се овозможува отворање и учество во пошироки јавни дебати, слободно создавање на јавното мислење и формирање критички ставови“, велат од АВМУ.


Промовирано ДВД за медиумска писменост наменето за основните училишта


Скопје, 25 јануари, 2018 - 15:43 (META) 

Во Агенцијата за аудио и аудио-визуелни и медиумски услуги (АВМУ) денеска се промовираше ДВД кое вклучува нагледни и едукативни материјали на тема медиумска писменост, а е наменето за основните училишта во Македонија.

Во ДВД-то има содржини изработени од невладини организации како Високата школа за новинарство и односи со јавноста, Македонскиот институт за медиуми, Фондацијата „Метаморфозис“ и други, но и содржини изработени од државни институции како АВМУ и Народниот правобранител.

Директорот на АВМУ, Зоран Трајчевски, рече дека со ова наставниците ќе добијат пишани и аудио-видео материјали кои ќе можат да ги користат како нагледни средства, со што медиумската писменост посуштински влегува во основните училишта.

ДВД-то е изработено во рамките на Македонската мрежа за медиумска писменост во која членуваат невладини и образовни организации, како и државни институции. Покрај на македонски, дел од содржините се и на албански, турски, српски, бошњачки, ромски и влашки јазик.

ДВД-то е одобрено од Бирото за развој на образованието и од Министерството за образование и наука за употреба во основните училишта, така што најголем дел од тиражот од 2.000 примероци ќе биде доставен токму до училиштата како материјал за користење во наставата.